Ŋkuléle Ðe Xexeame Ŋu

Alɔ̃dɔdɔ Kpena Ðe Mía Ŋu Míekpɔa Kuxiwo Gbɔ

London ƒe nyadzɔdzɔgbalẽ si nye The Times ka nya ta be: “Ame geɖe va de dzesii be edze abe kuxi siwo yewomete ŋu kpɔa ta na hafi va mlɔ anyi o la gbɔ kpɔkpɔ nɔa bɔbɔe wu ne ŋu ke ene, abe ɖe susua nɔa agbagba dzem le eŋu le zã me ene.” Dzɔdzɔmeŋutinunyala aɖewo siwo le Germany gblɔ le nyadzɔdzɔgbalẽ aɖe si ŋkɔe nye Nature me be yewoke ɖe kpeɖodzi aɖe ŋu si fia be nya sia nye nyateƒe. Wowɔ numekukua le ame 66 aɖe siwo lɔ̃ faa ŋu, eye wofia akɔntabubu mɔnu eve siwo dzi woato abu akɔnta aɖe la wo, gake womeɖe mɔnu etɔ̃lia si le kpuie si ana woake ɖe ŋuɖoɖoa ŋu kaba wu ya me na wo o. Woɖe mɔ na ameawo dometɔ aɖewo be woadɔ alɔ̃, eye wona bubuwo ya nɔ ŋu zã blibo alo ŋkeke blibo. Esi London ƒe nyadzɔdzɔgbalẽ si nye The Daily Telegraph nɔ nu ƒom tso numekuku ma ke ŋu la, eka nya ta be: “Alɔ̃ wɔa nu gãwo.” Enɔ bɔbɔe na amesiwo dɔ alɔ̃ la “be woake ɖe akɔntabubu mɔnu etɔ̃lia ŋu wu amesiwo nɔ ŋu la.” Esi dzɔdzɔmeŋutinunyalawo di be yewoaka ɖe edzi be menye esi hatsotso ɖeka me tɔwo dɔ alɔ̃ heɖi ɖe eme tae numekukua me tsonuwo yi nenema o ta la, wogawɔ dodokpɔa zi evelia ake. Wogaɖo dɔa na ame hatsotso eveawo le ŋdi me esime wodɔ alɔ̃ ɖi ɖe me nyuie le zã me megbe, kple le fiẽ me esime wonɔ ŋu ŋkeke bliboa vɔ megbe. Fifia ya womekpɔ vovototo aɖeke le ame hatsotso evea ƒe agbagbadzedze me o. The Times gblɔ be ema ɖee fia be “menye esi woɖi ɖe eme tae wote ŋu kpɔ ta na dodokpɔa o, ke boŋ esi ŋusẽ gbugbɔ ɖo susua ŋu le alɔ̃dɔdɔ vɔ megbe tae.” Eyata Susuŋutinunyala Ullrich Wagner ƒo nya ta be: “Alɔ̃dɔdɔ nana be nusɔsrɔ̃ nɔa bɔbɔe.”—g05 9/8.

 Ðevi Siwo Dia Nu Vivivo

Hadomegbenɔnɔŋutinunyala Juliet Schor le Boston College, eye wòsrɔ̃a nu tso ŋusẽ si nudidi vivivo kpɔna ɖe ɖeviwo dzi ŋu. Egblɔ be Amerika ɖeviwo kple sɔhɛ siwo li fifia nye “numetialawo, amesiwo dina be yewoaƒle nu ɖesiaɖe, kple amesiwo dina ŋutilãmenuwo vivivo wu dzidzimewo katã le ŋutinya me.” Canadatɔwo ƒe nyadzɔdzɔgbalẽ, si nye Globe and Mail, gblɔ be nudidi vivivo ƒe ŋusẽkpɔɖeamedzi ŋuti dzesiwo dometɔ aɖewoe nye “dzimaɖitsitsi ɖe ame ƒe dzedzeme kple awudodo ŋu, nuƒoƒo edziedzi le ameŋkutawo kple kesinɔnuwo ŋu, ɣeyiɣi sɔgbɔ zazã ɖe television kpɔkpɔ kple ɖe Internet zazã kpakple kɔmpiuta dzi fefewo ŋu.” Nufialagã Schor de dzesii be ɖevi siwo lɔ̃a nuƒoƒo le nusiwo wodina be yewoaƒle ŋu edziedzie dina zi geɖe wu be yewoazu gatɔwo. “Woɖea ɖeklemi wo ɖokui hã edziedzi, eye ne wotsɔ wo ɖokui sɔ kple amesiwo wotsɔna doa bobloe le television dzi la, womegakpɔa dzidzɔ ɖe woa ŋutɔwo ƒe dzedzeme ŋu o.” Nyadzɔdzɔgbalẽ si nye Globe ka nya ta be: Le go bubu me la, blanuiléle kple dzimaɖitsitsi, kpakple tagbɔdɔléle ŋuti kuxiwo meɖea fu na ɖevi siwo metsia dzi ɖe ŋutilãmenudidi vivivo ŋu o ya fũ o, bubu nɔa wo ŋu, eye ƒomedodo nyui nɔa wo kple wo dzilawo dome wu.—g05 9/8.

Dɔwɔwɔ Esi Ame ƒe Lãme Gblẽ

Britaintɔwo ƒe nyadzɔdzɔgbalẽ si nye Telegraph ƒe nyatakakanaƒe si le Internet dzi gblɔ be: “Amesiwo zia wo ɖokui dzi yia dɔ me ne woƒe lãme gblẽ kura gɔ̃ hã,” ate ŋu ava lé dzidɔ bɔbɔe. Dzɔdzɔmeŋutinunyala siwo le University College le London zã ƒe ewo kple edzivɔ tsɔ wɔ numekuku tso yevudɔwɔla siwo wu 10,000 ƒe lãmesẽ kple ŋkeke siwo wotsɔ de dɔmee ŋuti nuŋlɔɖiwo ŋu le London. Aƒetɔ Michael Marmot, amesi xɔ ŋgɔ le numekukua me, gblɔ be le ame alafa ɖeka me la, ame 30 vaseɖe 40 siwo meɖina ɖe eme le aƒeme o ne woƒe lãme gblẽ—ne kpe alo wɔɖi koe ƒo wo kura gɔ̃ hã—“va lé dzidɔ emegbe.”—g05 8/8.

Gumetakui Nana Dzigbɔ Megatɔa Funɔwo O

Nyadzɔdzɔgbalẽ si nye Australian gblɔ be: “Gumetakui nana dzigbɔ megatɔna funɔ le eƒe fufɔfɔ ɣleti gbãtɔwo me o.” Wode dzesii le numekuku aɖe si wowɔ le Anyiehe Australia ƒe Yunivɛsiti me be esi nyɔnu siwo fɔ fu eteƒe medidi o zã gumetakui agbɔsɔsɔ si anɔ abe gram ɖeka ene gbesiagbe la, eɖe woƒe dzigbɔtɔame dzi kpɔtɔ. Funɔ geɖe zãna gumetakui tsɔ ɖea woƒe dzigbɔtɔame dzi kpɔtɔna. Ke hã, dzɔdzɔmeŋutinunyalawo mewɔ numekuku tso eƒe dɔwɔwɔ ŋu ɣemaɣi o. Numekuku si wova wɔ fifia ɖee fia be dɔyɔŋusẽ si le gumetakui me sɔ pɛpɛpɛ kple vitamin B₆, si hã woŋlɔna na funɔwo be woatsɔ atsi dzigbɔtɔame nu.—g05 9/8.

Ʋudodo Nana Ame Geɖe Kuna

Numekuku aɖe si JAMA [Amerika Atikewɔlawo ƒe Habɔbɔ] wɔ ɖee fia be dɔnɔ siwo ŋu dzidɔ le, siwo wodo ʋu na enuenu dometɔ geɖe ku wu amesiwo melɔ̃ wodo ʋu na wo o. Nyatakakaa gblɔ be: “Akɔntabubu fia be ne wobu amesiwo kuna le ƒe si woxɔ, ŋutsu alo nyɔnu nyenye, dukɔ si me tɔ wonye, lolo fũ akpa, kple ʋu si ɖuɖuna le ame ŋu le amekoɣi ta ŋu hã la, dzidɔléla siwo kuna le esi wodo ʋu na wo ta la sɔ gbɔ wu kokoko.” Ðɔkta siwo wɔ numekukua ƒo nya ta be: “Míele nu xlɔ̃m be mele be woanɔ ʋu dom na dzidɔlélawo ɣesiaɣi si woƒe ʋu nya ɖiɖi o.”—g05 9/8.

Anglikan Subɔsubɔha me Ma

Australiatɔwo ƒe nyadzɔdzɔgbalẽ si nye The Age ka nya ta be Anglikan-sɔlemea ƒe bisiɔpwo ƒe tatɔ Philip Jensen, si nye woƒe nunɔlagã xɔŋkɔwo dometɔ ɖeka le Sydney, Australia, ƒo nu tsi tre ɖe Canterbury ƒe Bisiɔpgã ŋu nyitsɔ laa be “enye mawunyafiala ŋukpenanuwɔla si nɔa fetu xɔm to amewo beble dzi.” Jensen bu fɔ eƒe sɔlemeha ŋgɔnɔla sia be eda asi ɖe ŋutsu kple ŋutsu ƒe dɔdɔ dzi. The Age nyadzɔdzɔgbalẽa gblɔ be: “Ŋutsu kple ŋutsu ƒe dɔdɔ ƒe nyaa he mamã gã aɖe va Anglikan Sɔlemeha me le xexeame katã; esia wɔe be Afrika kple Asia tɔ geɖewo dzudzɔ hadede kple sɔlemehaa ƒe akpa si le Canada le woƒe mɔɖeɖe ɖe ŋutsu kple ŋutsu ƒe srɔ̃ɖeɖe ŋu ta, eye wodzudzɔ le United States hã le esi woɖo ŋutsu aɖe si dɔna kple ŋutsuwo be wòanye bisiɔp ta.”—g05 9/8.

Ðevi Miliɔn Akpe Ðeka Le Fu Kpem

Nyadzɔdzɔgbalẽ si nye The New York Times ka nya ta be Dukɔ Ƒoƒuawo ƒe Ðeviwo Ŋu Nyagbɔkpɔha ƒe numekuku ɖee fia be womele be aɖeke kura lém na ɖevi siwo le xexeame la dometɔ afã o—ɖevi mawo ƒe xexlẽme wu miliɔn teƒe akpe ɖeka. Aʋawɔwɔ, AIDS (SIDA), kple hiãkame gblẽ agbagba siwo dzem wole be woalé be na wo le ƒe 15 siwo va yi me la me. Tso keke ƒe 1990 me la, aʋawɔwɔ siwo dometɔ 55 nye dukɔmeviʋawo, ɖe ame 3,600,000 ƒe agbe ɖa, eye wo dometɔ afã kloe nye ɖeviwo. Le aʋa siawo dometɔ geɖe wɔɣi la, aglãdzelawo léna ɖeviwo akpasesẽtɔe, zina wo dzi dɔna wo gbɔ, alo fiana aʋawɔwɔ wo. Nunyuimaɖumaɖu bɔ, eye ɖoɖo aɖeke menɔa anyi na lãmesẽnyawo gbɔ kpɔkpɔ o. Ðevi siwo zu tsyɔ̃eviwo le esi AIDS wu wo dzilawo ta ƒe xexlẽme ɖo miliɔn 15 le ƒe 2003 me. Ðevi siwo wu miliɔn eve zu gakpɔmɔnu na amesiwo xɔ wo awɔbae na amewo be woadɔ wo gbɔ. Eye nyatakakaa gblɔ be ga si wozã ɖe aʋawɔnuwo ŋu ƒe sia ƒe la ɖo dɔlar miliɔn 956,000, evɔ ga si woazã atsɔ atsi hiãkame nui ya anɔ abe dɔlar miliɔn 40,000 vaseɖe 70,000 ko ene.—g05 9/8.