Ðe Amegbetɔ Le Eya Ŋutɔ ƒe Nuɖuɖu Dome Gblẽma?

“Menye fewo kple agbaɖuɖu alo hoʋiʋli si le xexeame godoo ye nye kuxi ŋutɔŋutɔ si dze ŋgɔ mí egbea o ke boŋ alesi míawɔ anɔ agbe si me vivisese kple dzidzeme le evɔ míagblẽ xexeame ƒe agbeléleɖete ŋutete dome o. Amegbetɔƒomea medze ŋgɔ ŋɔdzidonu sia tɔgbe kpɔ o, be: nusiwo tututu lé mí ɖe te la dome le gbegblẽm kura.”—Agbedomenyiŋusẽŋutinunyala David Suzuki.

ATƆTƆŊUTI nye nane si míate ŋu abu nu tsɛe bɔbɔe. Ne afisi wodea atɔtɔŋutigble lee nèle la, àbui be enye nusi bɔ ɖe afisiafi, eye gawu la, eƒomevi vovovowo anɔ anyi siwo me nàtia esi dim nèle la le. Gake ènya be eƒomevi siwo me nàtia esi dim nèle tsoe egbea le ʋɛ kura wu esiwo nɔ anyi ƒe 100 siwo va yia?

Le ƒe 1804 kpakple 1905 domee la, atɔtɔŋuti hamehame 7,098 ƒe agblee wodena le United States. Egbea, emawo dometɔ 6,121—si nye 86 le alafa me—megali o. Aleae wòle le peya hã gome. Peya hamehame 2,683 si ƒe agble wodena tsã la dometɔ 88 le alafa me megali kura o. Eye le detsiƒonuwo gome ya la, xexlẽmeawo dzi ɖe kpɔtɔ kura wu. Nane le bubum, eye woyɔnɛ be nu ƒomevi vovovoawo—menye le nugbagbe hamehame gbogboawo dome ko o ke le hatsotso ɖeka ƒomeviwo hã dome. Detsiƒonu hamehame siwo ƒe agble wodena le United States dzi ɖe kpɔtɔ 97 le alafa me le ɣeyiɣi si mede ƒe 80 hã o me! Gake ɖe numiemie ƒomevi vovovoawo le vevie nenema gbegbea?

Dzɔdzɔmeŋutinunyala geɖewo gblɔ be ele vevie. Togbɔ be wogahea glãka le akpa si numiemie ƒomevi vovovoawo wɔna ŋu hã la, nutoameŋutinunyala aɖewo gblɔ be ewɔa akpa vevi aɖe le agbenɔnɔ le anyigba dzi me. Wogblɔ be ele vevie be nuɖuɖu siwo míeƒãna hamehame nanɔ anyi abe alesi ko esiwo miena le wo ɖokui si le ave, gbetome, kple dzogbe siwo le xexeame hã le ene. Nu ƒomevi vovovo siwo anɔ hatsotso ɖeka me hã le vevie. Le kpɔɖeŋu me, mɔli ƒomevi vovovo siwo li ɖee fia be kuawo dometɔ aɖewo ate ŋu anɔ te ɖe edomegblẽnu nyanyɛ aɖewo nu godoo. Eyata agbalẽ aɖe si Ŋkuléle Ðe Xexeame Ŋu Habɔbɔ ta gblɔ nyitsɔ laa be nu ɖeka si ƒo wo katã ta si afia alesi anyigba ƒe numiemie ƒomevi vovovoawo dziɖeɖe kpɔtɔ ate ŋu agblẽ nui enye: nusi tututu gblẽm wòle le míaƒe nuɖuɖukpɔkpɔ ŋu.

Numiemiewo tsɔtsrɔ̃ ate ŋu agblẽ nu le agblemenukuwo ŋu le mɔ eve ya teti nu: gbã, agblemenuku ƒomevi siwo mie le wo ɖokui si le gbeme siwo hiã hena eƒomevi yeyewo ƒe dodo le etsɔme la tsɔtsrɔ̃ ɖa, kple evelia, nɔnɔme vovovo siwo anɔ nuku ƒomevi siwo ƒãm wole me dziɖeɖe kpɔtɔ. Le kpɔɖeŋu me, le ƒe alafa 20 lia ƒe gɔmedzedze la, woƒãa mɔli hamehame 100,000 kple edzivɔ le Asia, siwo dometɔ 30,000 ya teti nɔ India ɖeɖe ko. Fifia India ƒe nuku sia memama 75 le alafa me nye hatsotso ewo pɛ ko. Mɔli hamehame 2,000 si nɔ Sri Lanka tsã la kpɔtɔ 5 pɛ ko. Mexico, afisi wonya be bli bɔ ɖo koŋ, ƒe bli hamehame siwo nɔ anyi le ƒe 1930-awo me dome 20 le alafa me koe susɔ fifia.

Gake menye nuɖuɖu ɖeɖe koe ɖo afɔku me o. Numiemiewo mee wokpɔa atike siwo wowɔna dzrana la dometɔ 25 le alafa me tsonɛ, eye wogale kekem ɖe numiemie yeye siwo nyo na atikewɔwɔ ŋu. Ke hã wogakpɔtɔ le  numiemiewo tsrɔ̃m. Ne míagblɔe wòasɔ la, ɖe wòanye be míele nusi tututu alé mí ɖe te la dome gblẽma?

Xexeame ƒe Dzɔdzɔmenuwo Takpɔha ƒe nyatakakawo fia be numiemie kple lã 18,000 aɖewo siwo ŋu wosrɔ̃ nu tsoe la dometɔ 11,000 kple edzivɔwo le tsɔtsrɔ̃m ɖa kura. Le teƒewo abe Indonesia, Malaysia, kple Latin Amerika ene, afisi woƒo ave gbogbo aɖewo le wòzu agbledenyigbawo la, ɖeko numekulawo asusu numiemie hamehame siwo le tsɔtsrɔ̃m ɖa—alo wotsrɔ̃ ɖa xoxo—ƒe xexlẽme ayɔ. The UNESCO Courier ka nya ta be ame aɖewo gblɔ be nuwo tsɔtsrɔ̃ ɖa le edzi yim “kabakaba afɔkutɔe.”

Ele eme baa be anyigba gakpɔtɔ le nuɖuɖu gbogbo aɖewo wɔm ya. Gake ɣeyiɣi didi kae ameƒomea si le agbɔ sɔm ɖe edzi kabakaba ate ŋu anyi eɖokui ase ɖo esime ɣletinyigbaa ƒe numiemie ƒomevi vovovoawo dzi le ɖeɖem kpɔtɔ? Dukɔ vovovowo tso ɖe esia ŋu to nukudzraɖoƒewo ɖoɖo anyi me be numiemie veviwo nagabu o. Abɔdzikpɔƒe aɖewo tsɔe ɖo wo ɖokui dzi be yewoakpɔ numiemie aɖewo ta. Dzɔdzɔmeŋutinunya to nugbagbe ƒe agbedomenyiŋusẽ tɔtrɔ ŋuti dɔwɔnu sẽŋu yeyewo vɛ. Ke hã ɖe nukudzraɖoƒewo kple dzɔdzɔmeŋutinunya ate ŋu akpɔ kuxia gbɔ vavã? Nyati si kplɔe ɖe adzro biabia sia me.