‘Nenye Dada na Wò’

MAWUSUBƆLA vavãwo nyae be anukwareɖiɖi le vevie. Lɔlɔ̃ si le wo si na wo Wɔlae ʋãna wo be woaɖi anukware. De ŋugble le Lázaro ƒe nuteƒekpɔkpɔ sia ŋu kpɔ. Ɣeaɖeɣi, esi wònɔ dɔ wɔm le amedzrodzeƒe aɖe le Huatulco, le Mexico la, efɔ ame aɖe ƒe ga dɔlar 70 le amedzrodzeƒea. Etsɔ gaa yi na dɔdzikpɔla si nɔ dɔ me gbemagbe enumake. Esia megbe kpuie la, egafɔ gakotoku sue aɖe le tsileƒexɔ aɖe me. Etsɔe yi ɖe woƒe amedzroxɔƒea, eye ewɔ nuku na amesi tɔ wònye be wotsɔe vɛ na ye, si na wòkpɔ dzidzɔ.

Esi dɔdzikpɔlawo ƒe amegã se nya siawo la, ebia Lázaro be nukae ʋãe be wòtsɔ gaa kple gakotokua vɛ na yewo hã. Lázaro ɖo eŋu nɛ be gɔmeɖose siwo yesrɔ̃ le Biblia me meɖe mɔ na yeƒe dzitsinya be yeatsɔ nane si menye ye tɔ o. Esi dɔdzikpɔlawo ƒe amegã ŋlɔ lɛta henɔ ŋudzedzekpɔkpɔ ɖem fia Lázaro la, egblɔ nɛ be: “Megabɔ egbea be woake ɖe amesiwo léa agbenyuinɔnɔ me dzidzenu kɔkɔwo me ɖe asi ŋu o. Dɔwɔƒea kafu wò ɖe wò nɔnɔme nyui sia ta. Èɖee fia be yenye ame ɖɔʋu, kple kpɔɖeŋu na wò dɔwɔhatiwo. Nenye dada na mia kple wò ƒomea.” Wokafu Lázaro be eyae nye dɔwɔvi nyuitɔ kekeake le ɣleti ma me.

Lázaro ƒe dɔwɔhatiwo dometɔ aɖewo susui gbã be enye vodada be wòtrɔ nusiwo wòfɔ vɛ. Gake esi wokpɔ alesi woƒe dɔtɔa wɔ nui emegbe la, wokafu Lázaro ɖe eƒe agbenyuinɔnɔ ŋuti gɔmeɖosewo me léle ɖe asi ta.

Biblia xlɔ̃ nu Yesu yomedzela vavãwo be woawɔ “nu nyui na amesiame,” eye be woanɔ “agbe nyuie,” alo aɖi anukware, “le nusianu me.” (Galatiatɔwo 6:10; Hebritɔwo 13:18) Ðikeke mele eme o be ne Kristotɔwo ɖi anukware la, ehea ŋutikɔkɔe vanɛ na Biblia ƒe Mawu, “nuteƒewɔla kple dzɔdzɔetɔ,” Yehowa.—Mose V, 32:4.—g05 6/8.