Ne míele nɔnɔme sesẽ aɖe me tom eteƒe didia, dzi ate ŋu aɖe le mía ƒo bɔbɔe. David nya be ale si Fia Saul nɔ ye yome tim la nu ava yi gbe ɖeka, eye yeava zu fia abe ale si Yehowa do ŋugbe ene. (1Sa 16:13) Xɔse si nɔ David si la kpe ɖe eŋu wòlala dzigbɔɖitɔe kpɔ Yehowa sinu.

Ne nɔnɔme sesẽ aɖe va mía dzia, míate ŋu adze aɖaŋu, azã míaƒe susu alo tamebubu ŋutete atsɔ awɔ nane tso nɔnɔmea ŋu. (1Sa 21:12-14; Lod 1:4) Gake kuxi aɖewo gakpɔtɔ nɔa anyi kokoko togbɔ be míezɔ ɖe Biblia ƒe mɔfiamewo dzi wɔ nu sia nu si míate ŋui hã. Ne edzɔ alea, ele be míagbɔ dzi ɖi akpɔ Yehowa sinu. Madidi o, Yehowa aɖe míaƒe fukpekpewo katã ɖa eye “atutu aɖatsi sia aɖatsi” ɖa le míaƒe ŋkuwo me. (Nyɖ 21:4) Eɖanye Yehowae kpɔ kuxi aɖe gbɔ na mí alo nu bubu aɖee na kuxia nu yi o, nyateƒeae nye be: Míaƒe kuxiwo katã nu ayi gbe ɖeka. Esia nyanya ate ŋu ana míaƒe dzi nadze eme.

MIKPƆ VIDEO SI NYE YEHOWA ƑE AMEWO WƆ ÐEKA LE DUKƆ SI ME MAMA XƆ AƑE ÐO LA ME, EYOME MIAÐO BIABIA SIAWO ŊU:

• Kuxi kawo mee nɔvi siwo nɔ anyiehe Amerika to?

• Aleke woɖe lɔlɔ̃ kple dzigbɔɖi fia?

• Aleke woyi edzi tsɔ “nu siwo le vevie wu la” ɖo nɔƒe gbãtɔ?—Flp 1:10