“Agbalẽ Xoxo Aɖe Ŋutɔe” Da Dɔ Nɛ

Gbe ɖeka la, Yehowa Ðasefo aɖe si le Brazil, Anyiehe Amerika, la nɔ amewo gbɔ yim tso aƒe me yi aƒe me heyi ɖado go nyɔnu aɖe si gblɔ nɛ be agbalẽ aɖe da dɔ na ye lɔ̃xo. Ðasefoa di vevie be yeanya agbalẽ si wònye. Nyɔnua gblɔ be “agbalẽ xoxo aɖe ŋutɔe wònye,” eye wòyi ɖatsɔ via ƒe Nye Agbalẽ si Nye Biblia Ŋutinyawo si do xoxo ŋutɔ la vae.

Nyɔnua gblɔ be blanuiléledɔ ɖe fu na ye lɔ̃xoa eye wòvɔ̃na na ku kple vivitimenɔnɔ ale gbegbe be metsona le eƒe aba dzi gɔ̃ hã o. Wona Biblia Ŋutinyawo gbalẽa ɖeka nyɔnua ƒe vi eye wòxlẽnɛ na mamaa. Agbalẽa me nya siwo ɖevia xlẽna la de dzi ƒo na mamaa ale gbegbe be wòkpɔ hayahaya tso eƒe dɔlélea me.

Ðasefoa gblɔ be: “Esi megblɔ na nyɔnua be Yehowa Ðasefowoe ta agbalẽa eye be eƒe kɔpi yeye ɖeka ate ŋu asu wo si la, ebia be matsɔ eve vɛ na yewo—ɖeka anye ye lɔ̃xoa tɔ eye evelia anye ye ŋutɔ ye tɔ. Esi metsɔ agbalẽawo yi nɛ la, egabia bubuwo kpee. Esi ɣeyiɣiawo va nɔ yiyim la, exɔ agbalẽa ɖekaɖeka 16 sɔŋ na xɔlɔ̃awo!”

Àte ŋu adɔ Nye Agbalẽ si Nye Biblia Ŋutinyawo si me ŋutinya 116 siwo ku ɖe ame siwo nɔ anyi le Biblia ŋlɔɣiwo kpakple nu siwo dzɔ ɣemaɣiwo ŋu le la ƒe ɖeka. Le ƒe 30 siwo va yi tso esime woɖe agbalẽ sia ɖe go me la, wota ɖekaɖeka miliɔn 72 kple edzivɔwo. Bene míaɖo eƒe tata ɖeka ɖe wò la, nu si ko wòle be nàwɔe nye be nàkpe nudɔgbalẽvi si le ete la ɖo ahaɖoe ɖe adrɛs si dze le nudɔgbalẽvia dzi alo aɖoe ɖe adrɛs si sɔ, le magazine sia ƒe axa 5 lia.—g08 12-E.

□ Medi be miaɖo agbalẽ sia ɖeka ɖem femaxee.

□ Taflatsɛ, miva wɔ aƒe me Biblia nusɔsrɔ̃ femaxee kplim.