Sɔhɛwo Biana Be . . .

Nukae Gblẽ le Dodo le Aƒeme Dzaa Ŋu?

“Míedona dzaa le zãtitina heyina ɖe nuɖuɖudzraƒe sue aɖe ɖanɔa mía hatiwo gbɔ. Emegbe míedze togbɛ aɖe dzi yiyi gɔme. Mía tɔwo katã noa atama gake nyea nyemeno nɛ o. Míenɔa anyi ɖekae ɖoa dze tso nusianu ko ŋuti, hesea heavy metal hawo. Ekema míeyia aƒeme le ŋdi ga 5:00 me hafi dzinyelawo fɔna.”—Tara. *

“Ne fofonye dzo yi dɔ me eye danye mlɔ anyi la, meʋua ʋɔtrua dona dzaa. Megblẽnɛ ɖi be wòagase be metui o—gaʋɔtru ye. Menɔa xɔ̃nyewo gbɔ zã bliboa katã. Emegbe ne ŋu le kekem la, megagena ɖe aƒea me dzaa. Ɣeaɖewoɣi la, enyana be medo eye wotua ʋɔ ɖe nunye.”—Joseph.

DODO DZAA—eɖi abe vivisese kple dzidzɔ aɖe ƒomevi le eme ene. Enaa mɔnukpɔkpɔ ame be nàwɔ nu alesi nèdii gaƒoƒo ʋɛ aɖewo, si nye mɔnukpɔkpɔ be nàwɔ nusi dze ŋuwò ahanɔ anyi kple amesi nèdi mɔ mabiamabia ame aɖeke o. Tsɔ kpe ɖe eŋu la, ɖewohĩ èsee kpɔ hawòtiwo ƒo adegbe le nusiwo wowɔna kple dzidzɔ si wokpɔna ne wodo dzaa le zã me. Eyata adzro wò vevie be yeayi kpli wo.

Kɔledzidela 110 siwo wobia gbee le Dziehe Amerika la dometɔ 55 lɔ̃ ɖe edzi be yewodo le aƒeme dzaa zi ɖeka ya teti kpɔ. Wo dometɔ geɖe wɔ esia esime woxɔ ƒe 14. Kuxia do fievo ale gbegbe be eŋunyala aɖewo kafui be dzilawo nade elektrik toklãnagawo woƒe aƒewo ŋu atsɔ axe mɔ ɖe wo viwo ƒe dodo le aƒeme ame maklamaklãe nu. Nukatae sɔhɛ geɖe dona le aƒeme dzaa tsɔ doa dɔmedzoe na wo dzilawo?

Nusita Ame Aɖewo Dona le Aƒeme Dzaa

Ɣeaɖewoɣi la, susu si ko tae sɔhɛwo dona le aƒeme ame maklamaklãe enye be nu ti kɔ na wo eye wodi be yewoaɖe modzaka kple yewo xɔlɔ̃wo. Agbalẽ si nye Adolescents and Youth ɖe eme be sɔhɛwo adi be yewoado ame maklamaklãe “le mɔxeɖenu aɖewo, abe ne wode se na wo be womegado go fiẽsiwo esime zã medo akpa o alo ne wogbe na wo be womakpɔ gome le hadomenuwɔna aɖewo me o ene ta. Sɔhɛawo ato mɔ sia mɔ nu ayi eye ɣeaɖewoɣi la woatrɔ agbɔ ame aɖeke ƒe manyamanyae.” Ðetugbi ƒe 16 vi aɖe ɖe susu siwo ta wòdona dzaa me. Egblɔ be: “Mesena le ɖokuinye me abe vidzĩe menye ene eye be mɔnukpɔkpɔ mele asinye be manɔ agbe alesi melɔ̃ o. Ga si me wòle be maɖo aƒeme la tsɔ wu amesiame tɔ. Eye dzinyelawo meɖea mɔ nam be mayi afisiwo xɔ̃nyewo yina o. . . . Eyata metoa mɔ sia mɔ nu yina hedaa alakpa na wo.” Joseph, amesi ŋkɔ míeyɔ va yi, dze dodo le aƒeme dzaa  gɔme esime wòxɔ ƒe 14 eye wòde rap hawo ƒoƒe aɖe si edzilawo gbe nɛ be megayi o.

Nyateƒee, menye susu gbegblẽ tae sɔhɛ geɖewo dona dzaa ame maklamaklãe o. Tara, si nye sɔhɛ siwo míeyɔ va yi la dometɔ ɖeka, gblɔ be: “Menye nu gbãtɔ si nɔ susu me na mí enye ‘Mina míayi aɖawɔ nu gbegblẽ o.’ Ðeko medi be manɔ nɔvinyenyɔnu gbɔ, eye eya hã di be yeado aɖaɖe modzaka kple exɔlɔ̃wo.” Joseph gblɔ be: “Ðeko míedona ko. Medi be manɔ xɔ̃nyewo gbɔ ahaɖo dze kpli wo.” Gake togbɔ be ƒã hafi dodo kple ame xɔlɔ̃ ate ŋu ahe nuvlowɔwɔ gã aɖe vɛ hã la, sɔhɛ geɖe gena ɖe kuxi gãwo me.

Afɔku Siwo Le Eme

Susuŋutinunyala Ðk. Lynn E. Ponton gblɔ be: “Enye nusi le dzɔdzɔme nu be ƒewuiviwo naɖe afɔ siwo me afɔku ate ŋu anɔ.” Ðk. Ponton yi edzi ɖe eme be ele dzɔdzɔme nu eye ɖewohĩ esɔ be sɔhɛwo nadi be yewoanɔ yewo ɖokui si, ate nu yeyewo kpɔ, ahage ɖe nɔnɔme yeye dodzidzɔnamewo me. Enye tsitsi ƒe akpa aɖe. Gake sɔhɛ geɖe ƒoa wo ɖokui ɖe nɔnɔme siwo gbɔa eme la me—vevietɔ ne wole adzɔge ʋĩ tso wo dzilawo gbɔ. Teen magazine gblɔ be: “Hatiwo ƒe nyaƒoɖeamenu, modzakadzaka, dzonɔameme si dzi womeɖu o kple ɖewohĩ ameʋãnu bubuwo abe biya ene . . . ate ŋu ana ƒewuiviwo naɖe afɔ manyomanyo siwo me afɔku le—eye woabu woƒe agbe.” Numekuku aɖe si wowɔ yɔ ƒewuiviwo ƒe nuwɔna siwo me afɔku le la dometɔ aɖewo be woawoe nye ʋukuku sesĩe, nudomegbegblẽ, ahamumu atsɔ anɔ ʋu kumee, kple fififi.

Ne ènya ƒo ɖokuiwò ɖe tomaɖomaɖonuwo wɔwɔ me ko la, ele bɔbɔe be nàyi edzi awɔ nu gbegblẽ gãwo. Ðeko wòle abe alesi Yesu gblɔe ene le Luka 16:10 be: “Amesi wɔa nuteƒe le nu suetɔ ke me la, enyea nuteƒewɔla le nu geɖewo hã me.” Eyata mewɔ nuku o be dodo dzaa kple xɔlɔ̃wo ate ŋu ahe ame ade nuvɔ̃ gãwo wɔwɔ me. Tara wɔ matre. Joseph dze atikevɔ̃ɖiwo dzadzra gɔme, wolée, eye wodee gaxɔ me. Sɔhɛ Kristotɔ aɖe si ŋkɔe nye John dze atikevɔ̃ɖiwo zazã kple ʋu fifi gɔme. Nublanuitɔe la, sɔhɛ geɖewo hã ŋea agbenɔnɔ sia ƒe kuwo le ŋutilã me—si ƒe ɖewoe nye gbɔmeyafufɔfɔ, nulɔdɔwo xɔxɔ, alo aha sesẽ nono alo atikevɔ̃ɖiwo zazã zua numame na wo.—Galatiatɔwo 6:7, 8.

Nusiwo Wògblẽna

Nusi wògblẽna le ame ŋu si de ŋgɔ wu ŋutilã me tɔ enye nusi wògblẽna le wò seselelãme ŋu. Dzitsinya ƒe fuɖename vena ale gbegbe. (Psalmo 38:4, 5) Joseph gblɔ be: “Wogblɔna be ne nane medo le asiwò o la, mànya eƒe vevienyenye o. Ɣeaɖewoɣi la, mebua tame yia megbemegbee eye wòwɔa nuku nam be nyee wɔ nu mawo.”

Nusi hã dzi mele be míaŋe aɖaba aƒui o ye nye alesi bubu si le mía ŋu dome ate ŋu agblẽe. Nyagblɔla 10:1 gblɔ be: “Nudzodzoe wuamewo nana amiɖala ƒe ami ʋẽna kũ heƒaƒãna; bometsitsi ʋɛ aɖe kpena wua nunya kple  bubu.” Le blema ɣeyiɣiwo me la, nudzodzoe kuku sue aɖe ate ŋu ana ami alo ami ʋeʋẽ xɔasi nagblẽ. Nenema ke “bometsitsi ʋɛ aɖe” ate ŋu agblẽ bubu si nèkpe fu hafi wòsu asiwò mee. Eye ne Kristotɔe nènye la, ɖikeke mele eme o be agbe baɖa siawo nɔnɔ ahe wò ɖe megbe be hamea me mɔnukpɔkpɔ aɖewo masu asiwò o. Elabena ne èbu eŋu kpɔ la, aleke nàte ŋu ade dzi ƒo na ame bubuwo be woawɔ ɖe Biblia ƒe gɔmeɖosewo dzi esime wonya be wò ŋutɔ mèkpɔ wɔ wo dzi o?—Romatɔwo 2:1-3.

Mlɔeba, bu alesi dziwòlawo ase vevee ne wova nya be mèle aƒea me o la ŋu kpɔ. Dzila aɖe gblɔ alesi gbegbe ŋɔ dzii esime wònya be ye vinyɔnu si xɔ ƒe 15 mele aƒeme o. Egblɔ be esi yewomenya afisi yewo vinyɔnua yi o ta la, ye kple ye srɔ̃ ‘yewotsi dzi ale gbegbe.’ Ðe nèdi be yeado vevesese kple nuxaxa sia ƒomevi na dziwòlawoa?—Lododowo 10:1.

Ablɔɖe Geɖe Kpɔkpɔ

Gɔmesese le eŋu be ne edze abe ɖe dziwòlawo menaa mɔ wò kura o ene la, dzi aɖe le ƒowò. Ke hã dodo le aƒeme dzaa ye nye egbɔkpɔnua? Asi asu dziwò gbeɖeka godoo. Ne èdze aye ale gbegbe be nète ŋu blea dziwòlawo hã la, Yehowa Mawu kpɔa wò nuwɔnawo, ekpɔa esiwo nèwɔna le zã me kura gɔ̃ hã. (Hiob 34:21) Asi atu dziwò gbeɖeka, eye dziwòlawo magaka ɖe dziwò abe alesi wokana ɖe dziwò tsã ene o. Ekema nukae adzɔ? Nusi tututu dim nèle—si nye ablɔɖe la ƒe akpa gã aɖe abɔ wò!

Ðo ŋku edzi be: Be nànɔ ablɔɖe me la, ele be dziwòlawo naka ɖe dziwò. Mɔ nyuitɔ si dzi nàte ŋu ato awɔ ema koe nye be nàɖo to wo. (Efesotɔwo 6:1-3) Ne ewɔ na wò be dziwòlawo mele nu gɔme sem na ye le mɔ aɖe nu o la, gblɔe na wo tẽ—kple bubu. Woade ŋugble le nusi nègblɔ ŋu godoo. Le go bubu me la, ate ŋu adzɔ be nàkpɔe be susu nyui aɖewo tae wole mɔ xem ɖe ye nu ɖo. Ne wò susu mewɔ ɖeka kple wo tɔ o gɔ̃ hã la, mègaŋlɔ be gbeɖe be wolɔ̃ wò eye wotsɔ ɖe le wò nyonyo me vevie o. Yi edzi nàtu kakaɖedzi si le wo si na wò la ɖo, eye le ɣeyiɣi si sɔ me la, ablɔɖe si dim nèle la asu asiwò. *

‘Mègazɔ Kpli Wo O’

Le blema ɣeyiɣiawo me ke la, edzroa sɔhɛ mawuvɔ̃lawo be woade ha kple wo hatiwo le nuwɔna gbegblẽwo me. Eyata Salomo xlɔ̃ nu sɔhɛwo bena: “Vinye, ne nuvɔ̃wɔlawo le nuwò blem la, megalɔ̃ edzi o! . . . Megazɔ mɔ ɖeka dzi kpli wo o.” (Lododowo 1:10, 15) Wɔ ɖe aɖaŋuɖoɖo ma dzi ne alakpaxɔlɔ̃wo dze agbagba be yewoable nuwò nàdo le aƒeme ame maklamaklãe. Salomo gaxlɔ̃ nu be: “Nunyala kpɔa dzɔgbevɔ̃e, eye wòɣlaa eɖokui; ke ame bebewu dea ta eme, eye akpɔ etɔnua.”—Lododowo 22:3.

Ne èdze dodo le aƒeme dzaa gɔme xoxo la, ke dzudzɔ! Mlɔeba, ɖokuiwò ŋu ko nàgblẽ nu le. Na dziwòlawo nanya nusi wɔm nèle, eye nàxɔ tohehe alo mɔxeɖenu ɖesiaɖe si woana wò. Ne ehiã la, tia xɔlɔ̃ yeyewo—xɔlɔ̃ siwo akpɔ ŋusẽ nyui ɖe dziwò. (Lododowo 13:20) Di mɔ siwo nyo wu eye afɔku mele wo me o si nu nàto ado dzidzɔ na ɖokuiwò.

Vevietɔ tu wò gbɔgbɔmemenyenye ɖo to Biblia xexlẽ kple Kristotɔwo ƒe kpekpewo dede me. Hakpala la bia be: “Aleke ɖekakpui alé eƒe mɔ atsɔ fɔɖiɖi manɔmee?” Eɖo eŋu be: “Ne elé ŋku ɖe eɖokui ŋu ɖe [Mawu ƒe] nya la nu.” (Psalmo 119:9) Ne èle wò tamesusu trɔm ʋɛʋɛʋɛ ɖe nunyuiwɔwɔ ŋu la, àva kpɔe be togbɔ be dodo le aƒeme dzaa anye nusi me dzidzɔ kple vivisese aɖe anɔ hã la, afɔku siwo le eme la dzi ŋɔ wu.

[Etenuŋɔŋlɔwo]

[Nya si ɖe dzesi si le axa 20]

“Dzinyelawo meɖea mɔ nam be mayi afisiwo xɔ̃nye yina o . . . Metoa mɔ sia mɔ nu yina hedaa alakpa na wo”

[Nɔnɔmetata si le axa 19]

Zi geɖe la, dodo le aƒeme dzaa hea kuxi sesẽwo vɛ