Tso Míaƒe Nuxlẽlawo Gbɔ

Atike Vɔ̃ɖiwo Miewɔ numekuku deto le nyati siwo tsiã ɖe wo nɔewo nu si nye “Are Drugs Taking Over the World?” (Ðe Atike Vɔ̃ɖiwo Le Ŋusẽ Kpɔm Ðe Xexeame Dzia?) (le Eŋlisigbe me tɔ, November 8, 1999, me) la ŋu. Menye ʋɔnudrɔ̃ƒe numekula le nuto aɖe si me sɔhɛ atikevɔ̃ɖizãlawo bɔ ɖo. Tata sia akpe ɖe wo dometɔ geɖe ŋu be woadzudzɔ atike vɔ̃ɖiwo zazã.

J. T., Germany

Pedro kple srɔ̃a, Ana, ƒe ŋutinya de dzi ƒo nam ŋutɔ. Atikevɔ̃ɖizazã gblẽ nye agbe dome ƒe ade sɔŋ. Esi mesrɔ̃ Biblia eye meƒo nu tso nusiwo srɔ̃m mele ŋu na amewo la, ŋusẽ ɖo ŋunye le gbɔgbɔme mete ŋu dzudzɔ atike vɔ̃ɖiawo zazã.

D. J., United States

Mele nu fiam tso lãmesẽmenɔnɔ ŋu le suku ƒe 15 sɔŋ enye sia. Nyɔ! ƒe tata sia va ɖe ɣeyiɣi dzi ŋutɔ, elabena fifia míele nu srɔ̃m tso ahanono, atike vɔ̃ɖiwo zazã, kple ʋukuku ŋu. Mele nyatakaka siwo le tata sia me zã ge godoo!

C. J., United States

Tagua-ne Mexlẽ miaƒe magazinewo ƒe tata ɖesiaɖe tso ƒe 1954 me ke, eye nyati siwo ƒoa nu tso alesi woate ŋu azã nusiwo Yehowa wɔ le mɔ vovovowo nu ŋu wɔa dɔ ɖe dzinye ɣesiaɣi. Nyati siawo dometɔ ɖekae nye “The Tagua Nut—Can It Save Elephants?” (Tagua-ne—Ðe Wòate Ŋu Axɔ na Atiglinyiwoa?) (le Eŋlisigbe me tɔ, November 8, 1999, me.) Akpe na mi ɖe kpekpeɖeŋu si nam miele mí be míakpɔ ŋudzedze ɖe mía Mawu ƒe nunya wɔnukua ŋu ɖe edzi la ta.

D. H., United States

Adzewɔwɔ Akpe na mi kakaka ɖe nyati si nye “Nukae Le Megbe na Adzewɔwɔ?” (November 8, 1999) la ta. Ame geɖe bunɛ be adzetɔwo dzi ŋɔ eye wonyea nyagãwo. Gake fifia Wicca-habɔbɔ me nɔnɔ va le ɖekakpui kple ɖetugbi geɖewo ŋu dzem. Nye ŋutɔ vinyenyɔnu te vividodo ɖe eŋu. Gake eya ŋutɔ dɔ be woanɔ Nyɔ! ɖom ɖe ye, eye nyati sia nɔ tata gbãtɔ si va nɛ la me! Eva ɖe ɣeyiɣi nyuitɔ dzi ŋutɔ.

B. H., United States

Mawudɔlawo Miawoe wɔ dɔ kakaka be mieta “Nukae Nye Mawudɔlawo Ŋuti Nyateƒea?” ƒe nyati siwo tsiã ɖe wo nɔewo nu. (December 8, 1999) Ɣeyiɣia de mlɔeba be ame aɖe tsɔ dzinɔameƒo ŋlɔ nu le afɔku siwo le mawudɔlawo ŋuti dzixɔse totrowo ŋu bubudeameŋutɔe, eye wole eteƒe pɛpɛpɛ. Nɔnɔmetata si le axa 19 lia si ɖee fia be mawudɔlawo ŋutɔ gbe bubudedeameŋu si gbɔ eme si wotsɔna naa wo egbea la kaŋ, koŋue wɔ dɔ ɖe dzinye.

J.L.A.H., Brazil

Atikewɔwɔ Kuxi Ŋutinya si ku ɖe Major ƒomea ŋu si dze le nyati si nye “Míesrɔ̃ Ŋuɖoɖo Ðe Mawu Ŋu Le Fukpekpe Me” (December 8, 1999) me la de dzi ƒo nam ŋutɔ. Dziŋutidɔléle sesẽ vovovowo nɔ mía viŋutsu ŋu si bia be woawɔ dɔ nɛ. Ðɔktawo gblɔ na mí be, ‘Mia viŋutsu aku ne womedo ʋu nɛ o!’ Ðɔktawo ma mía kple srɔ̃nyeŋutsu dome gɔ̃ hã be woate ŋu aƒoe ɖe mía nu míalɔ̃ ɖe ʋua dodo dzi. Gake abe Major ƒomea ene la, míedo gbe ɖa bia ŋusẽdodo kple dzinɔameƒo. Mía via tsi agbe le dɔa wɔwɔ nɛ me eye ele lãmesẽ me fifia. Egblɔ be yedi be yeaxɔ nyɔnyrɔ azu Yehowa Ðasefo.

B. C., United States

Woxɔ srɔ̃nyeŋutsu ɖe kɔdzi, eye ɖɔktawo gblɔ be anɔ kɔa dzi ɣleti geɖe. Mía vi etɔ̃awo gbɔ kpɔkpɔ kple srɔ̃nye sasrãkpɔ gbesiagbe va nɔ tetem ɖe dzinye ŋutɔ. Nɔvinyeŋutsu kple nɔvinyenyɔnu Kristotɔwo na kpekpeɖeŋum ale gbegbe le ɖeviawo gbɔ kpɔkpɔ me. Ɣeyiɣi si tututu me wòwɔ nam be nyemagate ŋu atsɔ agba la o ye srɔ̃nye gbɔ va aƒeme. Esi mexlẽ nyati dedziƒoname sia la, nusiwo katã me Major ƒomea to la te ɖe dzinye hewɔ nublanui nam eye mefa avi. Aleke gbegbe wòdzɔ dzi nam enye si be mekpɔ alesi gbegbe woɖo ŋu ɖe Yehowa ŋui!

J. A., United States