Ŋkuléle Ðe Xexeame Ŋu

Wogbe Yesutɔwo Dede Agbalẽ Me le Russia

National Catholic Reporter ka nya ta be Russiatɔwo ƒe Dziɖuɖua ƒe Dɔwɔƒe si Kpɔa Senyawo Gbɔ meda asi ɖe Yesu Habɔbɔ ƒe biabia be woade yewo agbalẽ me yewoanye subɔsubɔha si le eɖokui si la dzi o. Woɖo Yesu Habɔbɔ, si woyɔna kpuie ko be Yesutɔwo le ƒe 1540 me. Le Russia ƒe subɔsubɔhawo ŋuti se yeyea me la, ele be woade subɔsubɔha akpa gãtɔ agbalẽ me hafi se naɖe mɔ na wo woawɔ dɔ. Ƒuƒoƒo siwo wogbe be womade wo agbalẽ me o mate ŋu ata mawusubɔsubɔgbalẽwo alo ama wo, akpe dutatɔwo hena mawusubɔsubɔdɔwo alo aɖo hehenaƒewo o. Wode Yehowa Ðasefowo agbalẽ me le dukɔa me le April 29, 1999 dzi.

Ameɖokuiwuwu Le Dzi Yim le Japan

Nyadzɔdzɔgbalẽ si nye The Daily Yomiuri ka nya ta be amewo wu wo ɖokui le ƒe 1998 me le Japan wu ƒe ɖesiaɖe si va yi me. Japan ƒe Kpovitɔwo ƒe Dɔwɔƒegã gblɔ be ame 32,863 ye wu wo ɖokui le ƒe 1998 me—si sɔ gbɔ wu amesiwo ku le lɔri fɔkuwo me le Japan zi gbɔ zi etɔ̃. Wogblɔ be dzidziɖedzia ƒe akpa gãtɔ tso gakuxi si dɔwɔɖuimanɔanyi si va dukɔa me esime ganyawo yi to nyitsɔ laa la gbɔ. Ameɖokuiwuwue nye nu adelia si wua ame wu le Japan.

Ðiƒoƒo Ya si Ate Ŋu Awu Ame

Reuters nyatakaha ka nya ta be, “dzudzɔ si dona tso ʋuwo me nye nusiwo ƒoa ɖi ya la dometɔ si le dzi yim wu le Europa, eye le dukɔ aɖewo me la, amesiwo ɖiƒoƒo ya sia wuna la sɔ gbɔ wu amesiwo kuna le lɔri fɔkuwo me.” Numekuku aɖe si Xexeame ƒe Lãmesẽhabɔbɔ wɔ ɖee fia be gbɔgbɔtsixe alo dzidɔ siwo tsoa ɖiƒoƒo ya me naa ame 21,000 kua kukpo le Austria, France, kple Switzerland ƒe sia ƒe. Le nyatakaka bubu me la, wobu akɔnta be ɖiƒoƒo ya naa ame 110 kua kukpo le India dugã 36 me.

Nyaléle Ðe Mɔ̃ Dzi le Bubum

Ƒe gbogbo aɖewoe nye esia si dzɔdzɔmeŋutinunyalawo gblɔ be nyatakakawo léle ɖe mɔ̃ dzi nyo wu wo ŋɔŋlɔ ɖe agbalẽ dzi. Gake fifia, agbalẽdzraɖoƒedzikpɔlawo kple amesiwo kpɔa nuŋlɔɖi xoxowo dzi le susu bubu dom ɖa. Newsweek magazine gblɔ be, “mɔ̃wo ƒe gbegblẽ alo woƒe xoxododo le ewɔm be míele dzɔdzɔmeŋutinunya kple ŋutinya me nyatakaka gbogbo aɖewo bum.” Kɔmpiuta gba siwo dzi woléa nyatakakawo ɖo medina dzoxɔxɔ, ɖi, yaƒoƒo, kple teƒe siwo ganuwo le o. Azɔ magazinea gblɔ be le teƒe si wodzrae ɖo nu la, kɔmpiuta gba siwo dzi woléa nya ɖo manɔ anyi wòadidi wu ƒe ewo o. Kuxi bubu si dze ŋgɔ amesiwo le agbagba dzem be yewoalé nyatakakawo léle ɖe kɔmpiutagbawo dzi me ɖe asie nye alesi mɔ̃ɖaŋununya le tɔtrɔm kabakabae. Mɔ̃ɖaŋu si wotsɔ léa nyawo ɖe kɔmpiuta dzi trɔna kabakaba, ale be medidina hafi xoxoawo zua tsigãdzinuwo o. Abby Smith si wɔa dɔ le Agbalẽdzraɖoƒe Kple Nyatakakawo Ŋuti Dɔwɔƒe gblɔ be: “Womate ŋu adzra nyatakakawo ɖo o, negbe ɖe wolé wo ɖe agbawo kple kɔmpiutawo dzi.”

Indiatɔwo ƒe Agbɔsɔsɔme Gbɔ Biliɔn Ðeka Ŋu

Dukɔ Ƒoƒuawo ƒe Dɔwɔƒe si Kpɔa Amewo ƒe Agbɔsɔsɔme gbɔ gblɔ be Indiatɔwo ƒe agbɔsɔsɔme gbɔ biliɔn ɖeka ŋu le August 1999 me. Le ƒe 50 si va yi ko me la, Indiatɔwo ƒe agbɔsɔsɔme nɔ alesi wòle fifia memama etɔ̃ teƒe ɖeka ko. Ne woƒe dzidziɖedzi si nye 1.6 le alafa me le ƒe ɖeka me akpɔtɔ ayi edzi nenema la, kaka wòade ƒe blane la, India agbɔ China ŋu ava zu dukɔ si me tɔwo sɔ gbɔ wu ɖesiaɖe le xexeame. The New York Times ka nya ta be: “India kple Chinatɔwo ƒe agbɔsɔsɔme sɔ gbɔ wu amesiwo le xexeame katã ƒe memama etɔ̃ teƒe ɖeka xoxo.” Le ƒe blane vɔ nanewo ko me la, amewo ƒe agbenɔƒe yi dzi le India tso ƒe 39 va ɖo ƒe 63.

Srɔ̃ɖeɖe le Ðiɖim le United States

Numekuku aɖe si wowɔ le Rutgers Yunivɛsiti ƒe Srɔ̃ɖeɖe Ŋuti Nusrɔ̃ƒe si dze le The Washington Post ƒe nyatakakadiƒe le internet dzi ɖee fia be srɔ̃ɖeɖe ɖiɖi le United States fifia wu ɣeyiɣi ɖesiaɖe le ŋutinya me nuŋlɔɖiwo me. Numekukua de dzesii hã be le xexemeʋa II megbe teti la, ɖevi siwo nɔ dukɔa me la dometɔ 80 le alafa me ƒe dzilawo ŋutɔŋutɔe nɔ wo nyim. Gake egbea la, xexlẽmea ɖiɖi va ɖo 60 le alafa me. Numekukua gblɔ be le ƒe blave siwo va yi me la, nyɔnuvi ƒewuivi siwo gblɔ be gbɔmeya vi dzidzi ‘nyo’ la dzi ɖe  edzi tso alafa memama 33 va ɖo 53. Mewɔ nuku o be numekukua gblɔ be: “Srɔ̃ɖeɖoɖoa ɖo afɔku gã aɖe me”!

Sukudede Ðo Afɔku Me le Afrika

Nyatakakadɔwɔƒe si nye All Africa News Agency ka nya ta be ɖevi siwo wu miliɔn 40 siwo wòle be woayi suku le Afrika ƒe akpa si te ɖe Sahara ƒe anyiehe ŋu mele suku dem o. Kuxi geɖewo le fu ɖem le nutoa ƒe sukudeɖoɖowo me. Le kpɔɖeŋu me, le ganyawo ƒe sesẽ ta la, tsi mele suku geɖe si o, eye afɔdzideƒe ʋɛ aɖewo koe le ɖewo si alo mele wo si kura o. Agbalẽ siwo woaxlẽ meli o, eye womenaa hehe nyui aɖeke nufialawo o. Tsɔ kpe ɖe gakuxiwo ŋu la, nyɔnuvi ƒewuivi geɖe fɔa fu, eye eya koŋ ye wɔnɛ be wo dometɔ akpa gãtɔ medea suku wua enu o. AIDS hã gblẽ nu le suku dede ŋu. Africa News gblɔ be: “Alesi ƒewuiviwo ƒoa wo ɖokui ɖe gbɔdɔdɔ me kaba wɔe be woxɔa AIDS dɔlélea ŋutɔ.” Le nɔnɔme aɖewo me la, wobiana tso nyɔnuvi siwo mexɔ AIDS o la si be woanɔ aƒeme akpɔ ƒometɔ siwo xɔ dɔa gbɔ. Ðk. Edward Fiske si nye Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnu Nyawo Gbɔkpɔha ƒe teƒenɔla si bi ɖe nufiafia le gɔmedzesukuwo me la gblɔ be: “Ne womede suku o la, ade Afrika dukɔ siwo te ɖe Sahara ƒe anyiehe ŋu la ƒe etsɔme afɔku me.”

Wokpɔ Afɔbidɛ Wɔwɔe le Amekuku Ƒuƒu Ŋu

London ƒe The Sunday Times ka nya ta be: “Afɔbidɛ wɔwɔe aɖe si wokpɔ le amekuku ƒuƒu aɖe ŋu la dze abe ɖe amea zãe le eƒe agbenɔɣi hafi woɖii kplii ƒe 2,500 enye si va yi ene.” Ðk. Nicholas Reeves ɖɔ afɔbidɛ wɔwɔea si wotsɔ aklala si me wotsɔ lãmi kple akalo dee la be enye “nuwɔwɔ si de ŋgɔ, wowɔe wònya kpɔ, wowɔe aɖaŋutɔe wòsẽ, eye edze ƒã be ɖe wodɔe koŋ wowɔ.” Wokpɔ fe le afɔbidɛa ŋu eye wosi ami si ɖi amegbetɔ ƒe ŋutigbalẽ ɖe eŋu. Woɖe do suesue enyi ɖe afɔbidɛa ŋu be nu nate ŋu alé ɖe eŋu. Woɖe doawo wòsɔ kple atokota si dzi kawo sɔ kple Y ƒe dzedzeme, ale be ne edo atokotaa la, eƒe ka naxe doawo dzi.

Taɖuame Siwo Tsoa Vevesesenutsitikewo Zazã Me!

Anɔ eme be dɔléle si nye atike mazãmazã nyuie ƒe taɖuame (MMH) le amesiwo noa taɖuametikewo zi etɔ̃ alo wu nenema le kwasiɖa ɖeka me la ŋu. Wobui be MMH anɔ ame 1 le 50 me ŋu, eye nusi henɛ vɛ enye atike tsɛwo abe aspirin, kple vevesesenutsitike siwo ɖɔktawo nana la zazã. Ne atikea wɔ dɔ vɔ la, ate ŋu ana dɔnɔa nase taɖuame ŋkɔ, eye wòatsɔe vodadatɔe be enye taɖuame dzro alo asrã aɖe ko. Dɔnɔa agano vevesesenutsitike bubuwo, si anɔ nyaa gblẽm ɖe edzi. Ðk. Tim Steiner, si le Imperial College, London, ɖe nu me be “ele be woabu dɔnɔ ɖesiaɖe si ta ɖuna gbesiagbe la be MMH le eŋu.” Egagblɔ kpee le London ƒe The Sunday Telegraph me be togbɔ be wode dzesi nɔnɔme sia ƒe aɖewoe nye sia hã la, ƒome ɖɔkta geɖe menya nu tso eŋu nyuie o, eyata ɖeko woŋlɔa vevesesenutsitike siwo nu sẽ wu na dɔnɔawo, evɔ nusi hiã koe nye be woadzudzɔ wo zazã hafi.

Beléle Na Aɖe

Nyadzɔdzɔgbalẽ si nye Prince George Citizen me nyatakaka aɖe gblɔ be nugbagbevi suesue siwo ɣlana ɖe wò aɖe gɔme ate ŋu adzi aɖinu siwo ana wò nume naʋẽ. Nyatakakaa gblɔ be: “Nugbagbevi suesuewo nɔa teƒe ɣaɣla, siwo ya mele o, eye eyatae wonɔa teƒe ɣaɣla siwo ya si míegbɔna yia míaƒe dzitodzitowo me metona o.” Numekɔklɔ kple aɖutɛme ɖeɖe ate ŋu ana wòaka ɖe eme, gake nugbagbevi suesuewo 25 le alafa me koe numekɔklɔ ate ŋu aɖe ɖa. Aɖutikewɔla Allan Grove xɔe se be Europatɔwo ƒe blema kɔnu si nye aɖe dzi haha ye nye “nu vevitɔ kekeake si nàte ŋu awɔ be wò nume nagaʋẽ o.” Nyadzɔdzɔgbalẽ si nye Citizen gblɔ be “aŋenu zazã atsɔ aha aɖea dzie nyo sasasã wu aɖuklɔnu, bene aɖea dzi nanɔ dzadzɛ ahabiã alesi dze.”

Ŋku Yeye aɖe na Yamenutome

Didiƒekpɔmɔ̃ si wona ŋkɔe be Gemini North, si le Mauna Kea, Hawaii, dze xexeame katã kpɔkpɔ gɔme le June 1999 me. London ƒe nyadzɔdzɔgbalẽ si nye Independent ka nya ta be eƒe ahuhɔ̃e si xɔa keklẽ si ƒe kekeme nye afɔ 26.5 akpe ɖe ɣletiviŋununyalawo ŋu woakpɔ nu suetɔ kekeake le didiƒe ʋĩ le yamenutowo me. Gemini North kpakple Hubble didiƒekpɔmɔ̃ si le yamenutome kple evea siaa kpena ɖe ɣletiviŋununyalawo ŋu wokua nu me le tsã ɣeyiɣiwo ŋu ale be “wokpɔa nusiwo dzɔ xoxoxo va yi.” Nusi nyo le Hubble didiƒekpɔmɔ̃a ŋue nye be ele yamenutome. Togbɔ be anyigbae Gemini le hã la, ezãa kɔmpiuta mɔ̃ɖaŋu tsɔ kɔa ɖiƒoƒo siwo le yame la me eye wòɖea foto wòdzena nyuie abe esiwo Hubble ɖena ene—alo wui gɔ̃ hã.