Dzidzɔ Si Le Xewo Kpɔkpɔ Me

ALEKE gbegbe nuwo atrɔ le xexeamee nye si ne ɖe xeviwo mele eme o! Woƒe xɔxlɔ̃, woƒe hadzidzi, woƒe amadede vovovoawo kple alesi wodzona le yamee—esiawo katã ƒo ƒu wɔe be nugbagbe hamehame siwo li ɖo atsyɔ̃ na xexeame. Gake zi nenie míetɔna sea woƒe xɔxlɔ̃ alo léa ŋku ɖe wo ŋu? Ne dugãmenɔlae nènye hele ame gbogbo siwo le hloloe tsom le agbe me dome eye nèsea ʋu gbogbowo ƒe toliɖeɖe ɣesiaɣi la, ke ɖewohĩ màte ŋu akpɔ xevi aɖeke kura le nuto si me nèle o. Ne kɔƒemenɔlae nènye gɔ̃ hã la, ele bɔbɔe be màbu wo ŋu boo o. Gake àdi be yeate ɖe xevi siwo le míaƒe nutoa me ŋu alé ŋku ɖe wo ŋu nyuie wua?

Àte ŋui ne èda xeviwo ƒe nuɖuɖu ɖe wò xɔ megbe ƒe afisi nàte ŋu akpɔ wo to fesre nu tututu. Emegbe nusi nàgahiã koe nye didiƒekpɔmɔ̃ kple fotoɖemɔ̃ si ɖea nuwo le didiƒe—kpakple dzigbɔɖi vi aɖe! Na film si te ŋu ɖea nusiwo le azɔli dzi sesĩe la nanɔ asiwò hekpe ɖe mɔfiagbalẽ nyui aɖe si me xeviwo ƒe nɔnɔmetatawo le ŋu. Ekema lé ŋku ɖe wo ŋu, ɖo to, nàse vivi nɛ!