Nusi Ŋuɖui Nye Gɔmesese

“NE MEYI ABADZI HEKPƆ ALESI NYE AFƆ KPLE ASIWO GLƆ̃E LA, MEWOA AVI.”—MIDORI, JAPAN.

ƑE ALAFA geɖee nye sia si ŋuɖui ɖe kpe na amegbetɔ. Wokpɔ kpeɖodzi le Egiptetɔ kuku siwo wosi atike na ŋu be ƒe alafa aɖewo enye sia si dɔlélea li. Anye be anyigbayeyedila Christopher Columbus hã lée. Eye ame miliɔn geɖe lénɛ egbea. Dɔ ka koŋue nye dɔléle sia si naa wozua nuwɔametɔ alea?

Woɖe nya “ŋuɖui” tso Helagbe me nya si gɔmee nye “ƒunukpeƒe ʋudzoame” me eye  wozãnɛ na ŋuɖui kple lãmegbegblẽ ƒomevi bubu siwo ɖii 100 kple edzivɔwo. * Menye kpeƒewo dzi koe dɔ sia dzena o, edzea lãkusi, ƒu, kpeƒetsiãka kple ka siwo bla wo ɖekae siwo katã kpena ɖe kpeƒeawo ŋu hã dzi. Ŋuɖui ƒomevi aɖewo ate ŋu agblẽ nu le wò ŋutigbalẽ, lãmenuwo kple wò ŋku gɔ̃ hã ŋu. Mina míade ŋugble le ŋuɖui ƒomevi eve siwo bɔ wu la ŋu—ƒumeŋuɖui kple kpeƒetete ŋuɖui.

Kpeƒewo ƒe Wɔwɔme

Kpeƒe enye afisi ƒu eve do go le. Kotoku titri aɖe si tome tsi wɔade aɖe le le ƒunukpeƒe aɖewo eye kotoku sia tɔ kpɔ ɖe kpeƒea ŋu helénɛ ɖe te. (Kpɔ eƒe tataa le axa 4.) Lã falɛfalɛ aɖe le kotoku sia me. Lã falɛfalɛ sia dzaa tsi wɔade aɖe. Le kotokua me la, lã zɔzrɔ̃e aɖe si me dena si woyɔna be ƒuxlɔ̃e tsyɔ̃ ƒu eveawo nu. Ƒuxlɔ̃ea nana be ƒuawo mekaa wo nɔewo nɔa wo nɔewo ŋu lilim o. Ƒuxlɔ̃eawo xɔa agba kpekpe siwo ŋutilã la tsɔna hã, eye wole abe suɖui ene na wò ƒunukpeƒeawo ale be wòmaa agba la ɖe wò ƒua ƒe akpa bubuwo.

Le kpɔɖeŋu me ne èzɔ, ƒu du, alo ti kpo la, wò kpekpeme si zina ɖe wò aligo kple klowo dzi te ŋu dea wò ŋutilã ƒe kpekpeme ƒe teƒe ene va ɖo enyi! Togbɔ be agba sia ƒe akpa gãtɔ dzea lãkusia kple kpeƒetsiãkawo dzi hã la, wò ƒuxlɔ̃ea miana abe akutsa ene si naa wò ƒuwo te ŋu tsɔa agba sia.

Kpeƒetete Ŋuɖui

Ne ŋuɖui si naa kpeƒewo tena dze ame dzi la, ŋutilãa ƒe dɔlélenutsiŋutete ɖea mɔ le kpeƒewo katã ŋu wovea ame. Le susu aɖe si womenya o nu la, ʋumenugbagbevi gbogbo aɖewo—si me ʋumenugbagbevi siwo woyɔna be T cell hã le siwo wɔa akpa vevi aɖe le ŋutilãa ƒe dɔlélenutsiŋutete me—gena ɖe do siwo le ƒunukpeƒekotokuawo me bibibi. Esia naa lãmetsi vovovowo dzana ɖe lãme na ame si nana be kpeƒewo ʋua dzo ame. Ƒunukpeƒekotokua me lã falɛfalɛ la me nugbagbeviwo te ŋu dzina ɖe edzi kabakaba ale gbegbe, ale be wòva zua abe lãkusi titri si me kansa ɖo ene. Lãkusi titri sia hã dzaa lãmetsi aɖe si gblẽa ƒuxlɔ̃ea. Esia naa ƒuawo va kaa wo nɔewo ŋu azɔ eye ƒunukpeƒea ƒe ʋaʋã zua dɔ—eye evena helĩhelĩ ŋutɔ. Nudomegbegblẽ sia ƒe edziyiyi gbɔdzɔa ka si bla kpeƒetsiãkawo, eye kpeƒetsiãkawo kple wo ŋu lãkusi siwo wɔnɛ be kpeƒea megate ŋu lina o naa ƒuawo glina le wo nɔewo nu vie zi geɖe, eye wòglɔ̃na. Zi geɖe la kpeƒetete ŋuɖui gblẽa nu le kpeƒeawo ŋu eye alɔnu, klo, kple afɔwoe wòwɔna. Kpeƒetete ŋuɖuilélawo dometɔ siwo wu alafa memama 50 ŋuti tsena alo toa kɔ. Ʋu vɔna le lãme na wo dometɔ aɖewo eye woƒe ŋku dzi kple veme ƒuna hevea wo helĩhelĩ. Ðeɖiteameŋu kple dɔ siwo hona kpee, si asrã kple lãmevewo hã kpe ɖo la, kplɔa ŋuɖui sia ɖo.

Kpeƒetete ŋuɖui ƒe amedzidzedze toa mɔ vovovo le nusi wògblẽna le ame ŋu, alesi wòdzea ame dzii, kple ɣeyiɣi si wòxɔna hafi kana ɖe eme gome. Le ame aɖewo gome la, vevesese kple tidzedze adze egɔme vivivi kwasiɖa geɖe alo ƒe aɖewo gɔ̃ hã. Edzea ame bubuwo dzi kpata zi ɖeka. Kpeƒetete ŋuɖuia nɔa ame aɖewo ŋu ɣleti ʋɛ aɖewo ko kana ɖe eme eye megblẽa nu boo le wo ŋu o. Vevesesea hona na ame aɖewo ɣeaɖewoɣi gakana ɖe eme. Eye dɔa nɔa ame aɖewo ŋu ƒe geɖe nɔa fu ɖem na wo madzudzɔmadzudzɔe vaseɖe esime wozu nuwɔametɔ.

 Amekawo ate ŋu alé dɔ sia? Ðk. Michael Schiff gblɔ be: “Nyɔnu siwo xɔ tso ƒe 40 va ɖo ƒe 60 koŋue te ŋu xɔnɛ wu.” Gake Schiff gagblɔ kpee be “ate ŋu adze amesiame dzi, metsɔ le ƒe si woxɔ me o, eye ɖeviwo kple ŋutsuwo siaa hã le eme.” Ete ŋu dzea amesiwo ƒe ƒometɔwo ŋu kpeƒetete ŋuɖui le xoxo la dzi bɔbɔe wu. Numekuku geɖe si wowɔ fia be atamanono, lolo akpa, kple ʋudodo nye nu vevi siwo koŋ gbɔ wòtsona dzea ame dzi bɔbɔe.

Ƒumeŋuɖui

Western Journal of Medicine gblɔ be: “Ƒumeŋuɖui le abe yame ƒe nɔnɔme ene le mɔ geɖe nu—ebɔ ɖe afisiafi, eye zi geɖe la, womekpɔnɛ dzea sii o eye wògblẽa nu geɖe ɣeaɖewoɣi.” To vovo na kpeƒetete ŋuɖui la, ƒumeŋuɖui ya mete ŋu kakana ɖe ŋutilã ƒe akpa bubuwo o ke boŋ kpeƒe ɖeka aɖe alo kpeƒe ʋɛ aɖewo ko ŋu wònɔa nu gblẽm le vivivi. Ne ƒuxlɔ̃ea va le nyinyim vivivi la, ƒuawo va nɔa wo nɔewo ŋu lilim. Esia megbe ƒu aɖewo va tona ɖe kpeƒea ŋu. Nutete aɖewo dona eye ƒu si le ete trina ɖe edzi eye wòva glɔ̃na. Eƒe dzesi bubuwo nye asikɔe tokɔwo, kpeƒe siwo ŋuɖui lé ƒe ɖiɖi klokloklo, lãme ƒe lialia kple vevesese, tidzedze, kple kpeƒe siwo dze ti.

Tsã la, wobua ƒumeŋuɖui be edzea ame dzi ne wole tsitsim. Gake fifia eŋunyalawo megabunɛ nenema o. The American Journal of Medicine gblɔ be: “Kpeɖodzi aɖeke meli be ame ƒe kpeƒe si menye nanekee gblẽ le eŋu o nadzudzɔ dɔwɔwɔ ɖe ɖoɖo nu le agba siwo wotsɔna ɖaa la ta le ame ƒe agbe me o.” Ke nukae hea ƒumeŋuɖuia vɛ? Britaintɔwo ƒe magazine The Lancet gblɔ be “glãkahehe geɖe le nu gblẽm” le agbagba siwo wodzena be woake ɖe nusi tututu gbɔe dɔ sia tsona ŋu. Numekula aɖewo do susu ɖa be gbã la, ate ŋu atso nane si agblẽ le ƒu ŋu, abe eƒe akpa sue aɖe ƒe ŋeŋe ene gbɔ. Esia ana ƒua nadze alɔ bubuwo eye wòagblẽ nu le ƒuxlɔ̃e ŋu. Ame bubuwo hã bui be ƒumeŋuɖuia dzea egɔme tso ƒuxlɔ̃ea ŋutɔ me. Wobui be ne ele nyinyim hele gbegblẽm la, agba va nɔa ƒu si le ete la dzi. Dɔléle bubuwo hona ne ŋutilã le agbagba dzem be wòaɖɔ ƒuxlɔ̃e si gblẽ la ɖo.

Amekawo dzie ƒumeŋuɖui ate ŋu adze? Togbɔ be menye tsitsi ɖeɖe ko gbɔe ƒumeŋuɖui tsona o hã la, zi geɖe la, ƒuxlɔ̃ea gbɔdzɔna ɖe edzi ne wole tsitsim. Amesiwo dzi wòagate ŋu adzee nye amesiwo ƒe ƒunukpeƒewo mesɔ ɖe wo nɔewo nu nyuie o alo amesiwo ƒe afɔ kple ata ŋu lãkusi mesẽ o, alo woƒe afɔ ɖeka didi wu ɖeka, alo amesiwo ƒe dzimeƒu medzɔ ɖe ɖoɖo nu o. Nuveviwɔame si tso afɔku aɖe si dzɔ ɖe ame ƒe kpeƒe dzi alo dɔ aɖe wɔwɔ si bia be woazã kpeƒea ʋuu wòaglo hã te ŋu naa ƒumeŋuɖui ɖea fu na ame. Ne nugbegblẽa nya dze egɔme ko la, lãmekpɔkpɔ ate ŋu ana ŋuɖuia nu nagasesẽ ɖe edzi wu.

Ðk. Tim Spector gblɔ be: “Ƒumeŋuɖui nye dɔ manyatalenu aɖe si tsoa nanewo koŋ wɔwɔ gbɔ gake etsoa domenyiŋusẽfianu siwo ƒe dome wonyi hã gbɔ.” Amesiwo dzi ƒumeŋuɖui te ŋu dzena bɔbɔe wu ye nye nyɔnu siwo xɔ tso ƒe 40 heyina kple nyɔnu siwo tsi wu siwo ƒe ƒomea me dɔa le. To vovo na ƒumasẽmasẽdɔ si tsoa alesi ame ƒe ƒuwo nɔa falɛfalɛ gbɔ la, ƒu ƒe kpekpeme boŋ gbɔe ƒumeŋuɖui  ya tsona. Numekula aɖewo hã gblɔ be etsoa ɔksidzin si va tɔtɔna kple nu bubuwo le lãme kple ne nunyiame siwo nye vitamin C kple D ƒe agbɔmasɔmasɔ le lãme na ame gbɔ.

Wo Dada

Zi geɖe la, ŋuɖui dada bia atikezazã, kamedede, kple tɔtrɔ wɔwɔ le ame ƒe agbenɔnɔ me. Kamedede ƒe dɔdamɔnufiala aɖe ate ŋu afia kamedede aɖe wɔwɔ ame. Kamedede vovovowo anɔ eme abe esi me wokuna ɖe nu ŋu alo zina ɖe nu dzi be woatsɔ ahe lãmekawo mee alo azi wo dzi, esiwo naa gbɔgbɔtsixe tsia ame ƒo, kple kamedede si me wotea agba kpekpe alo kɔa agba kpekpewo ene. Kamedede siawo wɔnɛ be dɔléle bubu geɖe siwo me kpeƒewo ƒe ame veve, woƒe tete, ɖeɖiteameŋu, lãmemakɔmakɔ, kple blanuilélewo hã le kana ɖe eme vie. Wokpɔe le ame tsitsiwo gɔ̃ hã ŋu be kamedede ɖea vi na wo. Kamedede ate ŋu axe mɔ na ƒu ƒe kpekpe akpa hã. Ame aɖewo hã gblɔ be ne wotsɔ nu xɔdzo alo nu fafa alo ne wotsɔ abuitɔamedɔdada kpɔ egbɔe la vevesesea kana ɖe eme vie. *

Esi lolo dzi ɖeɖe akpɔtɔ ate ŋu awɔ geɖe le kpeƒevevesese nutsitsi ŋu ta la, ŋuɖɔɖo le nusi woɖuna me wɔa akpa vevi aɖe le ŋuɖui dada ŋu. Ame aɖewo hã gblɔ be nuɖuɖu siwo me calcium sɔ gbɔ le abe amagbewo, atikutsetse, kple tɔmelã siwo me omega-3 mi le ɖuɖu—kple nuɖuɖu siwo ŋu woɖe atsa le kple esi me ami sɔ gbɔ ɖo akpa dzi tsotso—te ŋu ɖea lolo kple vevesese siaa dzi kpɔtɔna. Le mɔ ka nu? Ame aɖewo gblɔna be nuɖuɖu siawo tɔgbe xea mɔ na kpeƒe ƒe dzoʋuʋuame. Ame aɖewo hã gblɔna be nuɖuɖu siwo me ʋulɛ̃, esiwo wotsɔ nyinotsi wɔe, lu, tomatos, anagote, atadi, kple agbitsa mele o la hã nyona na ame aɖewo.

Le go aɖewo me la, wokafu kpeƒea koko hã be enyo woatsɔ akpɔ egbɔe. Woƒoa amekonua  ɖe kpeƒea tẽ le go sia me si nana be amekola la te ŋu ɖea kpeƒea ƒe lã si dzaa aɖi gblẽnu la ɖa. Gake mɔ sia mewɔa dɔ tututu o elabena vevesesea gbugbɔ vana. Wogawɔa nusi de ŋgɔ boo wu ema si me woɖɔa li kpeƒe bliboa katã (si zi geɖe nyea aligo alo klo) kple ame tɔ wɔwɔea. Amekoko sia ƒomevi te ŋu nɔa anyi dea ƒe 10 va ɖo ƒe 15 eye wòɖea vevesese dzi kpɔtɔna ŋutɔ.

Nyitsɔ laa la, atikewɔlawo te dɔyɔɖaŋu si megblẽa nu fũ le ame ŋu o kpɔ abe esiwo wodoa atike si nye hyaluronic acid ɖe kpeƒea tẽ ene, ale lãmetsi wɔade si nɔa kpeƒea la nanɔ anyi. Zi geɖe la, klo koŋue wote ŋu donɛ na. Europatɔ aɖewo ƒe numekuku ɖee fia be wokpɔ dzidzedze le atike aɖewo siwo dzra ƒuxlɔ̃ea ɖo dodo me.

Togbɔ be womeke ɖe atike aɖeke si daa ŋuɖui keŋkeŋ ŋu o hã la, atike geɖewo ɖea vevesese kple dzoʋuamea dzi kpɔtɔna eye wokpɔ be ɖewo hã te ŋu xea mɔ na dɔa ƒe ŋgɔyiyi. Vevesesenutsitike, kple corticosteroid dɔyaɖaŋu, atike siwo me steroid mele o siwo ɖea vevesesea dzi kpɔtɔna, atike siwo ɖea ŋuɖui dzi kpɔtɔna, atike siwo ɖea ŋutilã ƒe dɔlélenutsiŋutete dzi kpɔtɔna, atike siwo trɔa asi le domenyiŋusẽfianu ŋu, kple atike siwo trɔ asi le domenyiŋusẽmenugbagbevi ŋu be woatsi tre ɖe alesi ŋutilã hoa aʋa ɖe dɔléle ŋu ŋuti la katã nye dɔyɔɖaŋu aɖewo siwo wozãna be woaɖe vevesese siwo ŋuɖui hena vɛ dzi akpɔtɔ. Gake gbɔdzɔekpɔkpɔ mevana dzro ko o, elabena atike siawo katã gblẽa nu le ame ŋu le mɔ bubuwo nu. Viɖe kple afɔku siwo le wo me dada kpɔ be woanya esi nyo na ame nyea kuxi sesẽ na dɔnɔ kple ɖɔktawo siaa.

Aleke amesiwo le ŋuɖui si naa vevesese alea gbegbe lém la te ŋu nɔ te ɖe enui?

[Etenuŋɔŋlɔwo]

[Nya si ɖe dzesi si le axa 6]

ATAMANONO, LOLO AKPA, KPLE ƲUDODO NYE NU VEVI SIWO KOŊ GBƆ WÒTSONA KPEƑETETE ŊUÐUI DZEA AME DZI BƆBƆE

[Aɖaka/Nɔnɔmetata si le axa 8]

DƆYƆÐAŊU BUBUWO

Wobua dɔyɔmɔnu aɖewo be wonyo wu eye womegblẽa nu boo le ame ŋu abe esi ame geɖe ŋutɔ wɔna le wo gbɔ la ene o. Esiawo dometɔ aɖewoe nye oral type II collagen, si ŋu numekula aɖewo gblɔ le be wokpɔ dzidzedze le ezazã be wòaɖe kpeƒe ƒe tete kple kpeƒe ʋudzoame dzi akpɔtɔ. Le mɔ ka nu? To mɔxexe na lãmetsi ʋudzoamewo kple lãmetsi siwo gblẽa nu si ƒe ɖewoe nye esiwo woyɔna be interleukin-1 kple tumor necrosis factor α. Wogblɔ be wokpɔ be nunyiame aɖewo siwo wokpɔna tso nuɖuɖu si tso agble dzi ŋutɔ me tẽ te ŋu xea mɔ na lãmetsi gblẽnu siawo. Woƒe ɖewoe nye vitamin E, vitamin C, niacinamide, tɔmelã ŋu mi siwo me eicosapentaenoic acid kple gammalinolenic acid le. Le China la, wozã Tripterygium wilfordii Hook F, si nye gbetike aɖe ƒe geɖe. Wogblɔ be enyo na kpeƒetete ŋuɖui dada.

 [Nuwo ƒe nɔnɔme si le axa 4, 5]

(Edze nyuie le agbalẽa ŋutɔ me)

ƑUNUKPEƑE SI LE DEDIE

ƑUŊUKOTOKU

LÃKUSI

ƑUXLƆ̃E

KPEƑETSIÃKA

KPEƑEKOTOKU

KPEƑELÃ FALƐFALƐ

TSI SI NƆA KPEƑEA

ƑU

KPEƑETETE ŊUÐUI

MƆ MEGAVA LE WO DOME O

ƑU KPLE ƑUXLƆ̃EA LE GBEGBLẼM

KPEƑELÃ FALƐFALƐ SI LE DZO ƲUM

ƑUMEŊUÐUI

ƑUXLƆ̃E SI KAKA

ƑUXLƆ̃EA LE GBEGBLẼM

ƑU TOTOE

[Afi Si Míexɔ Mɔɖeɖe Tso]

Source: Arthritis Foundation

[Nɔnɔmetata siwo le axa 7]

Ŋuɖui ate ŋu adze ɖeviwo kple ame tsitsiwo siaa dzi

[Nɔnɔmetata siwo le axa 8]

Ðoɖowɔwɔ ɖe kamedede kple nuɖuɖu si sɔ ŋuti ate ŋu ana gbɔdzɔe ame vaseɖe afi aɖe