Ƒo Asa Na Tsatsadada Ƒe Mɔ̃ La

“Tsatsadada megblẽa nu le nye lãmesẽ ŋu o, eye meléa ŋku ɖe ga agbɔsɔsɔ si metsɔna daa tsatsae ŋu ɣesiaɣi. Gake melɔ̃ ɖe edzi be ɣesiaɣi si mada tsatsa ɖesiaɖe la, aɖi siwo mebuna be wonye nye aklama ye metiana ɣesiaɣi.”—Linda.

TSATSADALA geɖewo va xɔ edzi se be aklama alo dzɔgbenyui akpe ɖe yewo ŋu yewoatia aɖi siwo sɔ ada. Anɔ eme be womanɔ esusum be aʋatsodzixɔse mawo ŋue yewole ŋu ɖom ɖo ya o, gake woléa wo me ɖe asi kokoko.

Tsatsadala aɖewo gɔ̃ hã doa gbe ɖa na Mawu hebianɛ be wòakpe ɖe yewo ŋu ne yewoaɖu aɖi si yewotia. Ke hã Biblia ƒo nu tso alesi Mawu bu fɔ amesiwo gblɔna be yewosubɔnɛ gake ganɔa ‘kplɔ̃ ɖom na aklama’ ŋu. (Yesaya 65:11) Ẽ, nuwɔna siwo doa alakpadzixɔse siwo ku ɖe aklama ŋu ɖe ŋgɔ la nyɔa ŋu  na Mawu. Alesi tsatsadada le koŋue naa amewo ɖoa ŋu ɖe Aklama ŋu ŋkuagbãtɔe.

Tsatsadada hã naa amewo ƒoa wo ɖokui ɖe galɔlɔ̃ me vĩ. Le egbexexe si me amewo megatsɔa ɖeke le gbɔgbɔmenuwo me o me la, ga va zu nusi amewo tsɔ wɔ mawui, eye tsatsadada nye mɔ vevi aɖe si dzi wotona subɔnɛ. Tsatsadaƒe gãwo va zu woƒe sɔlemexɔ yeyewo, eye woƒe xɔse yeye si me ʋum wole azɔ enye be ŋukeklẽ nyo. Numekulawo va de dzesii be ame gbogbo siwo yia tsatsadaƒewo gblɔna be menye modzakaɖeɖe alo alesi afima nɔna tae yewo yina ɖo o, ke boŋ yewo yina be yewoaɖu “ga home gã aɖe  ŋutɔŋutɔ.” Gake Biblia xlɔ̃ nu be: “Nuvɔ̃wo katã ƒe ke enye galɔlɔ̃, si yome mɔ ame aɖewo di, eye wotre mɔ tso xɔse la gbɔ, eye wotsɔ nuxaxa geɖe ŋɔ wo ɖokui flofloflo.”—Timoteo I, 6:10.

Biblia gblɔe kɔte le Korintotɔwo I, 6:9, 10 be: “Migana woable mi o: . . . trɔ̃subɔlawo . . . kple ŋubiãlawo . . . la womanyi mawufiaɖuƒe la ƒe dome o.” Menye dɔléle vɔ̃ɖi koe ŋukeklẽ nye o; ewua ame le gbɔgbɔ me hã—gake enye dɔléle si woate ŋu ada.

Woke Ðe Nusi Ado Ŋusẽ Wo Hena Tɔtrɔwɔwɔ Ŋu

Kazushige si míeyɔ le nyati gbãtɔa me gblɔ be: “Medze agbagba be madzudzɔ tsatsadada zi geɖe. Meva de dzesii be tsatsa si mía kple xɔ̃nyewo míenɔ dadam le duɖimekeƒea nɔ nu gblẽm le nye ƒomea ŋu. Ga si meɖuna gafiãna ɣesiaɣi. Metsɔ ga si srɔ̃nye dzra ɖo ɖe mía viŋutsu evelia dzidzi ŋu gɔ̃ hã da tsatsae, eye ʋɛʋɛʋɛ la meva nɔ asi ƒom ɖe dɔwɔƒe ƒe ga me tsɔ nɔ tsatsa damee. Esia va wɔe be amewo megadea bubu ŋunye o. Srɔ̃nye faa avi enuenu nɔa kuku ɖem nam be madzudzɔ tsatsadada, gake ɖeko wòglom gbidii.”

Emegbe Kazushige te Biblia sɔsrɔ̃ kple Yehowa Ðasefowo. Egblɔ be: “Zi alesi mexlẽ Biblia la, zi nenemae kakaɖedzi sua asinye be Mawu aɖe li eye be toɖoɖo eyama aɖe vi nam. Meɖoe kplikpaa be madzudzɔ tsatsadada to Mawu ƒe ŋusẽdodo me. Ewɔ nuku nam be, menye ɖeko medzudzɔ tsatsadada o ke boŋ melé fui kura. Fifia ne mebu nuxaxa si tsatsadada he va nye ƒomea dzii ŋu la, eɖua dzi nam ale gbegbe. Aleke gbegbe medaa akpe na Yehowa Mawui be ekpe ɖe ŋunye medo le tsatsadada ƒe numamea me eye be ena gɔmesese va le nye agbe ŋu enye esi!”—Hebritɔwo 4:12.

John si míeyɔ le nyati gbãtɔa me hã te Biblia sɔsrɔ̃. Egblɔ be: “Biblia sɔsrɔ̃ kpe ɖe ŋunye megbugbɔ ŋugble de le nye nɔnɔmewo ŋu. Zi gbãtɔe nye sia nye ŋku ʋu mekpɔ nusi tsatsadada nɔ gbegblẽm le mía kple nye ƒomea ŋu la dze sii ŋutɔŋutɔ. Meva kpɔe dze sii be tsatsadada ƒãa ɖokuitɔdidi, ŋukeklẽ ƒe nɔnɔme ɖe ame me—siwo nye nɔnɔme siwo Yehowa lé fui. Esi meyi nusɔsrɔ̃a dzi la, lɔlɔ̃ si le asinye na Yehowa do ŋusẽm medzudzɔ tsatsadada. Medze tsatsadada gɔme elabena medi be nye agbe nanyo ɖe edzi. Nye didi ma va eme azɔ esi medzudzɔ tsatsadada hele Yehowa subɔm kple dzidzɔ.”

John srɔ̃, Linda hã tso nya me be yeadzudzɔ tsatsadada. Egblɔ be: “Menɔ bɔbɔe nam o. Gake esi mía kple srɔ̃nye míedze Biblia sɔsrɔ̃ kple Yehowa Ðasefowo ko la, mesrɔ̃ alesi mada susu ɖe nusiwo le vevie le agbe me la dzii. Menye nusiwo Mawu gblɔ be wonyo ɖeɖeko lɔlɔ̃e mesrɔ̃ o ke mesrɔ̃ fuléle nusiwo wòlé fui hã, tsɔ kpe ɖe ŋukeklẽ ƒomevi ɖesiaɖe ŋu. Tsɔ kpe ɖe agbe si ŋu gɔmesese le si su asinye ŋu la, ga geɖe tsia nye kotoku me.”—Psalmo 97:10.

Wò hã ate ŋu akpɔ ŋusẽ kple nunya si ana nàƒo asa na tsatsadada ƒe mɔ̃ la, to mia kple Yehowa Mawu dome ƒomedodo tutuɖo me. Esia wɔwɔ ana wò ganya, seselelãme, kple gbɔgbɔ me lãmesẽmenɔnɔ nanyo ɖe edzi. Ekema dzi adzɔ wò be nàva de dzesi nya siwo le Lododowo 10:22 ƒe nyateƒenyenye: ‘Yehowa ƒe yayra wɔa ame kesinɔtɔ eye mekpea vevesese ɖe eŋu o.’

[Nya si ɖe dzesi si le axa 11]

Menye dɔléle vɔ̃ɖi koe ŋukeklẽ nye o; ewua ame le gbɔgbɔ me hã

[Aɖaka/Nɔnɔmetata siwo le axa 9]

Tsatsadada Kple Vivimeŋusẽ La

Numekula siwo le Duke Yunivɛsiti ƒo nu tso ƒomedodo si le tsatsadada ŋuti boblododowo kple vivimeŋusẽwo dzixɔxɔse dome ŋuti le nyatakaka aɖe si wona Dukɔa ƒe Tsatsadada ƒe Ŋusẽkpɔɖeamedzi Ŋuti Numekuha la me. Nyatakakaa gblɔ be: “Ŋutilãmenuwo didi koŋ ŋue [tsatsadada] ŋuti boblododo geɖewo ƒoa nu le . . . Ke hã menye dɔ sesẽ wɔwɔ kple kutrikuku me toto akpɔ ŋutilãmenuwo tɔ tɔgbee o ke boŋ ŋuɖoɖo ɖe vivimeŋusẽwo kple akunyawɔkaɖiwo, drɔ̃ewo kple aʋatsodzixɔsewo ŋu dzie wotui ɖo. Eye lotodɔwɔla ɖesiaɖe nyae be yeƒe asisi veviwo dometɔ geɖewo nɔa te ɖe woa ŋutɔwo ƒe aʋatsodzixɔsewo, afakadzesiwo, kple ‘drɔ̃e gbalẽ’ xɔŋkɔ siwo me woŋlɔa xexlẽdzesi siwo sɔ ɖe ŋkɔwo, ɣletiŋkekewo, kple drɔ̃ewo nu ɖo la dzi tsoa gbe. Le esi teƒe be lotodɔwɔlawo nate gbe ɖe edzi be aɖi ɖesiaɖe si wotia la ate ŋu age eye be aɖi nyanyɛ aɖewo ko dada mana woaɖu gbe si wotso o teƒe la, woɖonɛ koŋ dea dzi ƒo na edalawo be woatia xexlẽdzesi tɔxɛ aɖewo (siwo me woalé ɖe asi goŋgoŋ) anɔ dadam.”

[Nɔnɔmetata siwo le axa 10]

“Lɔlɔ̃ si le asinye na Yehowa do ŋusẽm medzudzɔ tsatsadada.”​—John

“Tsɔ kpe ɖe agbe si me dzidzeme le nɔnɔ ŋu la, ga geɖe tsia nye kotoku me.”​—Linda

[Nɔnɔmetata siwo le axa 10]

“Ewɔ nuku nam be, menye ɖeko medzudzɔ tsatsadada o ke boŋ melé fui kura.”​—Kazushige