Nusi Gbɔ Agbenyuimanɔmanɔ Tso

Le October si va yi me la, nuŋlɔla aɖe si le Loja, Ecuador, ŋlɔ nu tsɔ ɖe ŋudzedzekpɔkpɔ fia ɖe Yehowa Ðasefowo ƒe subɔsubɔdɔa ŋu. Nusiwo wògblɔ ƒe ɖee nye si:

“Fuwɔame vɔ̃ɖitɔ kekeake siwo le nu gblẽm le ameƒomea ŋu dometɔ ɖekae nye agbenyuimanɔmanɔ . . . Edze abe amewo ŋlɔ Se Ewoawo dzi wɔwɔ be eye womeɖoa to woƒe dzitsinya o, si wɔe be amewo mesea nu gɔme na wo nɔewo o ene. Gbesiagbe kple le afisiafi la, míesea nu tso fuléle, ŋutasesẽ, nuvlowɔwɔ, atikevɔ̃ɖisitsatsa, nuvlowɔlawo ƒe ŋɔdzidoname, kple bubumademade ame ŋu ŋuti. . . .

“Yehowa Ðasefowo tsɔa ɖokuibɔbɔ wɔa woƒe dɔdasi le ŋutifafa kple tufafa me, yia wo haviwo gbɔ tso ʋɔtru nu yi ʋɔtru nu, nɔa woƒe magazine dzeani eveawo, Gbetakpɔxɔ kple Nyɔ!, siwo me wotaa nyati lédzinamewo ɖo la mam. Nyɔ! la koŋ ƒoa nu tso nyati nyui vovovo siwo sɔ ɖe dzɔdzɔmeŋutinunya kple dekɔnuwo nu la ŋuti. Woŋlɔa wo katã wo me kɔna eye wosɔna pɛpɛpɛ.”

Edze ƒã be agbenyuimanɔmanɔ bɔ egbea, gake abe alesi wogblɔe ɖe magazine sia ƒe axa 4 lia ƒe akpa si nye “Nusita Wotaa Nyɔ! Ðo” ene la, Nyɔ! la “kua nu me eye wòfiaa asi gɔmesese vavãtɔ si le fifi nudzɔdzɔwo ŋu.” Agbalẽ gbadza si nye Ðe Mawu Tsɔa Ðe Le Eme na Mí Vavãa? ƒo nu tso fukpekpe siwo me tom amegbetɔwo le la ŋu, gake ewɔ nusi yi ŋgɔ wu ema. Egblɔ nusita agbenyuimanɔmanɔ kple emetsonu gblẽnuwo li ɖo. Vevietɔ wu la, eɖe alesi woawɔ ahe gbɔdzɔe vɛ kpuie la fia.

Àte ŋu adɔ axa 32-gbalẽ gbadza sia si faa akɔ na ame la ƒe ɖeka ne èkpe nudɔgbalẽvi si kpe ɖe eŋu la ɖo eye nèɖoe ɖe adrɛs si dze le edzi alo nèzã adrɛs si sɔ le magazine sia ƒe axa 5 lia.

□ Taflatse miɖo agbalẽ gbadza si nye Ðe Mawu Tsɔa Ðe Le Eme na Mí Vavãa? ɖem.

□ Taflatse miva wɔ aƒeme Biblia nusɔsrɔ̃ femaxee kplim.