NU SI BIBLIA GBLƆ
Amedzɔtsolãme
Ame aɖewo gblɔna be nɔnɔmetɔtrɔ dzie agbe to va dzɔ. Ame bubuwo hã gblɔna be Mawu wɔ nu ɖeka aɖe eye nuwɔwɔ bubuwo va do go tso nu ɖeka ma me. Nu kae Biblia ya gblɔ?
Ðe nya si Biblia gblɔ tso nuwɔwɔ ƒe gɔmedzedze ŋu fia be nuwɔwɔwo medze egɔme zi ɖeka kpoyi oa?
Biblia gblɔ kpuie ko be: “Le gɔmedzedzea me Mawu wɔ dziƒo kple anyigba.” (1 Mose 1:1) Biblia megblɔ ale si tututu Mawu wɔ nu sia nui o. Eya ta ne nane ƒe wowó kpoyie na xexea va dzɔ hã la, ema matsi tre ɖe nu si Biblia gblɔ la ŋu o. Ke boŋ nu si wogblɔ le 1 Mose 1:1 aɖo nyabiase si nye, Ame kae na be nua wó kpoyi? la ŋu.
Dzɔdzɔmeŋutinunyala geɖewo xɔe se be ame aɖeke mefia mɔ nua ƒe wowó kpoyi, si wɔe be esi ɣeyiɣiawo va nɔ yiyim la, ɣletiviwo, ɣletinyigbawo kple nu bubu siwo le ɖoɖo nu la va dzɔ o. Biblia meda asi ɖe susu ma dzi o, ke boŋ egblɔ be Mawue wɔ xexea, anye be to nuwo ƒe wowó dzi loo alo to mɔnu bubu aɖe dzi.
“Le gɔmedzedzea me Mawu wɔ dziƒo kple anyigba.”—1 Mose 1:1.
Ðe Biblia gblɔ be nu gbagbewo tea ŋu trɔna ne ɣeyiɣiwo va le yiyima?
Ɛ̃. Biblia gblɔ be Mawu wɔ nu gbagbewo “le wo ƒomeviwo nu.” (1 Mose 1:11, 12, 21, 24, 25) Ðe vovototo ate ŋu anɔ nu gbagbe siwo tso ƒome ɖeka me la mea? Ɛ̃. Gake ɖe vovototo si dzena le nu gbagbe siwo tso ƒome ɖeka me fia be nu yeye aɖe kura ate ŋu adzɔ tso emea? Ao.
Bu eƒe kpɔɖeŋu aɖe ŋu kpɔ: Le ƒe 1970-awo me la, numekulawo srɔ̃ nu tso aloe siwo le Galápagos Ƒukpoa dzi la ŋu. Wode dzesii be enɔa bɔbɔe na aloe siwo ƒe dɔ lolo vie la be woatsi agbe. Esia na ame aɖewo ƒo nya ta be kpeɖodzi le nɔnɔmetɔtrɔ ŋu. Gake ɖe esia ɖo kpe nɔnɔmetɔtrɔ dzi loo alo tɔtrɔ ɖe nɔnɔme yeye ŋu koe wònye? Ƒe geɖe megbe la, aloe siwo ƒe dɔ le sue la, gava sɔ gbɔ wu. Numekuku sia na nufialagã Jeffrey H. Schwartz si srɔ̃ nu tso amegbetɔwo kple woƒe nuwɔnawo ŋu la ƒo nya ta be togbɔ be tɔtrɔ ɖe nɔnɔme yeyewo ŋu ate ŋu akpe ɖe nu gbagbewo ŋu woatsi agbe hã la, “wometrɔna zua nu bubu aɖeke o.”
Ðe Biblia ƒe nufiafia kple nɔnɔmetɔtrɔ nufiafia wɔ ɖeka?
Biblia gblɔ be “[Mawue] wɔ nuwo katã.” (Nyaɖeɖefia 4:11) Eye ‘meɖi’ ɖe eme o va se ɖe esime wòwu dɔ siwo wɔm wònɔ nu. (1 Mose 2:2) Nu si wòfia la me kɔ: Mawu mewɔ nu ɖeka aɖe eye wòva de asi ata me nɔ ɖiɖim ɖe eme henɔ nu ɖeka ma kpɔm wòtrɔ va zu nu bubuwo abe tɔmelã, kese kple amegbetɔ ƒomevi vovovowo ene le ƒe miliɔn geɖe megbe o. * Emae nye nɔnɔmetɔtrɔ alo ame dzɔ tso kese me ƒe nufiafia, eye eɖe Wɔlaa, ame si Biblia gblɔ be eyae “wɔ dziƒowo kple anyigba, atsiaƒu kple wo me nuwo katã” la ɖa le nyaa me.—2 Mose 20:11; Nyaɖeɖefia 10:6.
“Yehowa, mía Mawu, wòe dze be nàxɔ ŋutikɔkɔe, bubu kple ŋusẽ, elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.”—Nyaɖeɖefia 4:11.
Srɔ̃ nu geɖe kpee: Biblia gblɔ be Mawu ƒe “nɔnɔme makpɔmakpɔawo dzena gaglãa wokpɔna tso xexea wɔwɔ dzi, elabe wodze ƒãa le nu siwo wòwɔ la me.” (Romatɔwo 1:20) Nusɔsrɔ̃ tso Mawu ŋu ate ŋu ana nàse tameɖoɖo si le agbe ŋu la gɔme, elabena tameɖoɖo nyui aɖe le esi na dzinyuitɔ siwo katã dinɛ. (Nyagblɔla 12:13; Hebritɔwo 11:6) Àte ŋu axlẽ nu geɖe tso nya sia ŋu le www.pr418.com/ee alo nàte ɖe Yehowa Ðasefowo ŋu. Ʋu BIBLIA ƑE NUFIAFIAWO > BIBLIA ME BIABIAWO ƑE ŊUÐOÐOWO.
^ mm. 12 Biblia megblɔ be Mawu wɔ nuwo le ŋkeke ade siwo dometɔ ɖe sia ɖe ƒe didime nye gaƒoƒo 24 me, abe ale si nuwɔwɔdzixɔselawo gblɔna ene o. Àte ŋu axlẽ nu geɖe tso nya sia ŋu le agbalẽ gbadza si nye Was Life Created? (La vie a-t-elle été créée ?) me. Yehowa Ðasefowoe ta agbalẽ gbadza sia, eye àte ŋu awɔ eƒe kɔpi le www.pr418.com femaxee.
Ɖewohĩ Esia Hã Adzɔ Dzi Na Wò
NYƆ!
Nuwɔwɔwo Ŋu Nya Siwo Woɣla Ðe Amewo
Ðe nu si Biblia gblɔ tso xexea me wɔwɔ ŋu la wɔ ɖeka kple nu siwo ŋu dzɔdzɔmeŋutinunyalawo ke ɖoa?
DZƆDZƆMEŊUTINUNYA KPLE BIBLIA
Nya Siwo Amewo Gblɔ Tso Afi Si Agbe Dzɔ Tso Ŋu
Nugbagbeŋutinunyalawo, agbeŋutinunyalawo, atikeŋutinunyalawo, amekolawo, kple dzɔdzɔmeŋutinunyala bubuwo ƒo nu tso afi si agbe dzɔ tso ŋu esi wotsɔ nu siwo ŋu woke ɖo la sɔ kple nya siwo Biblia gblɔ.
