Modzakatsaɖiɖi Le Ghana

ETSO NYƆ! ŊLƆLA SI LE GHANA GBƆ

MÍEDZE míaƒe mɔzɔzɔ si ɖo ta Dukɔa ƒe Lãwo Kpɔƒe si le Ghana ƒe Gbegãdzi Nutome, le Mole, la ƒe mɔ si womedo kple aŋɔ o si didi wu kilometa 80 la gɔme vivivi, esime xexeame nɔ kɔkɔm eye wòsusɔ vie ŋu nake. Dzogbenyigba si dzi avekɔe siwo me ati siwo mekɔ boo o le koŋue bɔ ɖe nutoa me. Ɣeaɖewoɣi la, míetoa kɔƒe siwo me wotsɔ anyi tu xɔwoe eye wotsɔ be gba wo la ŋu yina.

Aleke gbegbe nuwo trɔe nye esi, esi míekpɔ, fiasewo, aŋɔmɔwo, eye míese mɔzɔlawo kpakple ʋuwo ƒe hoowɔwɔ si nɔ ɖiɖim esime míeva ɖo Damongo, si nye kɔƒenutomedu la me! Ðevi siwo do woƒe sukuwu siwo le hẽ la hã yina ɖe suku. Nyɔnu siwo ta avɔ siwo nɔ amadede dzeaniwo me dro agba vovovowo ɖe ta—nake, nuɖuɖu ƒomeviwo, kple tɔmedegbawo. Ʋuwo kple anyigbadzobomɔ̃wo ƒe kpẽkuku nɔ ɖiɖim eye gasɔdolawo hã va nɔ yiyim. Kilometa 20 ƒe mɔ ganɔ mía ŋgɔ.

Le Dukɔa ƒe Lãwo Kpɔƒe si Le Mole Me

Mlɔeba míeva ɖo abɔa me. Abɔa me mɔfiala Zechariah gblɔ be wotso Mole Lãwo Kpɔƒe bɔ sia si ƒe lolome nye kilometa 4,840 togodo le ƒe 1971 me. Lã siwo naa no wo viwo hamehame 93, lã siwo te ŋu nɔa godzi kple tɔme siaa ƒomevi vovovo 9, kpakple nutata hamehame 33 ye wode dzesii le abɔa me. Wo dometɔ aɖewoe nye dzata, lãkle, gana siwo le ŋɔtaŋɔta, dzogolowo, atiglinyiwo, sẽwo, tòwo, gbehawo, ziwo, ahlɔ̃ewo, gbedadiwo, sãdewo, aglãwo, takpawo, fĩe ƒomevi vovovowo, avugbɔe ƒomeviwo, hlɔ̃made, lo, kple da ƒomeviwo siwo me ʋɔwo hã le. Gakpe ɖe eŋu la, wode dzesi xe ƒomevi 300 hã.

Míeva ke ɖe avugbɔeha aɖe ŋu esime míenɔ zɔzɔm nɔ voewo ƒom to gbe si kɔ ɖo klo nu la me. Esesẽ ŋutɔ be míade dzesi avugbɔeawo  zi gbãtɔ elabena woƒe amadede sɔ kple gbe si ƒo xlã wo tɔ. Esi míenɔ wo kpɔm la, woawo hã nɔ mía kpɔm tututu ale be màganya amesi le nɔvia kpɔm o. Lã aɖe xlɔ̃ sesĩe le míaƒe ɖusikpa dzi si na míeɖi vo, esime míenɔ foto ɖem. Zi gã aɖe ŋue míeke ɖo, eye esi ɖo gbe enumake esi wòkpɔ be míenɔ tetem ɖe ye ŋu.

Míegava ke ɖe atiglinyi gã ene ŋu le ati gã aɖe te. Wonɔ atilɔawo bim kple woƒe ɖɔ henɔ aŋgba siwo le eŋu la ɖum. Míete ɖe wo ŋu, eye esi míenɔ abe meta 10 ko ene tso wo gbɔ la, Zechariah de dzi ƒo na mí be míaɖe foto wo. Eƒo eƒe tu si wòlé ɖe abɔta ƒe zɔ tsɔ nya atiglinyiawo ɖa le atia gɔme si na be foto si míegaɖe wo ganyo wu. Atiglinyiawo kpɔ bateƒe aɖe si medidi boo tso afima o eye woge ɖe tsia me. Zechariah ɖe nu me na mí be atiglinyiawo ƒe amadede te ŋu trɔna—amadede yibɔ si le wo ŋu la te ŋu biãna alo zua hẽ—le tsi bublu si wolena ƒe amadede nu.

Míeɖe zɔ yi ŋgɔ vie eye míekpɔ abɔa ƒe nɔnɔme katã. Ati siwo le afisia ƒe ɖewoe nye zangara kple yɔkutiwo. Míeto afisi tututu atiglinyiawo to  esi míetrɔ gbɔna. Wogakpɔtɔ nɔ adzɔge ɖaa gake atiglinyi lolotɔ, wu to ɖe dzi wɔ abe ɖe wòdi be yealé mí ene eye wòlũ ɖe mía dzi. Ðe wòdi be yealé mía?

Zechariah gblɔ na mí be míaɖe dzi ɖi, gake eɖe tu si nɔ abɔ nɛ eye wòkplɔ mí dzoe le mɔ si dzi atiglinyia nɔ la. Míegakpɔtɔ nɔ azɔlia dzi esime míaƒe mɔfiala galé eƒe tua ɖe asi—eye míaƒe fotoɖemɔ̃awo le mía si—eye míenɔ klalo hena ezazã. Eteƒe medidi hafi atiglinyia bu ɖe mí o.

Zechariah ɖe nu me na mí be abɔa me tiglinyiawo nya amewo eye be wo dometɔ aɖewo te ŋu tena ɖe ame ŋu kplikplikpli gɔ̃ hã. Ne míedo go atiglinyiawo edziedzi la, mɔfialaawo tsɔa ŋkɔ na wo. Woyɔ ɖeka be Knobby (Ŋutitokɔtɔ) elabena eto kɔ gã aɖe. Woyɔ atiglinyi bubu hã be Action (Amesi tsona ɖe nu ŋu, Avuwɔla) elabena elɔ̃a ŋɔdzidodo na modzakaɖetsaɖilawo.

Emegbe míeva ke ɖe takpa aɖewo ŋu. Míenɔ wo kpɔm esi wonɔ aba dam le ati dzi alo nɔ du ƒum le anyigba. Míaƒe mɔfiala la fia takpa vinɔ aɖe si kɔ vi eve mí, ekpa ɖeka ɖe dzime eye wòlé evelia ɖe akɔta. Egblɔ be venɔviwoe wonye.

Nyateƒee, míekpɔ gbemelã gbogbo aɖewo gbemagbe. Zechariah gblɔ na mí be ne èdi be yeakpɔ lãawo le dzomeŋɔli—si nye tso April kple June dome—la, ɖeko nàlala le do siwo me tsi dzina ɖo gbɔ elabena wonɔa ha me va noa tsi le afima. Egagblɔ hã be ate ŋu akpɔ lã bubu geɖe siwo ƒe ɖewoe nye tò kple dzata nyuie ne èle ʋu me ɖi tsa le abɔa me.

Ŋdɔnuɖuɣi ɖo azɔ. Esi míenɔ nu ɖum la, takpa gã aɖe va tɔ ɖe ʋu takpo aɖe si tɔ ɖe mía tɔ gbɔ tututu la gbɔ eye wònɔ míaƒe nuɖuɖua me kpɔm tututu. Takpa bubuwo hã va nɔ mía xa tom tsɔ kpe ɖe avugbɔe, kple gbeha kpakple mlɔeba atiglinyi ene siwo nɔ togbɛ aɖe si te ɖe mía ŋu dzi la ŋu. Ðewohĩ esia anye mɔ bɔbɔetɔ si dzi míato aɖe foto lã siawo!

Le Asime

Ɣeyiɣi si míetsɔ nɔ Dukɔa ƒe Lãwo Kpɔƒe si le Mole la nɔ kpuie akpa, gake míeku ʋu azɔ hezɔ gaƒoƒo eve ƒe mɔ si womedo kple aŋɔ o heɖo ta Sawla, si nye Lobitɔ siwo  nye agbledelawo ƒe kɔƒedu aɖe me. Enye afisia tɔwo ƒe dekɔnu wɔmoya aɖe be woƒe nyɔnuwo hea woƒe nuyi be wòadidi ahakeke ɖe edzi. Togbɔ be egbegbe ŋkuʋuʋu wɔe be nyɔnuviwo megalé kɔnyinyi sia me ɖe asi o hã la, nyɔnu geɖe gadana kokoko ɖe woƒe nuyi ƒe lolome dzi. Le nyateƒe me, wobui be enye dzu be woagblɔ na Lobi-nyɔnu be eƒe nuyi le kpuie abe ŋutsu tɔ ene.

Míeɖo kɔƒedu aɖe me eye míeyi ɖe woƒe asime. Wotsɔ ati tu woƒe asimegbadɔwoe eye wotsɔ be gbãe. Yevu ŋutsu aɖe tɔ ɖe asia me le Afrika-meyibɔawo dome. Míete ɖe eŋu eye míese be nyitsɔ laa koe wòva be yeaɖe Biblia gɔme ɖe Lobigbe me. Eva le Lobitɔawo dome le kɔƒedu aɖe si gogo afima me be wòate ŋu asrɔ̃ woƒe gbea dodo memie. Ena meɖo ŋku Robert Moffat si yi nyanyuikakadɔwɔƒe le Tswanagbedolawo dome le Afrika ƒe anyiehe le ƒe alafa 19 lia me eye wòɖe Biblia gɔme ɖe afima tɔwo ƒe gbe me la dzi.

Lobi nyagãɖeɖi aɖe si ƒe nuyi wohe wòdidi helolo la bɔbɔ nɔ bentsi dzi le asimegbadɔ aɖe te. Etra ati gbabɛ ɣi eve siwo ƒe lolome le abe degblefetsu ene ɖe do si le nuyiawo kple eve me. Medi be maɖe fotoe gake edzo enumake esi metsɔ fotoɖemɔ̃a. Zɔhɛnyeawo dometɔ ɖeka ɖe nu me nam be Lobi nyagãwo xɔe se be nuvevi ava wɔ yewoƒe luʋɔ ne ame aɖe ɖe foto yewo.

Mebu Mawu ƒe nunya si dze le eƒe nuwɔwɔ vovovo siwo míekpɔ me la ŋu, esi míetrɔ gbɔna ɖe Sawla, si nye afisi míetsi dɔ. Etsɔ aɖaŋu blibo wɔ lãwo kple amegbetɔwoe. Ðeko wòle abe alesi hakpala gblɔe ene be: “Yehowa, wò dɔwɔwɔwo sɔ gbɔ loo! Èwɔ wo katã le nunya me; anyigba yɔ fũ kple wò nuwɔwɔwo.”—Ps. 104:24.

[Anyigbatata si le axa 24, 25]

(Edze nyuie le agbalẽa ŋutɔ me)

GHANA

[Nɔnɔmetata si le axa 24]

Gbeha

[Nɔnɔmetata si le axa 24]

Gana Ŋɔtaŋɔta

[Nɔnɔmetata si le axa 25]

Avugbɔeha

[Nɔnɔmetata si le axa 25]

Atiglinyi

[Nɔnɔmetata si le axa 25]

Tɔmenyi

[Nɔnɔmetata si le axa 26]

Takpa vinɔ si kpa vi eve

[Nɔnɔmetata si le axa 27]

Sẽ

[Nɔnɔmetata si le axa 27]

Asia me