Sɔhɛwo Biana Be . . .

Aleke Mawɔ Adzudzɔ Dzitsitsi Alea Gbegbe?

“Nusiwo ate ŋu anye nu sesẽ na sɔhɛ dometɔ ɖekae nye etsɔme. Ètsia dzi le ɖokuiwò me. Ðe maʋu le aƒemea? Ðe mayi sukua? Ðe mawɔ ɣeyiɣiawo katã ƒe subɔsubɔdɔa? Ðe maɖe srɔ̃a? Tiatia vovovowo li ale gbegbe be ɖeko wòaɖi vɔvɔ̃ na wò.”—Shane si xɔ ƒe 20.

ÐE NÈTSIA dzi ŋutɔa? Sɔhɛ geɖe tsia dzi le susu vovovo ta. Nyadzɔdzɔlɛta aɖe si wota be woatsɔ afia mɔ dzilawoe ka nya ta be: “Xexeame godoo ƒe numekuku aɖe si wowɔ nyitsɔ laa le ƒewuivi siwo xɔ ƒe 15 va ɖo ƒe 18 ŋu le dukɔ 41 me ɖee fia be dɔ nyui si ŋu dzidzeme le ye nye nu vevitɔ si ŋu ƒewuiviwo tsia dzi ɖo wu.” Esi gakplɔe ɖo enye wo dzilawo ƒe lãmesẽ me nɔnɔ. Vɔvɔ̃ ɖe ame ƒe ame vevi aɖe ƒe ku nu ganye nusi ŋu wogatsia dzi ɖo vevie.

Dɔwɔƒe si kpɔa Agbalẽsrɔ̃nyawo gbɔ le United States ƒe numekuku aɖe si wòwɔ ɖee fia be “agbagbadzedze hena dzesi nyuiwo xɔxɔ” nye nu vevi si ŋu sɔhɛ geɖe tsia ɖo le United States. Numekuku ma ke ɖee fia be sɔhɛ siwo ƒe agbɔsɔsɔ ade emae sena le wo ɖokui me abe Shane (si ƒe nya míegblɔ le nyatia ƒe gɔmedzedzea) ene. Sɔhɛ bubu aɖe si ŋkɔe nye Ashley gblɔ be: “Metsi dzi ɖe nye etsɔme ŋu.”

Sɔhɛ bubuwo hã tsia dzi ɖe woƒe ŋutilãmededienɔnɔ ŋu. Le numekuku aɖe si wowɔ le ƒe 1996 me nu la, sɔhɛ 50 le alafa me kloe kpɔe be ŋutasẽnuwɔwɔ le aƒe xɔm ɖe yewoƒe suku me le United States. Ƒewuivi siwo wu miliɔn enyi (37 le alafa me) gblɔe be yewonya amesiwo woda tui dometɔ aɖe!

Gake menye dzitsitsi ɖesiaɖe ye ɖi vɔvɔ̃ alea gbegbe o. Le sɔhɛ geɖe gome la, woƒe dzitsitsi akpa gãtɔ ku ɖe woƒe hadomegbenɔnɔ ŋu. Wogblɔ le magazine aɖe si woŋlɔ na dzilawo me be: “Ƒewuiviwo tsia dzi ɖe ahiãvi ƒe amesinɔnɔ ŋu vevie, gake zi geɖe la, wotsia dzi ɖe xɔlɔ̃ ƒe amesimanɔmanɔ ŋu.” Nyɔnuvi ƒewuivi aɖe si ŋkɔe nye Meagan fa konyi be: “Aleke ame nanɔ anyi ko dɔ̃ nenema? Xɔlɔ̃wo hiãm.” Nya ma tɔgbe ke Kristotɔ sɔhɛ aɖe si xɔ ƒe 15 si ŋkɔe nye Natanael hã gblɔ: “Sukuvi geɖe tsia dzi ɖe atsyã ŋu. Wotsia dzi ɖe woƒe azɔlizɔzɔ, nuƒoƒo, kple woƒe dzedzeme ŋu. Wovɔ̃na be yewoadze bometsilawoe.”

Kuxiwo—Agbe ƒe Akpa Aɖee Wonye

Anyo ŋutɔ hafi, ne ɖe míate ŋu anɔ agbe si me dzitsitsi mele o. Gake Biblia gblɔ be: “Amegbetɔ nyɔnu tɔ dzidzia, eƒe agbe le kpuie, eye fuɖeɖe ti kɔ nɛ.” (Hiob 14:1) Eyata kuxiwo—kple wo ŋu dzitsitsi katã—nye agbe ƒe akpa aɖe. Gake àgblẽ nu le ɖokuiwò ŋu ne  èna dzitsitsi kple dzimaɖitsitsi vu tsyɔ wò tamebubu dzi. Biblia xlɔ̃ nu be: “Nuxaxa le dzi me tea ame ɖe anyi.”—Lododowo 12:25.

Mɔ siwo dzi nàto aƒo asa na dzitsitsi yakatsyɔ dometɔ ɖekae nye ɖokuidziɖuɖu. Ana si xɔ ƒe 16 gblɔ be: “Nye sukuxɔmevi geɖe tsia dzi be yewoava fɔ fu alo axɔ nulɔdɔ.” Gake àte ŋu aƒo asa na dzitsitsi mawo tɔgbe to Biblia ƒe agbenyuinɔnɔ ƒe dzidzenuwo me léle ɖe asi me. (Galatiatɔwo 6:7) Ke hã menye wò kuxiwo dometɔ ɖesiaɖe mee akɔ alo wo gbɔ kpɔkpɔ anɔ bɔbɔe o. Aleke nàwɔ adzudzɔ dzitsitsi alea gbegbe?

“Tsi Dzi Nunyatɔe”

Ame geɖe ɖea mɔ dzitsitsi gblẽa nu le wo ŋu vevie. Gake nyati aɖe si dze le magazine aɖe si woŋlɔ na ƒewuiviwo me kafui be woate ŋu “atsi dzi nunyatɔe” to alesi woatrɔ dzitsitsi ɖe dɔ nyuiwo wɔwɔ ŋu me! Gɔmeɖose geɖe le Biblia me siwo ate ŋu akpe ɖe ŋuwò le esia wɔwɔ me. De ŋugble le Lododowo 21:5 ŋu kpɔ: “Veviedola ƒe tameɖoɖo hea viɖe vɛ.” Mítsɔe be èdi be yeaɖo kplɔ̃ na xɔlɔ̃ aɖewo siwo tso míaƒe hamea me. Ðoɖo nyui wɔwɔ ate ŋu ana nàɖe dzi ɖi. Bia ɖokuiwò se be, ‘Amekawo tututue makpe? Ɣekaɣie madi be woava ɖo? Ɣekaɣie madi be woadzo? Numeɖenu agbɔsɔsɔ kae mahiã ɖe wɔnaa ŋu? Dzidzɔdonamenu kawoe adzɔ dzi na amesiame?’ Alesi nèbu nuwo ŋu nyuie la, nenemae wòava eme be kplɔ̃ɖoɖoa nakpɔ dzidzedzee.

Gake ate ŋu adzi dzitsitsi ɖe edzi to nuwo wɔwɔ wòanɔ kpeɖii akpa me. Yesu Kristo ɖo aɖaŋu sia na nyɔnu aɖe si nɔ fu ɖem na eɖokui wu alesi hiã le nuwo wɔwɔ na eƒe amedzro me be: “Nu ɖeka koe le vevie.” (Luka 10:41) Eyata bia ɖokuiwò be, ‘Nuka tututue hiã hafi kplɔ̃ɖoɖo sia nakpɔ dzidzedze?’ Nuwo wɔwɔ wòanɔ kpokploe ate ŋu ana nàɖe dzi ɖi.

Wò dedienɔnɔ le suku hã ate ŋu anye nu bubu aɖe si ana nàtsi dzi. Anɔ eme be màte ŋu awɔ nu boo aɖeke le nɔnɔmea ŋu o. Gake nu vevi aɖewo li nàte ŋu awɔ atsɔ akpɔ ɖokuiwò tae. Lododowo 22:3 gblɔ be: “Nunyala kpɔa dzɔgbevɔ̃e, eye wòɣlaa eɖokui; ke ame bebewu dea ta eme, eye akpɔ etɔnua.” Asaƒoƒo na afɔkuteƒewo—menye teƒe siwo sa ɖe aga ɖeɖeko o ke boŋ afisiwo mele ame aɖeke ƒe dzikpɔkpɔ te o si ame gblẽkuwo nɔna hã—ate ŋu aɖe wò afɔku me dzedze dzi akpɔtɔ.

Sukudɔwo hã ate ŋu ana nàtsi dzi. Ðewohĩ sukudɔdasi vevi geɖe li si wòle be nàwɔ le aƒeme eye àtsi dzi be yemate ŋu awɔ wo katã ɖe game dzi o. Gɔmeɖose si le Filipitɔwo 1:10 ate ŋu akpe ɖe ŋuwò, egblɔ be, ‘nàde dzesi nusiwo le vevie wu.’ Ẽ, srɔ̃ alesi nàda nusiwo le vevie wu ɖe nɔƒe gbãtɔe! De dzesi dɔdasi si hiã kpata, eye nàwɔ eya gbã. Ekema nàwɔ esi kplɔe ɖo. Ʋɛʋɛʋɛ la, àkpɔe be yeva te ŋu le te nɔm ɖe nɔnɔmea nu mlɔeba.

Xɔ Aɖaŋuɖoɖo

Esi Aaron nɔ eƒe sɔhɛ me la, etsi dzi vevie ɖe alesi wòawɔ ado le eƒe dodokpɔ mamlɛa me ŋu ale gbegbe be wòna be akɔta va nɔ evem. Egblɔ be: “Megblɔe na dzinyelawo, eye wokplɔm yi ɖɔkta gbɔe. Ede dzesii enumake be naneke megblẽ le nye dzi ŋu o, eye wòɖe alesi dzimaɖitsitsi ate ŋu agblẽ nu le ame ƒe ŋutilã ŋui me nam. Emegbe dzinyelawo kpe ɖe ŋunye mekpɔe be mewɔ dzadzraɖo siwo mate ŋui ɖe dodokpɔa ŋu eye be fifia beléle na ɖokuinye ŋue wòle be matsi dzi ɖo. Dzimaɖitsitsia tɔ, akɔtavea ka ɖe eme, eye mewɔ dɔ nyui le dodokpɔa me.”

Ne èkpɔ be dzitsitsi na nu te ɖe ye dzi la, mègagbe nuƒoƒo tso eŋu o. Míeyɔ Lododowo  12:25 ƒe akpa aɖe va yi, gake mawunyakpukpui bliboa gblɔ be: “Nuxaxa le dzi me tea ame ɖe anyi; ke xɔlɔ̃nya doa dzidzɔ na ame.” Nuƒoƒo tso “nusiwo ŋu nètsi dzi ɖo” ŋu koe ate ŋu ana nàkpɔ “xɔlɔ̃nya” si dea dzi ƒo na ame!

Gbã la, àdi be yeadzro nu me kple ye dzilawo; ate ŋu adzɔ bɔbɔe be woaɖo aɖaŋu aɖewo na wò. Gbɔgbɔmemetsitsi siwo le miaƒe Kristotɔwo ƒe hamea me hã nye kpekpeɖeŋutsoƒe bubu na wò. Janelle si xɔ ƒe 15 gblɔ be: “Metsi dzi ɖe suku kɔkɔ dede ŋu, akɔkpekpe kple nusiawo katã tsoa dzika ƒo nam—atikevɔ̃ɖizazã, gbɔdɔdɔ, ŋutasesẽ—vaseɖe esime megblɔe na hamemegã aɖe. Eɖo aɖaŋu nyui geɖe nam. Mehaya enumake elabena mekpɔe be mate ŋu akpɔ kuxia gbɔ.”

Mègahe Nuwo Wɔwɔ Ðe Megbe O

Ɣeaɖewoɣi la, nanewo nɔa anyi wòle be míawɔ, gake míegblẽa wo ɖi mawɔmawɔe le esi medoa dzidzɔ na mí o ta. Le kpɔɖeŋu me, masɔmasɔ aɖe ɖo Shevone si xɔ ƒe 19 kple hati Kristotɔ aɖe dome. Enyae be ele be yewoaƒo nu tso nya la ŋu, gake ehe ewɔwɔ ɖe megbe. Egblɔ be, “zi alesi mehe nyaa ɖe megbe la, zi nenemae wòɖea fu nam.” Emegbe Shevone ɖo ŋku Yesu ƒe nya siwo le Mateo 5:23, 24 si xlɔ̃ nu Kristotɔwo be woakpɔ kuxiwo gbɔ enumake dzi. Shevone gblɔ be “esi mewɔ esia mlɔeba la, mekpɔ gbɔdzɔe.”

Ðe nèle nane wɔwɔ—dɔdasi si ŋu mèkpɔa dzidzɔ le o alo nyaʋiʋli sesẽ aɖe—hem ɖe megbea? Tso ɖe eŋu kaba boŋ, ale be wòaɖe nusiwo ŋu nètsia dzi ɖo la dometɔ ɖeka dzi akpɔtɔ na wò.

Nɔnɔme Siwo Nyea Ŋkubiãnya

Menye nusianu gbɔ kpɔkpɔe le bɔbɔe nenema o. De ŋugble le ɖekakpui aɖe si ŋkɔe nye Abdur ŋu kpɔ. Dadaa nɔ kansa lém, eye wòle be wòakpɔ dadaa kple tsɛa siaa dzi. Le nyateƒe me, Abdur tsia dzi le dadaa ƒe dɔa ŋu. Gake egblɔ be: “Mesrɔ̃ nane le nya siwo Yesu gblɔ be, ‘Amekae le mia dome, ne ele fu ɖem na eɖokui la, wòate ŋu atsɔ abɔ ɖeka akpe ɖe eƒe agbenɔɣi ŋu mahã?’ la me. Le esi mana nu nati kɔ nam teƒe la, medzea agbagba be mabu nuwo ŋu akpɔ nusi ate ŋu akpɔ kuxia gbɔ nyuie wu boŋ ŋu.”—Mateo 6:27.

Mele bɔbɔe be nàɖe dzi ɖi le nɔnɔme sesẽwo me o. Nu tena ɖe ame aɖewo dzi ale gbegbe be woɖea asi le wo ɖokui ŋu, gbea nuɖuɖu. Gake agbalẽ si nye Helping Your Teenager Deal With Stress (Kpekpe Ðe Viwò Ƒewuivi Ŋu be Woanɔ Te Ðe Nuteɖeamedzi Nu) xlɔ̃ nu be ne ète nunyiame veviwo ɖokuiwò la, ana “ŋusẽ boo aɖeke manɔ ŋuwò nàtsɔ anɔ te ɖe nuteɖeamedzi ƒe nugblẽleameŋuwo nu o eye wòʋua mɔ ɖe lãmegbegblẽ gãwo ŋu.” Eyata lé be na ɖokuiwò. Ði ɖe me nyuie eye nàɖu nusiwo me nunyiame le.

Àte ŋu akpɔ gbɔdzɔe gãtɔ kekeake ne èwɔ ɖe Biblia ƒe aɖaŋuɖoɖo sia dzi: “Tsɔ wò nyawo dro ɖe Yehowa dzi, eyae akpɔ tawò; emana ke naɖe le ame dzɔdzɔe te akpɔ gbeɖe o.” (Psalmo 55:23) Shane si míeyɔ le nyatia ƒe gɔmedzedzea me tsi dzi ɖe eƒe etsɔme ŋu. Egblɔ be “mena nye susu nɔa Mawu ƒe Nya kple eƒe tameɖoɖo dzi.” Eteƒe medidi o, eva kpɔe be yeate ŋu akpɔ dzidzɔ le etsɔme ne yezã yeƒe agbe tsɔ subɔ Mawui. (Nyaɖeɖefia 4:11) Shane gblɔ be: “Medzudzɔ dzitsitsi. Nu vevi bubu li si ŋu wòle be mabu.”

Eyata ne èkpɔe be yele dzi tsim akpa la, ke di mɔ nyui siwo dzi nàto akpɔ wò kuxia gbɔ. Xɔ aɖaŋuɖoɖo tso ame tsitsiwo gbɔ. Eye ƒo wo katã ta la, tsɔ wò dzimaɖitsitsitsiwo katã ɖo Yehowa ŋkume, “elabena eyama léa be na mi.” (Petro I, 5:7) To eƒe kpekpeɖeŋu me la, ɖewohĩ àdzudzɔ dzitsitsi fũ.

[Nɔnɔmetata si le axa 13]

Ðo dze tso wò dzimaɖitsitsiwo ŋu na dziwòlawo

[Nɔnɔmetata si le axa 14]

Ne ètso ɖe kuxiwo gbɔ kpɔkpɔ ŋu kaba la, ana nàdzudzɔ dzitsitsi