Dɔmavɔleameŋu—Ƒomea ƒe Agbae

NUKAE nye dɔmavɔleameŋu? Kpuie ko la, enye dɔléle si nɔa ame ŋu ɖaa. Gakpe ɖe eŋu la, nufialagã aɖe ɖe dɔmavɔleameŋu gɔme be enye “lãmegbegblẽ si womate ŋu ada to dɔwɔwɔnamemɔnu tsɛ aɖe dzi alo awɔ atike nɛ ɣeyiɣi kpui aɖe ko aɖɔe ɖo o.” Menye dɔléle si ƒomevi wònye, edada loo alo eƒe nugbegble le ame ŋue nye nusi na akɔkpekpe kple dɔmavɔleameŋu nye nu sesẽ o, ke boŋ alesi wòhiã be woanɔ te ɖe enu ɣeyiɣi didi lae.

Gawu la, menye dɔnɔa ŋu koe dɔmavɔleameŋu gblẽa nu le zi geɖe o. Agbalẽ si nye Motor Neurone Disease—A Family Affair, gblɔ be “ƒome aɖe mee ame akpa gãtɔ le, eye [dɔnɔa] ƒe vevesese kple dzimaɖitsitsiwo akpɔ ŋusẽ ɖe amesiwo te ɖe eŋu hã dzi.” Vidada aɖe si ƒe vinyɔnu ŋu kansa le la ɖo kpe esia dzi. Egblɔ be, “ekpɔa ŋusẽ ɖe ƒomea me tɔ ɖesiaɖe dzi, woɖaɖee fia alo womeɖaɖee fia o, wonya alo womenya o.”

Gake mawɔ dɔ ɖe amesiame dzi sɔsɔe o. Ke hã ne ƒometɔwo nya alesi dɔmavɔleameŋu kpɔa ŋusẽ ɖe amewo dzie la, anɔ eme be akpe ɖe wo ŋu be woadzra ɖo akpe akɔ kple kuxi siwo tututu woƒe nɔnɔmea ahe vɛ. Gakpe ɖe eŋu la, ne amesiwo menye ƒometɔwo o—abe dɔwɔhatiwo, sukuhatiwo, aƒelikawo, kple xɔlɔ̃wo ene—se alesi dɔmavɔleameŋu gblẽa nu le ame ŋui gɔme la, akpe ɖe wo ŋu be woana kpekpeɖeŋu si hiã veveseseɖeamenutɔe wu. Esi esia le susume na mí la, mina míalé ŋku ɖe mɔ aɖewo siwo nu dɔmavɔleameŋu ate ŋu agblẽ nu le ƒomewo ŋui la ŋu.

Mɔzɔzɔ le Dzronyigba Dzi

Woate ŋu atsɔ nɔnɔme si me ƒome si me dɔmavɔleameŋu le tona la asɔ kple alesi woazɔ mɔ le dzronyigba dzi. Le esime nanewo anɔ ko abe alesi wòle le ƒomea denyigba dzi ene la, bubuwo ya manɔ nenema o alo woato vovo kura gɔ̃ hã. Ne dɔmavɔleameŋu dze ƒomea me tɔ aɖe dzi la, tɔtrɔ aɖeke mava le ƒomea ƒe nuwɔna geɖe me o. Gake nanewo atrɔ kura.

Le gɔmedzedzea me la, dɔlélea ŋutɔ ate ŋu atrɔ ɖoɖo si nu ƒomea wɔa nu ɖo, eye wòazi ƒomea me tɔ ɖesiaɖe dzi be wòawɔ tɔtrɔwo bene wòate ŋu anɔ te ɖe enu. Helen, si xɔ ƒe 14, eye blanuiléle atraɖii si nu sẽ le fu ɖem  na dadaa ɖo kpe esia dzi. Egblɔ be, “míewɔa tɔtrɔ le míaƒe ɖoɖowɔɖiwo me be wòasɔ ɖe nusi Dada ate ŋu awɔ alo mate ŋu awɔ o le alesi ŋkeke ɖesiaɖe abiae la nu.”

Atikewɔwɔ—si ƒe taɖodzinue nye be wòana woahaya tso dɔlélea me—gɔ̃ hã agate ŋu atɔtɔ ƒomea ƒe ɖoɖo yeyea ɖe edzi. Bu Braam kple Ann, siwo míeyɔ le nyati si do ŋgɔ me ƒe kpɔɖeŋu ŋu kpɔ. Braam gblɔ be: “Ehiã be míawɔ tɔtrɔ gãwo le míaƒe gbesiagbe dɔwɔnawo me le mía viawo ƒe atikewɔwɔa ta.” Ann ɖe eme be: “Míeyia kɔdzi gbɔna gbesiagbe. Hekpe ɖe eŋu la, ɖɔktaa kafui be míana nuɖuɖu sue ɖeviawo woaɖu zi ade gbeɖeka le woƒe nuɖuɖu ŋutete si ŋu dɔlélea gblẽ nu le ta. Enye nuɖaɖamɔnu yeye kura nam.” Kuxi bubu si gasẽ wue nye kpekpe ɖe ɖeviawo ŋu woawɔ kamedede si wofia wo be woawɔ be ŋusẽ naɖo lãmekaawo me. Ann ɖo ŋku edzi be “ema nye nu sesẽ si wòhiã be mawɔ wòa mam.”

Ne dɔnɔa le tɔtrɔm ɖe fuwɔamea—kple ɣeaɖewoɣi, vevesese—si tsoa atikewɔwɔ kple atikewɔlawo ƒe dɔdamɔnuwo me nu la, eva hiãna geɖe wu be wòakpɔ ƒomea sinu hena kpekpeɖeŋu si wòhiã kple seselelãme ƒe ŋusẽdoame. Ewɔnɛ be menye ɖeko wòva hiãna be ƒometɔwo nasrɔ̃ nu yeye siwo akpe ɖe wo ŋu woakpɔ dɔnɔa ƒe ŋutilãme nuhiahiãwo gbɔ o, ke eva nyea dzizizi na wo katã be woawɔ tɔtrɔwo le woƒe nuwɔnawo, seselelãmewo, agbenɔnɔ, kple ɖoɖo si nu wowɔa nu ɖo hã me.

Edze ƒã be hiahiã siawo bia dzidodo geɖe tso ƒomea me tɔwo si. Vidada aɖe si ƒe vinyɔnu wonɔ kansa dam na le kɔdzi ɖo kpe edzi be ate ŋu “ate ɖeɖi ame ŋu wu alesi ame bubu aɖe nasusui.”

Nɔnɔme Siwo Nɔa Tɔtrɔm Ðaa

Agbalẽ si nye Coping With Chronic Illness—Overcoming Powerlessness, gblɔ be: “Alesi dɔmavɔleameŋu kana ɖe eme vie gagblẽna ɖe edzi wɔnɛ be womate ŋu anya alesi nuwo ava nɔ o.” Le ɣeyiɣi si me ƒometɔwo le tɔtrɔm ɖe nɔnɔme aɖe ŋu la, ate ŋu adzɔ be nɔnɔme bubu, siwo ɖewohĩ wo nu sẽ wu nado mo ɖa. Dɔlélea ate ŋu aho le vome alo agasesẽ ɖe edzi kpata, eye ate ŋu adzɔ be atike siwo woawɔ la mana nɔnɔmea naka ɖe eme abe alesi wokpɔ mɔe ene o. Ahiã be woanɔ atikewɔwɔa ɖɔlim tso ɣeyiɣi yi ɣeyiɣi alo ate ŋu ahe kuxi  bubu siwo womele mɔ kpɔm na o vɛ. Ne eva dzɔ be ƒomea me tɔ siwo nu ti kɔ na nanɔ dagbadagbam anɔ kpekpeɖeŋu si dɔnɔa hiã la namee la, ate ŋu adzɔ be seselelãme siwo dzi woɖoa asii tsã naho gbeɖeka le vo me.

Alesi dɔléle kple atikewɔwɔ geɖe metoa mɔ ɖeka o la fɔa biabia siwo nu womate ŋu asi le o abe esiawo ene ɖe te be: Ɣeyiɣi didi kae nɔnɔme sia ayi edzi? Afikae dɔlélea agasesẽ ɖe dzi ase ɖo? Afikae míate ŋu ado dzi ase ɖo? Zi geɖe la, dɔléle si wua ame nana kakaɖedzi aɖeke menɔa ame si o si wɔnɛ be wobiana be—“Ɣeyiɣi didi kae wòagaxɔ hafi wòaku?”

Dɔlélea, atikewɔmɔnuwo, nutikɔname, kple kakaɖedzi manɔamesi katã ƒoa ƒu hea kuxi bubu si womekpɔa mɔ na o vɛ.

Ŋusẽ si Wòkpɔna Ðe Hadomegbenɔnɔ Dzi

Kathleen, amesi blanuiléle mavɔleameŋu ɖe fu na srɔ̃aŋutsu ɖe nu me be: “Eva hiã be maɖu alesi mesena le ɖokuinye me be metsi akogo hexaxae la dzi.” Eyi edzi be, “nɔnɔmea na míede vovo ge do kpoe, elabena míete ŋu kpea amewo alo awɔ ɖe amekpekpewo dzi ava de ha kple ame bubuwo gbeɖe o. Mlɔeba la, míegava dea ha o.” Abe Kathleen ene la, eva hiãna be ame geɖe nakpe akɔ kple fɔbubuameɖokui le esi womete ŋu xɔa amedzrowo alo wɔna ɖe amekpekpewo dzi o ta. Nukatae wòdzɔna alea?

Dɔlélea ŋutɔ alo nusiwo atikewɔwɔa agblẽ le ame ŋu ate ŋu ana wòasesẽ, alo manya wɔ kura be woakpɔ gome le hadomenuwɔnawo me o. Ƒometɔwo alo dɔnɔawo ase le wo ɖokui me be dɔlélea ana amewo ƒe ŋku nanɔ yewo ŋu, alo ate ŋu ado ŋukpe yewo. Blanuiléle ate ŋu ana dɔnɔa nase le eɖokui me be yemegadze ade ha kple ye xɔlɔ̃ xoxowo o, alo anɔ eme be dzi manɔ ƒomea ƒo be woade ha koŋ o. Le susu vovovowo ta la, dɔmavɔleameŋu ate ŋu ana ƒome bliboa nase le eɖokui me be ye sa ɖe aga hetsi akogo.

Gakpe ɖe eŋu la, menye amesiamee anya nusi wòagblɔ alo alesi wòawɔ nui ne ele ame aɖe si ŋu dɔléle aɖe le gbɔ o. (Kpɔ aɖaka si nye “Alesi Nàwɔ Ana Kpekpeɖeŋu,” le axa 11.) Ann gblɔ be: “Ne viwò to vovo tso ɖevi bubuwo gbɔ la, ame geɖe aɖe ŋku ɖe edzi eye woagblɔ ameŋumabunyawo. Le nyateƒe me la, ànɔ fɔ bum ɖokuiwò ɖe dɔlélea ta, eye ɖeko woƒe nyagbɔgblɔwo agana nàbu fɔ ɖokuiwò ɖe edzi.” Nusi Ann gblɔ la ka fe nu bubu si ate ŋu adzɔ ɖe ƒomewo dzi bɔbɔe.

Seselelãme Gblẽnuwo

Numekula aɖe gblɔ be: “Ne wokpɔ dɔléle aɖe le ame ŋu teti la, eʋuʋua ƒometɔ akpa gãtɔ, woƒe nu kuna, eye womexɔnɛ sena o. Wobunɛ be yewomate ŋu anɔ te ɖe enu o.” Ẽ, ate ŋu agba dzi na ame ne wonya be dɔléle si ate ŋu awu ame alo agblẽ nu le ame ŋu vevie la dze ame ƒe lɔlɔ̃tɔ dzi. Ƒomea me tɔwo ase le wo ɖokui me be mɔkpɔkpɔ bu ɖe yewo, eye kakaɖedzi aɖeke manɔ wo si na etsɔme o eye nubuname kple dziku axɔ wo me.

Ele eme baa be le ƒome siwo me ƒomea me tɔ aɖe dze dɔ ɣeyiɣi didi eye wògblẽ nu le eŋu, evɔ womenya ta le dɔlélea nu o gome la, enyea gbɔdzɔe na wo ne wova ke ɖe dɔlélea ŋu. Gake ƒome aɖewo awɔ nu bubui ne wova nya dɔlélea. Vidada aɖe si le South Africa lɔ̃ ɖe edzi be: “Esi wogblɔ nusi nɔ fu ɖem na mía viawo na mí la, evem ale gbegbe be mesusu be ne ɖe womegblɔe nam o la, ne enyo wu.”

Agbalẽ si nye A Special Child in the Family —Living With Your Sick or Disabled Child ɖe eme be “ele dzɔdzɔme nu be nàse veve le seselelãme gome . . . esime nèle tɔtrɔm ɖe nɔnɔme yeye sia ŋu. Ɣeaɖewoɣi wò seselelãmewo nu asẽ ale gbegbe be ànɔ vɔvɔ̃m be yemate ŋu anɔ te ɖe enu o.” Agbalẽa ŋlɔla Diana Kimpton, si dɔkavime dɔléle vɔ̃ɖi aɖe le viaŋutsu eve ŋu gblɔ be: “Nye seselelãmewo na vɔvɔ̃ ɖom ale gbegbe be eva hiã be mase egɔme be seselelãme ma magblẽ naneke le ŋunye o.”

Enye nusi bɔ be vɔvɔ̃ naɖo ƒomewo—si nye vɔvɔ̃ na nusi mele nyanya o, vɔvɔ̃ na dɔlélea, vɔvɔ̃ na eŋuti atikewɔwɔ, vɔvɔ̃ na vevesese, kple vɔvɔ̃ na ku. Vɔvɔ̃ geɖe ate ŋu anɔ ɖeviwo koŋ me si womaɖe agblɔ o—vevietɔ ne womeɖe nusi le dzɔdzɔm la me na wo le mɔ si woate ŋu ase egɔme nu o.

Dzikudodo hã va bɔna. South Africatɔwo ƒe magazine si nye TLC ɖe eme be: “Zi geɖe la, dɔnɔa ate ŋu ava ɖe eƒe dziku ɖe ƒometɔwo ŋu.” Ema ate ŋu awɔe be ƒometɔwo hã nado dziku—ɖe ɖɔktawo ŋu be womete ŋu kpɔ dɔlélea do ŋgɔ o, ɖe woa ŋutɔwo ɖokui ŋu be yewo ŋue ƒometɔa xɔ dɔa le, ɖe dɔnɔa ŋu be mekpɔ eɖokui dzi nyuie o, ɖe Satana Abosam ŋu be eyae he fukpekpe vɛ, alo ɖe Mawu gɔ̃ hã ŋu, asusui be eya gbɔe dɔlélea tso. Zi geɖe hã, amewo bua fɔ wo ɖokui ɖe dɔmavɔleameŋu ta. Agbalẽ si nye Children With Cancer—A Comprehensive Reference Guide for Parents, gblɔ be: “Ðevi si ŋu kansa le dzilawo kple nɔviawo katã kloe bua fɔ wo ɖokui.”

Zi geɖe la, seselelãme sẽŋu siawo hea blanuiléle—aɖe ƒomevi—vɛ. Numekula aɖe ŋlɔ be: “Ewɔ abe eyae nye seselelãme si bɔ wu ɖesiaɖe ene. Lɛta gbogbowo le asinye matsɔ aɖo kpe edzii.”

Ẽ, Ƒomewo Ate Ŋu Anɔ Te Ðe Enu

Nusi faa akɔ na amee nye be ƒome geɖe va kpɔe be tenɔnɔ ɖe nɔnɔmea nu mesesẽ abe alesi wòdze le gɔmedzedzea me ene o. Diana Kimpton, na kakaɖedzi be: “Alesi nàbu nɔnɔmeae le susume avloe kura wu alesi wòle ŋutɔŋutɔ.” Ede dzesii le eya ŋutɔ ƒe nuteƒekpɔkpɔ me be “nɔnɔmea mava vɔ̃ɖi le etsɔme abe alesi nèsusui le gɔmedzedzea me ene o.” Kakaɖedzi nenɔ asiwò be ƒome bubuwo te ŋu do dzi le dɔmavɔleameŋu manyatalenuwo ƒe fuwɔame me, eye wò hã ate ŋui. Ame geɖe va kpɔe be nyanya be ame bubuwo te ŋu nɔ te ɖe enu naa gbɔdzɔe wo eye mɔkpɔkpɔ ɖoa wo me.

Gake susu le eme be ƒomea nabu tame be, ‘Aleke míawɔ anɔ te ɖe enu?’ Nyati si kplɔe ɖo adzro mɔ siwo nu ƒome aɖewo nɔ te ɖe enu le la me.

[Nya si ɖe dzesi si le axa 5]

Ehiã be ƒomewo nakpɔ dɔnɔa ƒe nuhiahiãwo gbɔ eye woawɔ tɔtrɔwo le woa ŋutɔ ƒe nɔnɔmewo, seselelãmewo, kple agbenɔnɔ me

[Nya si ɖe dzesi si le axa 6]

Seselelãme ƒe vevesesewo aɖe fu na dɔnɔa kple ƒomea siaa

[Nya si ɖe dzesi si le axa 7]

Dzi megaɖe le ƒowò o. Ƒome bubuwo te ŋu nɔ te ɖe enu. Wò hã àte ŋui

[Aɖaka si le axa 7]

Dɔmavɔleameŋu ƒe Kuxi Aɖewo

• Nusɔsrɔ̃ tso dɔlélea ŋu kple alesi woanɔ te ɖe enui

• Tɔtrɔwɔwɔ le ame ƒe agbenɔnɔ kple gbesiagbenuwɔnawo me

• Tenɔnɔ ɖe hadome kadodowo ƒe tɔtrɔ nu

• Dadasɔ kple dziɖeɖe ɖi le susume

• Nuxaxa ɖe nusiwo dɔmavɔleameŋu gblẽ le ame ŋu ta

• Tenɔnɔ ɖe seselelãme ƒe vevesesewo nu

• Nukpɔsusu si sɔ ƒe amesinɔnɔ