Míedo Dzaa na Wò Va “Mawu Ƒe Nya Fialawo” Nutome Gã Takpekpea!

AME MILIƆN GEÐEWO AYI ewɔƒe alafa geɖe le xexeame godoo. Wowɔ ɖoɖo ɖe takpekpe 189 ŋu le United States ɖeɖe dzaa. Woawɔ gbãtɔ tso May 18-20 dzi, eye woawɔ mamlɛa tso September 14-16 dzi. Anɔ eme be woawɔ ŋkeke etɔ̃ kpekpe siawo—tso Fiɖagbe vaseɖe Kwasiɖagbe—dometɔ aɖe le du si tsɔ kpuie ɖe gbɔwò me.

Woatsɔ haƒoƒo adze takpekpea gɔmee gbesiagbe le ŋdi ga 9:30 me. Le Fiɖagbe dzaadonamenuƒoa ƒoƒo vɔ megbe la, míase nuƒo siwo wotu ɖe Biblia me nyatiwo dzi, siwo nye “Fiaɖuƒe Nufiafia Tsea Ku Nyuiwo,” “‘Mawu ƒe Nu Dzɔtsuwo’ Ʋãa Mí,” kple “Kpɔ Dzidzɔ ɖe Yehowa ƒe Dzɔdzɔenyenye Ŋu.” Woatsɔ nuƒo tɔxɛ si ƒe tanyae nye “Wodzra Mí Ðo be Míanye Mawu ƒe Nya Fialawo” aƒo ŋdi kpekpea tae.

Le ŋdɔ me nuƒo gbãtɔ si nye “Wokɔ Wo Ŋuti Hena Dɔ Nyuiwo Wɔwɔ” yome la, míase nuƒo kpuikpui etɔ̃ siwo nye “Nufiafia Mía Ðokui Esime Míele Nu Fiam Ame Bubuwo.” Nuƒo siawo ate gbe ɖe nusiwo míeɖea gbeƒãe dzi wɔwɔ ƒe vevienyenye dzi le agbenyuinɔnɔ, ɖokuisi Biblia sɔsrɔ̃ kple alesi wòhiã be míatsi tre ɖe Abosam ƒe agbagbadzedzewo be yeable mí ŋu gome. Nuƒo si nye “Milé Fu Amamaɖeɖe Nuwɔnawo si Xɔ Aƒe ɖe Xexeame” akplɔe ɖo. Emegbe woaƒo ŋkekea ƒe wɔnawo ta kple Yesaya ta 60 me dzodzro si ƒe tanyae nye “Yehowa Tsɔ Kekeli Ðo Atsyɔ̃e na Eƒe Amewo.”

Memleɖagbe nuƒo siwo nye “Gbɔɖeme Kpɔkpɔ le Kristo ƒe Kɔkuti Te,” “Srɔ̃ Nufiala Gã La,” kple “Ðe Nèlɔ̃na be Yeasubɔ Amewoa?” ahe susu yi alesi wòle be míasrɔ̃ Kristo ƒe kpɔɖeŋui dzi. Woaƒo nuƒo kpuikpui siwo axɔ gaƒoƒo eve siwo ƒe tanyawo nye “Subɔla Siwo Dzi Amewo To Zu Xɔsetɔwo,” kple “Kpɔ Viɖe Bliboe tso Teokrasi Hehenana Me” le Memleɖagbe. Ŋdi me nuƒo kpuiawo aɖo aɖaŋu ku ɖe nusrɔ̃lawo wɔwɔ ŋu, eye ŋdɔ me nuƒoawo aku ɖe mɔ siwo dzi míato ate ŋu akpɔ viɖe bliboe tso Biblia sɔsrɔ̃ kple Kristotɔwo ƒe kpekpewo dede me ŋu. Woaƒo ŋdi me wɔna la ta kple nyɔnyrɔxɔxɔnuƒo, emegbe mɔnukpɔkpɔ asu amesiwo dze si be woana nyɔnyrɔ wo. Ame geɖewo adi vevie be yewoase Memleɖa ŋdɔ me nuƒo si nye “Nunana Yeyewo Hena Míaƒe Gbɔgbɔmeŋgɔgbedede” si aƒo ŋkekea ƒe wɔnawo ta.

Nuƒo kpuikpui etɔ̃ si me woadzro Maleaxi ƒe agbalẽa me le eye woafia alesi woazã emenyawo le míaƒe ŋkekea me anɔ Kwasiɖagbe ŋdi ƒe wɔnawo me. Esia yome drama si me wodo blemanuwo le, si ku ɖe Korax, Datan kple Abiram ƒe aglãdzedze ɖe ŋusẽ si Mawu na Mose ŋu akplɔe ɖo. Emegbe nuƒo aɖe aɖe nufiame si le dramaa me la me. Woaƒo dutoƒonuƒo si ƒe tanyae nye “Amekawoe Le Nyateƒea Fiam Dukɔwo Katã?” le ŋdɔ me.

Ðikekemanɔmee la, aɖe vi geɖe na wò le gbɔgbɔ me ne ède ŋkeke etɔ̃awo katã. Bia takpekpewɔƒe si tsɔ ɖe mia gbɔ le Yehowa Ðasefowo ƒe Fiaɖuƒe Akpata si le mia gbɔ me alo nàŋlɔ agbalẽ na magazine sia talawo. Woŋlɔ takpekpea wɔƒewo le Ghana, United States, Britain, Canada, Ireland, kple Malta ɖe February 15, 2001, ƒe Gbetakpɔxɔ me.