Tɔmanɔsiƒomewo—Kuxia Nu Tsitsi Kuraa

NE NƆNƆMEA ayi edzi abe alesi wòle fifia ene la, eteƒe madidi o tɔmanɔsiƒomewo ava zu nusi dzi woada asi ɖo. United States ƒe Lãmesẽnya Kple Kpekpeɖeŋunana Dɔwɔƒe ƒe nyatakaka aɖe gblɔ be: “Ðevi siwo dzilaɖekɛwo nyi medzea agbagba le suku o, woƒe nuwɔna meɖɔa ʋu o, eye woawoe dɔmavɔleameŋu kple tagbɔdɔwo ɖea fu na wu. . . . Ðeviwo nyinyi le vidadaɖekɛƒomewo me wɔnɛ be afɔku gã siwo nye ƒewuiviwo ƒe vidzidzi, sukumademade, [kple] gamenɔnɔ dzina ɖe edzi bobobo.”

Eyata mewɔ nuku o be hadomegbenɔnɔ ŋuti nunyalawo, ƒomeɖaŋuɖolawo, nufialawo, kple dunyahelawo gɔ̃ hã le mɔ siwo dzi woato atsi nɔnɔme gbegblẽ sia nu dim vevie. Wowɔ ŋutsuwo ƒe takpekpe gãwo be woatsɔ ate gbe ɖe asixɔxɔ si le vifofonyenye ŋu la dzi eye be woaɖo kpe ŋutsuwo ƒe vevienyenye le ƒomea me dzi. Vifofonyenye ŋuti gbalẽwo bɔ ɖe agbalẽdzraƒewo. Woɖe afɔwo gɔ̃ hã be woazi vifofowo dzi be woatsɔ woƒe agbanɔamedziwo. Le United States la, ʋɔnudrɔ̃lawo bua fɔ “vifofo siwo gbe wo viwo dzi kpɔkpɔ,” woƒoa nu tsia tre ɖe wo ŋu le television dzi numedzodzrowo me, eye wodoa ŋukpe wo le dutoƒo gɔ̃ hã. Gake afɔɖeɖe mawo meɖe vi boo aɖeke o.

Egbɔkpɔmɔnu Bɔbɔewo

Egbɔkpɔmɔnu bɔbɔewo hã ate ŋu ahe emetsonu madeamedziwo vɛ nenema ke. Le kpɔɖeŋu me, nyɔnu si ŋu woɖe asi le ate ŋu agbugbɔ aɖe srɔ̃ kaba, kple susu be yeadi fofo yeye na ye viwo. Gake togbɔ be viɖewo ate ŋu anɔ srɔ̃gbugbɔgaɖe me hã la, ate ŋu ahe kuxiwo hã vɛ. Esesẽna na ɖeviwo ɣeaɖewoɣi be woaxɔ ame bubu aɖe awɔ wo fofoe. Ɣeaɖewoɣi la wogbea lɔlɔ̃ ɖe edzi gbidii. Numekuku aɖe ɖee fia be “ɖetugbi siwo nɔ dzila vixɔnyila gbɔ ƒe agbɔsɔsɔme si ade eve le etɔ̃ me kloe ʋuna le aƒeme hafi xɔna ƒe 19 . . . ne míetsɔe sɔ kple ɖetugbi siwo le wo dzilawo ŋutɔŋutɔ gbɔ siwo dometɔ 50 le alafa me ʋuna doa ŋgɔ na ƒe 19 xɔxɔ.” Le atikɔmeƒome kpɔdzidzedzewo me gɔ̃ hã la, ɣeaɖewoɣi ƒe geɖe va yina hafi ɖeviawo xɔa vifofo vixɔnyila la alesi dze. *

Nenema ke ƒewuiviwo ƒe fufɔfɔkuxia gbɔkpɔmɔnu bɔbɔe aɖeke meli o. Le kpɔɖeŋu me, fuɖeɖe nye dada le Mawu ƒe se dzi eye ebia be ɖetugbi nasẽ ŋuta le vidzĩ si le tsitsim le eƒe ƒodo me ŋu. (Mose II, 20:13; 21:22, 23; Psalmo 139:14-16; tsɔe sɔ kple Yohanes I, 3:17.) Aleke wɔ esia made seselelãmebiwo ame ŋu o? Vitsɔtsɔna woaxɔ anyi dzena na ame geɖe abe nɔnɔmea gbɔ kpɔmɔnu si me nublanuikpɔkpɔ dze  le wu ene, gake eya hã ate ŋu ade seselelãmebiwo ame ŋu—vidada kple via siaa ŋu.

Nɔnɔmea gbɔ kpɔmɔnu bɔbɔewo mate ŋu atsi tɔmanɔsiƒomewo ƒe kuxia nu o, kura o. Woate ŋu atsi egbegbe ƒome ƒe nɔnɔme madeamedziwo nu ne amewo alɔ̃ awɔ tɔtrɔ gãwo le woƒe tamebubu, woƒe nɔnɔmewo, woƒe nuwɔna, kple woƒe agbenɔnɔwo ŋu. Nane si de ŋgɔ wu nuƒo wɔdɔɖeamedzi kple susuŋutinunya siwo bɔ la hiã hafi wòaʋa amewo be woawɔ tɔtrɔ sesẽ mawo. ‘Nu deŋgɔ’ ma le Mawu ƒe Nya, Biblia me. Ne èbu eŋu kpɔ la, Mawu ŋutɔe nye ƒome ƒe nuɖoanyia gɔmeɖoanyila. (Efesotɔwo 3:14, 15) Enya nusi hiã ɖeviwo nyuie wu ame bubu ɖesiaɖe.

Biblia ƒe Gɔmeɖosewo Kpena Ðe Ƒomewo Ŋu Wokpɔa Dzidzedze

Gake ɖe Biblia ate ŋu akpe ɖe ɖevi siwo wo dzilawo gblẽ ɖi la ŋu ŋutɔŋutɔa? Ðe womegblẽ tso eme oa? Kura o! Le nyati sia ƒe gɔmedzedze la, míeyɔ United States dziɖuɖua ƒe nyatakaka aɖe si gblɔ afɔku siwo dzea ŋgɔ ɖevi siawo la dometɔ geɖe. Le ŋkubiãnya siawo megbe hã la, woƒo nyatakakaa ta ale: “Togbɔ be kpeɖodzia li kɔte be tɔmanɔsitɔnyenye ate ŋu ahe afɔku gãwo vɛ hã la, numekukua ɖee fia hã be ɖevi siwo le dzilaɖekɛƒomewo me dometɔ akpa gãtɔ tsina nyuie.” Ẽ, woate ŋu atsi nusiwo tɔmanɔsitɔnyenye gblẽna le ame ŋu la nu alo ne mede ɖeke o la, woaɖe wo dzi akpɔtɔ. Esia le nenema vevietɔ ne wowɔ Biblia me gɔmeɖosewo ŋudɔ le vinyinyi me.

Esia bia agbagbadzedze geɖe le dzilaɖekɛa gome—si nye agbanɔamedzi si adze le gɔmedzedzea me abe nusi awu tsɔtsɔ na ame ene. Gake ne nɔnɔme sia mee nèle la, àte ŋu asrɔ̃ ŋuɖoɖo ɖe Yehowa Mawu ŋu bliboe. (Lododowo 3:1, 2) Nyɔnu Kristotɔ siwo nɔ anyi le Biblia ƒe ɣeyiɣiwo me dometɔ aɖewo nɔ nɔnɔme sesẽ, siwo me ahosinyenye hã nɔ me. Biblia gblɔ tso ame mawo tɔgbe ŋu be: “Nyɔnu, si nye ahosi vavã, eye ame aɖeke meli nɛ o la, tsɔa eƒe mɔkpɔkpɔ ɖoa Mawu dzi, eye wònɔa kukuɖeɖewo kple gbedodoɖawo dzi zã kple keli.” (Timoteo I, 5:5) Ðo ŋku edzi be Yehowa yɔ eɖokui be “tsyɔẽviwo fofo.” (Psalmo 68:6) Kakaɖedzi nenɔ mewò be ada megbe na nyɔnu si vɔ̃a Mawu le eƒe agbagba siwo dzem wòle be yeanyi viawo me.

Aƒeme Biblia nusɔsrɔ̃ wɔwɔ kple viwòwo nye mɔ vevi aɖe si dzi nàto akpe ɖe wo ŋu woatsi ava zu ame tsitsi siwo awɔ nu wòada asɔ. (Mose V, 6:6-9) Le Yehowa Ðasefowo dome la, dzilaɖekɛ geɖe zãa Biblia-srɔ̃gbalẽ siwo ŋu wotrɔ asi le koŋ na sɔhɛwo, abe Questions Young People Ask—Answers That Work ene. * Nyatakaka siwo le eme akpe ɖe sɔhɛwo ŋu woatu agbenɔnɔ ƒe dzidzenu siwo ate ŋu akpe ɖe wo ŋu be womawɔ vodada siwo wo dzilawo wɔ va yi o ɖo. Ne ɖeviwo va nya Yehowa Mawu la, woate ŋu ava nɔ sidzemee be dziƒo Fofo aɖe si tsɔa ɖe le eme na yewo vevie la le yewo si. (Psalmo 27:10) Esia ate ŋu akpe ɖe wo ŋu be woanɔ te ɖe alesi wosena le wo ɖokui me be wogblẽ yewo ɖi la nu. Nyɔnuvi Britaintɔ aɖe si dzilawo dome ma ɖo ŋku edzi be: “Le wo katã me la, Dada ƒã alesi wòhiã be mado gbe ɖae kple dziɖoɖo ɖe  Yehowa ŋu bliboe ɖe menye. Ema kpe ɖe mía ŋu míenɔ te ɖe nɔnɔmeawo nu.”

Nana Be Dzila Kple Ðevi Dome Kadodoa Nanɔ Anyi

Biblia gblɔe kɔte be ele be ɖevi nabu dadaa kple fofoa siaa. (Mose II, 20:12) Eye srɔ̃gbegbe metsoa fofo kple vi ƒe kadodoa me o. Togbɔ be anɔ eme be srɔ̃ŋutsu xoxoa maganɔ aƒea me o hã la, ɖeviawo ate ŋu ayi edzi anɔ ƒomedodo kplikplikpli me kplii. * Kuxia ye nye be anɔ eme be vidadaa ado dziku ɖe eŋu eye eƒe tete ɖe ɖeviawo ŋu ave dɔme nɛ. Aleke vidada ate ŋu anɔ te ɖe seselelãme sia nui?

Biblia na nuxlɔ̃ame nyui aɖe be: “[Kpɔ nyuie be] dɔmedzoe megaflu wò nayi fewu ɖu ge o . . . Kpɔ ɖokuiwò dzi nyuie! Megatrɔ ɖe yakanu ŋu o.” (Hiob 36:18-21) Nyateƒee, mele bɔbɔe be nàƒo nu nyui tso ame aɖe si wɔ nuvevi wò alo gblẽ wò ɖi la ŋu o. Gake bia ɖokuiwò se be: ‘Ðe nyɔnuvi ate ŋu ava ka ɖe ŋutsu dzi ne wogblɔa alesi gbegbe fofoa vɔ̃ɖie ŋu nya nɛ ɣesiaɣia? Ðe ŋutsuvi ate ŋu ava tu ŋutsu ƒe nɔnɔme nyuiwo ɖo ne wogblɔna nɛ be, “Èto fofowò ƒe ʋe me” tsɔ doa vloea? Ðe nukpɔsusu nyui ava nɔ ɖeviwo si ɖe ŋusẽ ŋu ne wofiana wo be woada wo fofo ɖe anyi alo wogbena na wo be woagate ɖe eŋu kura oa?’ Eme kɔ ƒã be, gbɔɖiɖi ƒomedodo si anɔ viwòwo kple wo fofo dome gblẽa nu.

Ðewohĩ awɔ mo yaa na wò be nànya be Biblia metsi tre ɖe dzikudodo le dzɔdzɔenyenye me ŋu o. Biblia gblɔ be: “Mibi dzi, eye migawɔ nuvɔ̃ o.” (Efesotɔwo 4:26) Menye dzikudodoe nye nuvɔ̃a o, ke nana be “dziku, dɔmedzoe, nu tovo wɔwɔ, busunyagbɔgblɔ” nakpɔ ŋusẽ ɖe ame dzie. (Kolosetɔwo 3:8) Eyata tsri ‘vifofo dzudzu’ le ɖeviwo ŋkume. Ne èkpɔ be ehiã be yeaƒo nu tso yeƒe dziɖeleameƒowo ŋu la, ke wɔ ɖe Biblia ƒe aɖaŋuɖoɖo be nàgblɔ wò “nuxaxa le dzi me” na ame aɖe la dzi, gake gblɔe na ame bubu ke menye viwòwo o—ɖewohĩ xɔ̃wò aɖe si dzi nèka ɖo. (Lododowo 12:25) Dze agbagba nàna nukpɔsusu nyui nanɔ asiwò eye nàtsri nusiwo dzɔ va yi ŋu bubu akpa. (Nyagblɔla 7:10) Ewɔwɔ alea ate ŋu akpe ɖe ŋuwò ŋutɔ le wò dziku dzi ɖuɖu me.

Mlɔeba la, ɖo ŋku edzi be Biblia de se na ɖevi be wòabu fofoa—ne fofoa meɖoa kpɔɖeŋu nyui o gɔ̃ hã. (Efesotɔwo 6:2, 3) Eyata kpe ɖe viwòwo ŋu be nukpɔsusu si sɔ nanɔ wo si le wo fofo ƒe gbɔdzɔgbɔdzɔwo ŋu. Ðetugbi aɖe si tsi le aƒe si me ma me gblɔ be: “Esi metsɔ nukpɔsusu si dze kpɔ fofonyee—be enye amegbetɔ madeblibo si ŋu vodada le la—eƒe nu megavea dɔ me nam azɔ o.” Ne ède dzi ƒo na viwòwo be woabu wo fofo la, àkpe ɖe wo ŋu be woatu nukpɔsusu si sɔ le ŋusẽ si le asiwò abe dzila ene ŋu ɖo!

Azɔ hã ele vevie be màgagblẽ bubu si viwòwo ade ŋuwò la me o. Wogakpɔtɔ le wo ‘dada ƒe nufiame’ te. (Lododowo 1:8) Ŋutsuviwo ate ŋu ase le wo ɖokui me be agba wu yewo ne wokpɔa wo sinu be ‘woatsɔ ƒomea ƒe ta ƒe agbanɔamedziwo.’ Nenema ke nyɔnuviwo hã atɔtɔe ne wozu amesi wo dada toa eƒe nyawo na. Ehiã be nàna kakaɖedzi ɖeviawo be ye si nye wo dzilae akpɔ wo dzi—menye woawoe akpɔ  ye dzi o. (Tsɔe sɔ kple Korintotɔwo II, 12:14.) Kakaɖedzi nana wo alea ate ŋu ana woase le wo ɖokui me be yewole dedie, togbɔ be nɔnɔmea made dzi ƒo tututu le woƒe ƒomea me o hã.

Vifofo Teƒenɔlawo

Ke ne vifofoa mele ƒomea me kura o ɖe? Eŋutinunyalawo gblɔ be ɖeviwo ate ŋu akpɔ viɖe tso hadede kple ŋutsuwo me. Togbɔ be ame nyrui alo aƒelika aɖe ƒe ɖetsɔleme ɖeɖefia ɖevi lɔlɔ̃tɔe ate ŋu aɖe vi hã la, hadede tuameɖo si yia edzi le ŋutsuwo dome si wòakpɔ le Kristo-hamea me koŋue aɖe vi nɛ wu. Yesu do ŋugbe be hamea anye ƒome si akpe ɖe ame ŋu.—Marko 10:29, 30.

Timoteo tsi va zu Mawu ƒe ame ɖedzesi aɖe le Biblia ƒe ɣeyiɣiwo me vifofo dzixɔsetɔ aɖeke ƒe kpekpeɖeŋu manɔmee. Biblia tsɔ esia ƒe kafukafu ƒe akpa gãtɔ na dadaa kple mamaa lɔ̃amewo. (Dɔwɔwɔwo 16:1; Timoteo II, 1:1-5) Gake hadede kple ŋutsu Kristotɔ aɖe—si nye apostolo Paulo—hã ɖe vi nɛ. Paulo yɔ Timoteo be “vinye lɔlɔ̃tɔ kple nuteƒewɔla le Aƒetɔ me.” (Korintotɔwo I, 4:17) Nenema ke wodea dzi ƒo na Yehowa Ðasefowo egbea be woawɔ ɖe Biblia ƒe aɖaŋuɖoɖo si nye be “woakpɔ tsyɔ̃eviwo kple ahosiwo ta” la dzi. (Yakobo 1:27) Wode dzi ƒo na wo be woaxɔ na ‘tsyɔ̃eviwo’ to ɖetsɔleme si sɔ ɖeɖefia wo lɔlɔ̃tɔe me. (Hiob 29:12) Ðetugbi aɖe si ŋkɔe nye Annette ɖo ŋku ɖetsɔleme tuameɖo si Kristotɔ hamemegã aɖe ɖe fiae le eƒe ɖevime dzi, gblɔ be: “Eyae nye fofoteƒenɔla vavã ɖeka kolia si nɔ asinye kpɔ.”

Nɔnɔmea Tɔtrɔ

Gɔmeɖose siawo ŋudɔwɔwɔ ate ŋu akpe ɖe tɔmanɔsiviwo ŋu be woakpɔ dzidzedze. Togbɔ be woƒe ɖevimegbenɔnɔ mede wo dzi o hã la, woate ŋu ava zu ame tsitsi ɖɔʋu siwo lɔ̃a ame, hewɔa nuteƒe, kple dzila dovevienu siwo da sɔ. Ke hã enyo wu kura be woaxe mɔ ɖe afɔku nu wu esi wòadzɔ hafi woanɔ asi trɔm le eŋu. Mlɔeba la, hafi woate ŋu atsi tɔmanɔsiƒomewo ƒe anyinɔnɔ tso dzidzime yi dzidzime nu la, ke ele be ŋutsuwo kple nyɔnuwo naɖoe kplikpaa awɔ Biblia ƒe aɖaŋuɖoɖowo dzi le woƒe agbe me—le kpɔɖeŋu me, to wɔwɔ ɖe Biblia ƒe sedede ɖe gbɔdɔdɔ do ŋgɔ na srɔ̃ɖeɖe nu dzi kple wɔwɔ ɖe dzidzenu siwo le Biblia me na srɔ̃ŋutsuwo kple srɔ̃nyɔnuwo dzi me.—Korintotɔwo I, 6:9; Efesotɔwo 5:21-33.

Egbea ɖevi geɖewo fofo le wo gbɔ le aƒeme gake woagate ŋu ayɔ wo be tɔmanɔsitɔwo. Ƒomeŋutinunyala bibi aɖe gblɔ be: “Kuxi gãtɔ kekeake si dze ŋgɔ . . . ɖeviwo egbeae nye dzilawo ƒe ɖekematsɔleme kple vovo makpɔmakpɔ ɖe wo ŋu.” Mawu ƒe Nya kpɔ kuxi sia gbɔ tẽ. Ede se na vifofowo ku ɖe wo viwo ŋu be: “Minyi wo le Kristotɔnyenye ƒe hehe, kple nuxɔxlɔ̃ la me.” (Efesotɔwo 6:4, New English Bible; Lododowo 24:27) Ne vifofowo wɔ ɖe Biblia ƒe aɖaŋuɖoɖowo dzi la, ɖeviwo matsi dzi be woava gblẽ yewo ɖi o.

Gake ɖe míate ŋu akpɔ mɔ le nyateƒe me be ame gbogbo aɖewo atrɔ ɖe Biblia la ŋua? Kura o. (Mateo 7:14) Gake Yehowa Ðasefowo kpe ɖe ame miliɔn geɖe ŋu wole dzidzɔ kpɔm le woƒe ƒomegbenɔnɔ me to aƒeme Biblia nusɔsrɔ̃ ƒe ɖoɖo aɖe dzi. * Nyateƒee, Biblia xlɔ̃ nu be srɔ̃tɔwo katã “akpɔ xaxa le ŋutilã me” le blibomademade ta ya. (Korintotɔwo I, 7:28) Gake amesiwo dea bubu Mawu ƒe Nya ŋu le nyateƒe me dzea agbagba kpɔa woƒe kuxiwo gbɔ, menye be woagbe wo nɔewo le masɔmasɔ aɖe ƒe mododoɖa zi gbãtɔ ko ta o. Nyateƒee, esɔna ɣeaɖewoɣi be Kristotɔ nabu kaklã alo srɔ̃gbegbe gɔ̃ hã ŋu. (Mateo 5:32) Gake nusiwo esia ate ŋu agblẽ le viawo ŋu nyanya ate ŋu aʋa Kristotɔ be ne anya wɔ la wòadi mɔ siwo dzi wòato akpɔ srɔ̃ɖeɖea ta.

Biblia ƒe aɖaŋuɖoɖowo ŋudɔwɔwɔ awɔ nusi yi ŋgɔ wu wò ƒomea ta kpɔkpɔ fifia ko. Ate ŋu ahe agbe mavɔ nɔnɔ vɛ na mi katã! Yesu gblɔ be: “Esiae nye agbe mavɔ la bena, woanya wò, Mawu vavã ɖeka la, kple Yesu Kristo, si nèdɔ ɖa la.” (Yohanes 17:3) Mawu ƒe Nya la xexlẽ kple aɖaŋuɖoɖo siwo le eme la ŋudɔ wɔwɔe nye mɔ nyuitɔwo kekeake si dzi nàto ana wò ƒomea nadze na agbe mavɔ kpɔkpɔ dometɔ ɖeka.

[Etenuŋɔŋlɔwo]

[Nɔnɔmetata si le axa 8, 9]

To Biblia me gɔmeɖosewo dzi wɔwɔ me la, dzilaɖekɛ ate ŋu akpɔ dzidzedze le ɖeviwo nyinyi me

[Nɔnɔmetata si le axa 10]

Zi geɖe la, Kristotɔ ŋutsuwo ate ŋu ‘axɔ na tɔmanɔsivi’ to ɖetsɔleme si sɔ ɖeɖefiae lɔlɔ̃tɔe me