Biblia Ƒe Nukpɔsusu

Amekae Nye Subɔla?

LE ZÃ si do ŋgɔ na Yesu ƒe vɔsaku me la, dzre sesẽ aɖe dzɔ ɖe exɔlɔ̃ kplikplikpliwo dome. Luka 22:24 gblɔ be “dzre . . . ɖo wo dome bena, yewo dometɔ kae nye gãtɔ mahã?” Menye esiae nye zi gbãtɔ si nyaʋiʋli ma tɔgbe do mo ɖa le Yesu ƒe apostoloawo dome o. Yesu ɖɔ woƒe nukpɔsusu sia ɖo zi eve ya teti va yi xoxo.

Aleke gbegbe wòwɔ nublanuie nye si be ele be Yesu nagaɖo ŋku nusi tututu Kristotɔ subɔla vavãtɔ nye dzi na wo le zã sesẽ ma me. Egblɔ be: “Amesi nye gãtɔ le mia dome la, nazu abe suetɔ ene; eye amesi nye amegã la, nazu abe subɔla ene.”—Luka 22:26.

Mele be wòawɔ nuku na mí be nukpɔsusu masɔmasɔ ma nɔ apostoloawo si ɖe ɖoƒe kple ŋkɔxɔxɔ ƒe vevienyenye ŋu o. Do ŋgɔ na Yesu ƒe vava la, amesiwo ƒe kpɔɖeŋu wosrɔ̃na le ŋgɔxɔxɔ le subɔsubɔnyawo mee nye agbalẽfialawo kple Farisitɔwo. Le esi woana mɔfiafia kple nufiame amewo teƒe la, aʋatso subɔla siawo ɖo kɔnyinyi kple se kpaɖi siwo tua “dziƒofiaɖuƒe la ɖe amewo nu” la anyi. Wonye amesiwo dia ɖoƒe kɔkɔwo kple ŋkɔxɔxɔ, ɖokuiŋubula siwo wɔa woƒe nuwo, be “amewo nakpɔ.”—Mateo 23:4, 5, 13.

Subɔla Yeye Ƒomevi Bubu Aɖe

Gake Yesu to gbɔgbɔ me subɔsubɔdɔ yeye ƒomevi aɖe vɛ na eƒe nusrɔ̃lawo. Efia wo be: “Ke miawo la migana woayɔ mi be Rabi o, elabena ame ɖeka koe nye miaƒe nufiala, eye mi katã la nɔviwo mienye. Eye migayɔ ame aɖeke be mia fofo le anyigba dzi o; elabena ame ɖekae nye mia fofo, eyae le dziƒo. . . . Ke amesi nye gãtɔ le mia dome la, nanye miaƒe subɔla.” (Mateo 23:8-11) Yesu ƒe nusrɔ̃lawo masrɔ̃ woƒe ŋkekea me subɔsubɔhakplɔlawo ƒe kpɔɖeŋu o. Ne wodi be yewoazu subɔla akuakuawo la, ke ele na wo be woasrɔ̃ Yesu. Kpɔɖeŋu ka ƒomevi wògblẽ ɖi?

Biblia zã Helagbe me nya di·aʹko·nos na “subɔla” zi geɖe. The Encyclopedia of Religion gblɔ be nya sia “metsi tre ɖi na ɖoƒe o ke boŋ subɔsubɔ ƒe ƒomedodo si le subɔla kple amesi subɔm wòle domee: Kristo ƒe kpɔɖeŋu yomedzedze . . . ye nye nu vevitɔ si dzi Kristotɔ ato ase subɔsubɔdɔ gɔme.”

Le ɖekawɔwɔ me kple nya “subɔla” ƒe gɔmeɖeɖe si sɔ la, Yesu tsɔ eɖokui na hesubɔ ame bubuwo. Eɖe nu me dzigbɔɖitɔe be, “Amegbetɔvi la meva bena, woasubɔ ye o, ke boŋ bena yeasubɔ,  eye yeatsɔ [yeƒe] agbe la ana ɖe ame geɖewo ƒe xɔxɔ ta.” (Mateo 20:28) Yesu zã eƒe ɣeyiɣi, ŋusẽ, kple ŋutete tsɔ kpe ɖe ame bubuwo ŋu le ŋutilã kple gbɔgbɔ me ɖokuitɔmadimaditɔe. Nukatae? Le esi eƒe dɔme trɔ ɖe ameha si ŋu wowɔ nugbegblẽ ɖo le gbɔgbɔ me siwo lɔ hoo yi be yewoava kpɔe tae. Edi be yeakpe ɖe wo ŋu. Lɔlɔ̃ si tso dzime ye ʋãe be wòsubɔ, eye edi be yeƒe nusrɔ̃lawo naɖe nunana ƒe nɔnɔme ma ƒomevi ke afia.—Mateo 9:36.

Le Yesu ƒe agbenɔnɔ katã me la, eɖo kpɔɖeŋu ɖi na amesiwo ava zu subɔlawo le etsɔme. Egblɔ be, “nuŋeŋe la sɔ gbɔ; ke nuŋelawo mede ha o. Eyaŋuti miɖe kuku na nuŋeŋe ƒe Aƒetɔ la bena, wòadɔ dɔwɔlawo aɖo ɖe eƒe nuŋeŋe la me.” (Mateo 9:37, 38) Ẽ, Kristo ƒe subɔlawo anye dɔ gãtɔ kekeake si wowɔ kpɔ le xexeame la wɔlawo—woana gbɔgbɔ me akɔfafa ameƒome bliboa katã to gbeƒãɖeɖe Mawu ƒe Fiaɖuƒe ŋuti nyanyuia kple efiafia amewo me.—Mateo 28:19, 20.

Susu tɔtrɔ ɖe nunana kple amewo ƒe hiahiãwo gbɔ kpɔkpɔ ŋu ye nye nusi na mɔ si dzi Kristo to subɔ ɖe dzesi etɔxɛe. Efia nu eƒe subɔlawo wonye subɔviwo, gbɔgbɔmelãɖelawo kple alẽkplɔlawo, ke menye amesiwo nye vivimenukpɔla kple agbalẽnyala siwo doa awu tɔxɛ alo awu ɖedzesi ƒomevi aɖewo o.—Mateo 4:19; 23:5; Yohanes 21:15-17.

Biblia ƒe Nukpɔsusu

Nublanuitɔe la, esi ƒe alafawo va nɔ yiyim la, wova tsɔ susu totro nɔ subɔla siwo subɔna ɖokuitɔmadimaditɔe siwo nye gbeƒãɖela kple nufialawo ƒe dɔa kpɔmee. Nusi dze egɔme abe Kristotɔwo ƒe subɔsubɔdɔa ene va trɔ zu hame dziɖuɖu ƒe nuɖoanyi si ŋu ŋusẽ le. Woɖo ŋusẽnɔƒe kple ɖoƒe kɔkɔwo anyi, eye wona bubu kple ŋusẽ amesiwo nɔa ɖoƒe siawo eye kesinɔnu gbogbo aɖewo hã sua wo si. Esia he mamawo vɛ. Nunɔlawo ƒe ha si kpɔa mawusubɔsubɔ me nu kɔkɔewo gbɔ kple amesiwo ɖoa aɖaŋu na mɔtralawo va do. Alesi Kristotɔ ɖesiaɖe si nɔ ƒe alafa gbãtɔ hamea me nye subɔla si me dzo nɔ va trɔ esi ƒe alafawo va nɔ yiyim zu ame ʋɛ aɖe siwo xɔ hehe tɔxɛ siwo ŋu wodea bubu tɔxɛe, amesiwo ko wona ŋusẽe be woaɖe gbeƒã ahafia nu.

Gake Biblia meɖee fia be Kristotɔ subɔla nye amesi doa awu ɖedzesi aɖe ƒomevi, wɔa kɔnu tɔxɛ aɖe, xɔa fetu, alo nye amesi dziɖuɖu na ŋusẽe o, ke boŋ amesi kua kutri wɔa dɔ ɖokuitɔmadimaditɔe. Apostolo Paulo yɔ nɔnɔme siwo wòle be Kristotɔ subɔlawo naɖe afia. Ede dzi ƒo na wo be womegawɔ ‘naneke le bubu dzodzro ta o, ke boŋ le ɖokuibɔbɔ me.’—Filipitɔwo 2:3.

Le nyateƒe me la, Paulo tsɔa nusi wòɖea gbeƒãe dea dɔwɔwɔ me. Esi wòzɔ ɖe Kristo ƒe kpɔɖeŋu nu pɛpɛpɛ ta la, medi ɣeaɖekeɣi “nusi nyo na eya ŋutɔ o, ke nusi nyo na ame geɖeawo boŋ, bene woakpɔ agbexɔxɔ.” Ese egɔme eye wòse le eɖokui me vevie hã be enye yeƒe agbanɔamedzi be yeagblɔ ‘nyanyuia fetu aɖeke manɔmee,’ egblɔ kpee be, “bene nyemagawɔ nye ŋusẽ la ŋuti dɔ le nyanyui la ŋuti o.” Medi “bubu tso amewo gbɔ” na eɖokui o.—Korintotɔwo I, 9:16-18; 10:33; Tesalonikatɔwo I, 2:6.

Kpɔɖeŋu nyui ka gbegbee nye si esia nye na Kristotɔ subɔla vavã ɖesiaɖe! Amesiwo srɔ̃ eƒe kpɔɖeŋu nyui sia eye wozɔ ɖe ɖokuitɔmadimadi ƒe kpɔɖeŋu nyui si Yesu Kristo ɖo dzi, eye wotsɔ wo ɖokui na faa be yewoana gbɔgbɔmekpekpeɖeŋu kple nyanyuia ƒe akɔfaname amewo la, aɖee afia be yewonye Mawu ƒe subɔla vavãtɔwo.—Petro I, 2:21.