Ahamuame Mazamazã Nyuie Gblẽa Nu Le Ame Ƒe Lãmesẽ Ŋu

“Santé!” “Salute!” “Za vashe zdorovye!” “Chuc suc khoe!” Eɖanye France, Italy, Russia, alo Vietnam ye o, hafi xɔlɔ̃wo nano aha la, wogblɔa nya siawo tɔgbe si gɔmee nye: “Míedi lãmesẽ!” Evɔ ewɔ nuku be ame miliɔn geɖe tsɔa ahanono ɖea yɔdo na wo ɖokui boŋ.

AHAMUAME mazamazã nyuie nye kuxi sesẽ aɖe si lɔ ahatsunono, ahamumu, kple ahanoxe zuzu ɖe eme. Xexeame ƒe Lãmesẽ Habɔbɔ gblɔ be ahatsunono fia “aha nono edziedzi si ate ŋu agblẽ nu le ame ŋu” le ŋutilã me, susu me, alo hadome. Efia be woano aha wòasɔ gbɔ wu esi dzi lãmesẽnyawo gbɔ kpɔlawo alo se da asi ɖo. Ahamumu fia aha nono si le nu gblẽm le ame ŋu le ŋutilã kple susu me xoxo evɔ amea mekpɔ zu ahanoxe haɖe o. Woɖe ahanoxe zuzu gɔme be enye “alesi ame magate ŋu aɖu eɖokui dzi le aha nono gome o.” Ahanoxe ƒe susu katã nɔa ahamuame ŋu, eyia enono dzi ne ele nu vovovowo gblẽm le eŋu gɔ̃ hã, eye ne mekpɔ ɖeke no o la, eɖea fu nɛ.

Ƒe kae nèɖaxɔ o, ŋutsu alo nyɔnue nènye o, alo dukɔ ka me tɔe nènye o, ahatsunono ate ŋu agblẽ nu le ŋuwò. Evɔ ɖe, aleke koŋue aha kpɔa ŋusẽ ɖe ŋutilãa dzii ya? Nukae ahatsunono ate ŋu agblẽ le ame ƒe lãmesẽ ŋu? Eye ahamuame agbɔsɔsɔ ka dzie ame geɖe da asi ɖo be eyae sɔ?

 Egblẽa Nu le Susua Ŋu

Atikemenu si koŋ le ahamuame geɖe mee nye esi woyɔna le yevugbe me be ethanol [etanɔl], eye ate ŋu agblẽ nu le ahɔhɔ̃mekawo ƒe dɔwɔwɔ ŋu alo atsrɔ̃ wo kura. Eyata le nyateƒe me la, amesi mu aha la le ko abe amesi aɖi ɖo lãme na ene. Ne etanɔl sɔ gbɔ ɖe ame ƒe lãme la, ate ŋu ana wòayi ɖi me alo aku. Le kpɔɖeŋu me, nuwɔna si nye ikkinomi, alo aha nono kabakaba dzimagbɔɖitɔe si yia edzi le Japan sukuviwo dome la wua wo dometɔ geɖe ƒe sia ƒe. Ŋutete le ŋutilãa ŋu be wòatrɔ etanɔl la wòazu nu bubu siwo megblẽa nu le ame ŋu o, gake tɔtrɔ ma meyia edzi le ahaa nono megbe teti o. Ne ame no aha kabakaba akpa wu alesi ŋutilãa ate ŋu awɔ eŋudɔ la, ekema etanɔl la va sɔa gbɔ akpa ɖe ŋutilãa me, eye enumake etea nu gbegblẽ le ahɔhɔ̃a ƒe dɔwɔwɔ ŋu. Le mɔ ka nu?

Alesi gbegbe ahɔhɔ̃ me nugbagbevi, siwo nye lãmenugbagbevi vevitɔwo, trɔa asi le nuwo ŋui nukutɔe la gbɔe míaƒe nuƒoƒo, nukpɔkpɔ, ŋutinuwo ƒe dɔwɔwɔ aduadu, tamebubu, kple nɔnɔme si le mía si tsona. Etanɔl tɔtɔa nuwɔna mawo, si wɔnɛ be etrɔa ahɔhɔ̃ me lãmetsiwo—siwo nye atikemenu siwo naa kadodo nɔa ahɔhɔ̃menugbagbeviwo dome—ƒe dɔwɔwɔ. Esia wɔnɛ be nyatakaka si woɖo ɖe ahɔhɔ̃a la tsakana, ale be ahɔhɔ̃a megate ŋu wɔa dɔ nyuie o. Ema tae ne ame no aha akpa la, eƒe nuƒo me megakɔna o, enɔa nu kpɔm dɔ̃, nɔa zɔzɔm sagasaga, eye megate ŋu zãna ɖe nu ŋu wɔna alo nyana nusi tututu wɔm wòle o—nusiawo katã ɖenɛ fiana be aha le ŋusẽ kpɔm ɖe ame dzi.

Ne aha kpɔ ŋusẽ ɖe ahɔhɔ̃a dzi eteƒe didi la, ekema ahɔhɔ̃a dzea agbagba trɔna ɖe etanɔl ƒe aɖia ŋu be ahɔhɔ̃mekawo nagawɔ dɔ nyuie. Esiae nana aha va mana ʋu na ame, si wɔnɛ be aha agbɔsɔsɔ si mua ame aɖe tsã la magamui azɔ o. Ne ahamuame kpɔ ŋusẽ ɖe ahɔhɔ̃a dzi ale gbegbe be ne meli o  ko ahɔhɔ̃a magate ŋu awɔ dɔ o la, ekema amea va zu ahanoxe. Ahɔhɔ̃a va nɔa ahamuame dim vevie ale be wòate ŋu awɔ dɔ. Eyata ne amea meno aha o la, ekema nu tɔtɔna le ahɔhɔ̃a ƒe dɔwɔwɔ ŋu, si wɔnɛ be amea atsi dzimaɖi, anɔ ƒoƒom, alo wòanɔ kpeŋui kum gɔ̃ hã.

Menye ahɔhɔ̃ ƒe dɔwɔwɔ ŋu koe ahatsunono gblẽa nu le o, ate ŋu ana lãmenugbagbeviwo namiã ahaku, si agblẽ nu le ahɔhɔ̃a ƒe wɔwɔme ŋu kura. Togbɔ be asiɖeɖe le ahanono ŋu ate akpɔ kuxia ƒe akpa aɖe gbɔ hã la, edze abe womagate ŋu awɔ naneke le nusiwo wògblẽ la dometɔ aɖewo ya ŋu o ene, eye esia wɔnɛ be ame megaɖoa ŋku nu dzi nyuie alo zãna eƒe susu nyuie o. Gake menye aha ƒe ŋusẽ kpɔkpɔ ɖe ahɔhɔ̃a dzi hena ɣeyiɣi didi aɖe kokokoe gblẽa nu le eŋu o. Numekukuwo ɖee fia be ahatsunono ɣeyiɣi kpui aɖe kura gɔ̃ hã ate ŋu agblẽ nu.

Aklãdɔ Kple Kansa

Aklã wɔa akpa vevi aɖe le nusiwo míeɖuna la tutu, avu wɔwɔ kple dɔlékuiwo, ʋu ƒe sisi nyuie, kple aɖinuwo, siwo dome ahamuame hã le, ɖeɖe ɖa le ŋutilãa me me. Ahamuame nono ɣeyiɣi didi aɖe gblẽa nu le aklãa ŋu le mɔ̃ etɔ̃ nu. Gbã la, etanɔl ƒe agbɔsɔsɔ le ŋutilãa me wɔnɛ be aminuwo va sɔna gbɔ ɖe lãme na ame, si nana wova lina kɔ ɖe aklãa me. Ale aminuwo va sɔa gbɔ akpa le aklãa me. Le ɣeyiɣi aɖe megbe la, aklãa va tena, si woyɔna be aklãdɔ alo hepatitis (hépatite). Togbɔ be ahamuame zazã ŋutɔ hã ate ŋu ana woaxɔ aklãdɔ hã la, edze abe ewɔnɛ be ŋutilãa megate ŋu kpea hepatitis B kple hepatitis C ƒe dɔlékuiwo hã dzi o ene. * Ne womekpɔ egbɔ o la, aklãa ƒe tete ana lãmenugbagbeviwo nawó ahaku. Nusi ahamuame gblẽna kpena ɖe esiawo ŋu enye be enana lãmenugbagbevi siwo wɔa dɔ le ɖoɖo ɖeka koŋ aɖe nu la katã kuna.

Mlɔeba la, aklãa va liana. Aklãa ƒe tete ɣeyiɣi didi aɖe kple lãmenugbagbeviwo ƒe kuku wɔnɛ  be wòva gblẽna keŋkeŋ. Ðeko aklãa va toa kɔ glidzaglidza, le esi teƒe be wòabɔbɔ. Mlɔeba la, lãmekawo va xea mɔ na ʋua ƒe sisi nyuie, si nana amea ƒe aklã dzudzɔa dɔwɔwɔ, eye amea kuna.

Ŋusẽ si ahamuame kpɔna ɖe aklãa dzi la gagblẽa nu le mɔ bubu nu—ewɔnɛ be aklãa megate ŋu xea mɔ ɖe nusiwo nana woxɔa kansa nu o. Menye ɖekoe ahamuame nana woxɔa aklã me kansa bɔbɔe ko o, enana woxɔa nume, veme, dzitodzitomeka si me ya tona, kple vehlo me kansa hã bɔbɔe ŋutɔ. Gawu la, ahamuame wɔnɛ be atama me nu siwo nana kansa la te ŋu toa lãkusi wɔade siwo le ame ƒe nume me bɔbɔe, eye le esia ta atamanolawo gale afɔku me wu. Nyɔnu siwo noa aha gbesiagbe la ate ŋu axɔ no me kansa. Numekuku aɖe ɖee fia be afɔku li be nyɔnu siwo noa aha dzidze etɔ̃ alo esi wu ema gbesiagbe la dometɔ 69 le alafa me axɔ kansa bɔbɔe wu nyɔnu siwo menoa aha o.

Vidzĩ Siwo Aɖi Si

Nu vevi aɖe si ahanono wòagbɔ eme gblẽnae nye ŋusẽ si wòkpɔna ɖe vidzĩ si le dɔ me dzi. Nyadzɔdzɔgbalẽ si nye International Herald Tribune gblɔ be: “Atike aɖeke megblẽa nu le fugboe si le tsitsim ŋu de esi ahamuame gblẽna nu o.” Ne funɔ le aha nom la, ekema vidzĩa hã le enom, eye ahamuame gblẽa nu le fugboea ŋu ŋutɔ le ɣeyiɣi mawo me. Ahamuame gblẽa nu le eƒe ahɔhɔ̃mekawo ƒe dɔwɔwɔ ŋu keŋkeŋ. Ŋutilãa megate ŋu wɔa ahɔhɔ̃menugbagbeviwo nyuie o. Lãmenugbagbeviwo kuna. Lãmenugbagbevi bubuwo va nɔa teƒe si mesɔ o.

Nusi dona tsoa eme, si nye fugboe ŋu dɔ siwo tso ahanono gbɔ, koŋ ye nana be ɖevi siwo wodzi la ƒe susu fana. Kuxi siwo ɖevi siwo dzi wono aha ɖo doa goe la dometɔ aɖewoe nye susu ƒe dɔmawɔmawɔ nyuie, gbe masemase, matsimatsi le susu, nuwɔna, kple ŋutilã me, momadzeanyi, kpakple nusese kple nukpɔkpɔ ƒe kuxiwo. Ðevi siawo ƒe mo ɖia amesiwo ŋu nane gblẽ le tɔ.

Hekpe ɖe eŋu la, nu ate ŋu agblẽ le vidada siwo noa aha ɖe ŋku nu gɔ̃ hã ƒe viwo ŋu, abe nuwɔwɔ tukatuka kple nusɔsrɔ̃ ƒe ŋutete ƒe amesimanɔmanɔ ene. Nufialagã Ann Streissguth si le ŋusẽ si ahamuame kple atikevɔ̃ɖi kpɔna ɖe fugboe dzi ŋuti dɔwɔƒe le Washington Yunivɛsiti gblɔ be: “Mehiã be nànye ahanoxe hafi agblẽ nu le vidzĩ si le wò dɔ me ŋu o; ne ènye funɔ gake noa aha  ko la, àgblẽ nu le eŋu.” Franse Dukɔa ƒe Lãmesẽ Kple Atikewɔwɔ Ŋuti Numekuhabɔbɔ ƒe nyatakaka si ƒe tanyae nye Alcool—Effets sur la santé gblɔ be: “Ahamuame nono gblẽa nu le fufɔɣia katã me, eye eƒe sue aɖeke nono meli si me afɔku aɖeke mele o.” Eyata nu nyuitɔ kekeake si wòle be nyɔnu funɔwo nawɔe nye be woagano ahamuame aɖeke kura o. *

Enono si Magblẽ Nu O

Menye kuxi siwo ahanono fũ hena va ame ƒe lãmesẽ dzi la katã koe nye ema ŋu míeƒo nu tso va ɖo afisia o. Le ƒe 2004 me la, nyati aɖe dze le Nature magazine me si gblɔ be “aha sue aɖe ko nono gɔ̃ hã nana woxɔa abi bɔbɔe, eye ate ŋu ana woaxɔ dɔléle 60 kloe hã bɔbɔe.” Ne nyaa le alea ɖe, ekema agbɔsɔsɔme kae míano si magblẽ nu o? Edzɔa dzi na ame miliɔn geɖe le xexeame egbea be yewoano aha ɣeaɖewoɣi. Nusi ana nànɔ lãmesẽ mee nye be nàno agbɔsɔsɔme si sɔ. Evɔ ɖe, agbɔsɔsɔ ka koŋue nye esi sɔ? Ame geɖe abui be esi nu yewonona la sɔ, ɖewohĩ woasusui be zi alesi yewomenya muna alo zu ahanoxe ya o ko la, mehiã be yewoatsi dzi o. Ke hã le Europa la, le ame 4 ɖesiaɖe dome la, wobui be ame 1 noa ahatsu.

Nyatakakatsoƒe geɖe gblɔ be aha agbɔsɔsɔme si sɔ na ŋutsuwoe nye esi me ahasesẽ akuakua ƒe agbɔsɔsɔ anɔ abe kɔŋkɔvi afã kple vi aɖe ko ene le, eye le nyɔnuwo gome la, anye ema ƒe afã. Franseawo kple Britaintɔwo ƒe lãmesẽnyawo gbɔ kpɔlawo gblɔ be woate ŋu ano “agbɔsɔsɔme si sɔ” si nye esi me ahasesẽ akuakua kɔŋkɔvi ɖeka le, eye nyɔnuwo nano agbɔsɔsɔ si me kɔŋkɔvi afã kple vi aɖe ko le. United States Dukɔa ƒe Ahamuame Mazamazã Nyuie Kple Ahatsunono Ŋuti Numekuha yi edzi de dzi ƒo be “amesiwo xɔ ƒe 65 kple edzivɔ la nano esi me ahasesẽ akuakua mede kɔŋkɔvi afã le o ko gbesiagbe.” * Gake amesiame kple alesi ahamuame kpɔa ŋusẽ ɖe edzii ye. Le go aɖewo me la, agbɔsɔsɔ sue mawo kura gɔ̃ hã asɔ gbɔ akpa na ame aɖewo ya akpa. Le kpɔɖeŋu me, Nyatakaka Tɔxɛ 10 lia si Wona United States ƒe Sewɔtakpekpea le Ŋusẽ si Ahamuame Kpɔna Ðe Lãmesẽ Dzi Ŋu gblɔ be “ahamuame ƒe agbɔsɔsɔ si sɔ ate ŋu agblẽ nu le amesiwo ŋu tagbɔdɔ le alo le blanuilédɔ lém la ŋu.” Nusiwo ŋu woabue nye ƒexɔxɔ, dɔléle siwo le ame ŋu, kple ame ƒe kpekpeme.—Kpɔ aɖaka si nye “Afɔkuawo Dzi Ðeɖe Akpɔtɔ.”

Kpekpeɖeŋu kae woate ŋu ana amesiwo noa aha fũ akpa? Nyati si kplɔ esia ɖo aɖo biabia ma ŋu.—g05 10/8.

[Etenuŋɔŋlɔwo]

 [Nɔnɔmetata si le axa 15]

Nàno Ðeka Hafi Adze Mɔa?

Ɣeyiɣi si me wodze ʋuwo wɔwɔ kee wode sewo ku ɖe aha nono hafi aku ʋu ŋu. Dukɔ gbãtɔ si de se siawoe nye Denmark, le ƒe 1903 me.

Ne mèɖu nu hafi no ahamuame o la, ekema ne ahaa ɖo wò ʋuka me ko la, akpɔ ŋusẽ ɖe dziwò kaba ŋutɔ le gaƒoƒo afã siwo kplɔ enono ɖo me. Ame geɖe susuna be ne èno kɔfi, xɔ ya fafɛ, alo de kame vie la, akpe ɖe ŋuwò be aha si nèno la magakpɔ ŋusẽ ɖe dziwò akpa o, gake aʋatsoe. Ele be ɣeyiɣi aɖe nava yi godoo hafi ahaa ƒe ŋusẽ nu naɖiɖi. Gake mègaŋlɔe be hã o be aha muame ya koa, aha muamee; eƒe vi aɖeke meli o. Esia fia be eɖanye wein, biya, alo aha sesẽ bubuwoe nèno o, ŋusẽ ɖeka ma kee wo dometɔ ɖesiaɖe ƒe dzidze ɖeka akpɔ ɖe dziwò. *

Ahamuame vi aɖe ko nono gɔ̃ hã ate ŋu ana màdo gasɔ, moto, alo aku ʋu nyuie o. Ahamuame ana màgakpɔ nu nyuie o. Mɔfiadzesi siwo le mɔwo to la ava nɔ sue le ŋkuwò me. Màgate ŋu akpɔ nusiwo ƒo xlã wò, didime si le mia kple nanewo dome, kpakple nusiwo le adzɔge la nyuie o. Nyawo dadakpɔ, dzɔdzɔmenuwɔnawo, kple wò ŋutinuwo ƒe dɔwɔwɔ aduadu, me agbɔdzɔ.

Ne èno ahamuame hafi dze afɔku la, ekema abi siwo nàxɔ la alolo wu esi nàxɔ ne ɖe mèno aha o. Gawu la, ŋusẽ si ahamuame akpɔ ɖe wò dzi kple wò ʋu ƒe dɔwɔwɔ dzi la awɔe be ɖewohĩ màtsi agbe ne eva hiã be woawɔ dɔ na wò kpata o. Franse Dukɔa ƒe Lãmesẽ Kple Atikewɔwɔ Ŋuti Numekuhabɔbɔ ƒe nyatakaka aɖe gblɔ be: “Eyata, amesiwo kuna le ʋufɔku siwo tso ahamumu gbɔ me la ƒe akpa gãtɔ nyea ʋukula ahanomunɔawo ŋutɔ, togbɔ be ame geɖe mesusunɛ alea o hã.” Le afɔku siwo li ta la, nyatakakaa kafu nusiwo gbɔna:

▪ Mègano aha ne èle gasɔ alo moto do ge, alo le ʋu ku ge o.

▪ Mègaɖo ʋu si kum amesi no aha le la o.

▪ Mègaɖe mɔ xɔwò alo dziwòlawo naku ʋu ne wono aha o.

[Etenuŋɔŋlɔ]

[Nɔnɔmetata si le axa 15]

Aha sesẽ akuakua ƒe kɔŋkɔvi afã kple vi aɖe ye le aha siawo me

Biya atukpa sue ɖeka (Glass ɖeka kple afã kloe)

Aha sesẽ (wiski, gin, vodka) ƒe dzidze ɖeka (Kɔŋkɔvi ɖeka kple afã kloe)

Wein kplu ɖeka (Kɔŋkɔvi 4 kple afã kloe)

Ahasesẽ si vivina ƒe dzidze ɖeka (Kɔŋkɔvi 2 kple afã kloe)

[Nɔnɔmetata si le axa 16]

AHANOXE NYENYE—ÐE WODZINA AME KPLIA?

Esi dzɔdzɔmeŋutinunyalawo di be yewoakpɔ atike na ahanomunɔwo ta la, wodze agbagba be yewoakpɔe ɖa be akpa kae nusiwo dome ame nyi wɔna le amea ƒe aha nono kple ahanomunɔ zuzu me hã. Dzɔdzɔmeŋutinunyalawo va ke ɖe domenyiŋusẽfianu geɖe siwo dze abe wokpɔa ŋusẽ ɖe alesi ame wɔa nu ɖe aha muame ŋu ene dzi ŋu. Gake menye nusiwo dome ame nyi gbɔ koe ahamumu tsona o. Ne nusiwo dome ame nyi ate ŋu ana wòazu ahanomunɔ hã la, mefia be anyee kokoko o. Nuto kple nɔnɔme si me ame le hã wɔa akpa aɖe. Wogblɔ be kuxia ate ŋu atso nusiawo hã gbɔ: hehe nyui manamana, ƒomea me tɔ alo hati aɖe ƒe ahamumu, nɔnɔme siwo hea dzre vɛ, seselelãme kuxiwo, blanuiléle, adãɖoɖo, vivisese yome titi, aha geɖe nono gake womamu o, alo nu muame bubu aɖe ƒe ame mamã. Nusiawo kple nu bubuwoe wɔnɛ be ame va zua ahanoxe.

[Nɔnɔmetata si le axa 16]

FRANCE:

Numekukuwo ɖee fia be amesiwo noa aha akpa la anɔ abe miliɔn atɔ̃ ene, eye wo dometɔ miliɔn eve vaseɖe etɔ̃ nye ahanoxewo

NIGERIA:

Lagos ƒe nyadzɔdzɔgbalẽ si nye Daily Champion gblɔ be “Nigeriatɔ miliɔn 15 kple edzivɔ nye ahanoxewo”—ema nye amesiwo le dukɔ ma me dometɔ 12 kloe le alafa ɖesiaɖe me

PORTUGAL:

Le mama dedie nu la, ahasesẽ akuaku si ame ɖeka nona le dukɔ sia me la nye esiwo sɔ gbɔ wu le xexeame dometɔ ɖeka. Lisbon ƒe nyadzɔdzɔgbalẽ si nye Público ka nya ta be dukɔa me tɔ 10 le alafa ɖesiaɖe me kpea “nuwɔametɔnyenye si tso ahamuame nono gbɔ la ƒe fu vevie”

UNITED STATES:

Nyatakaka Tɔxɛ 10 lia si Wona United States ƒe Sewɔtakpekpea le Ŋusẽ si Ahamuame Kpɔna Ðe Lãmesẽ Dzi Ŋu ɖee fia be “Amerikatɔ miliɔn 14 kloe—si nye ame agbɔsɔsɔ si le dukɔa me dometɔ 7 kple afã kloe le alafa me—ƒe ahanono sɔ kple esi woabu be egbɔ eme alo ana ame nanye ahanoxe”

[Nɔnɔmetata si le axa 18]

AFƆKUAWO DZI ÐEÐE AKPƆTƆ

Xexeame ƒe Lãmesẽ Habɔbɔ ƒe Ŋutenɔnɔ Kple Nu Muamewo ƒe Amesitsitsi Ŋuti Dɔwɔƒe gblɔ nusiwo gbɔna be woawɔ atsɔ aɖe afɔkuawo dzi akpɔtɔ. Afɔkua dzi ɖeɖe kpɔtɔ mefia be mate ŋu adzɔ kura o. Amesiame kple alesi ahamuame kpɔa ŋusẽ ɖe edzii ye.

▪ Mègano ahamuame wòawu dzidze eve gbeɖeka o *

▪ Mègano ahamuame o ŋkeke eve ya teti le kwasiɖaa me

Le nɔnɔme siwo gbɔna me la, dzidze ɖeka alo eve hã nono ate ŋu anye esi sɔ gbɔ akpa:

▪ Ne ame le ʋu alo moto kum, alo le dɔ wɔm le mɔ̃ aɖe ŋu

▪ Ne ame fɔ fu alo dzi vi fẽ si le no nom

▪ Ne ame le atike aɖewo zãm

▪ Ne dɔléle aɖewo le ame ŋu

▪ Ne màte ŋu aɖu ɖokuiwò dzi le ahanono gome o

[Etenuŋɔŋlɔ]

[Afi Si Míexɔ Mɔɖeɖe Tso]

Tsoƒe: Brief Intervention for Hazardous and Harmful Drinking

[Nɔnɔmetata si le axa 19]

AHAMUAME—ENYO NA WÒ DZIA?

Dzɔdzɔmeŋutinunyalawo bui be atikemenu siwo le wein dzĩ me (siwo woyɔna le yevugbe me be polyphenols) kpɔa ŋusẽ ɖe atikemenu aɖe si nana ʋukawo miãna alo wo me xena dzi.

Gawu la, wogblɔna be ahamuame nono nana ami geɖe metsia ame ƒe ʋu me o. Woxɔa ŋusẽ le nusiwo ate ŋu ana ame ƒe ʋu nabla hã si.

Gake edze abe aha sue aɖe si ame ano vivivi le kwasiɖaa me, si awɔ dɔ le eƒe ŋutilã me gbɔe viɖeawo tsona ene, ke menye be woalɔ ahaa katã ano le zã ɖeka me o. Wogblɔ be aha nono wòasɔ gbɔ wu dzidze eve gbeɖeka wɔnɛ be woxɔa ʋusɔgbɔdɔ, eye ahatsunono ate ŋu ana ame natu, eye ate ŋu awɔe be ame ƒe dzi nalolo alo manɔ dɔ wɔm nyuie o. Ŋumaɖɔmaɖɔɖo le ahanono me wɔnɛ be nusiawo kple bubu siwo ate ŋu agblẽ nu le ame ƒe lãmesẽ ŋu la va kpɔa ŋusẽ wu vi ɖesiaɖe si ahamuame ate ŋu aɖe na dzi kple ʋukawo. Nu nyui ɖesiaɖe zazã akpa menyo o—ẽ, nusianu zazã wòagbɔ eme medea ame dzi o.

[Nɔnɔmetata si le axa 17]

NUSI AHAMUAME ATE ŊU AGBLẼ LE ŊUWÒ

Ahɔhɔ̃

Lãmenugbagbeviwo tsɔtsrɔ̃, ŋkumaɖomaɖonudzi, blanuiléle, adãwɔwɔ

Nukpɔkpɔ, nuƒoƒo, kple ŋutinuwo ƒe nuwɔwɔ ɖe ɖoɖo nu me atɔtɔ

Vehlo, nume, no, kple aklã me kansa

Dzi

Lãmekawo agbɔdzɔ, dzi ado kpo dɔ wɔwɔ

Aklã

Ade ami, emegbe alolo, ate ahalia

Afɔku bubuwo

Ŋutilã mate ŋu atsi dɔléle nu o, dɔmebi, ƒomeɖe ƒe tete

Nyɔnu funɔ

Via ate ŋu azu nuwɔametɔ alo eƒe susu mawɔ dɔ nyuie o

[Nɔnɔmetata si le axa 18]

“Atike aɖeke megblẽa nu le fugboe si le tsitsim ŋu de esi ahamuame gblẽna nu o”