Ðe Miate Ŋu Adzra Mia Nɔewo Dome Ðoa?

Aƒea me tɔwo kpɔe be yewoƒe xɔa meganyo o, gake woɖoe be yewoadzrae ɖo.

ÀDI be yeadzra mia kple srɔ̃wò hã dome ɖoa? Ne èdii ɖe, ekema afi kae nàdze egɔme tsoe? Te aɖaŋuɖoɖo siwo gbɔna kpɔ.

1 Ðoe kplikpaa.

Mia kple srɔ̃wò milɔ̃ ɖe edzi be yewoadze agbagba ɖekae be mia dome naganyo. Miŋlɔ nu si mieɖo be miawɔ la ɖi. Ne mia kple srɔ̃wò mieɖoe vavã be miakpɔ miaƒe srɔ̃ɖeɖe me kuxiawo gbɔ la, ekema miate ŋu akpɔ wo gbɔ ɖekae.—Nyagblɔla 4:9, 10.

2 Mide dzesi nu si nye kuxia.

Nu kae le didim be yeagblẽ srɔ̃ɖeɖea me? Ŋlɔ nu si nèsusu be eyae hiã be miawɔ, alo nu si nàdi be yewoatrɔ la ɖi kpuie. (Efesotɔwo 4:22-24) Eme kɔ be ɖewohĩ nu si wò ya nèkpɔ be eyae nye kuxia la ato vovo na srɔ̃wò tɔ.

3 Miɖo nu si miedi be yewoawɔ.

Kaka ɣleti ade nava yi ɖe, kuxi kawo gbɔe nàdi be miakpɔ? Tɔtrɔ kawoe nàdi be mi ame evea miawɔ? Ŋlɔ nu si nèdi be yeawɔ la ɖi. Ne ènya nu si tututu hiã le miaƒe srɔ̃ɖeɖea me la, ekema àte ŋu awɔ nu siwo nèɖo la bɔbɔe.—1 Korintotɔwo 9:26.

 4 Wɔ aɖaŋu siwo Biblia ɖo la dzi.

Ne ède dzesi nu si nye kuxia, eye nèɖo nu siwo nèdi be yeatrɔ vɔ la, ekema kpɔe ɖa be aɖaŋu kae Biblia ɖo tso kuxi ma ŋu hã. Gɔmeɖose siwo le eme la wɔa dɔ ɣesiaɣi, eye wokpena ɖe ame ŋu ŋutɔ. (Yesaya 48:17; 2 Timoteo 3:17) Le kpɔɖeŋu me, Biblia de dzi ƒo na mia kple srɔ̃wò be miatsɔ vodadawo anɔ mia nɔewo kem. Biblia gblɔ be: “Bubu wònye [na ame], nenye be, eɖe kɔ ɖa le dzidada ŋu.”—Lododowo 19:11; Efesotɔwo 4:32.

Ne edze abe agbagba siwo dzem nèle la mele vi boo aɖeke ɖem o hã la, lé dzi ɖe ƒo! Agbalẽ aɖe gblɔ nu siwo do tso eme na ame siwo te ŋu wɔe ale: “Nu si do tso eme la wɔ nuku: Esi srɔ̃tɔ alafa ɖeka siwo dome mele nyuie o la dometɔ 86 ku ɖe wo nɔewo ŋu togbɔ be kuxiwo li hã la, wova kpɔe le ƒe atɔ̃ megbe be srɔ̃ɖeɖea me va nyo wu.” (The Case for Marriage) Srɔ̃tɔ siwo be yewomekpɔa dzidzɔ kura o gɔ̃ hã ƒe nɔnɔmeawo va ka ɖe eme.

Ðewohĩ ava nyo na wò hã. Yehowa Ðasefowoe ta agbalẽ sia, eye wokpɔe be Biblia ɖo aɖaŋu nyui siwo akpe ɖe srɔ̃tɔwo ŋu. Le kpɔɖeŋu me, srɔ̃tɔ geɖewo kpɔe be esi yewowɔa nu ɖe yewo nɔewo ŋu nyuie, yewosea veve ɖe yewo nɔewo nu, eye yewolɔ̃na faa tsɔna kea yewo nɔewo la, yewo dome va nyo wu. Srɔ̃nyɔnuwo va srɔ̃e be ele vevie be yewoanye ame “fatu [siwo] nɔa anyi kpoo,” eye srɔ̃ŋutsuwo hã va kpɔe be ne yewomedoa dziku ɖe yewo srɔ̃wo ŋu helĩhelĩ o la, eɖea vi.—1 Petro 3:4; Kolosetɔwo 3:19.

Nu si ta Biblia me gɔmeɖose siawo wɔa dɔe nye be Yehowa Mawu, Ame si na woŋlɔ Biblia, lae ɖo srɔ̃ɖeɖe gɔme anyi. Ðe manyo be nàbia Yehowa Ðasefowo ne woafia wò ale si nàzã Biblia atsɔ adzra mia kple srɔ̃wò dome ɖo oa? *—g10-E 02.

[Etenuŋɔŋlɔ]