Biblia ƒe Nukpɔsusu

Ðe Dukɔwo Dome Nyagbɔkpɔmɔnuwo Ahe Ŋutifafa Va Xexeamea?

ÀDI be aʋawɔwɔ ƒomevi ɖesiaɖe nu nayia? Ðikekemanɔmee la, ehiã be woato dukɔwo dome nyagbɔkpɔmɔnuwo dzi alé dukɔmevi kple dukɔwo dome ʋawɔwɔ aɖewo nu ya teti. Ame geɖe susui be ne xexeamedziɖulawo wɔ nu aduadu la, woate ŋu aɖe aʋawɔwɔwo ɖa. Gake ɖewohĩ dzi ɖe le ƒowò le esi dukɔwo dome nyagbɔkpɔmɔnuwo mele dzidzedze kpɔm o ta. Hena ƒe alafa geɖe la, dukɔwo dome nyagbɔkpɔlawo da asi ɖe nubablawo dzi, wɔ tameɖoɖo kplikpaawo ŋuti ɖoɖowo, hewɔ dukplɔlawo alo dziɖuɖumegãwo ƒe takpekpewo, gake kuxi ʋɛ aɖewo koe wote ŋu kpɔ ta na keŋkeŋ.

Biblia gblɔ nya geɖe tso dukɔwo dome nyagbɔkpɔkpɔ kple ŋutifafa ŋu. Eɖo biabia siwo gbɔna ŋu: Nukawoe xea mɔ na dukɔwo dome nyagbɔkpɔkpɔ be mete ŋu hea ŋutifafa vɛ fifia o? Ðe wòle be Kristotɔwo naƒo wo ɖokui ɖe dukɔwo  dome nyagbɔkpɔdɔwo mea? Mɔ ka nue ŋutifafa vavãtɔ ato ava mlɔeba?

Nukae Xea Mɔ na Ŋutifafa?

Biblia me nuŋlɔɖi geɖe ɖe alesi amewo ƒe gododo ŋkume kple ŋkume hena nyawo léle kpɔ ate ŋu ahe ŋutifafa vɛ la fia. Le kpɔɖeŋu me, Abigail ɖe nu me na Dawid kple eƒe aʋakɔ aɖaŋutɔe be woagabia hlɔ̃ yeƒe aƒemetɔwo o. (Samuel I, 25:18-35) Yesu do lo tso fia aɖe si ŋu ŋusẽ mele wòakpe aʋa kple edzidzelawo o tsɔ wu be wòaɖo dɔlawo ɖe wo hena ŋutifafa wɔwɔ la ŋu. (Luka 14:31, 32) Ẽ, Biblia lɔ̃ ɖe edzi be dukɔwo dome nyagbɔkpɔmɔnu aɖewo ate ŋu alé aʋawɔwɔwo nu. Ekema nukatae ŋutifafatakpekpewo mekpɔa dzidzedze boo aɖeke o zi geɖe?

Biblia gblɔe ɖi wòsɔ be míaƒe ɣeyiɣia anye ɣeyiɣi vɔ̃wo. Le Satana Abosam ƒe ŋusẽkpɔɖeamedzi vɔ̃wo ta la, amewo anye amesiwo “gbea avuléle” ahazu “ame wɔadãwo, amesiwo melɔ̃a nu nyui o, yomemɔfialawo, ame mabunuwo, amesiwo doa wo ɖokui ɖe dzi glodzo.” (Timoteo II, 3:3, 4; Nyaɖeɖefia 12:12) Gakpe ɖe eŋu la, Yesu gblɔe ɖi be “aʋawo kple aʋaŋutiɣliwo” anye fifi nuɖoanyiawo ƒe nuwuwu ƒe dzesi. (Marko 13:7, 8) Amekae agbe be nusiawo medzi ɖe edzi o? Esi wòle alea ta la, ɖe wòwɔ nuku be zi geɖe agbagba siwo wodzena be woahe dukɔwo dome ŋutifafa vɛ la doa kpo nua?

Azɔ hã, de ŋugble le nya sia ŋu: Togbɔ be dukɔwo dome nyagbɔkpɔlawo adze gbagba vevie be yewoalé aʋawɔwɔ nu hã la, wo dometɔ ɖesiaɖe ƒe taɖodzinu vevitɔe nye be woado woa ŋutɔwo dedukɔwo ƒe nyonyo ɖe ŋgɔ. Esia koŋue nye dukɔwo dome nyagbɔkpɔla dunyahelawo ƒe taɖodzinu vevitɔ. Ðe wòle be Kristotɔwo naƒo wo ɖokui ɖe nya mawo mea?

Kristotɔwo Kple Dukɔwo Dome Nyagbɔkpɔlawo

Biblia xlɔ̃ nu be: “Migaɖo ŋu ɖe amegãwo, amegbetɔvi, siwo mate ŋu axɔ na ame o la ŋu o.” (Psalmo 146:3) Esia fia be susu nyui ka kee ɖale xexeame dukɔwo dome nyagbɔkpɔlawo si o, ŋutete kple ŋusẽ mele wo si woakpɔ ta na kuxiwo keŋkeŋ o.

Esime Yesu nɔ Pontio Pilato ŋkume wònɔ ʋɔnu drɔ̃mee la, egblɔ be: “Nye fiaɖuƒe metso xexe sia me o; nye fiaɖuƒe, ɖe wòtso xexe sia me la, ne nye dɔlawo aʋli tanye, bena womagadem asi na Yudatɔwo o; ke azɔ la nye fiaɖuƒe metso afisia o.” (Yohanes 18:36) Zi geɖe dukɔmevinyenye ƒe fuléle kple dunyahehe me ɖokuitɔdidi kpɔa ŋusẽ ɖe ŋutifafaɖoɖowo dzi. Eyata Kristotɔ vavãwo mekpɔa gome le xexe sia me ʋawɔwɔwo kple wo nu léle to dukɔwo dome nyagbɔkpɔmɔnuwo dzi ƒe agbagbadzedzewo me o.

Ðe esia fia be Kristotɔwo metsɔ ɖeke le xexeamenyawo me oa? Ðe amegbetɔwo ƒe fukpekpe menyɔa fu lãme na wo oa? Menye nenemae o. Ke boŋ Biblia ɖɔ Mawu subɔla vavãwo be wonye amesiwo le “hũ ɖem, eye wole nu xam” ɖe nu vɔ̃ɖi siwo le edzi yim ƒo xlã wo ŋu. (Xezekiel 9:4) Ðeko Kristotɔwo le Mawu sinu kpɔm be wòahe ŋutifafa vɛ abe alesi wòdo ŋugbee ene. Ðe aʋa ƒe anyimanɔmanɔ fia ŋutifafa na wòa? Ema tututu wɔ gee Mawu ƒe Fiaɖuƒea le. (Psalmo 46:9, 10) Gake tsɔ kpe ɖe eŋu la, akpɔ egbɔ be dedienɔnɔ blibo kple ŋutifafa su anyigbaa dzi nɔlawo katã si. (Mixa 4:3, 4; Nyaɖeɖefia 21:3, 4) Ŋutifafa deblibo sia tɔgbe mate ŋu ato dukɔwo dome nyagbɔkpɔlawo kple ‘avuléhabɔbɔwo’ ƒe agbagbadzedzewo dzi ava gbeɖe o.

Biblia ƒe nyagblɔɖi kple nuteƒekpɔkpɔwo ɖee fia kɔte be dziɖeleameƒo koe ŋuɖoɖo ɖe dukɔwo dome nyagbɔkpɔlawo ŋu be woahe ŋutifafa vɛ hena vɛ. Amesiwo da woƒe mɔkpɔkpɔ ɖe Yesu Kristo dzi be wòahe ŋutifafa vɛ hedoa alɔ Mawu ƒe Fiaɖuƒea la ƒe didiwo hena ŋutifafa vavãtɔ kpɔkpɔ ava eme. Gawu la, woase vivi le eme tegbee!—Psalmo 37:11, 29.

[Nya si ɖe dzesi si le axa 15]

Susu nyui ka kee ɖale xexeame dukɔwo dome nyagbɔkpɔlawo si o, ŋutete kple ŋusẽ mele wo si woakpɔ ta na kuxiwo keŋkeŋ o

[Nɔnɔmetata Tsoƒe si le axa 14]

Ete: Photo by Stephen Chernin/Getty Images