HILTON lɔ̃a kɔdada. Esi wòxɔ ƒe adre la, edaa kɔ le kɔdaƒewo kple ablɔwo dzi siaa! Esi wònɔ suku kɔkɔ dem la, eya kple exɔlɔ̃wo nɔa tsatsam henɔa amewo dim be yewoaƒo. Egblɔ be: “Mefia fi, medaa tsatsa, mekpɔa gbɔdɔnuwɔnawo, mesẽa ŋuta le nyɔnuwo ŋu, eye medzua dzinyelawo.” Eyi edzi be: “Nye nuwɔna va vloe ale gbegbe be dzinyelawo susui be nyemate ŋu atrɔ gbeɖe o. Esi mewu suku kɔkɔa nu la, meʋu le aƒe me.”

Esi Hilton trɔ gbɔ va le ƒe 12 megbe la, ale si gbegbe eƒe agbenɔnɔ trɔe la wɔ nuku na edzilawo ŋutɔ! Ezu ame fafa, eɖua eɖokui dzi, eye wòbua ame. Nu kae na wòtrɔ nenema gbegbe? Esi wòʋu le aƒe me la, eva te tamebubu vevie tso eƒe agbe ŋu. Ede ŋugble tso Biblia me nyawo ŋu be woate ŋu akpe ɖe ye ŋu yeatrɔ yeƒe agbenɔnɔ mahã. Hilton gblɔ be: “Mewɔna ɖe nu siwo mesrɔ̃na le Biblia me la dzi, esia fia be ele be mawɔ ɖe se si wode le Efesotɔwo 6:2, 3 be mabu dzinyelawo la dzi. Esiae nye zi gbãtɔ si mekpɔ dzidzɔ vavã le nye agbe me, eye mehe dzidzɔ vɛ na tɔ́nye kple nɔnye, ke meganye dzigbagbã o.”

Hilton ƒe ŋutinya sia ɖo kpe edzi be Biblia sɔ na míaƒe ŋkekea eye nɔnɔme nyui siwo Biblia de dzi ƒo be woatu ɖo la tea ŋu trɔa ame ƒe agbenɔnɔ. (Hebritɔwo 4:12) Na míakpɔ nɔnɔme nyui siawo dometɔ aɖewo ɖa ne míakpɔ ale si wotea ŋu trɔa ame ƒe agbenɔnɔe. Woawoe nye nyateƒetoto, ɖokuidziɖuɖu, nuteƒewɔwɔ kple lɔlɔ̃.