Meɖoe Kplikpaa Be Maɖo Nye Taɖodzinua Gbɔ

ABE ALESI MARTHA CHÁVEZ SERNA GBLƆE ENE

Gbeɖeka esi mexɔ ƒe 16 la, menɔ dɔ wɔm le aƒeme esime meyi ɖi me. Esime nye mo va kɔ la, aba dzie mekpɔ ɖokuinye le. Nye ame bliboa metɔtɔ, ta nɔ ɖuyem vevie, eye nyemate ŋu akpɔ nu alo ase nu o hena miniti geɖe. Mevɔ̃ ale gbegbe. Nukae wɔm?

DZINYELAWO tsi dzimaɖi kplɔm yi ɖɔkta aɖe gbɔ, eye wòŋlɔ vitamin aɖewo nam. Ebe esi zã tsina hafi memlɔa anyi tae meyi ɖi me ɖo. Ɣleti aɖewo megbe la, megaku ƒenyi ake zi evelia, eye emegbe egadzɔ zi etɔ̃lia. Míeyi ɖɔkta bubu gbɔ eye eya gblɔ be nye ahɔhɔ̃mekawo gbɔe kuxia tso eye le esia ta enam atike aɖewo.

Gake ɖeko megava nɔ ƒenyi kum edziedzi wu. Mebúna ɖe ɖokuinye, dzea anyi, eye nuvevi wɔam. Ɣeaɖewoɣi hã, meɖua aɖe kple nye nuyi. Ne nye mo va kɔ la, ta ɖuam vevie eye dzi gbɔ tsɔam. Menɔ veve sem le lãme katã eye zi geɖe la, nyemete ŋu ɖoa ŋku nusi menɔ wɔwɔm hafi ku ƒenyi la dzi o. Ehiãna be matsi aba dzi ŋkeke ɖeka alo eve zi geɖe hafi ahaya. Ke hã, metsɔnɛ ko be ɣeyiɣi aɖe ƒe nu koe nɔ wɔyem—be eteƒe madidi hafi enu ayi o.

Egblẽ Nu le Nye Taɖodzinuwo Ŋu

Esime menɔ tsitsim vie koe nye ƒomea dze Biblia sɔsrɔ̃ gɔme kple Yehowa Ðasefowo. Mɔɖela veviwo, alo ɣeyiɣiawo katã ƒe subɔla siwo zãna gaƒoƒo geɖe ɣleti sia ɣleti tsɔna fiaa Biblia me nyateƒea amewo, dometɔ evee va fiaa nu mí. Mekpɔe be subɔsubɔdɔ si mɔɖela siawo wɔna nana dzi dzɔa wo. Esi menɔ nu ƒom tso Biblia ƒe ŋugbedodowo ŋu na nye nufiala kple sukuhatiwo ta la, nye hã meva te dzidzɔ ma kpɔkpɔ.

Eteƒe medidi hafi nye ƒomea me tɔ geɖe va zu Yehowa Ðasefowo o. Gbeƒãɖeɖe nyanyuia vivi nunye ale gbegbe! Esi mexɔ ƒe adre la, meɖoe be nye hã mava zu mɔɖela vevi. Esi mexɔ ƒe 16 la, mewɔ afɔɖeɖe vevi aɖe be maɖo ta taɖodzinu ma gbɔ hexɔ nyɔnyrɔ. Tete ko ƒenyikuku ƒe nyaa va do mo ɖa.

Mɔɖeɖedɔa Wɔwɔ

Togbɔ be menɔ dɔ lém le ŋutilã me hã la, mebunɛ kokoko be mate ŋu ava zu Yehowa Ðasefo ɣeyiɣiawo katã ƒe subɔla. Gake esi wònye meyia ɖi me zi eve le kwasiɖa ɖeka me ta la, hamea me tɔ aɖewo susui be mele be matsɔ agba kpekpe ma o. Melé blanui eye dzi ɖe le ƒonye. Gake ɣeaɖeɣi la, nɔviŋutsu aɖe kple srɔ̃a siwo le subɔsubɔm le Yehowa Ðasefowo ƒe alɔdzedɔwɔƒe le Mexico la va míaƒe hamea me. Wose be medi be mawɔ mɔɖeɖedɔa eye wode dzi ƒo nam geɖe. Wona meka ɖe edzi be mehiã be nye dɔlélea naxe mɔ nam na mɔɖeɖedɔa wɔwɔ o.

Eyata le September 1, 1988 la, woɖom gbesiagbe mɔɖela le San Andrés Chiautla, le Mexico, afisi míele. Mezãna gaƒoƒo geɖe ɣleti sia ɣleti tsɔ ɖea gbeƒã nyanyuia. Ne ƒenyikukua wɔe be nyemate ŋu ayi amewo gbɔ o la, ekema meŋlɔa lɛta na amesiwo le nutoa me tsɔ ƒoa nu na wo tso Ŋɔŋlɔawo  me nyawo ŋu heŋlɔa dzideƒonamenyawo na wo be woasrɔ̃ Biblia.

Míeva Nya Nusi Nɔ Wɔyem

Le ɣeyiɣi sia me la, dzinyelawo kplɔm yi ahɔhɔ̃ŋutinunyala aɖe gbɔ si na wogblẽ ga geɖe ŋutɔ. Ðɔkta sia wɔ dodokpɔwo hekpɔe be anyidzedɔe le ŋunye. Atike siwo mezã ɣemaɣi wɔe be dɔa megaɖe fu nam le ƒe ene siwo kplɔe ɖo me o. Ena mete ŋu de Mɔɖelawo ƒe Subɔsubɔ Suku, eye mexɔ dzideƒonamenya geɖe le afima siwo na didi geɖe wu va nɔ menye be masubɔ le afisi nyanyuigbeƒãɖela geɖe wu hiã le.

Dzinyelawo nyae be medi vevie be madzi nye subɔsubɔa ɖe edzi. Esi wònye míekpɔ ta na nye dɔa le mɔ aɖe nu ta la, woɖe mɔ nam meyi Zitácuaro, si le Michoacán Nuto me, si didi abe kilometa 200 ene tso mía gbɔ. Dɔwɔwɔ ɖekae kple mɔɖela bubuwo le afima kpe ɖe ŋunye meva tsɔ vevienyenye geɖe wu na ɣeyiɣiawo katã ƒe subɔsubɔdɔa.

Gake le subɔsubɔ le Zitácuaro ƒe eve megbe la, megava nɔ ƒenyi kum ake. Ete ɖe dzinye eye melé blanui esime metrɔ yi aƒe le dzinyelawo gbɔ, eye wòhiã be mawɔ atike. Meyi ahɔhɔ̃ŋutinunyala aɖe gbɔ, eye wòde dzesii be atike siwo zãm menɔ la nɔ nu gblẽm le nye aklã ŋu. Meva nɔ atike bubuwo dim be mazã, elabena ga megava nɔ mía si míayi ɖɔktawo gbɔ o. Dɔa va nɔ nyanyram ɖe edzi eye wòva hiã be maɖe asi le mɔɖeɖedɔa ŋu. Ƒenyikuku ɖesiaɖe zua mɔxenu nam. Gake ne mexlẽ Psalmowo eye metrɔ ɖe Yehowa ŋu le gbedodoɖa me la, mesenɛ le ɖokuinye me be efaa akɔ nam hedoa ŋusẽm.—Psalmo 94:17-19.

Nye Taɖodzinua Va Eme

Le ɣeyiɣi si me dɔa sesẽ wu me la, mekua ƒenyi zi eve gbesiagbe. Gake nuwo va ka ɖe eme wòɖe dzesi. Ðɔkta aɖe va nɔ anyidzedɔ ƒe atike bubu wɔm nam, eye nye lãme va te kɔkɔ. Eyata le September 1, 1995 dzi la, megadze mɔɖeɖedɔa wɔwɔ gɔme ake. Dɔlélea megava nɔ fu ɖem nam o, eyata esi ƒe eve va yi si anyidzedɔa megaɖe fu nam zi ɖeka pɛ teti hã o megbe la, mebia be masubɔ abe mɔɖela vevi ene. Ema abia be mazã ɣeyiɣi geɖe wu le subɔsubɔdɔa me eye masubɔ le afisiafi si hiahiã le. Wò ya bu alesi mese le ɖokuinye me esi woda asi ɖe dzinye be mawɔ dɔ ma ŋu kpɔ! Taɖodzinu si meɖo tso keke nye ɖevime la va eme nam azɔ.

Le April 1, 2001 la, medze dɔ gɔme le kɔƒe aɖe si le Tonuto si nye Hidalgo me. Fifia mele subɔsubɔm le du sue aɖe me le Guanajuato Nutoa me. Ele be manɔ ŋudzɔ ale be mazã atike ahaɖi ɖe eme nyuie. Menɔa ŋudzɔ ɖe nuɖuɖu ŋu hã, vevietɔ aminuwo, nusiwo me caffeine le, kple goemenuwo. Medzea agbagba hã be malé ɖokuinye, ale be magakpɔ dziku kabakaba alo anɔ dzimaɖi tsim wòagbɔ eme o. Gake nuwɔwɔ alea he viɖe geɖe vɛ nam. Le nye mɔɖela vevi ƒe subɔsubɔdɔa me la, zi ɖeka pɛ koe megaku ƒenyi kpɔ.

Esi tree menye eye ƒomegbanɔamedziwo mele dzinye o ta la, edzɔ dzi nam be mayi edzi anye mɔɖela vevi. Nyanya be ‘Yehowa menye madzɔmadzɔtɔ be wòaŋlɔ míaƒe dɔwɔwɔ kple lɔlɔ̃ si míeɖe fia le eŋkɔ ta be o’ la faa akɔ nam. Elɔ̃a mí lo, elabena mebiaa nusi míate ŋu anae o la tsoa mía si o! Nyateƒenya ma nyanya kpe ɖe ŋunye be nye tamebubu da sɔ, elabena ne lãmesẽnyawo ana wòava hiã be magadzudzɔ mɔɖeɖedɔa wɔwɔ ake hã la, menyae be Yehowa ayi edzi akpɔ dzidzɔ ɖe subɔsubɔdɔ si wɔm mele tso luʋɔ blibo me la ŋu.—Hebritɔwo 6:10; Kolosetɔwo 3:23.

Nyateƒee, nye xɔse ŋu nya gbɔgblɔ na amewo gbesiagbe doa ŋusẽm. Enana yayra siwo Mawu dzra ɖo ɖi na mí le etsɔme hã nɔa nye susu me vevie. Biblia do ŋugbe be le xexe yeyea me la, dɔléle aɖeke maganɔ anyi o, “eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu [ava] yi.”—Nyaɖeɖefia 21:3, 4; Yesaya 33:24; Petro II, 3:13.—g05 6/22.

[Nɔnɔmetata siwo le axa 24]

Esime mexɔ abe ƒe 7 ene (etame); mexɔ abe ƒe 16 ene, le nye nyɔnyrɔxɔxɔ megbe kpuie

[Nɔnɔmetata si le axa 25]

Mele gbeadzi kple xɔ̃nye aɖe