Biblia ƒe Nukpɔsusu

Anya Wɔ Be Woaɖu Numame Gbegblẽwo Dzia?

AGBALẼŊLƆLA Mark Twain gblɔ nya ɖikokoe aɖe ɣeaɖeɣi be: “Asiɖeɖe le atamanono ŋue nye nu bɔbɔetɔ kekeake le xexeame. Menya elabena mewɔe zi gbɔ zi akpe geɖe.” Ðikekemanɔmee la, Twain ƒe nukokoenyaa wɔ dɔ ɖe ame geɖewo dzi. Togbɔ be woanya nyuie be numame aɖewo wɔwɔ menyo o eye wogblẽa nu le ame ŋu hã la, wonya hã be ameɖokuidzizizi be womawɔ wo o kple asiɖeɖe le wo ŋu nye nya bubu kura. Nuwɔna aɖewo ate ŋu atsi ame si ƒe geɖe ale gbegbe be agbagbadzedze be woaɖe asi le wo ŋu ate ŋu asesẽ ŋutɔ. Agbagbadzedze be woaɖu dzodzro mawo dzi ate ŋu ate ɖeɖi ame ŋu ahana ŋutilã la nase veve gɔ̃ hã.

Ðk. Anthony Daniels, si wɔa atike na gamenɔlawo, gblɔ be zi geɖe la, sedzidalawo gblɔna be seselelãme kple dzodzro gbegblẽwo kpɔa ŋusẽ ɖe yewo dzi ale gbegbe be wɔna aɖeke meganɔa yewo ŋu o. Woʋlia nya be ne nane nya zu numame na ame ko la, “ekpɔa ŋusẽ ɖe edzi ale gbegbe be ŋusẽ aɖeke kura meganɔa esi wòate ŋu aɖu eɖokui dzi o.” Ne nya sia nye nyateƒe la, ke womate ŋu abia akɔnta mía dometɔ aɖeke o le nyaƒoɖeamenu si wònye ta. Gake nyateƒee wònye be míaƒe seselelãmewo kple dzodzrowo kpɔa ŋusẽ ɖe mía dzi ale gbegbe be míate ŋu aɖu mía ɖokui dzi oa? Alo ɖe woate ŋu aɖu numame gbegblẽwo dzi nyateƒea? Be míakpɔ ŋuɖoɖo si ŋu kakaɖedzi le la, mina míakpɔ nya si Biblia gblɔ ɖa.

Nudzodzro Kple Nusi Nyo Woawɔ

Biblia na eme kɔ ƒã be Mawu abia akɔnta mí ɖe míaƒe nuwɔnawo ta. (Romatɔwo 14:12) Azɔ hã edi tso mía si be míawɔ nu wòawɔ ɖeka kple yeƒe dzidzenu dzɔdzɔewo. (Petro I, 1:15) Esi wònye mía Wɔla ta la, enya nusi nyo na mí, eye eƒe gɔmeɖosewo tsi tre ɖe nuwɔna siwo zu numame na ame geɖewo le xexe sia me la dometɔ geɖe ŋu. (Korintotɔwo I, 6:9, 10; Galatiatɔwo 5:19-21) Ke hã enya nusi le edzi yim ŋutɔŋutɔ eye wònye nublanuikpɔla si media nusi amegbetɔ madeblibowo mate ŋu awɔ o la tso wo si o.—Psalmo 78:38; 103:13, 14.

Ema tae hakpala la ŋlɔ bena: “Yehowa, ne èbe, yealé vodadawo ɖi la, Aƒetɔ, ameka anɔ te ma?” (Psalmo 130:3) Ẽ, Yehowa nya nyuie be “ame ƒe dzimesusu enye vɔ̃ tso ɖevime ke.” (Mose I, 8:21) Míaƒe dzɔdzɔme, gbɔdzɔgbɔdzɔ siwo dome míenyi, kple agbe siwo míenɔ va yi wɔnɛ be asaƒoƒo na tamesusu kple dzodzro gbegblẽ ɖesiaɖe menya wɔna o. Esia ta lɔlɔ̃ ʋã Yehowa be media blibodede tso mía si o.—Mose V, 10:12; Yohanes I, 5:3.

Gake Mawu ƒe nublanuikpɔkpɔ alea meɖe mí le míaƒe agbanɔamedzi be míaɖu dzodzro vɔ̃wo dzi me o. Togbɔ be apostolo Paulo lɔ̃ ɖe edzi be yewɔa avu kple dzodzro vɔ̃wo hã la, mena ta o. (Romatɔwo 7:21-24) Egblɔ be: “Meƒoa nye ŋutilã wòdoa ʋusrã, eye mewɔnɛ kluvi.” Nukatae? Bena “nye ŋutɔ la nyemagazu ame madzemadze o.” (Korintotɔwo I, 9:27) Ẽ, be míatsi tre ɖe dzodzro vɔ̃ siwo le mía me ŋu ahaɖu wo dzi keŋkeŋ la, ɖokuidziɖuɖu hiã vevie.

Àte Ŋu Awɔ Tɔtrɔ

Amesiwo srɔ̃ nu tso amewo ƒe agbenɔnɔ ŋu gblɔ be alesi wosrɔ̃a nuwɔna nyuiwo wova zua numame na ame le ɣeyiɣi aɖewo megbee la, nenemae wòle le nuwɔna gbegblẽ siwo va tsia ame si la hã gomee. Ne nya sia nye nyateƒe la, ekema woate  ŋu asrɔ̃ alesi woaɖe asi le nuwɔna gbegblẽ siwo tsi ame si la hã ŋu! Aleke woawɔe? Agbalẽ aɖe si ƒo nu tso tenɔnɔ ɖe nuteɖeamedzi nu ŋu ŋlɔlawo gblɔ be: “Bu viɖe siwo atso asiɖeɖe le numame xoxoawo ŋu me la ŋu.” Emegbe “ŋlɔ viɖe vovovo siwo nàkpɔ ne ètrɔ wò agbenɔnɔ la ɖi.” Ẽ, ŋugbledede le viɖe siwo míakpɔ tso asiɖeɖe le numame gbegblẽwo ŋu me la aʋã mí be míawɔ tɔtrɔ.

Bu nuxlɔ̃ame si apostolo Paulo na be ‘míana woawɔ mí yeyee le míaƒe tamesusu ƒe gbɔgbɔ la me’ me ŋu kpɔ. (Efesotɔwo 4:22, 23) Gbɔgbɔ mae nye nusi kpɔa ŋusẽ míaƒe tamesusu dzi. Àte ŋu awɔ gbɔgbɔ ma yeyee to tete ɖe Mawu ŋu kplikplikpli kple ŋudzedzekpɔkpɔ tutuɖo ɖe eƒe dzidzenuwo ŋu me. Enyanya be yele nusiwo dzea Yehowa ŋu wɔm ado ŋusẽ wò be nàyi edzi awɔ tɔtrɔ siwo hiã.—Psalmo 69:31-34; Lododowo 27:11; Kolosetɔwo 1:9, 10.

Gake asiɖeɖe le numame gbegblẽ siwo anya kpɔ ŋusẽ ɖe míaƒe agbe dzi ƒe geɖe ŋu asesẽ. Mele be míabui be aʋa vi nye ge wòala míawɔ hafi míaɖu dzi o. Le nyateƒe me la, ate ŋu adzɔ be nàgage ɖe nɔnɔme ma me ake ɣeaɖewoɣi eye nàdo kpo nusi nèdi be yeawɔ boŋ la wɔwɔ. Gake dzi megaɖe le ƒowò o, ne ɣeyiɣiwo va le yiyim ko la, nuwo ava nɔ bɔbɔe vie. Zi alesi nèyi edzi le agbagba dzem be yeaɖe nɔnɔme yeyea afiae la, zi nenemae eɖeɖefia ava ma wòe.

Azɔ hã kakaɖedzi li be amesi lɔ̃ Mawu ate ŋu axɔ eƒe kpekpeɖeŋu kple yayra. Paulo na kakaɖedzi mí be: “Nuteƒewɔla enye Mawu, amesi mana mɔ bena, woate mi akpɔ awu alesi miate ŋui la o; ke ana gododo le eme hã . . . bene miate ŋu atsɔe.” (Korintotɔwo I, 10:13) Eteƒe madidi o, Yehowa Mawu aɖe nuɖoanyi vɔ̃ɖi sia kple eme tetekpɔ kple dzodzro vɔ̃wo katã ɖa. (Petro II, 3:9-13; Yohanes I, 2:16, 17) Amegbetɔ madeblibo siwo katã atsi agbe le tsɔtsrɔ̃ sia me la ate ŋu avo tso fuwɔame ɖesiaɖe me keŋkeŋ—le ŋutilã, susu, kple seselelãme gome—tegbetegbe mlɔeba. Mawu do ŋugbe be: “Womagaɖo ŋku tsãtɔwo dzi, alo woava ame ƒe ta me o.” (Yesaya 65:17) Ðikeke mele eme o be dzodzro vɔ̃ ɖefunamewo anɔ ‘tsã nu’ siawo dome. Ðe esia menye susu nyui ŋutɔ aɖe si ta wòle be míawɔ míaƒe ŋutete ɖesiaɖe awɔ aʋa atsi tre ɖe numame gbegblẽwo ŋu egbea oa?

[Aɖaka/Nɔnɔmetata siwo le axa 31]

ASIÐEÐE LE NUMAME GBEGBLẼWO ŊU

1. De dzesi numame gbegblẽwo eye nàlɔ̃ ɖe edzi be wonye numame gbegblẽwo. Bia ɖokuiwò be, ‘Ðe nuwɔna sia ɖea vi nam ŋutɔŋutɔa? Ðe wòɖea fu na amewoa? Ðe wògblẽa nu le nye lãmesẽ, ganyawo, dedienɔnɔ, ƒome, alo susu me ƒe akɔdzeanyi ŋua? Aleke gbegbee wòaɖe vi nam wui ne meɖe asi le eŋu?’

2. Tsɔ nuwɔna ɖɔʋu aɖe ɖo numame gbegblẽa teƒe. Le kpɔɖeŋu me, ɖe nède dzesii be yezãa ɣeyiɣi geɖe akpa ɖe Internet ŋu, ɖewohĩ nènɔa nu maɖɔʋuwo kpɔma? Ekema wɔ ɖoɖo nàzã ɣeyiɣi ma ɖe nuxexlẽ, nusɔsrɔ̃, alo kamedede ɖɔʋuwo ŋu.

3. Lé ŋku ɖe ŋgɔyiyi si wɔm nèle ŋu. Zã miniti ʋɛ aɖewo nàde ŋugble le ŋgɔyiyi si nèwɔ ŋu gbesiagbe. Ne ègage dze nɔnɔmea me ake la, kpɔe ɖa be nukawoe gakplɔ ye de nuwɔna ma me ake hã.

4. Bia kpekpeɖeŋu tso amewo gbɔ. Na xɔlɔ̃wo kple ƒometɔwo nanya be yele agbagba dzem be yeaɖe asi le numame sia ŋu eye nàbia be woaɖo afɔ afɔta na ye ne wokpɔe be yedi be yeage ɖe nɔnɔmea me. Ðo dze kple amesiwo te ŋu ɖu nuwɔna ma dzi.—Lododowo 11:14.

5. Da sɔ eye nàɖo taɖodzinu siwo gbɔ amegbetɔ ate ŋu aɖo na ɖokuiwò. Mègakpɔ mɔ be yeakpɔ dzidzedze kpata o. Asiɖeɖe le nuwɔna siwo tsi ame si ƒe geɖe dometɔ aɖewo ŋu ate ŋu axɔ ɣeyiɣi.

6. Do gbe ɖa na Mawu. To Mawu ƒe kpekpeɖeŋu me la, àte ŋu aɖu numame gbegblẽ ɖesiaɖe dzi.—Psalmo 55:23; Luka 18:27.