Vovo Tso Ahatsunono Me

“Ahatsunolae fofonye nye, eye eƒe kɔe metsɔ. Kaka maxɔ ƒe 12 la, menɔ aha nom xoxo. Hafi maɖe srɔ̃ la, menoa aha muna gbesiagbe. Meva nɔa ŋuta sẽm le amewo ŋu; zi geɖe la, kpovitɔwoe va xɔna na nye ƒomea. Nye lãme va nɔ gbegblẽm kabakaba. Ahamuame nono na meva nɔ ʋu dem, eye ʋudede ma wum kloe. Emegbe nye aklã va lia, eye ʋu vɔ le lãme nam. Meva wɔ ɖeka kple ame aɖewo siwo nɔ agbagba dzem be yewo ŋutɔ yewoakpɔ yewoƒe ahanono kuxia gbɔ, gake gbeɖea koe. Ðeko wòva wɔna nam abe ka aɖee blam, si me nyemate ŋu ado go le o ene.”—VÍCTOR, * ARGENTINA.

AMESIWO ŋu ahatsunono gblẽ nu le la gblɔa ŋutinya siawo tɔgbe edziedzi. Abe Víctor ene la, ewɔna na wo be yewomate ŋu ado le ahatsunono ƒe mɔ̃ si ɖe yewo me gbeɖe o. Ðe woate ŋu akpɔ kuxi siwo do tso ahamuame zazã me gbɔ alo aƒo asa nɛ kura gɔ̃ hã? Ne woate ŋui ɖe, ke aleke woawɔe?

Lɔlɔ̃ Ðe Kuxia Dzi

Nu gbãtɔe nye be ele vevie be amesi noa aha edziedzi kple amesiwo te ɖe eŋu la nalɔ̃ ɖe edzi be ahanono va zu kuxi nɛ. Ahanoxe nyenye nyea dzesi be kuxi aɖe li, gake kuxi gã bubuwo le megbe nɛ. Ðewohĩ aha sue aɖe koe amea nona tsã hafi, gake enono edziedzi hena ɣeyiɣi didi aɖe gbɔe kuxia tso. Nusi wɔ nuku enye be menye amesiwo zu ahanoxewo, siwo mete ŋu ɖua wo ɖokui dzi o gbɔe afɔku, ŋutasesẽ, kple hadomekuxi siwo ahanono hena vɛ la ƒe akpa gãtɔ tsona o. Se nya si Xexeame ƒe Lãmesẽ Habɔbɔ gblɔ ɖa: ‘Mɔ nyuitɔ kekeake si dzi míato aɖe kuxi siwo ahanono hena vɛ dzi akpɔtɔe nye be woakpe ɖe amesiwo nona agbɔsɔsɔ si sɔ ŋu be woaɖe edzi akpɔtɔ wu amesiwo zu ahatsunolawo xoxo.’ Ðe nènoa aha wòsɔa gbɔ wu esi dzi lãmesẽnyawo gbɔ kpɔlawo da asi ɖoa? Ðe nènoa aha ne èle nane si hiã be nànɔ ŋute ahalé ŋku ɖe nuwo ŋu nyuie la wɔmaa? Ðe wò ahanono na nèdoa go kuxiwo le wò ƒomea me kple le dɔwɔƒea? Lɔlɔ̃ ɖe edzi be aha agbɔsɔsɔme si yenona ate ŋu agblẽ nu le ye ŋu kple edzi ɖeɖe akpɔtɔ nye “mɔ nyuitɔ kekeake” si dzi ame ato aƒo asa na kuxi gã siwo ava emegbe. Ne ame va zu ahanoxe la, esesẽna ŋutɔ be wòatrɔ.

Zi geɖe la, ahatsunola akpa gãtɔ melɔ̃na ɖe edzi be yewozu ahatsunola o. Wogblɔna be: “Nyemenonɛ wua amewo o ɖe” alo “Mate ŋu adzudzɔ ne nye ŋutɔ melɔ̃.” Konstantin si le Russia gblɔ be: “Togbɔ be meku kloe le ahanono ta hã la, nyemebu ɖokuinye gbeɖe kpɔ be ahanoxee  menye o, eyata nyemewɔ afɔɖeɖe aɖeke be madzudzɔ o.” Marek si le Poland (Pologne) gblɔ be: “Medze agbagba zi geɖe be madzudzɔ, gake nyemelɔ̃ ɖe edzi ŋutɔŋutɔ be ahanoxee menye o. Nyemebu kuxi siwo ahanono hena vɛ la nu gãe o.”

Aleke woate ŋu akpe ɖe ame ŋu wòalɔ̃ ɖe edzi be ahanono nye kuxi na ye, ale be wòaɖe afɔ siwo sɔ tso eŋu? Gbã la, ele be amea nalɔ̃ ɖe edzi be esi yenoa aha akpa tae yedoa go kuxiwo ɖo, eye be ne yedzudzɔ ahanono la, yeƒe agbe anyo wu. Abe alesi wogblɔe ɖe La Revue du Praticien—Médecine Générale me ene la, ele be wòatrɔ susu. Le esi teƒe be wòagblɔ be “menoa aha le esi srɔ̃nye dzo le gbɔnye eye dɔ hã ge le asinye ta” la, ele be wòanye boŋ be “srɔ̃nye dzo le gbɔnye eye dɔ hã ge le asinye le esi menoa aha ta.”

Ne èdi be yeakpe ɖe ahanoxe aɖe ŋu wòatrɔ susu alea la, ɖewohĩ àdi be yeawɔ ɖe aɖaŋuɖoɖo siwo gbɔna dzi: Ðo toe nyuie, bia nyawoe tẽ siwo aʋu mɔ nɛ wòaɖe eƒe seselelãmewo agblɔ faa, ɖe veveseɖeamenu fiae ale be wòase le eɖokui me be èse yeƒe kuxia gɔme, de dzi ƒo nɛ ne agbagba vi aɖe koe wòte ŋu dze le kuxia ŋu hã, mègadi vodada le eŋu alo awɔ nusi ana wòagbe nuƒoƒo alo kpekpeɖeŋu xɔxɔ o. Àte ŋu ana wòaŋlɔ ŋuɖoɖowo tso nyabiabia eve siwo nye Nukae adzɔ ne meyi edzi le aha nom? kple Nukae adzɔ ne medzudzɔ? ŋu da ɖi; ema hã ate ŋu akpe ɖe eŋu.

Kpekpeɖeŋu Didi

Ne ame aɖe dze ahatsu nono la, mefia be viɖe aɖeke megale eŋu o alo be magate ŋu atrɔ o. Ame aɖewo ŋutɔ dzea agbagba dzudzɔna. Gake ɖewohĩ amesiwo nye ahanoxewo la ahiã ɖɔkta aɖe ƒe kpekpeɖeŋu be woadzudzɔ. * Le ame aɖewo gome la, anyo be woatso aƒeme anɔ kɔadzi yim, gake ne dzodzodzoetsitsi si do tso aha manomanoa me nu sẽ na amea la, ɖewohĩ ahiã be woasikae ɖe kɔdzi. Ne aha manomano ƒe dzodzodzoetsitsia dzi ɖe kpɔtɔ vie—le ŋkeke eve kple atɔ̃ dome—vɔ la, ekema woate ŋu aŋlɔ atike aɖewo na amea si ana aha maganɔ edzrom kutɔkutɔe o, ale be wòava ɖe asi le eŋu keŋkeŋ.

Gake atike wɔwɔ na ahanomunɔ mefia be akpɔ dzidzedze godoo o. Ɣeyiɣi aɖe ƒe kpekpeɖeŋu koe atikewo nana, womedana ahamumu o. Alain si le France la zã atike geɖe ɖe ahamumu ŋu. Gake egblɔ be: “Ne menya dzo le kɔa dzi ko la, megadzea aha nono gɔme ake elabena mía kple ahanolawo kee ganɔa ha dem. Magblɔe kpuie ko be nyemeɖoe be madzudzɔ ŋutɔŋutɔ o.”

Nusi Bu la Didi

Le nyateƒe me la, nusita ame geɖe mete ŋu kpɔa dzidzedze le ahanono dzi ɖuɖu me o ye nye be emanomano nana wòva wɔna na wo abe ɖe nane bu na wo ene, abe alesi ko ame ƒe xɔlɔ̃ kplikplikpli aɖe nagblẽe ɖi ene. Vasiliy si le Russia gblɔ be: “Mebua ahanono ŋu ɣesiaɣi. Ne ŋu aɖe ke nyemeno aha o la, ke nyemenyana ta le ɖokuinye nu gbemagbe o.” Le ahanoxe gbɔ la, ahanono le vevie nɛ wu dɔwɔna bubu ɖesiaɖe. Jerzy si le Poland gblɔ be: “Taɖodzinu si ko nɔ asinye le agbe mee nye be mano aha, eye madi ga adze aha ano.” Edze ƒã be ele be taɖodzinu yeye nava nɔ amesi nye ahanoxe tsã la si hafi wòate ŋu aɖe asi le eŋu keŋkeŋ.

Agbalẽ aɖe si Xexeame ƒe Lãmesẽ Habɔbɔ ta na amesiwo le agbagba dzem be yewoadzudzɔ ahanono la gblɔ be ele vevie be woawɔ dɔ siwo ŋu taɖodzinu aɖe le ale be woagava dze aha nono ake o. Susu siwo wodo ɖa dometɔ ɖekae nye be woakpɔ gome le mawusubɔsubɔdɔwo me.

Gome kpɔkpɔ vevie le mawusubɔsubɔdɔwo me ate ŋu akpe ɖe ame ŋu wòavo tso ahamuame ƒe ŋusẽkpɔɖeamedzi me. Le kpɔɖeŋu me, esi Alain do le game zi etɔ̃lia le nu gbegblẽ siwo wòwɔ le ahanono ta megbe la, edze Biblia sɔsrɔ̃ gɔme kple Yehowa Ðasefowo. Egblɔ be: “Biblia sɔsrɔ̃ na taɖodzinu va  nɔ nye agbe ŋu, eye ema kpe ɖe ŋunye meɖu ahanono dzi. Menye ɖeko meɖoe be madzudzɔ ahanono o, ke be madze Yehowa ŋu hã.”

Ne Ahanono ƒe Kuxia Trɔ Va

Ahatsunono ŋuti ɖaŋuɖolawo gblɔ be ele vevie be woakpe ɖe amesiwo le asi ɖem le ahatsunono ŋu la ŋu ahade dzi ƒo na wo. Ame geɖe ƒe ƒometɔwo kple xɔlɔ̃wo gbe nu le wo gbɔ le woƒe nɔnɔme wɔnublanuia ta. Alesi ƒometɔwo kple xɔlɔ̃wo megadea nu eme na amesiawo o ta la, woate ŋu alé blanui alo awu wo ɖokui gɔ̃ hã. Agbalẽ si ŋu míeƒo nu tsoe va yi la na aɖaŋuɖoɖo siwo gbɔna amesiwo le kpekpeɖeŋu nam ahanoxewo, be: “Kpɔ egbɔ be nàganɔ nya hem ɖe amesi ŋu nèle kpekpem ɖo la ŋu o, ne eƒe nuwɔna ku dzi na wò alo ɖe fu na wò gɔ̃ hã. Nenɔ susu me na wò be ame ƒe nɔnɔme tɔtrɔ mele bɔbɔe kura o. Kwasiɖa aɖewo me anyo gake ɖewo hã made ame dzi o. Dzi dede ƒo na amea kple alɔ dodoe be wòano aha agbɔsɔsɔme si magblẽ nu le eŋu o alo be wòaganoe kura o, kpakple kpekpe ɖe eŋu be wòabu tame tso nu yeyewo ŋu hiã.”

Hilario si nye ahanola ƒe 30 sɔŋ gblɔ be: “Nusi kpe ɖe ŋunye enye lɔlɔ̃ kple beléle si xɔ̃nye Yehowa Ðasefowo tsɔ nam le hamea me. Megava dzea ahanono zi geɖe le asi ɖeɖe le eŋu ɣeaɖeɣi megbe, gake wodea dzi ƒo nam hetsɔa Biblia ɖoa aɖaŋu nyuiwo nam ɣesiaɣi.”

Ne asi ɖeɖe le ahatsunono ŋu nye kuxi na wò la, ɖo ŋku edzi be ɖewohĩ ne èɖe asi le eŋu va ɖo ɣeaɖeɣi hã la, àte ŋu agava te enono ake, eye be ele be nàbui be ema hã hiã hafi nàte ŋu adzudzɔe keŋkeŋ. Dzi megaɖe le ƒowò o! Kpɔe ɖa be nukae na yegava dze ahanono ake hã, eye zã nusi ŋu nèke ɖo la nàtsɔ axe mɔ na enono ake le etsɔme. De dzesi nusiwo koŋ nana ahanono dzroa wò. Ðe wòanye wò mo si dzaka, blanuiléle, akogotsitsi, nyaʋiʋli, nuteɖeamedzi, alo wɔna kple teƒe siwo amewo noa aha le yea? Ekema ƒo asa na nu mawoe! Jerzy, si zã ƒe eve blibo hafi te ŋu ɖu ahanono dzi keŋkeŋ la, gblɔ be: “Medzea agbagba be made dzesi seselelãme siwo ate ŋu aho ahanono ƒe dzodzro nam. Fifia, meƒoa asa na nɔnɔme mawo dometɔ ɖesiaɖe. Nyemegogona afisi amewo noa ahamuame le o. Nyemeɖua naneke si me ahamuame le o, eye kura gɔ̃ hã la, nyemezãna amisisi alo atike siwo me ahamuame me nu aɖe le o. Nyemekpɔa boblo siwo wodona ɖe ahamuame ta hã o.” Ame geɖe kpɔe be gbe dodo ɖa na Mawu be wòana ‘ŋusẽ si gbɔ amegbetɔ tɔ ŋu’ yewo kpe ɖe yewo ŋu ŋutɔ le ahanono ƒe dzodzroa dzi ɖuɖu me.—Korintotɔwo II, 4:7; Filipitɔwo 4:6, 7.

Ablɔɖe Mlɔeba!

Togbɔ be avu kple kɔ ƒe nyae wònyena hã la, ele bɔbɔe be ame navo tso ahanoxe nyenye me. Amesiwo katã míeyɔ le nyati sia me la te ŋu dzudzɔe. Fifia wole lãmesẽ me wu, eye wole eŋu viɖewo kpɔm le woƒe ƒomea me kple le woƒe dɔwɔƒe siaa. Alain gblɔ be: “Fifia ablɔɖe le asinye be nyemano aha o.” Konstantin gblɔ be: “Sidzedze Yehowa kpɔ nye ƒomea ta. Fifia, taɖodzinu le nye agbe ŋu. Meganye ahae nana mekpɔa dzidzɔ o.” Víctor hã be: “Fifia mevo. Bubu gava le ŋunye, eye menya amesi ƒomevi menye.”

Ame aɖe ɖale afɔku me le ahamuame mazamazã nyuie ta, le fu kpem le ahamumu ta, alo nye ahanoxe o, ate ŋu awɔ tɔtrɔ. Ne wò ahanono nye afɔku na wò lãmesẽ kple dzidzɔkpɔkpɔ la, ekema mègahe ɖe megbe o; wɔ tɔtrɔ siwo hiã. Aɖe vi na wò ŋutɔ kple amesiwo lɔ̃a wo siaa.—g05 10/8.

[Etenuŋɔŋlɔwo]

[Nɔnɔmetata si le axa 20]

Lɔlɔ̃ ɖe kuxia dzie nye afɔɖeɖe gbãtɔ

[Nɔnɔmetata si le axa 21]

Ehiã be atikewɔlawo nakpe ɖe ame geɖe ŋu hafi woaɖu ahanono dzi

[Nɔnɔmetata si le axa 22]

Gbedodoɖa ate ŋu akpe ɖe ŋuwò

[Nɔnɔmetata si le axa 22]

Àte ŋu adzudzɔ ahanono!