Amesiame ƒe Lãmesẽ me Nɔnɔ—Etu Aƒe!

GERMANY nyadzɔdzɔgbalẽ Focus ka nya ta be: “Eŋu bubu be womagadze dɔ akpɔ o . . . bɔ fifia.” Gake menye nu yeyee nya sia nye o. Wɔla la meɖoe be amegbetɔ nadze dɔ esime amegbetɔ ƒe agbe dze egɔme o. Menye eƒe tameɖoɖo na amegbetɔ enye be ‘amesiame nanɔ lãmesẽ me va ɖo afisi dze’ ko o. Amesiame ƒe lãmesẽ deblibo me nɔnɔ ƒe ɖoɖoe mía Wɔla la wɔ na mí!

Ke nukatae mí katã míaƒe lãme gblẽna eye míedzea dɔ ɖo? Biblia gblɔ na mí be Yehowa Mawu wɔ ameƒomea katã dzilawo, Adam kple Xawa, wode blibo. Le nuwo wɔwɔ vɔ megbe la, “Mawu kpɔ nusiwo katã wòwɔ la, eye kpɔ ɖa, wonyo ŋutɔ.” Menye mía Wɔla lɔlɔ̃tɔ ƒe tameɖoɖo gbeɖe be dɔléle kple ku naɖe kpe na mí o. Gake esi Adam kple Xawa gbe agbemɔ si woɖo ɖi na wo dzi toto la, wodze nuvɔ̃ me. Adam ƒe nuvɔ̃ me tsonu enye ku si to amewo katã dzi yi.—Mose I, 1:31; Romatɔwo 5:12.

Yehowa megblẽ ameƒomea ɖi ko o. Eye meɖe asi le eƒe gɔmedzetameɖoɖo na wo kple anyigba hã ŋu o. Egblɔ eƒe tameɖoɖo fia le Biblia la katã me be yeagana amegbetɔ siwo nye toɖolawo nagava nɔ lãmesẽ si me wonɔ tsã la me. Esime Mawu ƒe Vi, Yesu Kristo nɔ anyigba dzi la, eɖe Mawu ƒe ŋusẽ be wòayɔ dɔ lãmegbegblẽtɔwo fia. Le kpɔɖeŋu me, Yesu ʋu ŋku na ŋkuagbãtɔwo, da anyidɔ, ʋu to na tokunɔwo, da tetedɔ, da kpeŋui, eye wòyɔ dɔ lãmetututɔwo.—Mateo 4:23, 24; Luka 5:12, 13; 7:22; 14:1-4; Yohanes 9:1-7.

Madidi o Mawu aɖe gbe na eƒe Mesia Fia Yesu Kristo be wòakpɔ ameƒomea ƒe xexeame nyawo gbɔ. Le eƒe kpɔkplɔ te la, Yesaya ƒe nyagblɔɖi sia ava eme, be: “Duametɔ aɖeke magblɔ be, yele dɔ lém o; wotsɔ vodada ke amesiwo le eme.” (Yesaya 33:24) Aleke wòava dzɔe?

Míede dzesii be nyagblɔɖila la ŋlɔ be “wotsɔ vodada ke” amewo. Eyata woaɖe nusi gbɔ dɔléle tso—nuvɔ̃ si dome ameƒomea nyi—ɖa. Aleke wòadzɔe? Woawɔ Yesu ƒe tafevɔsa ƒe asixɔxɔ ŋudɔ na ameƒomea me tɔ siwo nye toɖolawo, eye to mɔ sia nu woaɖe nusi he  dɔléle kple ku vɛ ɖa. Anyigba ƒe afisiafi azu paradiso. Kristotɔ Apostolo Yohanes ŋlɔ be: “Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.” Nusia adzɔ kpuie!—Nyaɖeɖefia 21:3, 4; Mateo, ta 24; Timoteo II, 3:1-5.

Dadasɔ Ɣeawokatãɣi

Fifia la, lãmegbegblẽ kple dɔléle kpɔtɔ le fu ɖem na ame miliɔn geɖe. Eyata esɔ be amewo natsɔ ɖe le wo kple woƒe amewo ƒe lãmesẽ me.

Egbea Kristotɔ kpɔa ŋudzedze deto ɖe atikewɔlawo ƒe agbagbadzedze ŋu. Wowɔa afɔɖeɖe siwo sɔ be woƒe lãme nasẽ alo woanɔ lãmesẽ me ɣesiaɣi. Gake Biblia ƒe ŋugbedodo be dɔléle magava nɔ anyi o la kpena ɖe mía ŋu be míada asɔ le go sia me. Vaseɖe esime Mesia Fia la naxɔ ameƒomea ƒe nyawo gbɔ akpɔ la, míate ŋu anɔ lãmesẽ deblibo me o. Abe alesi míekpɔe va yi ene la, mɔ wɔnukutɔ kekeake siwo wofɔ kura gɔ̃ hã mete ŋu na be atikewɔlawo ke ɖe mango ɖiɖitɔ kekeake si le atia ƒe ɖɔme ŋu o—si nye amesiame ƒe lãmesẽ me nɔnɔ—ŋu o.

Woaɖo taɖodzinu si nye “amesiame ƒe lãmesẽ si dze me nɔnɔ le xexeame katã” la gbɔ kpuie. Gake manye to Dukɔ Ƒoƒuawo alo Xexeame ƒe Lãmesẽ Habɔbɔ alo nutomeɖoɖowɔlawo alo hadomeɖɔɖɔɖowɔla alo atikewɔlawo dzi o. Yesu Kristo si mee wode dɔ mae. Dzidzɔ ka gbegbee nye si wòanye ne ‘wova ɖe ameƒomea tso gbegblẽ ƒe kluvinyenye la me ayi ɖe mawuviwo ƒe ŋutikɔkɔe ƒe ablɔɖe la me’ mlɔeba!—Romatɔwo 8:21.

[Nɔnɔmetata siwo le axa 10]

Lãmesẽ anɔ amesiame si le Mawu ƒe xexe yeyea me