Biblia ƒe Nukpɔsusu

Ðe Biblia Ði Gbɔ Nyɔnuwoa?

TERTULLIAN, si nye ƒe alafa etɔ̃lia me mawunyaŋununyala aɖe, gblɔ le eƒe agbalẽa aɖe me be nyɔnuwoe nye “agbo” si nu gbɔgbɔ vɔ̃wo tona vana xexeame. Ame bubuwo zã Biblia tsɔ ɖee fia be nyɔnuwo nye ame tsɛwo wu ŋutsuwo. Le esia ta ame geɖe susuna be Biblia ɖi gbɔ nyɔnuwo.

Elizabeth Cady Stanton, si nye nyɔnu aɖe si ʋli nyɔnuwo ƒe gomenɔamesiwo ta le United States, le ƒe alafa 19 lia me, susu be “Biblia kple Mawusubɔsubɔe nye mɔxenu gãtɔ kekeake na nyɔnuwo ƒe ablɔɖekpɔkpɔ.” Stanton gblɔ tso Biblia-gbalẽ atɔ̃ gbãtɔawo ŋu ɣeaɖeɣi be: “Nyemeganya agbalẽ aɖeke si fia nu tsitotsito ku ɖe nyɔnuwo dzi ɖuɖu kple gbɔ ɖiɖi wo ŋu de agbalẽ siawo nu o.”

Togbɔ be ame aɖewo ko sie nukpɔsusu manyomanyo ma anɔ egbea hã la, ame geɖe susuna kokoko be Biblia ƒe akpa aɖewo de gbɔ ɖiɖi nyɔnuwo dzi. Ðe nyataƒoƒo alea sɔa?

Alesi Wobu Nyɔnuwoe le Hebri Ŋɔŋlɔawo Me

“Wò tame anɔ srɔ̃wò ŋu, eye eya anye gã ɖe dziwò.” (Mose I, 3:16) Ðeklemiɖelawo fiaa asi nya sia be enye Mawu ƒe ʋɔnu dɔdrɔ̃ Xawa kple eƒe asi dada ɖe edzi be ŋutsuwo nate nyɔnuwo ɖe anyi. Gake  menye Mawu ƒe tameɖoɖoe nya sia si wògblɔ na Xawa la nye o, ke boŋ enye nu wɔnublanui si tututu ado tso nuvɔ̃ si wòwɔ, kple Mawu ƒe dziɖulanyenye si wògbe, me gbɔgblɔ nɛ boŋ. Ŋuta sesẽ le nyɔnuwo ŋu nye ameƒomea ƒe blibomademade me tsonu, menye Mawu ƒe lɔlɔ̃nu o. Le nyateƒe me le dukɔ geɖe me la, srɔ̃ŋutsuwo tea wo srɔ̃nyɔnuwo ɖe anyi vevie zi geɖe. Gake menye aleae Mawu ƒe tameɖoɖo le tso gɔmedzedzea me hafi o.

Mawu ƒe nɔnɔme nue wòwɔ Adam kple Xawa siaa ɖo. Gawu la, se ɖekae Mawu de na wo ame evea: be woadzi, ayɔ anyigba dzi ahanye agbo ɖe edzi. Wo kple eve lae awɔ dɔ aduadu. (Mose I, 1:27, 28) Eme kɔ ƒã be le ɣemaɣi la, wo dometɔ aɖeke meɖua nɔvia dzi ŋutasesẽtɔe o. Mose I, 1:31 gblɔ be: “Mawu kpɔ nusiwo katã wòwɔ la, eye kpɔ ɖa, wonyo ŋutɔ.”

Le go aɖewo me la, Biblia me nuŋlɔɖiwo megblɔna nusi nye Mawu ƒe nukpɔsusu le nane ŋu o. Ðeko nuŋlɔɖi siawo nyea nusiwo dzɔ va yi la ŋuti nyatakakawo ko. Woka nya ta tso alesi Lot tsɔ vianyɔnuwo na Sodomtɔwo be woaɖe ŋuti, evɔ nuŋlɔɖia megblɔ be enyo loo alo be Mawu kpɔ ŋudzedze ɖe nusi Lot wɔ la ŋu o. *—Mose I, 19:6-8.

Le nyateƒe me la, Mawu lé fu ameteteɖeanyi kple ŋlɔmiwɔwɔ ƒomevi ɖesiaɖe. (Mose II, 22:21; Mose V, 27:19; Yesaya 10:1, 2) Mose ƒe Sea tsi tre ɖe amegbɔdɔdɔ sesẽe kple gbolowɔwɔ ŋu. (Mose III, 19:29; Mose V, 22:23-29) Woxe mɔ ɖe ahasiwɔwɔ nu eye ɖe wowua ŋutsu kple nyɔnu si wɔ ahasi. (Mose III, 20:10) Sea meɖi gbɔ nyɔnuwo o; ɖe wòde wo dzi hekpɔ wo ta tso ameteteɖeanyi si bɔ le dukɔ siwo ƒo xlã wo me la me boŋ. Ðe wodea bubu kple asixɔxɔ gã Yudatɔ srɔ̃nyɔnu si zã ŋu ale gbegbe. (Lododowo 31:10, 28-30) Ne Israel-viwo mewɔ ɖe Mawu ƒe se siwo wòde be woade bubu nyɔnuwo ŋu dzi o la nye woa ŋutɔwo ƒe vodada, menye Mawu ƒe lɔlɔ̃nu o. (Mose V, 32:5) Mlɔeba la, Mawu drɔ̃ ʋɔnu dukɔ bliboa eye wòhe to na wo ɖe woƒe tomaɖomaɖo atraɖii ta.

Ðe Ðokuibɔbɔ Fia Gbɔɖiɖia?

Nuwo te ŋu zɔna nyuie le amewo dome, ne wonya wɔ ɖoɖo ɖe nuwo ŋu nyuie ko. Eye esia biana ŋusẽ ŋudɔ wɔwɔ. Ne womewɔe nenema o la, tɔtɔ koe nɔa anyi. “Mawu menye nyamanyamawɔwɔ ƒe Mawu o, ke ŋutifafa ƒe Mawu boŋ.”—Korintotɔwo I, 14:33.

Apostolo Paulo ƒo nu tso tanyenye ƒe ɖoɖo si le ƒomea me ŋu ale: “Ŋutsu sia ŋutsu ƒe ta enye Kristo, ke nyɔnu ƒe ta enye ŋutsu, ke Kristo ƒe ta enye Mawu.” (Korintotɔwo I, 11:3) Amesiame bɔbɔna ɖe ame aɖe te, negbe Mawu koe mele ame aɖeke te o. Ðe nyateƒe si wònye be Yesu bɔbɔ ɖe ame te fia be woɖi gbɔea? Kura o! Enye nyateƒe be wode dɔ asi na ŋutsuwo le Ŋɔŋlɔawo me be woaxɔ ŋgɔ le hamea kple ƒomea me ya, gake ema mefia be woɖi gbɔ nyɔnuwo o. Be nuwo natsɔ afɔ nyuie le ƒomea kple hamea me bia be nyɔnuwo kple ŋutsuwo siaa nawɔ woƒe wɔƒewo le lɔlɔ̃ kple bubu me.—Efesotɔwo 5:21-25, 28, 29, 33.

Yesu wɔ nu ɖe nyɔnuwo ŋu bubutɔe ɣeawokatãɣi. Yesu metsɔ Farisitɔ ƒe kɔnyinyi kple se siwo ɖia gbɔ ame, siwo wofia amewo, la wɔ dɔe o. Woa kple nyɔnu siwo menye Yudatɔwo o gɔ̃ hã ɖo dze. (Mateo 15:22-28; Yohanes 4:7-9) Efia nu nyɔnuwo. (Luka 10:38-42) Ekpɔ nyɔnuwo ta be womagagbe wo yakatsyɔ o. (Marko 10:11, 12) Ðewohĩ hadomenu siwo Yesu trɔ vevie le eƒe anyigba dzi nɔɣia dometɔ ɖekae nye be exɔlɔ̃ veviwo dometɔ aɖewo nye nyɔnuwo. (Luka 8:1-3) Esi Yesu nye amesi ɖe Mawu ƒe nɔnɔmewo fia pɛpɛpɛ ta la, eɖee fia be ŋutsuwo kple nyɔnuwo xɔ asi sɔsɔe le Mawu ŋku me. Le nyateƒe me la, ŋutsuwo kple nyɔnuwo siaae xɔ gbɔgbɔ kɔkɔe ƒe nunanaa le Kristotɔ gbãtɔawo dome. (Dɔwɔwɔwo 2:1-4, 17, 18) Le amesiwo wosi ami na be woazu fiawo kple nunɔlawo kple Kristo gome la, vovototo manɔ wo dome ne wofɔ wo ɖe tsitre be woava nɔ agbe le dziƒo o, woɖanye ŋutsuwo alo nyɔnuwo o. (Galatiatɔwo 3:28) Ao, Biblia Ŋlɔla, Yehowa, meɖiaa gbɔ nyɔnuwo kura o.—g05 11/8.

[Etenuŋɔŋlɔ]

[Nɔnɔmetata si le axa 10]

Yesu wɔ nu ɖe nyɔnuwo ŋu bubutɔe, menɔ abe eŋɔlimetɔ geɖewo ene o