Egbegbe Agadomenɔlawo

ETSO NYƆ! ƑE NUŊLƆLA SI LE LESOTHO GBƆ

AGADOMENƆLAWO li le míaƒe egbeŋkekeawo mea? Míekpɔ wo dometɔ aɖewo le Lesotho, si nye anyiehe Afrika-fiaɖuƒe si nye tonyigba. Wo dedu, Ha Kome, si le Maluti-to dzeaniawo ƒe togbɛwo dome, didi tso Lesotho ƒe fiadu si nye Maseru gbɔ anɔ kilometa 60. Zi geɖe le dzomeŋɔli ɣletiwo me la, seƒoƒo dzĩ dzeaniwo xɔa to ɖiabu siawo ŋu keŋ. Ŋkɔ nyanyɛ si wolɔ̃a yɔyɔ na woe nye dzotuɖonu dzĩwo, eye seƒoƒo dzeani siawo wɔnɛ be vovototo gã aɖe va nɔa gbe dama siwo wɔna vlɔvlɔvlɔ le nutoa me la dome.

 Le afisia la, ƒome geɖewo lé agbenɔnɔmɔnu si nɔ anyi ƒe alafa geɖe la me ɖe asi. Agado siwo le toa ƒe abua ŋu mee wotsoa woƒe aƒewo ɖo. Ati suesuewo kple nu bubuwo abe aƒla ene, ye wodea gli titri si woɖona ɖe agadoawo ŋgɔ me. Wotsɔa nyimi kple anyi tsakana tsɔ lia gli ŋui. Eŋu lili sia naa dzoxɔxɔ vi aɖe nɔa xɔa me le Lesotho ƒe vuvɔŋɔli si me yame te ŋu fana miamiamia si ate ŋu ana tsi nazu tsikpe la me. Le agadoa me la, woku anyigba ƒe teƒe aɖe wòyi to me si woyɔna be ifo, si gɔmee nye “dzodoƒe,” eye wodoa dzo ɖe afisia hã be dzoxɔxɔ vi aɖe nɔa anyi ne vuvɔ le wɔwɔm.

Zi geɖe la, kpetoa kee ganyea xɔa tame, megbeglia, kple axadzigliawo. Wotsɔa anyi kple nyimi si wotsaka lilia teƒe siawoe, eye wogbugbɔ linɛ ƒe sia ƒe. Esia naa agadoa me ƒe amadede zua yeye eye wo ŋu gazrɔ̃na ɖe edzi. Wotsɔa nyigbalẽ ɖoa atsyɔ̃ na agadoa me eye wòganyea beli si dzi womlɔna.

Amedzro siwo aɖi tsa tso Ɣetoɖoƒedukɔwo me akpɔ ŋudzedze ɖe blemagbenɔnɔ si me wolé ɖe asi le afisia la ŋu eye woakpɔe be eto vovo. Awu si ƒomevi koŋ wolɔ̃a dodoe nye kuntru siwo le amadede vovovo me kple kuku siwo wolɔ̃ kple gbe eye wo tame le tsutsue. Zi geɖe la, ŋutsuvi lãkplɔvi siwo zɔa afɔ ƒuƒlu ye kplɔa woƒe lãhawo. Kɔƒea me ŋutsuwo wɔa dɔ le bligblewo me loo alo wonɔa dze ɖom vevie kple wo hati ŋutsu bubuwo.

Egbegbe mɔ̃ɖaŋunu aɖewo dzena ɣeaɖewoɣi le nutoa me. Yameʋu sue siwo tona yame va yina ɣeaɖewoɣi kple lɔri siwo tsɔa amedzrowo vaa agadoawo gbɔ doa dzidzɔ na ɖeviwo kple ame tsitsiwo siaa le kɔƒea me. Zi geɖe la, wodoa dzo ɖe xexe ɖaa nu le edzi le gaze si afɔ etɔ̃ li na me. Esi nake mebɔ ɖe afima o ta la, nyimi ƒuƒu, aƒlawo, kple atilɔ ʋɛ aɖewoe wotsɔ doa dzoe. Aƒemenuzazã siwo ŋudɔ agadomenɔla siawo wɔna dometɔ aɖewoe nye te kple tevi, siwo wotsɔna tua blii, kple akplẽɖatsi si wotsɔ ɖaa akplẽe.

Nɔnɔmetata siwo Bushmen-wo ta bɔ ɖe Lesotho ale gbegbe, eye woate ŋu akpɔ wo le agado geɖewo me kple agakpewo dzi le dukɔa me katã. Bushmen-woe nye ame gbãtɔ siwo nɔ Ha Kome ƒe agadoawo me. Woƒe nutatawo ɖea nuwɔna vovovowo fiana, tso tɔdziʋu kple ɖɔwo tsɔtsɔ aɖe lãe dzi yi ɣeɖuɖu kpeɖii siwo me zi geɖe gomekpɔlawo tsyɔa lãwo ƒe mowɔwɔewo mo dzi. Nutataawo dometɔ aɖewo hã nyea lãwo, abe kesewo, dzatawo, tɔmenyiwo, kple eland, si nye avugbɔe lolotɔ kekeake ene. Gake fifia nutata akpa gãtɔ siwo nɔ Ha Kome ƒe agadoawo me la bu. Wo dometɔ ʋɛ aɖewo koe susɔ si wotsɔ ɖoa ŋku Bushmen-wo ƒe aɖaŋuwɔwɔwo dzii.

Yehowa Ðasefowo ƒe ƒuƒoƒo aɖe wɔa woƒe gbeƒãɖeɖedɔa le nuto aɖe si medidi akpa tso Ha Kome gbɔ o me. Ɣeaɖewoɣi wosrãa agadomenɔlaawo kpɔ, amesiwo ame geɖe nya be wonye amedzrowɔlawo. Zi geɖe la wokua afima tɔwo ƒe dzogbɔ si woyɔna be motoho, ɖe agba me tsɔ wɔa amedzro na Ðasefoawo. Ha Kome tɔ geɖe dina vevie be yewoaxɔ Biblia-srɔ̃gbalẽwo. Enuenu la, woɖea ŋudzedzekpɔkpɔ fiana eye wonaa detsiƒonuwo, aziwo, alo nu bubuwo Ðasefoawo ɖe agbalẽawo ta tsɔ doa alɔ woƒe hehenadɔae.

Egbeŋkekeawo me agadomenɔla siawo dea bubu deto Biblia ŋu eye wolɔ̃a nya geɖe biabia le agbe, ku, kple woƒe kɔnyinyiwo ŋuti. Ðasefoawo ƒe dɔwɔwɔ dzonɔamemetɔe le nuto ma me wɔe be wole Biblia-nusɔsrɔ̃ geɖewo wɔm. Le mɔ sia nu la, nyateƒea ƒe kuwo ge ɖe anyigba nyui dzi le ɖokuibɔbɔla siawo ƒe dzi me.—Mateo 13:8.

[Anyigbatata si le axa 26]

(Edze nyuie le agbalẽa ŋutɔ me)

HA KOME