Kpekpeɖeŋu Hena Mía Viwo Ta Kpɔkpɔ

Le ƒe si va yi me la, nyɔnu aɖe si le Virginia, Amerika, ŋlɔ lɛta tsɔ da akpe ɖe agbalẽ si nye Srɔ̃ Nu tso Nufiala Gã la Gbɔ ta. Egblɔ be: “Hafi mamayɔvinyewo namlɔ anyi la, wogblɔna be: ‘Mama, xlẽ ŋutinya ɖeka na mí le Yesu ƒe agbalẽa me.’ Woxɔ ƒe 4, 6, kple 7, eye ŋutinyawo vivina wo nu ale gbegbe.”

Nyɔnua ɖe eme be: “Mexlẽ ta 32 lia si nye ‘Alesi Wokpɔ Yesu Tae’ na wo. Ewɔ dɔ ɖe dzinye ŋutɔ elabena esi nusɔsrɔ̃ ma ƒo nu tso alesi Yehowa kpɔ Yesu tae ŋu vɔ la, eɖo aɖaŋu nyui aɖewo siwo akpe ɖe ɖeviwo ŋu woakpɔ wo ɖokui ta. Egblɔ be: ‘Ne ame aɖe di be yeawɔ nusia la, gblɔe nɛ sesĩe kple ŋusẽ be: “Mègawɔe o! Meyina egblɔ ge!”’”

Le Mexico la, ƒe atɔ̃ vi aɖe si ŋkɔe nye Betsaida dada gblɔ be zi evelia enye ma yele Nufiala-gbalẽa xlẽm kple ye vinyɔnuvia. Vidada gblɔ be: “Gbegblẽm koe xexeame le ɖe edzi, eye mía viwo le go dom nyaƒoɖeamenu geɖe wu tsã. Vinyenyɔnua gblɔ be aɖaŋuɖoɖo nyuiwo le agbalẽa me siwo fia alesi yeakpɔ ye ɖokui tae tso nu gbegblẽwo me, abe esiwo woyɔ le ta 32 lia me ene, eye be yeda akpe ɖe wo ta.”

Nufiala-gbalẽ sia si si axa 256 le, si me foto dzeani geɖe le, eye wòkeke abe agbalẽ sia si xlẽm nèle ene la kpena ɖe dzilawo ŋu be woawɔ ɖe Biblia ƒe mɔfiafia dzi le wo viwo hehe me. (Lododowo 22:6) Wotu nusɔsrɔ̃ siwo le eme la ɖe Yesu Kristo ƒe nufiafiawo dzi eye wogblɔ wo wole bɔbɔe; ke hã, nusɔsrɔ̃ le eme na amesiame. Àte ŋu adɔ ɖeka ne èkpe nudɔgbalẽvi si le ete la ɖo heɖoe ɖe adrɛs si dze le nudɔgbalẽvia dzi alo ɖoe ɖe adrɛs si sɔ le magazine sia ƒe axa 5 lia.—g4/06.

□ Medi be miaɖo Srɔ̃ Nu tso Nufiala Gã la Gbɔ ƒe agbalẽ gbadzaa ɖeka ɖem.

□ Taflatse, miva wɔ aƒeme Biblia nusɔsrɔ̃ femaxee kplim.