Seƒoƒowo Nɔƒe Tɔxɛ Aɖe
Seƒoƒowo Nɔƒe Tɔxɛ Aɖe
ETSO NYƆ! ŊLƆLA SI LE SOUTH AFRICA GBƆ
ESI ƒe alafa 18 lia me numiemieŋutinunyala Carolus Linnaeus ɖe seƒoƒo aɖewo siwo le Afrika ɖe hatsotso me vɔ la, egblɔ le teƒe si wokpɔ wo tsoe ŋu be “anyigba dzi paradiso ma, Cape of Good Hope si Wɔla Dɔmenyotɔ la tsɔ Eƒe nu nyuitɔwo ɖo atsyɔ na.”
Nu nyuitɔ siawo siwo wòwɔnɛ la le teƒe aɖe si le Afrika ƒe anyiehe nuwuƒe lɔƒo. Netherlandstɔ siwo va nɔ afima na ŋkɔ numiemie si bɔ ɖe nutoame wu be fijnbosch, si gɔmee nye “ati wusɛ” (fine bush le Eŋlisigbe me) alo “ati suewo.” Esi nya fijn fia “sue” ta la, anye alesi aŋgbaawo le sue kple alesi nutoa me numiemiewo ƒe atiwo le lɛɛ ye wowɔnɛ. Le ɣeyiɣi aɖe megbe la, nya fijnbosch va zu “fynbos.” Numiemie siwo le Fynbos nutoa me ƒe aŋgbawo te ŋu nɔa sue hesẽna, gake seƒoƒoawo ƒe lolome, amadede, kple woƒe nɔnɔme nya kpɔna ŋutɔ.
Fynbos nutoa le seƒoƒowo ƒe nuto si to vovo kura tso bubu siwo le xexeame gbɔ la dome—si nye Cape Seƒoƒo nutoa. * Togbɔ be teƒe sue aɖe koe nuto sia xɔ hã la, enye teƒe si numiemie ƒomevi gbogbo aɖewo le—nyatakaka aɖe ɖee fia be wosɔ gbɔ wu 8,550—eye wo memama etɔ̃ ƒe akpa eve mele xexeame ƒe akpa bubu aɖeke woakpɔ o.
Numiemie ƒomevi vovovo 1,470 sɔŋ ye wode dzesi le Table-to ɖeɖe dzi! Wogblɔ le New Scientist magazine me be “esia sɔ gbɔ wu esiwo le Britain Ƒukpowo katã dzi.” Azɔ hã, Fynbos nuto sia kpɔ ŋusẽ geɖe ɖe xexeame ƒe akpa bubuwo dzi. Le mɔ ka nu?
Seƒoƒo Hamehame Wɔnukuawo
Ne seƒoƒo si woyɔna be geranium le fesreti dzi na wò la, ke anye be esiwo tso Fynbos nutoame dometɔ ɖekae wòanye. Le wo ƒomevi vovovo 250 siwo dzɔna le wo ɖokuisi le anyigba dzi dome la, wo memama etɔ̃ ƒe akpa eve kple edzivɔ le Fynbos nutoa me.
Gakpe ɖe eŋu la, Iridaceae-seƒoƒo 1,800 ƒe memama etɔ̃liae le afisia, eye gladioli 72 kple edzivɔ si megale xexeame ƒe akpa aɖeke o la le wo dome. Le esiwo nye daisies kple vygies gome la, wo ƒomevi vovovo 1,646 ye le Afrika ƒe anyiehekpa sia dzi. * Esiwo melɔ̃na yrɔna o, siwo ƒe amadede ganɔa wo ŋu wozãna ƒe geɖe tsɔ ɖoa atsyɔ̃e ne woƒu gɔ̃ hã la le wo dome.
Gake nusi ɖe dzesi wu le Fynbos nutoa me ŋue nye seƒoƒo si woyɔna be erica, alo heath. Awɔ mo yaa na wò be le erica ƒomevi vovovo 740 siwo le xexeame katã la, wo dometɔ 625 le Fynbos!
Sukligbe Kple Suklixe
Linnaeus lé ŋku ɖe Fynbos ƒe seƒoƒo hatsotso aɖe si si nɔnɔme wɔnuku vovovo le ŋu. Ena ŋkɔ wo be Protea (ele Proteaceae hatsotso me), si nye Helatɔwo ƒe mawu Proteus si wosusu be etrɔna ɖe nɔnɔme vovovo me la ƒe ŋkɔ. Proteas vovovo 328 ye dzɔ tso Fynbos nutoa me. Dzidzɔ gã ŋutɔe wòanye be nànɔ tsa ɖim le Cape towo dome ko ake ɖe protea ƒe lolotɔ kekeake ŋu! Eƒe seƒoƒo dzeania lolona wua amegbetɔ ƒe mo ɣeaɖewoɣi.
Protea ƒomevi bubu si bɔ enye “sukligbe.” Ati sia ƒe seƒoƒowo nɔna abe kpluwo ene, eye tsi vivi gbogbo aɖe dzina ɖe wo me. Ame gbãtɔ siwo va nɔ afima trɔa seƒoƒoawo me tsi vivi ɖe ganu me, eye emegbe woɖanɛ wòzua nunono.
Cape ƒe suklixe—Fynbos nutome ɖeɖekoe xe sia le—eye wòlɔ̃a proteas ƒe tsi vivia ale gbegbe. Suklixea tsɔa eƒe dɔ kple aɖe legbea noa seƒoƒoa me tsi vivia, eye dɔmenyo si eya hã wɔnae nye be etsɔa seƒoƒo ŋu ʋuʋudedi tsoa seƒoƒo ɖeka ŋu yia bubu dzi—enye dɔ nyui aɖe si nana atiwo te ŋu tsena. Gakpe ɖe eŋu la, suklixea fɔa nudzodzoe siwo va nɔa seƒoƒo gã siawo ŋu la mina. Alea wɔ be xea kple seƒoƒoa hiã wo nɔewo ƒe kpekpeɖeŋu hafi woate ŋu anɔ agbe.
Kpekpeɖeŋunana Vevi Bubuwo
Protea seƒoƒo aɖewo gogo anyigba ŋutɔ ale be woɣla ɖe numiemie bubuwo te. Ʋeʋẽ lilili si nɔa protea siawo ŋu nana afiwo mevɔna le egbɔ o. Afiawo ƒoa ta ɖe seƒoƒoawo me eye wonoa wo me tsi, eye emegbe wotsɔa seƒoƒo ŋu ʋuʋudedi siwo lé ɖe woƒe fuwo ŋu la yia protea seƒoƒo bubuwo gbɔe. Eyata kpekpeɖeŋunana sia le gbefi kple protea dome hena woƒe agbe nɔnɔ.
Kpekpeɖeŋunana sia tɔgbee le seƒoƒo si nye erica kple agoɖitsi si ƒe akɔta ƒe amadede nye aŋutiɖiɖi, si le Fynbos nuto ɖeɖeko me la dome. Le alesi seƒoƒoawo bi gɔdɔ̃e ta la, wosɔ nyuie na agoɖitsia ƒe dɔ. Ne xea ƒo dɔ ɖe seƒoƒoa me be yeano eme tsi la, seƒoƒo ŋu ʋuʋudedi kɔna ɖe eƒe ta ŋu. Le ƒe bliboa me la, erica ƒosewo kpɔa agoɖitsia ƒe nuhiahiãwo gbɔ, eye xea ƒe dɔ si nana atiwo te ŋu tsena ɖea vi na numiemieawo hã. Adzɔ dzi na wò ŋutɔ ne ànɔ zɔzɔm le to aɖe ŋu ko akpɔ nuwɔwɔ aduadu wɔnuku sia!
Nugbagbe bubu geɖe aɖewo hã hiã le Fynbos. Le kpɔɖeŋu me, kpakpaluʋui ƒomevi aɖe si woyɔna be Table-to ŋu ƒe atsyɔ̃ la koŋue nana seƒoƒo dzẽ hamehame 15 tsea ku. Seƒoƒo siawo dometɔ si wonya wu enye disa, si ɖoa atsyɔ̃ na Table-toa.
Azɔ hã, alegeli ƒomevi aɖewo li siwo ɖua numiemie hatsotso siwo nye orchid, dzogbenya, kple iris ƒe ke siwo nɔa nogoo. Cape alegeliawo tsɔa seƒoƒoawo ƒe ke kakɛwo ɖadzrana ɖo ɖe woƒe dowo me. Esiwo ge le mɔ dzi alo susɔ ɖe doa me si womete ŋu ɖu o la va toa ke hemiena.
Lã wɔami sɔ gbɔ aɖe nɔa Fynbos numiemie alafa geɖe ƒe kuwo ŋu siwo ƒe ʋeʋẽ anyidiwo mesena toa wo ŋu o. Ne anyidiwo kpɔ “léƒe” na ku siawo vɔ la, wohea wo yia tomee. Emegbe anyidiawo ɖua lã bɔbɔe siwo le kuawo ŋu hegblẽa ku sesẽawo ɖi. Ne edzɔ alea la, ku siwo tsi tome eye xewo kple afiwo mekpɔ o la miena emegbe.
Azɔ hã tagbatsu aɖewo hã li siwo si dɔ didi ƒomevi aɖe le. Tagbatsu siawo te ŋu nana Fynbos numiemie siwo ƒe seƒoƒowo me globo la tsea ku ŋutɔ. Tagbatsuawo dometɔ aɖe ƒe dɔ ƒe didime ade sentimeta 7.6. Nyateƒee, nuwɔwɔ aduadu alea le vevie bene nuwo nanɔ agbe le Fynbos!
Ƒomedodo Madeamedzi Aɖe
Nutoameŋutinunyala T. F. J. van Rensburg gblɔ le agbalẽ si nye An Introduction to Fynbos me be: “Ewɔ nublanui be Amegbetɔ si wotsɔ ɖo Nuwɔwɔwo nu gbɔe wòtso le go geɖe me be wogblẽ anyigba ƒe akpa aɖewo dome.” Nyateƒee, wotsrɔ̃ teƒe geɖe le ɣeyiɣi kpui aɖe ko me abe alesi Ðk. Piet van Wyk gblɔe ene be: “Anye ƒe 300 tso esime dutatɔwo va la, amegbetɔ ma fynbos ƒe agamenyigbawo kakɛkakɛ eye wotrɔe ale gbegbe be fynbos nutoa me numiemie . . . siwo nɔ anyi tso gɔmedzedzea me ƒe alafa memama 31 koe gasusɔ. Wobu mo na fynbos numiemie hamehame 39 xoxo, eye menye ŋɔdzi mee 1,033 bubu aɖewo ɖo fifia o ke womegabɔ kura o.”
Amegbetɔ ƒe nuwɔnawo ate ŋu agblẽ kpekpeɖeŋu si Fynbos lãwo kple numiemiewo naa wo nɔewo la dome. Edze le agbalẽ si nye Table Mountain—A Natural Wonder me be: “Azɔ koe nugbagbewo kple wo nɔƒewo ŋutinunyala va le ƒomedodo manyatalenu si le fynbos lãwo kple numiemiewo dome gɔme sem. Ne numiemie aɖe megava li o la, ɖe lã siwo kpena ɖe eŋu wòtsea ku (afi ƒomeviwo, kpakpaluʋui kple adoŋgo), hã nu ayia?” Ke xe siwo le Fynbos hã ɖe? Le South Africa nugbagbeŋutinunyala C. J. Skead ƒe nya nu la, suklixewo ƒe agbenɔnɔ ɖo afɔku me le “kadodo kplikplikpli si le wo kpakple Protea ƒomeviwo dome ta.”
Nyatakaka ɖefuname ma tɔgbe si ku ɖe Fynbos nutoa me ŋu nye nusi ŋu woatsi dzi ɖo. Ke hã la, mɔkpɔkpɔ li hã na amesiwo le abe Linnaeus ene, siwo xɔa “Wɔla Dɔmenyotɔ la” dzi se. Elabena míate ŋu aka ɖe edzi be anyigba agawɔ nu eye wòaƒo se wu tsã ne Yehowa Mawu wɔ eƒe ŋugbedodo dzi eye ‘wòwɔ nuwo katã yeyee.’—Nyaɖeɖefia 21:5.
[Etenuŋɔŋlɔwo]
^ mm. 5 Woma xexeame katã ɖe seƒoƒo ƒe nuto ade me. Numiemie tɔxɛ siwo le nuto siawo me dzie numiemieŋutinunyalawo nɔa te ɖo dea dzesi nutoawo. Nuto si ƒo xlã South Africa ƒe Ƒutatoa (Cape) hã nye nuto ade siawo dometɔ ɖeka.
^ mm. 9 Daisies le seƒoƒo hatsotso si nye Asteraceae me, eye vygies, si nye alesi woyɔna na mesems le nutoa me, hã le Mesembrynathemum ƒe hatsotsoa me.
[Anyigbatata siwo le axa 16]
(Edze nyuie le agbalẽa ŋutɔ me)
Fynbos Nutoa me (edze le amadede mumu me)
Table-to
[Afi Si Míexɔ Mɔɖeɖe Tso]
Mountain High Maps® Copyright © 1997 Digital Wisdom, Inc.
[Nɔnɔmetata si le axa 16]
“Gladiolus” seƒoƒo 72 siwo megale anyigba ƒe akpa aɖeke o dometɔ ɖeka ƒe tata
[Afi Si Míexɔ Mɔɖeɖe Tso]
Una Coetzee (www.agulhasfynbos.co.za)
[Nɔnɔmetata si le axa 16]
“Protea” seƒoƒo aɖewo keke wu ame ƒe mo
[Afi Si Míexɔ Mɔɖeɖe Tso]
Nigel Dennis
[Nɔnɔmetata si le axa 16, 17]
Le Table-to ɖeɖe dzi la, wode dzesi numiemie hamehame 1,470
[Nɔnɔmetata si le axa 16, 17]
“Strawberry” seƒoƒo si melɔ̃na yrɔna o
[Afi Si Míexɔ Mɔɖeɖe Tso]
Nigel Dennis
[Nɔnɔmetata si le axa 17]
“Daisy” ƒomevi geɖe siwo le Fynbos dometɔ ɖeka
[Afi Si Míexɔ Mɔɖeɖe Tso]
Kirstenbosch, Cape Town
[Nɔnɔmetata si le axa 17]
Table-to ƒe kpakpaluʋui dzeania koŋue wɔnɛ be seƒoƒo dzẽ ƒomevi 15 tsea ku
[Afi Si Míexɔ Mɔɖeɖe Tso]
Colin Paterson-Jones
[Nɔnɔmetata si le axa 17]
Pincushion protea
[Afi Si Míexɔ Mɔɖeɖe Tso]
National Parks Board of South Africa
[Nɔnɔmetata si le axa 18]
Kadodo tɔxɛ aɖe le “erica” seƒoƒo kple agoɖitsi dome
[Afi Si Míexɔ Mɔɖeɖe Tso]
Colin Paterson-Jones
[Nɔnɔmetata si le axa 18]
“Proteas” seƒoƒo kple Cape suklixe nye xɔlɔ̃ veviwo
[Afi Si Míexɔ Mɔɖeɖe Tso]
Kirstenbosch, Cape Town
[Nɔnɔmetata si le axa 18]
“Watsonia” seƒoƒo
[Afi Si Míexɔ Mɔɖeɖe Tso]
Kirstenbosch, Cape Town
[Nɔnɔmetata Tsoƒe si le axa 18]
National Parks Board of South Africa