Biblia Ƒe Nukpɔsusu

Mɔ Vovovo Siwo Ðo Ta Mawu Gbɔe Subɔsubɔhawo Katã Nyea?

AGBALẼŊLƆLA Marcus Borg gblɔ be: “Mekpɔe be edzi manya xɔ se le go aɖeke me be xexeame katã ƒe Mawu naɖoe be subɔsubɔha ɖeka ko dzie woato anya ye o.” Nobel Ŋutifafa Nunanaxɔla Desmond Tutu gblɔ be: “Subɔsubɔha aɖeke mate ŋu aƒu asi akɔ be yewo sie xɔse ƒe nya ɣaɣla la ƒe nyateƒe bliboa katã le o.” Nukpɔsusu aɖe si le Hindutɔ geɖe si enye “Jotto moth, totto poth,” si gɔmeɖeɖe gbadzaa enye be mɔ vovovo siwo ɖo ta teƒe ɖeka ma ke koe subɔsubɔhawo katã nye. Nukpɔsusu sia ke tɔgbe le Buddhatɔwo hã si. Le nyateƒe me, ame miliɔn geɖe xɔe se be mɔ vovovo siwo ɖo ta Mawu gbɔe subɔsubɔhawo katã nye.

Ŋutinyaŋlɔla Geoffrey Parrinder gblɔ be: “Wogblɔna ɣeaɖewoɣi be taɖodzinu ɖekae le subɔsubɔhawo katã si, alo be mɔ vovovo siwo sɔ kple wo nɔewo, si kplɔa ame yia nyateƒea gbɔe wonye, alo kura gɔ̃ hã be nu ɖekae wo katã fiana.” Ele eme baa be subɔsubɔhawo ƒe nufiafiawo, kɔnuwo, kple dzixɔsewo ɖi wo nɔewo ya. Subɔsubɔha akpa gãtɔ ƒoa nu tso lɔlɔ̃ ŋu eye wofiaa nu be amewuwu, fififi, kple alakpadada nye nu gbegblẽ. Le subɔsubɔha akpa gãtɔ me la, ame geɖewo dzea agbagba vevie kpena ɖe ame ŋu. Eyata ne ame aɖe ka ɖe eƒe dzixɔsewo dzi bliboe eye wòdzea agbagba nɔa agbe nyui la, ɖe nane gagblẽ le subɔsubɔha si me wòanɔ ŋua? Alo mɔ vovovo siwo ɖo ta Mawu gbɔ koe subɔsubɔhawo katã nyea?

Kutrikuku Ðeɖe—Ðe Wòsɔ Gbɔa?

Bu ƒe alafa gbãtɔ me Yudatɔ aɖe si ŋkɔe nye Saul si va zu Kristotɔ apostolo Paulo ŋu kpɔ. Enye amesi tsɔ dzonɔameme nɔ megbe na Yuda-subɔsubɔ vevie si na be wòdze agbagba be yeatsrɔ̃ Kristo yomedzelawo ƒe tadedeagu, si wòbu be mesɔ o. (Dɔwɔwɔwo 8:1-3; 9:1, 2) Gake to Mawu ƒe amenuveve me la, Saul va kpɔe dze sii be amesiwo doa vevie Mawu subɔsubɔ abe ye ke ene hã ate ŋu awɔ vodada le nyateƒe bliboa manyamanya ta. (Romatɔwo  10:2) Esi Saul va srɔ̃ nu geɖe tso Mawu ƒe lɔlɔ̃nu kple alesi wòwɔa nui ŋu vɔ la, etrɔ eye wòva de ta agu kple amesiwo tututu yome tim wònɔ—siwo nye Yesu Kristo yomedzelawo.—Timoteo I, 1:12-16.

Ðe Biblia gblɔ be xɔse alafa nanewo li siwo dome wòle be woatia ɖe le eye be ɖesiaɖe si wonya tia ko adze Mawu ŋua? Mɔfiame siwo apostolo Paulo xɔ tso Yesu Kristo si wofɔ ɖe tsitre gbɔ la fia be menye nenemae kura o. Yesu dɔ eyama ɖe dukɔwo gbɔ “be [wòaʋu] woƒe ŋkuwo, bena woatrɔ atso viviti me ava kekeli me, eye tso Satana ƒe ŋusẽ me ava Mawu gbɔ.” (Dɔwɔwɔwo 26:17, 18) Eme kɔ ƒã be tiatia si míewɔna le subɔsubɔ gome le vevie. Amesiwo gbɔ woɖo Paulo ɖo dometɔ geɖe nɔ ha aɖe me xoxo. Gake wole “viviti” me. Le nyateƒe me, ne ɖe subɔsubɔhawo katã nye mɔ vovovo siwo ɖo ta agbe mavɔ me eye wodzea Mawu ŋu la, anye ne magahiã be Yesu nana hehe eyomedzelawo ɖe nusrɔ̃lawo wɔwɔ dɔ si wòde wo si la ŋu o.—Mateo 28:19, 20.

Yesu gblɔ le eƒe Todzimawunya xɔŋkɔ la me be: “Miyi ɖe agbo bii la me; elabena agbo la keke, eye mɔ la le gbadza, si kplɔa amewo yina ɖe tsɔtsrɔ̃ me, eye ame geɖewo nye amesiwo le edzi yina ɖe eme. Elabena agbo la le biie, eye mɔ la hã xaxa, si kplɔa amewo yina ɖe agbe la me, eye ame ʋɛwo nye amesiwo kpɔnɛ.” (Mateo 7:13, 14) Biblia la gblɔe kɔte be “xɔse ɖeka” koe li. (Efesotɔwo 4:5) Edze ƒã be amesiwo le mɔ “gbadza” la dzi dometɔ geɖe le subɔsubɔha aɖe me. Gake “xɔse ɖeka” la mele wo si o. Esi wònye nyateƒe tadedeagu ɖeka ƒomevi koe li ta la, ele be amesiwo katã le edim la nadi eyomemɔ.

Di Mawu Vavã La

Tso ameƒomea ƒe ŋutinya ƒe gɔmedzedzea me ke la, Mawu gblɔ nusi wòdi be woawɔ la na amewo. (Mose I, 1:28; 2:5-17; 4:3-5) Egbea woɖe eƒe nudidiwo fia wo me kɔ ƒã ɖe Biblia me. Esia wɔe be míate ŋu anya tadedeagu si dze Mawu ŋu kple esi medze eŋu o. (Mateo 15:3-9) Ðe wodzi ame aɖewo ɖe ha si me wole me, gake ɖeko ame bubuwo ya ge ɖe subɔsubɔha si me woƒe nuto me tɔ akpa gãtɔ le me ko. Le ame geɖe gome la, ɣeyiɣi si me wodzi wo kple afisi wodzi wo ɖoe na be wole subɔsubɔha si me wole me ɖo. Gake ɖe wòle be nànɔ subɔsubɔha aɖe me eŋu mabumabui alo nàna ame bubuwo natiae na wòa?

Ele be nàtsɔ sidzedze atia subɔsubɔha si me nànɔ lae eye nàtui ɖe Ŋɔŋlɔawo me dzodzro tsitotsito dzi. Le ƒe alafa gbãtɔ me la, ame aɖewo siwo si sidzedze su mexɔ nya si Paulo gblɔ na wo la ko o. ‘Wotsɔ beléle dzroa Ŋɔŋlɔawo me gbesiagbe be nusiawo le eme hã.’ (Dɔwɔwɔwo 17:11; Yohanes I, 4:1) Nukata wò ŋutɔ màwɔe nenema ke o?

Biblia gblɔ le xexeame katã ƒe Mawu ŋu be ele amesiwo asubɔe le nyateƒe me la dim. Abe alesi wòdze le Yohanes 4:23, 24 ene la, Yesu ɖe nu me be: ‘Gake gaƒoƒo gbɔna, eye wòde azɔ, esi nyateƒe tadeagulawo ade ta agu na Fofo la le gbɔgbɔ kple nyateƒe me; elabena Fofo la dia tadeagula siawo tɔgbe. Mawue nye gbɔgbɔ, eye amesiwo le ta dem agu nɛ la, ele be woade ta agu le gbɔgbɔ kple nyateƒe me.’ “Mawusubɔsubɔ, si ŋuti kɔ, eye ɖiƒoƒo aɖeke mele eŋu le Mawu Fofo la ŋku me o,” la koe dzea eŋu. (Yakobo 1:27) Mawu yra ɖe ame miliɔn nanewo ƒe agbagbadzedze be yewoadi mɔ xaxɛ si yi agbe me la dzi. Mana agbe mavɔ ɖekematsɔlemetɔwo o, amesiwo dzea agbagba vevie anukwaretɔe be yewoake ɖe mɔ xaxɛ si wòɖo ɖi ŋu hezɔna edzi koe wòanae.—Maleaxi 3:18.