Nɔ Game Dzi!

WOKA nya ta le USA Today me be: “Megbetsitsi nye numame ƒe kuxi le dɔmegãwo ŋu.” Eyɔ numekuku aɖe si wowɔ tso dɔmegã 2,700 ŋu hegblɔ kpee be: “Wotsia megbe le takpekpe ade le 10 ɖesiaɖe si woyina me.”

Le dɔwɔlawo dome la, wobua megbetsitsi be enye nɔnɔme manyomanyo ɖeɖefia, eye eyi ŋgɔ wu ema gɔ̃ hã. Numekuku aɖe si wowɔ tso dɔwɔla 81,000 ŋu ɖee fia be: “Gaƒoƒo siwo dome gblẽna dzodzro to megbetsitsi kple dɔmemayimayi mɔmabiamabiae me nye mɔ siwo dzi dɔwɔƒewo ƒe ga gbogbowo tona buna.” Gake menye dɔwɔnyawo me koe megbetsitsi gblẽa nu le o. Numekuku aɖe si wowɔ le sekɛndrisuku dzikpɔlawo gbɔ ɖee fia be “sukuviwo ƒe megbetsitsi koŋue nye kuxi si gblẽa nu le woƒe hehexɔxɔ ŋu edziedzi.”

Ðe mía Wɔla ɖoe be míanye amesiwo bua gamedzinɔnɔ nu vevii. Ewɔ “nu keklẽ gã eveawo”—ɣe kple dzinu—be woakpe ɖe mía ŋu míanya game. (Mose I, 1:14-16) Le egbeŋkekeawo me la, gamefiamɔ̃ siwo li kpena ɖe mía ŋu be míanya miniti kple sɛkɛnd siwo le gaƒoƒo dzi gɔ̃ hã. Gake togbɔ be mɔ̃ɖaŋununya na be gamekpɔkpɔ le bɔbɔe ŋutɔ hã la, gamedzinɔnɔ—hena dɔme, suku, alo teƒe vevi bubuwo yiyi—kpɔtɔ nye kuxi na mía dometɔ geɖe.

Ɣeyiɣi masuame gbɔe wòanye be kuxia tsoa? Enye nyateƒe be dɔ siwo nɔa amewo dzi le dɔwɔƒewo kple ƒomewo me ate ŋu ate kame ya. Ke hã vidada dɔmedela aɖe si ŋkɔe nye Wanda Rosseland gblɔ be: “Medzudzɔ konyifafa tso ɣeyiɣi masuame ŋu esi meva de dzesii be gaƒoƒo 24 ye le mía dometɔ ɖesiaɖe si gbesiagbe. Mebu eŋu hetso nya me be le míaƒe egbexexea me la, menye ɖe ɣeyiɣi si le mía si le sue akpa o, ke boŋ ɣeyiɣi dome gblẽnuwo kple susuhenuwoe sɔ gbɔ akpa.”

Bu Renee, * si nye vidada Yehowa Ðasefo, si si vi atɔ̃ le hã ŋu kpɔ. Egblɔ be: “Le vinyewo ƒe ɖevimenɔɣi la, wo dzadzraɖo hena suku kple Kristotɔwo ƒe kpekpewo yiyi ɖe game dzi menɔa bɔbɔe o. Ke hã menɔa game dzi ɣesiaɣi. Gake fifia si wo katã wotsi boŋ la, numame gbegblẽ si nye megbetsitsi va zu kuxi nam.” Ðe numame gbegblẽ sia le wò hã ŋuwòa? Ne nenemae la, àte ŋu awɔ tɔtrɔ! Nusiwo nàte ŋu awɔ la dometɔ aɖewoe nye esi.

● BU EMETSONUWO ŊU. Megbetsitsi ƒe numamea adze nu sue aɖee. Gake de ŋugble le  Biblia ƒe nya siawo ŋu kpɔ: “Nudzodzoe [kukuwo] nana amiɖala ƒe ami ʋẽna kũ heƒaƒãna; bometsitsi ʋɛ aɖe kpena wua nunya kple bubu.” (Nyagblɔla 10:1) Ẽ, “bometsitsi ʋɛ aɖe” le ame bubuwo ŋu mabumabu gome ate ŋu ana ŋkɔ nyui si le ŋuwò le nufiala alo dɔtɔ gbɔ nate ŋu agblẽ.

Esime nyɔnu aɖe si ŋkɔe nye Marie nɔ suku dem le kɔledzi aɖe si le wo gbɔ la, ede dzesii be yeƒe sukuxɔmehati aɖewo “mebua gamedzinɔnɔ nu vevii o,” wotsia megbe hafi vaa klass zi geɖe. Egblɔ be: “Gake medidi hafi wotrɔ woƒe nɔnɔmea o. Nufialawo dometɔ eve mefena kple gamedzinɔnɔ o. Eyata ne miniti ʋɛ aɖe gɔ̃ hãe sukuvi aɖe tsi megbe la, wodea dzesii ɖe agbalẽ me be meva suku gbemagbe o. Eye ne megbetsitsi ƒe dzesidewo sɔ gbɔ ɖe wò ŋkɔ nu la, màxɔ dzesi nyui le dodokpɔ me o.”

Megbetsitsi ɣesiaɣi ate ŋu aƒo ɖi ŋkɔ nyui si le ŋuwò le xɔlɔ̃wo alo hatiwo hã gbɔ. Ŋutsu aɖe si ŋkɔe nye Joseph, si xɔ wu ƒe blane, ɖo ŋku hati Kristotɔ aɖe si wònya ƒe gbogbo aɖewoe nye si va yi la dzi. Togbɔ be wodea bubu ŋutsu sia ŋu le nufiafia ƒe ŋutete siwo le esi ta hã la, kuxi ɖiamenu aɖe le eŋu. Joseph gblɔ be: “Etsia megbe ɣesiaɣi. Etsia megbe le nusianu me! Eye edze abe metsɔ ɖeke le eme o ene. Amewo tsɔa eƒe megbetsitsia nɔa hatse kamee.” Ðe amewo te gbɔgblɔ le ŋuwò be ètsia megbe ɣesiaɣia? Ne nenemae la, ke ele bɔbɔe be wò nɔnɔme nyuiwo magadze woakpɔ o.

● BU AMEWO ŊU. Amewo bua megbetsitsi be enye bubumademade ame ŋu eye eɖiaa wo nu. Eye ate ŋu awɔ na amewo be èbua ɖokuiwò gãe. Esi dɔmegã aɖe nɔ nusita dɔmegã geɖewo tsia megbe vaa kpekpewo ɣesiaɣi me ɖem la, elɔ̃ ɖe edzi be: “Nya la koe nye be dada le mía dometɔ akpa gãtɔ me.” To vovo na ema la, Kristotɔwo bua ame bubuwo gãe wua wo ɖokui. (Filipitɔwo 2:3) Azɔ hã wowɔna ɖe Sikasededea dzi hewɔa nu ɖe amewo ŋu abe alesi wodina be woawɔe ɖe yewo ŋui ene. (Mateo 7:12) Ðe meɖiaa nuwò ne wòhiã be nàlala ame ɣeyiɣi didi oa? Ekema mègana amewo nanɔ lalawòm o.

● SRƆ̃ ƔEYIƔI ŊUDƆWƆWƆ NYUIE. Ðe nèhea nuwo wɔwɔ ɖe megbe heva tsia klokloklo le ɣeyiɣi mamlɛa mea? Ðe nètsɔa nu gbogbo aɖewo doa agbae na ɖokuiwò eye nèdzea agbagba be yeawɔ dɔ gbogbo aɖewo le ɣeyiɣi kpui aɖe ko mea? Gɔmeɖose si le Nyagblɔla 3:1 ate ŋu akpe ɖe ŋuwò, esi nye: “Ɣeyiɣi li na nusianu.” “Ɣeyiɣi” ɖoɖo na nuwo akpe ɖe ŋuwò be nàwɔ wo ɖe ɖoɖo nu.

Gbã la, ŋlɔ nusiwo katã nèdi be yeawɔ la ɖi. Emegbe zɔ ɖe gɔmeɖose si le Filipitɔwo 1:10 dzi: ‘De dzesi nusiwo le vevie wu.’ Ẽ, wɔ nusiwo le vevie wu gbã. Nukae hiã vevie wòle kokoko be nàwɔ gbã? Nusiwo ŋu nàte ŋu aɖe asi le gbɔ ava wɔ ɣebubuɣi eye naneke magblẽ o ye nye kawo? Mlɔeba la, kpɔe ɖa be gaƒoƒo nenie yehiã atsɔ awɔ nuawoe kple ɣekaɣie yeate ŋu awɔ wo hã. Da sɔ eye nàƒo asa na nu gbogbo aɖewo  lɔlɔ kɔ ɖe ɖokuiwò dzi be yeawɔ le ɣeyiɣi kpui aɖe me.

Nyɔnu aɖe si ŋkɔe nye Dorothy daa akpe na edzilawo be wofia gamedzinɔnɔ ye. Egblɔ be: “Ne míayi Kristotɔwo ƒe kpekpe le fiẽ ga 7:30 la, dada naa míedzea dzadzraɖo gɔme gaƒoƒo ɖeka miniti 45 doa ŋgɔ. Míetsona ɖe fiẽnuɖuɖu, agba siwo me míeɖu nu le me kɔklɔ, dzadzraɖo, kple ʋukuku yi kpekpeae ŋu kaba. Gamedzinɔnɔ va ma mí ale gbegbe.” Ɣeaɖewoɣi la, edea ame dzi ne ètso kaba be ne nane va tso mɔ me na wò kpata la, nàte ŋu akpɔ egbɔ. Dorothy gblɔ be: “Nyitsɔ laa meyina ame aɖewo kɔ ge ayi kpekpee. Esi meyina la, nye ʋua ƒe taya va gbã le mɔa dzi. Meɖee gbugbɔ de bubu gake ɖo wo gbɔ ɖe game dzi. Èkpɔea, metsona kaba ɣesiaɣi be ne ʋua do nuƒo nam alo ʋuwo sɔ gbɔ ɖe mɔa dzi hã, game malém o.”

● BIA AÐAŊUÐOÐO TSO AMEWO GBƆ. Biblia gblɔ le Lododowo 27:17 be: “Alesi wotsɔa ga nyrea gae la, nenema ame nyrea nɔviae.” Abe alesi gɔmeɖose sia fiae ene la, ɖo dze kple amesiwo le wò nɔnɔmea tɔgbe me—evɔ wote ŋu wɔa nu ɖe game dzi. Zi geɖe la, aɖaŋuɖoɖo nyui geɖewo anɔ wo si.

Renee, si ŋu míeƒo nu tsoe do ŋgɔ ɖoe kplikpaa be yeaɖe asi le gamedzimanɔmanɔ ŋu. Egblɔ be: “Meɖoe kplikpaa nyitsɔ sia be mawɔ asitɔtrɔ. Togbɔ be mele bɔbɔe nam o hã la, ele kakam ɖe eme.” Wò hã àte ŋui. Nusi hiã koe nye nukpɔsusu nyui ƒe amesinɔnɔ kple agbagbadzedze, àte ŋu asrɔ̃ gamedzinɔnɔ!

[Etenuŋɔŋlɔ]

[Nɔnɔmetata siwo le axa 16]

Megbe tsitsi ɣesiaɣi ate ŋu ana dɔtɔwo natsɔ ŋku bubu akpɔ wòe eye wòaɖe ameŋumabumabu afia

[Nɔnɔmetata si le axa 17]

Ðoɖo nyui wɔwɔ ɖe nuwo ŋu ate ŋu akpe ɖe ŋuwò màgblẽ ɣeyiɣi o