WHISTON xɔ ŋkɔ hã le ƒe alafa gbãtɔ me Yudatɔwo ƒe ŋutinyaŋlɔla Flavius Josephus ƒe nuŋlɔɖiwo gɔme ɖeɖe ɖe Eŋlisigbe me ta, ame siwo gbɔ wòxɔ ŋkɔ le wue nye ame siwo srɔ̃a Biblia. Eƒe agbalẽ si woyɔna be The Works of Josephus kɔ nu me geɖe ku ɖe Yudatɔwo ƒe ŋutinya kple Kristotɔ gbãtɔwo ƒe nuwɔnawo ŋu.

Whiston ƒe tagbɔ ɖa ŋutɔ eye wòku nu me le agbalẽ geɖewo me, vevietɔ dzɔdzɔmeŋutinunya kple mawusubɔsubɔ gbalẽwo me. Exɔe se be nuwɔwɔwo ƒe ŋutinya si le Biblia me la de pɛpɛpɛ, eye wògblɔ hã be xexemenuwo ƒe wɔwɔme, atsyɔ̃ kple ɖoɖo si nu wole la ɖee fia be Mawue wɔ wo.

Gawu la, Whiston xɔe se be nu si gbɔ wòtso be Kristotɔwo ƒe subɔsubɔha vovovowo va lie nye ale si hakplɔlawo tra ɖa tso Biblia ƒe nufiafiawo gbɔ heva da asi ɖe nufiafia siwo metso Biblia me o kple ame siwo woyɔna be Sɔlemeha Fofowo ƒe kɔnuwo dzi.

Whiston xɔe se be nyateƒenya siwo ku ɖe Mawu ŋue le Biblia me, eye meda asi ɖe funyafunyawɔwɔ ame tegbee le dzo mavɔ me ƒe nufiafia dzi o. Ebua nufiafia sia be enye nufiafia manyatalenu si na amewo susunɛ be tamesẽlae Mawu nye eye esia nye vlododo Mawu hã. Nu si koŋ na be sɔlemeha va lé fui kaɖikaɖie nye ale si wògbe Mawuɖekaetɔ̃ alo Trinita Kɔkɔe ƒe nufiafia, si nye be ame etɔ̃e le Mawu me, ame etɔ̃ siawo katã wosɔ, wo katã woli tegbee, be woawoe nye Fofo la, Vi la kple Gbɔgbɔ Kɔkɔe la. Evɔ ame siawo ke gafia nu be menye mawu etɔ̃e li o ke boŋ ɖeka koe.

Esi Whiston ku nu me nyuie la, eva kpɔe be Kristotɔ gbãtɔ- wo mefiaa nu be Mawuɖekaetɔ̃ ye Mawu nye o, ke boŋ esi Kristotɔwo va xɔ xexemenunyalawo ƒe nufiafiawo dzi se vɔ megbee wova da asi ɖe nufiafia sia dzi. * Whiston xɔlɔ̃wo ɖo aɖaŋu nɛ be megaɖe agbalẽ si me wòŋlɔ nu siwo ŋu wòke ɖo la ɖe go o. Gake egbe gbidii be yemate ŋu amia nu ɖe nyateƒe si yede dzesi ku ɖe ame si tututu Yesu nye ŋu, be Mawu ƒe Vie wònye eye ɖe wowɔe la tɔtrɔ gboe la dzi o.

Cambridge Yunivɛsitia xɔa dɔ le ame sia ame si fia nu tsi tre ɖe Anglikan sɔlemehaa ƒe nufiafiawo ŋu la si, eye esia fia be ɖoƒe ma ate ŋu age le Whiston si. Ke hã memia nu ɖe nu siwo ŋu wòke ɖo la dzi o, eƒe nuwɔnaa to vovo na Newton tɔ. Newton hã bui be aʋatsoe Mawuɖekaetɔ̃ ƒe nufiafia nye, gake mekɔ nu le edzi o. Whiston ŋlɔ bena: “Xexea me nu aɖeke mate ŋu . . . ana mamia nu ɖe nu si menya dzi o.”

Le ƒe 1710 me la, wonya Whiston le Cambridge Yunivɛsitia me. Esi meda asi ɖe alakpadzixɔsewo dzi o ta la, ŋutsu sia si nye “agbalẽnyala xɔŋkɔ va zu ame si wotsri.” Ɣemaɣi kura gɔ̃ hã la vɔvɔ̃ meɖoe o. Le nyateƒe me la, le ɣeyiɣi si me tututu wonɔ enu tsom be etsi tre ɖe sɔlemeha ƒe nufiafia ŋu me la, eta nyati geɖewo siwo wòna ŋkɔe be Primitive Christianity Revived (Kristotɔnyenye Gbãtɔ Gbugbɔɖoanyi), eye nu si wòwɔnɛ be Kristotɔnyenye gbãtɔe nye ale si Yesu yomedzela gbãtɔwo subɔe. Emegbe Whiston va ɖo Krisotɔnyenye Dodo Ðe Ŋgɔ Ƒe Habɔbɔ, eye wokpena le eƒe me le London.

Togbɔ be dɔ ge le Whiston si eye ganyawo sesẽ nɛ hena ɣeyiɣi aɖe hã la, eyi edzi nɔ agbalẽ ŋlɔm eye wonɔa nu fiam le kɔfi-noƒewo le London. Le ƒe 1737 me la, eɖe Josephus ƒe nuŋlɔɖi siwo gɔme wòɖe la ɖe go be yeatsɔ akpe ɖe amewo ŋu woanya nu tso ale si nuwo nɔ esime Kristotɔnyenye dze egɔme la ŋu. Wokpɔtɔ le eƒe agbalẽ sia tam va se ɖe egbe.

Esi dzi nɔ Whiston ƒo wòƒo nu tsi tre ɖe dzixɔse siwo dzi ame akpa gãtɔ da asi ɖo ŋu ta la, agbalẽŋlɔla James E. Force gblɔ be ame geɖewo bunɛ egbea be enye “ame trama.” Gake ame bubuwo ya bunɛ be enye Biblia-ŋutinunyala bibi, ame si di nyateƒe si ku ɖe mawusubɔsubɔ ŋu anukwaretɔe, eye wòɖoe kplikpa nɔ agbe ɖe eƒe dzixɔsewo nu.