Lɔlɔ̃nu Faa Dɔwɔlawo Le Dɔ Dzi

LE Fiɖa ɖesiaɖe ƒe ɣetrɔ me la, Sirley, si le eƒe ƒe blaeneawo me, eye wònye nufiala le Brazil tsɔa eƒe akpata me wɔa sukuxɔ mee. Amélia si nye sukuviawo dometɔ ɖeka va ɖoa afima le ga eve me lɔƒo. Nusɔsrɔ̃ ɖeka hɔ̃ hã metoa eŋu o eye fifia ete ŋu xlẽa nu wu sɔhɛ siwo le suku kɔkɔ dem dometɔ geɖe gɔ̃ hã. Amélia xɔ ƒe 82.

Amélia le dukɔ ma me nɔla tsitsi 60 kple edzivɔ, siwo wu agbalẽsɔsrɔ̃suku femaxee si Sirley nɔa wɔwɔm le wode nu la ƒe afɔtoƒewo tom. Nyitsɔ laa la, wota Sirley ƒe lɔlɔ̃nu faa dɔa ŋu nya ɖe Braziltɔwo ƒe nyadzɔdzɔgbalẽ si nye Jornal do Sudoeste me. Esi wogblɔ le nyadzɔdzɔgbalẽa me be dɔ si Sirley wɔ “ɖe vi nyui aɖe ŋutɔ le nutoa me tɔwo ƒe agbenɔnɔ me” vɔ la, wogagblɔ be mɔ si dzi wòtona fiaa nu ame tsitsiawo wɔ dɔ ale gbegbe be “le gaƒoƒo 120 dzaa ko ƒe sukuxɔ me nɔnɔ megbe la, wote ŋu le lɛta ŋlɔm, le nyadzɔdzɔgbalẽwo xlẽm, eye wote ŋu le akɔnta bum hele gbesiagbenuwɔna bubuwo wɔm.” Nyadzɔdzɔgbalẽa gblɔ kpee be, nusrɔ̃gbalẽ si Sirley zãna enye Learn to Read and Write gbalẽvi (Srɔ̃ Nuŋɔŋlɔ Kple Nuxexlẽ), si Yehowa Ðasefowo ta. *

Agbenɔnɔ Bubutɔe Xɔ ɖe Ŋukpe Teƒe

Sirley ƒe nusrɔ̃viwo dometɔ ɖeka, Dona Luzia, si xɔ ƒe 68 gblɔ be, hafi yeava srɔ̃ nuxexlẽ kple nuŋɔŋlɔ la, ekpea ŋu na ye be yeaɖo dze kple amewo. Nuƒeƒle le asime kura nyea nu sesẽ nɛ. Egblɔ kple nukomo be: “Fifia mete ŋu ŋlɔa lɛta na ƒonyemetɔ siwo le duta, eye nye ŋutɔe kpɔa nye ga dzi. Ame aɖeke megabaam le gagbagba me azɔ o.” Maria si hã xɔ ƒe 68 ɖo ŋku alesi wòkpea ŋu nɛ be wòtsɔa eƒe degblefetsu dea  asi eƒe dzudzɔxɔxɔledɔme ƒe gaxɔgbalẽvi tee la dzi. Egblɔe be “Ðeko wòwɔna nam be wɔametɔe menye.” Gake agbalẽsɔsrɔ̃sukua kpe ɖe eŋu be fifia la, Maria te ŋu ŋlɔa eya ŋutɔ ƒe ŋkɔ.

Kafukafunya siwo gblɔm sukua delawo kple enuwulawo le la na Sirley ƒe nufiafia la dze ame geɖe ŋu ale gbegbe be eƒe akpata me le yɔyɔm gba go. Eteƒe madidi o, wogbɔna sukua wɔ ge le teƒe bubu si lolo wu.

Wɔna si Ta Woxɔ Nunana Ðo

Sirley nye Yehowa Ðasefo. Ðikeke mele eme o be ènya nu tso Biblia-fiafiadɔ si Yehowa  Ðasefowo wɔna wònye lɔlɔ̃nu faa dɔ ŋu. Ke hã la, menye Sirley ɖeka koe le dzidzedze kpɔm le dɔ sia wɔwɔ me o. Agbalẽsɔsrɔ̃suku alafa nane siwo wowɔna le Fiaɖuƒe Akpatawo me le Brazil katã la kpe ɖe amesiwo wu 22,000 ŋu xoxo le dukɔ ma me be wonya nuxexlẽ kple nuŋɔŋlɔ.

Yehowa Ðasefowo ƒe ɖoɖo siawo tɔgbe kpɔ dzidzedze le xexeame ƒe akpa bubuwo hã. Le kpɔɖeŋu me, le Afrika-dukɔ si nye Burundi me la, Dukɔa ƒe Ame Tsitsiwo ƒe Agbalẽnyanya Dzikpɔƒe (si nye Sukudede Dzikpɔƒea ƒe alɔdze) kpɔ dzidzɔ ɖe nusi do tso Ðasefoawo ƒe agbalẽsɔsrɔ̃sukua me ŋu ale gbegbe be wona nu sukua ƒe nufiala ene ɖe “dɔ sesẽ si wowɔ tsɔ fia nu ame bubuwo be woanya nuxexlẽ” ta. Nusi koŋue wɔ dɔ ɖe dziɖuɖumegãwo dzie nye be amesiwo nya nuxexlẽ kple nuŋɔŋlɔ ƒe alafa memama 75 nye nyɔnu tsitsiwo—amesiwo wòkpea lãme na be woakpɔ gome le suku siawo tɔgbe dede me.

Le Mozambique la, sukuvi 4,000 ye le Ðasefowo ƒe agbalẽsɔsrɔ̃sukua dem, eye amesiwo sɔ gbɔ wu 5,000 srɔ̃ nuxexlẽ kple nuŋɔŋlɔ le ƒe ene siwo va yi me. Ame aɖe si de sukua kpɔ ŋlɔ bena: “Medi be maɖe ŋudzedzekpɔkpɔ deto afia. Sukua wɔe be mete ŋu xlẽa nu heŋlɔa nu.”

 Kpekpeɖeŋudɔ si Nye “Akuakua ke Menye Gotagome Nu O”

Lɔlɔ̃nu faa dɔ bubu si Yehowa Ðasefowo gawɔna enye kpekpeɖeŋu nana amesiwo dzi afɔku dzɔ ɖo. Ɣeyiɣi kpui aɖee nye si va yi la, amewo va ƒo ƒu ɖe adzɔnuwo dzraɖoƒe aɖe si gogo Paris, France, henɔ dɔ dzi kple ŋkubiã. Lɔlɔ̃nu faa dɔwɔla 400 aɖewo zã woƒe kwasiɖanuwuwu nɔ nuɖuɖu, nudodowo, kple atikewo dem agbalẽgowo me. Kaka kwasiɖanuwuwua nava yi la, nugo gã asieke me yɔ fũ kple kpekpeɖeŋununana siwo ƒe home ade United States dɔlar miliɔn ɖeka kloe henɔ lalam be meli natsɔ wo adzoe. Eteƒe medidi o, agba la va ɖo Titina Afrika si aʋawɔwɔ nɔ edzi yim le, eye afima ƒe Ðasefo lɔlɔ̃nu faa dɔwɔlawo ma nuawo alɔtsɔtsɔe. Azɔ hã Ðasefowoe dzɔ nunana siawo dometɔ akpa gãtɔ.

Wokafu dɔmenyonuwɔna si Yehowa Ðasefowo wɔ le Congo (Kinshasa) nyadzɔdzɔgbalẽ aɖe me be enye “akuakua ke menye gotagome nu o.” Dukɔ Ƒoƒuawo ƒe Dɔdzikpɔha na Sitsoƒedilawo (UNHCR) ƒe amegãwo hã ɖe ŋudzedzekpɔkpɔ ma ke tɔgbe fia ɖe dɔa ŋu. UNHCR ƒe amegã aɖe si le Democratic Republic of Congo hã kpɔ dzidzɔ ɖe ɖoɖo si nu Ðasefoawo wɔ kpekpeɖeŋunanadɔa le ŋu ale gbegbe be etsɔ eya ŋutɔ ƒe ʋu na be dɔa wɔlawo nazã. Ewɔ dɔ ɖe afima nɔlawo hã dzi. Esi eteƒekpɔlawo kpɔ alesi kpekpeɖeŋunuawo ɖo amesiwo hiã tu gbɔ kabakabae la, ewɔ mo yaa na wo dometɔ aɖewo eye wobia be: “Aleke míewɔ ɖoɖoa heke ɖe amesiame ŋu pɛpɛpɛ alea?”

Kpekpeɖeŋunanadɔ siwo Yehowa Ðasefowo wɔna kpakple woƒe agbalẽsɔsrɔ̃ ɖoɖoawo nye dɔ siwo wɔm Ðasefoawo le le xexeame godoo ƒe bla nanewoe nye sia la dometɔ eve pɛ ko. Ke hã la, Ðasefowo gawɔ lɔlɔ̃nu faa dɔ bubu aɖe—enye dɔ si hea viɖe mavɔ ŋutɔŋutɔ vɛ. Míadzro nya sia me le nyati si kplɔe ɖo me.

[Etenuŋɔŋlɔ]

[Aɖaka/Nɔnɔmetata si le axa 16]

Lɔlɔ̃nu Faa Dɔwɔwɔ Le Tɔtrɔm

Togbɔ be Julie nɔa mɔzɔzɔ dzi ɖaa yia xexeame ƒe akpa vovovo le eƒe dɔwɔnyawo ta hã la, edia ɣeyiɣi wɔa lɔlɔ̃nu faa dɔ aɖe kokoko—ɣeaɖewoɣi. Nyitsɔ laa esime wònɔ Anyiehe Amerika la, eyi ɖana kpekpeɖeŋu le tsyɔ̃eviwo dzikpɔƒe aɖe si gogo Santiago le Chile. Egblɔ be mɔzɔzɔ ʋua “mɔnukpɔkpɔ gãwo” na ye yewɔa lɔlɔ̃nu faa dɔwo.

Lɔlɔ̃nu faa dɔwɔlawo ƒe xexlẽme si le dzidzim ɖe edzi le woƒe ɣeyiɣi zãm abe Julie ene—gake hena ɣeyiɣi ʋɛ aɖe ko. Sara Meléndez si nye zimenɔla na numekuha si bua akɔnta le lɔlɔ̃nu faa dɔwo ŋu gblɔ be “Enye tɔtrɔ yeye. Amewo le lɔlɔ̃nu faa dɔwo wɔm, gake ɣeyiɣi kpui aɖe ko ƒe dɔ wònye wowɔna.” Ewɔe be dɔnunɔlawo le nusi ame aɖewo ʋuʋu ta heyɔ be “lɔlɔ̃nu faa dɔwɔwɔ ƒe to yiyi” ƒe amemiamia sem, eye wole dagbadagbam be yewoadi amewo na yewoƒe dɔwo.

“Lɔlɔ̃nu Faa Dɔ Wɔwɔ ɖe Nɔnɔmea Nu”

Amesiwo wɔa ɖoɖo ɖe lɔlɔ̃nu faa dɔwo ŋu dometɔ aɖewo kpɔe be tɔtrɔ yeye sia—si nye lɔlɔ̃nu faa dɔ wɔwɔ ɣeyiɣi vi aɖe ko—tso lɔlɔ̃nu faa dɔwɔlawo ƒe nɔnɔme si trɔ gbɔ. Lɔlɔ̃nu faa dɔwo ŋuti ɖaŋuɖola Susan Ellis gblɔ be: “Nɔnɔme si nye ‘Meli be mawɔ dɔ zi alesi miehiãm ko’ si wotsɔ wɔa lɔlɔ̃nu faa dɔwoe megali o. Ðokuitsɔtsɔna megale amewo me o.” Nyadzɔdzɔŋlɔla Eileen Daspin hã lɔ̃ ɖe edzi nenema ke. Esi wòbia gbe lɔlɔ̃nu faa dɔwɔha dzikpɔla vovovowo tso lɔlɔ̃nu faa dɔwɔlawo ƒe vɔvɔ ŋu megbe la, eƒo nya ta be “Vɔvɔ̃ si le amewo me be woatsɔ wo ɖokuiwo ana ɣeyiɣi didi la le nu gblẽm le lɔlɔ̃nu faa dɔwo wɔwɔ ŋu.”

Ke hã la, New York Tsɔ Ðe Le Eme habɔbɔa dzikpɔla Kathleen Behrens si ƒe nya míegblɔ va yi le nyati siawo me bui be, menye ɖe ɖokuitsɔtsɔna mele amesiwo wɔa lɔlɔ̃nu faa dɔ hena ɣeyiɣi kpuiwo me o, ke boŋ esi ɣeyiɣi fũ mele wo si o tae. Kpuie ko la, amesiwo dea dɔme gaƒoƒo 50 kple edzivɔ kwasiɖa ɖesiaɖe tsɔ kpe ɖe ɖeviwo alo ame tsitsiwo dzi kpɔkpɔ ŋu la mate ŋu awɔ lɔlɔ̃nu faa dɔwo tre ɖe enu o. Egblɔ be: “Ke hã la, alesi ko amesiawo siwo ŋu vovo mele o gatsɔ dɔ si aɖe vi na amewo kpe ɖe woƒe agbenɔnɔ ŋu la fia be, ɖokuitsɔtsɔna si le wo me sẽŋu ŋutɔ nyateƒe.”

Behrens gblɔ be le lɔlɔ̃nu faa dɔwɔla siwo ŋu ɣeyiɣi mele boo o gome la, “lɔlɔ̃nu faa dɔ wɔwɔ ɖe nɔnɔmea nu” koe nye nua. Lɔlɔ̃nu faa habɔbɔ aɖewo na wowɔa dɔ ŋkeke ɖeka ko fifia gɔ̃ hã. “Esia nana amewo tsɔa wo ɖokuiwo kena wɔa dɔ siwo ɖea vi gake mɔnu nanɔ anyi be woawɔe ɣeyiɣi kpui aɖewo ko.”

Gakpe ɖe ŋu la, ame xexlẽme aɖe si le dzidzim ɖe edzi tsɔ wo ɖokui le kekem hele woƒe kɔmpiutawo zãm le aƒeme tsɔ le nyatakakawo ŋlɔm ɖi hele numekuku wɔm. Magazine si nye The Wall Street Journal gblɔ be: “Ðewohĩ lɔlɔ̃nu faa dɔ wɔwɔ to kɔmpiuta zazã dzie mebɔ o wu le ‘lɔlɔ̃nu faa dɔ wɔwɔ ɖe nɔnɔmea nu’ me, eye ame aɖewo gblɔ be wokpɔ mɔ be eyae ava ɖe vi wu.”

[Aɖaka/Nɔnɔmetata si le axa 18]

Kpekpeɖeŋunana le Kobe!

Esi anyigba ʋuʋu le melidzeƒedu deŋgɔ si nye Kobe, Japan, le January, ƒe 1995 me la, alesi gbegbe nuwo gblẽe la wu gbɔgblɔ. Le alesi ame 5,000 ƒe agbe tsi emee ta la, eyae nye anyigbaʋuʋu si wu ame wu ɖesiaɖe si dzɔ kpɔ le Japan tso ƒe 1923 me. Yehowa Ðasefo siwo tso Japan kple xexeame godoo wɔ ɖoɖo enumake ɖe kpekpeɖeŋunana amesiwo ŋu wògblẽ nu le la ŋu. Esi wowɔ ɖoɖo be woadzɔ nu la, wodzɔ United States dɔlar miliɔn ɖeka kple edzivɔ le dɔwɔŋkeke etɔ̃ me. Kpekpeɖeŋunu vovovo va li kɔ ɖe Kobe.

Kristotɔ hamemegã aɖe si nɔ kpekpeɖeŋudɔwɔlawo dome va kpɔe be nuwo yɔ yewoƒe Fiaɖuƒe Akpata fũ wu alesi hiã gɔ̃ hã. Aleke wogbɔna nu mamlɛawo wɔ gee? Edoe ɖa be woatsɔ nuawo dometɔ aɖewo ana kɔdzi aɖe si te ɖe wo ŋu. Ðasefoawo de nuawo agbatsɔʋu aɖe me eye wodze mɔ heku ʋua to nugbagbãawo dome. Mɔzɔzɔ si xɔa aɖabaƒoƒo ʋɛ tsã la va xɔ gaƒoƒo geɖe. Esi woɖo kɔa dzi la, wotsɔ nuawo—siwo ƒe ɖewoe nye kuntruwo, beliwo, avɔ biɖibiɖiwo, atikutsetsewo kple atikewo—na ɖɔkta gã si le afima. Edo dzidzɔ na ɖɔkta la wògblɔ be yewoaxɔ nusianu si Ðasefoawo ate ŋu ana yewo. Wokpɔ dzidzɔ ɖe atikutsetseawo ŋu vevie esi nuɖuɖu mumu menɔ anyi asu na dɔnɔawo o ta.

Esi Ðasefoawo nɔ nuawo ɖem le ʋua me la, ɖɔktaa tsi tre ɖi henɔ wo kpɔm dũu—togbɔ be wohiãe le dɔ me hã. Emegbe ede ta agu ɖokuibɔbɔtɔe heda akpe na wo. Esi wodze mɔ yina la, egakpɔtɔ tsi tre ɖi henɔ alesi gbegbe wòkpɔ dzidzɔ ɖe nuawo ŋu ɖem fia. Hamemegã si nɔ ameawo nu va de dzesii be emegbe kɔa dzi dɔwɔlawo va wɔ nu aduadu kple dɔnɔ siwo nye Yehowa Ðasefowo.

[Aɖaka/Nɔnɔmetata si le axa 19]

Lɔlɔ̃nu Faa Dɔwɔwɔ—Dɔ si Ðea Vi

Esime lɔlɔ̃nu faa dɔwɔla aɖewo siwo le Kabezi, si nye du vi aɖe le Burundi, di be yewoatu Yehowa Ðasefowo ƒe Fiaɖuƒe Akpata la, nutoa me dzikpɔla bia nusi medzɔ kpɔ o tso wo si. Ebia nenye be Ðasefoawo ate ŋu adzra mɔ si gogo teƒe si wogbɔna xɔa tu ge ɖo la ɖo. Ðasefoawo lɔ̃ kple dzidzɔ be yewoawɔ dɔa, eye wowɔ dɔa mɔ̃ mazãmazãe. Lɔlɔ̃nu faa dɔwɔlaawo wɔ dɔa nyuie ale gbegbe be, amegã siwo le nutoa me ɖe ŋudzedzekpɔkpɔ fia ɖe woƒe dɔ sesẽ wɔwɔ kple ɖe ɖokuitsɔtsɔna ƒe gbɔgbɔ si woɖe fia ta. Emegbe lɔlɔ̃nu faa dɔwɔlaawo yi edzi tu woƒe Fiaɖuƒe Akpataa, si ƒe nɔnɔmetata dze le etame. Fifia la, xɔ nyui aɖe le wo si, si akpe ɖe wo ŋu woadzi woƒe Biblia-fiafiadɔ wɔwɔ ɖe edzi le ƒe siwo gbɔna me. Nyateƒee, lɔlɔ̃nu faa dɔ siwo wowɔna le mɔ vovovowo nu ate ŋu aɖe vi siwo ade didiƒe.

[Nɔnɔmetata siwo le axa 16, 17]

Sirley kpɔa dzidzeme le nufiafia amewo be woasrɔ̃ nuxexlẽ me

[Afi Si Míexɔ Mɔɖeɖe Tso]

Nelson P. Duarte-Jornal do Sudoeste