Yae Kplɔe Vɛ

Esime aƒetɔ aɖe nɔ zɔzɔm le Mumbai ƒe ablɔ dzi le India la, ya ʋuduʋudu aɖe kplɔ agbalẽvi aɖe va da ɖe eƒe afɔnu. Fiaɖuƒe Ŋuti Nya 36 liae, si ƒe tanyae nye “Ƒe Akpe Yeye La—Nukae Etsɔ si Gbɔna Ahe Vɛ na Wò?” Nyatia do dzidzɔ nɛ. Etsɔe enumake eye wòxlẽ agbalẽvi bliboa katã. Enyɔ eƒe ɖetsɔleme, eye esi wòdi be yeanya nu geɖe kpee ta la, ebia be woaɖo Biblia kple agbalẽ bubuwo ɖe ye.

Nya siwo doa ŋusẽ ame ƒe xɔse ye le agbalẽvi ma si Yehowa Ðasefowo ta la me. Eɖe nu me eme kɔ ƒã be kuxi siwo míedoa goe siwo dometɔ aɖewo nye dɔléle, ahedada, kple aʋawɔwɔ la tso “ŋukeklẽ, makamakaɖeamedzi, kple ɖokuitɔdidi gbɔ—siwo nye nɔnɔme si dzɔdzɔmeŋutinunyalawo ƒe numekuku, mɔ̃ɖaŋununya, alo dunyahehe mate ŋu aɖe ɖa bɔbɔe o.” Trakt la gagblɔe be le etsɔ si gbɔna kpuie me la, Mawu aɖe vɔ̃ɖinyenye katã ɖa le anyigba dzi.

Àdi be yeanya nu geɖe tso etsɔme ŋugbedodo siwo le Biblia me ŋua? Yehowa Ðasefowo zãna Biblia-srɔ̃gbalẽ siwo dometɔ ɖekae nye Nukae Mawu Di tso Mía Si? tsɔ fiaa Biblia ame miliɔn nanewo le woƒe aƒewo me. Agbalẽ gbadza sia ɖo biabia siwo gbɔna ŋu: Amekae Nye Mawu? Nukae nye Mawu ƒe tameɖoɖo na anyigba? Nukae nye Mawu ƒe Fiaɖuƒe la? Aleke Biblia ate ŋu ana wò ƒomegbenɔnɔ nanyo ɖe edzii?

Ne èdi be Yehowa Ðasefowo nasrã ye kpɔ le yeƒe aƒeme ahakpe ɖe ŋuwò nànya nusi Mawu ava wɔ le etsɔ si gbɔna kpuie me la, adzɔ dzi na wo eye woagblɔ nya geɖe na wò tso Mawu ƒe Fiaɖuƒea ŋu. Taflatse kpe nudɔgbalẽvi si le ete la ɖo be woate ŋu akpe ɖe ŋuwò.

□ Taflatse miɖo agbalẽ gbadza si nye Nukae Mawu Di tso Mía Si? ƒe ɖe ɖem.

□ Taflatse miva wɔ aƒeme Biblia nusɔsrɔ̃ femaxee kplim.