Biblia Ƒe Nukpɔsusu

Ðe Mawu Di Be Nàzu Kesinɔtɔa?

“Mawu na tɔtrɔ yeye va nye agbe me! Eteƒe madidi o, mazu kesinɔtɔ gã aɖe!”

“Medi be mazu kesinɔtɔ gã aɖe elabena Mawu kple mawudɔlawo katã di be mazu kesinɔtɔ.”

“Mawu na ŋusẽ mí be míakpɔ kesinɔnuwo.”

‘Bibliae na nu le edzi dzem nam.’

NYA mawo ɖe nukpɔsusu si subɔsubɔha geɖe dona ɖe ŋgɔ be ŋutilãmenudzedziname nye Mawu ƒe yayra ƒe kpeɖodzi la fia. Wogblɔna be ne èwɔa nu nyui la, Mawu ana ŋutete wò be kesinɔnu geɖe nasu asiwò le agbe sia me eye wòagaɖo eteƒe na wò le etsɔ si gbɔna hã me. Dzixɔse sia bɔ ŋutɔ, eye agbalẽ siwo doa susu sia ɖe ŋgɔe nye esiwo woƒlena wu. Gake ɖe “nudzedziname ƒe mawunyagbɔgblɔ” sia wɔ ɖeka kple Biblia ƒe nufiafia?

Kakaɖedzitɔe la, mía Wɔla, si Biblia yɔ be “Mawu dzidzɔtɔ” la, di be míakpɔ dzidzɔ eye eme nanyo na mí le agbe me. (1 Timoteo 1:11; Psalmo 1:1-3) Tsɔ kpe ɖe eŋu la, eyraa ame siwo wɔa eƒe lɔlɔ̃nu. (Lododowo 10:22) Gake egbea le míawo gome la, ɖe yayra ma fia ko be nu nadze edzi na mí le ŋutilã mea? Míeva sea biabia sia gɔme nyuie wu ne míenya ɣeyiɣi si me míele le Mawu ƒe tameɖoɖo ƒe ɖoɖowo nu.

Kesinɔtɔzuɣie Nye Esia?

Le blema ɣeyiɣiwo me la, Yehowa Mawu yra esubɔla aɖewo kple ŋutilãmekesinɔnuwo, eye esia ƒe kpɔɖeŋu ɖedzesi aɖewoe nye Hiob kple Fia Salomo. (1 Fiawo 10:23; Hiob 42:12) Ke hã, ŋutilãmenu ʋɛ aɖewo koe nɔ Mawu vɔ̃la bubuwo abe Yohanes Amenyrɔɖetsimela kple Yesu Kristo ene si. (Marko 1:6; Luka 9:58) Nu kae esia fia mí? Le Biblia ƒe nya nu la, Mawu wɔa nu kple esubɔlawo le ɖekawɔwɔ me kple tameɖoɖo si le esi le ɣeyiɣi aɖe koŋ me la nu. (Nyagblɔla 3:1) Aleke gɔmeɖose ma ka mí egbeae?

Biblia ƒe nyagblɔɖiwo ɖee fia be míele “nuɖoanyi sia ƒe nuwuɣi” alo egbexexea ƒe “ŋkeke mamlɛawo” me. Nu siwo aɖe dzesi le ŋkeke siawo mee nye aʋawɔwɔ, dɔléle, dɔwuame, anyigbaʋuʋu kple hadomegbenɔnɔ ƒe gbegblẽ—nu siawo te fuɖeɖe na ameƒomea le mɔ si tɔgbi medzɔ kpɔ o nu tso keke ƒe 1914 me ke. (Mateo 24:3; 2 Timoteo 3:1-5; Luka 21:10, 11; Nyaɖeɖefia 6:3-8) Kpuie ko la, xexe sia le abe tɔdziʋu aɖe si gbã eye eteƒe madidi o wòanyrɔ keŋkeŋ ene! Le nu si nyateƒenya siawo ɖe fia nu la, ɖe susu anɔ eme be Mawu natsɔ ŋutilãmenuwo ayra esubɔla ɖe sia ɖea, alo ɖe tameɖoɖo aɖe si le vevie wue le Mawu si na mía?

Yesu Kristo tsɔ míaƒe ɣeyiɣia sɔ kple Noa ƒe ŋkekeawo. Yesu gblɔ be: “Ale si wowɔ le ŋkeke mawo me do ŋgɔ na tsiɖɔɖɔa, wonɔ nu ɖum, nɔ nu nom, ŋutsuwo nɔ srɔ̃ ɖem, eye wonɔ nyɔnuwo tsɔm na be woaɖe, va se ɖe ŋkeke si dzi Noa ge ɖe aɖakaʋu la me, eye wometsɔ ɖeke le eme o, va se ɖe esime  tsiɖɔɖɔa va, eye wòkplɔ wo katã yii la, nenema kee Amegbetɔvi la ƒe anyinɔnɔ hã anɔ.” (Mateo 24:37-39) Yesu gatsɔ míaƒe ɣeyiɣia sɔ kple Lot ƒe ŋkekeawo hã. Lot ƒe aƒelika siwo nɔ Sodom kple Gomora la nɔ ‘nu ɖum, nɔ nu nom, nɔ nu ƒlem, nɔ nu dzram, henɔ xɔ tum.’ Yesu gblɔ kpee be: “Gake le ŋkeke si dzi Lot do go tso Sodom la, dzo kple dzokpe dza tso dziƒo va tsrɔ̃ wo katã. Nenema kee wòanɔ le ŋkeke ma si dzi woaɖe Amegbetɔvi la ɖe go afia la dzi.”—Luka 17:28-30.

Le nyateƒe me la, naneke megblẽ le nuɖuɖu, nunono, srɔ̃ɖeɖe, nuƒeƒle kple nudzadzra ŋu o. Nu si me afɔkua le ye nye be míaƒo mía ɖokuiwo ɖe nu mawo me ale gbegbe be míagakpɔ ale si gbegbe nuwɔwɔ kpata hiã le ɣeyiɣi siawo me la adze sii o. Eya ta bia ɖokuiwò be, ‘Ðe wòanye dɔmenyonyo be Mawu natsɔ nu siwo tututu akpɔ ŋusẽ ɖe míaƒe agbe dzi ahana míaƒe susu nadzo le nu si le vevie wu dzi la ayra mía?’ * Kura o, ke boŋ anye nugbegblẽ le mía ŋu. Menye aleae lɔlɔ̃ ƒe Mawu la wɔa nui o!—1 Timoteo 6:17; 1 Yohanes 4:8.

Agbeɖeɣie Nye Esia!

Le ameƒomea ƒe ŋutinya ƒe ɣeyiɣi vevi sia me la, wode dɔ aɖe si hiã kpata la asi na Mawu ƒe amewo. Yesu gblɔ be: “Woaɖe gbeƒã fiaɖuƒe ŋuti nya nyui sia le anyigba blibo la katã dzi, be wòanye ɖaseɖiɖi na dukɔwo katã, eye ekema nuwuwu la ava.” (Mateo 24:14) Yehowa Ðasefowo tsɔ nya sia nya vevii. Le susu sia ta la, wodea dzi ƒo na woƒe aƒelikawo be woasrɔ̃ nu tso Fiaɖuƒe ma kple nu siwo Mawu di tso mía si hena agbe mavɔ kpɔkpɔ la ŋu.—Yohanes 17:3.

Ke hã, Mawu mebia tso esubɔla wɔnuteƒewo si be woanɔ nuteameɖokui ƒe agbe o. Ke boŋ edi be woakpɔ ŋudzedze ɖe agbemenuhiahiã veviwo ŋu ale be woate ŋu alé fɔ ɖe ye subɔsubɔ ŋu. (Mateo 6:33) Ne wowɔe alea la, eya hã akpɔ woƒe ŋutilãmenuhiahiãwo gbɔ na wo. Hebritɔwo 13:5 gblɔ be: “Mina miaƒe agbenɔnɔ navo tso galɔlɔ̃ me, eye nu siwo le mia si fifia la nadze mia ŋu. Elabena [Mawu gblɔ] be: ‘Nyemaɖe asi le ŋuwò gbeɖe o, eye nyemagblẽ wò ɖi hã akpɔ o.’”

Mawu ana nya siawo nava eme le mɔ ɖedzesi nu ne ekpɔ esubɔla vavãwo ƒe “ameha gã aɖe” ta tso egbegbe nuɖoanyi sia tsɔtsrɔ̃ me eye wòana woage ɖe ŋutifafa xexe yeye si me nudzedziname vavãtɔ anɔ la me. (Nyaɖeɖefia 7:9, 14) Yesu gblɔ be: “Meva be woakpɔ agbe, eye be woakpɔe wòasɔ gbɔ.” (Yohanes 10:10) Be ‘woakpɔ agbe wòasɔ gbɔ’ mefia be ŋutilãmenunɔamesi geɖe nasu ame si fifia o, ke boŋ, efia agbe si nuwuwu manɔe na o ƒe amesisusu le Paradiso me le Mawu ƒe Fiaɖuƒea ƒe dziɖuɖu te.—Luka 23:43.

Mègaɖe mɔ woatsɔ yeaɖi nudzedziname ƒe mawunyagbɔgblɔ, si le nyateƒe me la, wònye nu si hea ame ƒe susu ɖa le nu vavã la dzi, able wò o. Ðe esia teƒe la, wɔ ɖe Yesu ƒe nuxlɔ̃ame sia si me lɔlɔ̃ le dzi, si gblɔ be: “Mikpɔ mia ɖokui dzi nyuie, be nu tsu ɖuɖu kple aha tsu nono kple agbe me dzimaɖitsitsiwo nagate miaƒe dzi ɖe to gbeɖe o, ne ŋkeke ma nagava lili mi abe mɔ ene o.”—Luka 21:34, 35.—g09 05-E.

[Etenuŋɔŋlɔ]

ÈBU NYA SIA ŊU KPƆA?

▪ Nu ka ƒe ɣeyiɣi mee míele fifia?—Mateo 24:14.

▪ Biblia me nudzɔdzɔ kawoe Yesu tsɔ míaƒe ɣeyiɣia sɔ kplii? —Mateo 24:37-39; Luka 17:28-30.

▪ Nu kae wòle be míaƒo asa na ne míedi be míakpɔ agbe mavɔ?—Luka 21:34.

[Nya si ɖe dzesi si le axa 11]

Le nyateƒe me la, yeaɖi nudzedziname ƒe mawunyagbɔgblɔ nye nu si hea ame ƒe susu ɖa le nu vavã la dzi