Nu kae na nèva tsɔ ɖe le dzɔdzɔmeŋutinunya me?

Esime menɔ ɖevime la, mekpɔa dzidzɔ ɖe dzɔdzɔmenuwo ŋu. Richterswil si nye Switzerland kɔƒe dzeani aɖe mee menɔ tsi le Zurich-ta to. Dzinyelawo kple nɔvinye tsitsiwo kplɔam ɖia tsa, eye woƒoa nu tso lãwo kple ati siwo míekpɔna le afi mawo ŋu nam.

Nu ka tae nèsrɔ̃ nu tso ƒunukpeƒekoko ŋu?

Fofonye wɔ dɔ ɣeyiɣi kpui aɖe le amekoƒe le dɔnɔkɔdzi aɖe si le míaƒe nutoa me abe amekola ƒe kpeɖeŋutɔ ene. Nu siwo wòkpɔ le afi ma na be wòƒoa nu tso amekoko ŋu vividoɖenuŋutɔe. Ale si wòdoa vivi ɖe dɔ sia ŋu la wɔ dɔ ɖe dzinye ale gbegbe be meva tiae emegbe be manye amekola. Mesrɔ̃ ƒunukpeƒekoko koŋ, elabena ale si wowɔa dɔ siae la doa dzidzɔ nam. Ebiana be ƒunukpeƒekola nabu tame abe mɔ̃ɖaŋudɔwɔla ene ale be wòate ŋu aɖɔ ƒuwo, lãkusiwo kple kpeƒetsiaka siwo wɔnɛ be míetea ŋu zɔna la ɖo.

Nu si doa dzidzɔ nam wue nye ne mekpɔ ame siwo mewɔ dɔ na wohaya. Dɔwɔwɔ kple amewo kplikplikpli doa dzidzɔ nam ŋutɔ.

Nu ka tae nèsusunɛ tsã be Mawu meli o?

Tso nye sɔhɛmenɔɣi kee mesusunɛ be Mawu meli o le susu eve aɖewo koŋ ta. Gbã la, meva kpɔe be mawunyafiala aɖewo nɔa agbe gbegblẽ, eye esia ɖe fu nam ŋutɔ. Susu eveliae nye be míaƒe nufiala siwo fiaa nu gbagbe ŋuti nunya dometɔ aɖewo xɔe se be ɖeko nu gbagbewo dzɔ le wo ɖokui si, eye nye hã meva da asi ɖe nufiafia sia dzi, vevietɔ esime menɔ yunivɛsiti.

Nu ka tae nèva da asi ɖe nufiafia si nye be ɖeko nu gbagbewo dzɔ le wo ɖokui si la dzi?

Mexɔ nye nufialawo dzi se. Tsɔ kpe ɖe eŋu la, mesusui be ale si nu gbagbewo ɖi wo nɔewo le nu geɖe me la ɖee fia be nu gbagbe ɖeka aɖe mee wo katã wodzɔ  tso, eye be esia ɖo kpe edzi be nu gbagbewo trɔa nɔnɔme zua bubuwo.

Ke nu ka tae nèva trɔ susu emegbe?

Xɔ̃nye aɖe kpem meyi Yehowa Ðasefowo ƒe kpekpe. Ale si hamea me tɔwo doa vivi ɖe ame ŋu kple ale si gbegbe nufiame le nuƒoawo me la wɔ dɔ ɖe dzinye ŋutɔ. Emegbe aƒenɔvi wɔame aɖe si tso hamea me la va srãm kpɔ, eye mebiae be, “Aleke mawɔ aka ɖe edzi be Biblia me nyawo nye nyateƒe?”

Edzro Biblia me nyagblɔɖi siwo ku ɖe míaƒe ŋkekea me nudzɔdzɔ geɖewo ŋu la me kplim. Esiawo dometɔ ɖekae nye Yesu ƒe nyagblɔɖi siwo ku ɖe ale si aʋawɔwɔ ayi edzi le dukɔwo dome, “anyigba aʋuʋu ŋutɔ, eye dɔvɔ̃wo kple nuɖuɖu ƒe veve ava teƒeteƒewo” le xexe sia ƒe ŋkeke mamlɛawo me la ŋu.¹ Edzro nyagblɔɖi siwo ku ɖe ale si amewo ƒe agbenɔnɔ agblẽ ɖe edzi kple ale si ŋubiabiã kple nu vɔ̃ɖi wɔwɔ geɖe siwo teƒe kpɔm míele egbea adzi ɖe edzi ŋu la hã me kplim.² Eteƒe medidi o, meva te Biblia-sɔsrɔ̃ moveviɖoɖotɔe, eye le ɣeyiɣi kpui aɖe megbe la, meva kpɔe be Biblia ƒe nyagblɔɖiwo katã vaa eme ɣesiaɣi. Eye megbugbɔ ŋku lé ɖe ale si mebua afi si nu gbagbewo dzɔ tso la ŋu.

Ðe numekuku siwo nèwɔ abe ɖɔkta ene la na nèbu afi si agbe dzɔ tso la ŋua?

Ɛ̃. Esi mete Biblia-sɔsrɔ̃ la, menɔ numekuku hã wɔm tso amegbetɔ ƒe klo koko ŋu. Tso ƒe 1960-awo ƒe nuwuwu la, dzɔdzɔmeŋutinunyalawo va le míaƒe klo ƒe wɔwɔme si wɔ nuku ŋutɔ la gɔme sem nyuie wu. Wova de dzesi be menye ɖeko míaƒe klowo trona abe ale si ʋɔtru trona le eƒe megbega ŋu ene o, ke boŋ wotea ŋu trona godoo, eye woɖiɖina le wo nɔewo nu bɔkɔɔ hã—nu wɔnuku eve siawoe wɔe be míaƒe kloa tea ŋu wɔa dɔ geɖewo. Le kpɔɖeŋu me míetea ŋu zɔna, ɖua ɣe hewɔa nu bubu geɖewo.

Numekulawo dze agbagba ƒe 40 sɔŋ be yewoawɔ klo si anɔ abe amegbetɔwo tɔ ene. Gake ale si amegbetɔ ƒe klo ƒe wɔwɔme kple dɔwɔnawo sɔ gbɔe la na wòle sesẽm na wo. Gawu la, ne wotsɔ míaƒe klo sɔ kple klo wɔwɔe la, klo wɔwɔe menɔa anyi eteƒe didina o. Ne klowɔlawo tsɔ dɔwɔnu nyuitɔ kekeake wɔ klo hã la, anye dzidzɔ na wo ne ete ŋu nɔ anyi xɔ ƒe 20 ya teti. Nya lae nye be lãmenugbagbeviwoe le míaƒe kloa me siwo ɖɔlia wo ɖokuiwo enuenu. Le gonyeme la, klo ƒe wɔwɔme ɖo kpe Mawu ƒe nunya dzi nam, ke menye be kloa ŋutɔ koe dzɔ le eɖokui si o.

Ke ale si nu gbagbewo ɖia wo nɔewo le nu geɖewo me kple ale si woƒe domenyiŋusẽfianu tea ŋu trɔna ya ɖe?

Esia ɖoa kpe Wɔla ma ke ƒe anyinɔnɔ dzi. Gawu la, ne nu gbagbewo ƒe domenyiŋusẽfianu trɔ la, womezua nuwɔwɔ bubu siwo de ŋgɔ wu eye woƒe nɔnɔme nyona wu o. Ke ɖe wògblẽa nu le woƒe lãmenugbagbeviwo ŋu boŋ. Enye nyateƒe be afɔku ate ŋu aɖe vi ya. Le kpɔɖeŋu me, ne keteke va lɔ tɔdzisasrã aɖe eye wòkaka la, ate ŋu akpɔ dua ta be woƒe futɔwo ƒe asrafowo mato tɔdzisasrã ma dzi adze dua dzi o. Gake afɔku ma mena be dua nyo ɖe edzi o. Nenema kee nu gbagbewo ƒe domenyiŋusẽfianuwo ƒe tɔtrɔ menana be woƒe lãmenugbagbeviwo nyona ɖe edzi wu o. Eye tɔtrɔ sia mate ŋu ana be woƒe lãmenuwo natrɔ azu nu si de ŋgɔ abe amegbetɔ ƒe klo ene kaka wòahayi ŋutilã ƒe akpa bubuwo nye ge gbeɖe o.

Nu ka tae nèva zu Yehowa Ðasefo?

Esi mete Biblia me nyawo dzi wɔwɔ la, nye agbe va nyo ɖe edzi sãsãsã. Eye le ƒe 2003 me la, mede Yehowa Ðasefowo ƒe dukɔwo dome takpekpe, eye mekpɔ ɖekawɔwɔ sẽŋu aɖe le vavala siwo menya wo nɔewo do ŋgɔ o la dome abe dadaviwoe wonye ene. Emae nye lɔlɔ̃ akuakua, eye medi be mazu wo dometɔ ɖeka.