ÐE SUBƆSUBƆHAWO ƒe nya va ti wòa? Ne nenemae la, ke menye wò ɖeka koe o. Le dukɔ geɖe me la, ame siwo le dodom le subɔsubɔhawo me la le agbɔ sɔm ɖe edzi—nudzɔdzɔ sia fia be subɔsubɔhawo ƒe etsɔme ɖo afɔku me. Woƒo nu tso dukɔ siawo dometɔ ʋɛ aɖewo ŋu le ete.

Susu vovovowoe na dzi ɖe le amewo ƒo womegadina be yewoanɔ subɔsubɔha aɖeke me o. Susu siawo ƒe ɖewoe nye ŋutasẽnu kple ŋɔdzinu siwo subɔsubɔhawo wɔna alo nɔa megbe na, gbɔdɔdɔ ƒe agbe gbegblẽ si subɔsubɔhakplɔlawo nɔna, kple nu bubu siwo medzena gaglã o siwo hã le nu gblẽm abe esiwo gbɔna ene:

• Nudzedziname: “Le numekuku aɖe (Global Index of Religion and Atheism) si wowɔ tso subɔsubɔhawo ŋu le xexea me godoo ƒe nya nu la, ne amewo va le gatɔwo zum la, womegatsɔa ɖeke le subɔsubɔnyawo me o.” Numekuku sia ɖe dzesi elabena nuwo va de ame geɖe dzi le dukɔ geɖewo me. Gaŋutinunyalagã John V. C. Nye gblɔ be, “le dukɔ aɖewo me egbea la, nuwo de amewo dzi ale gbegbe be ne fia gãtɔ kekeake si nɔ anyi ƒe alafa eve va yi kpɔ wo la aʋã ŋu.”

  NYA SI BIBLIA GBLƆ: Biblia gblɔe ɖi be “le ŋkeke mamlɛawo me la,” amewo alɔ̃ ga kple dzidzɔkpɔkpɔ wu ale si woalɔ̃ Mawu kple wo havi. (2 Timoteo 3:1-5) Esi Biblia ŋlɔla aɖe kpɔ ale si kesinɔtɔnyenye gblẽa nu le ame ƒe mawusubɔsubɔ ŋu la, egblɔ na Yehowa Mawu be: “Mègana mada ahe alo anye kesinɔtɔ o.” Nu ka tae? Egblɔ wu enu be, ‘Ne magaɖi ƒo ahagbe nu le gbɔwò o.’—Lododowo 30:8, 9.

• Subɔsubɔkɔnyinyiwo kple agbe si wonɔna: Ame geɖe vevietɔ ɖekakpui kple ɖetugbuiwo kpɔe be mawusubɔsubɔ mele vevie alo hiã le yewoƒe agbe me o. Ame bubuwo hã megakana ɖe subɔsubɔhawo dzi o. Aƒetɔ Tim Maguire, si nye habɔbɔ si me tɔwo xɔe se be amewo ate ŋu akpɔ dzidzɔ subɔsubɔhawo manɔmee ƒe nyanuɖela le Scotland gblɔ be, “Le nu siwo sɔlemehawo wɔ le ƒe alafa siwo va yi me ta la, amewo trɔ megbe de wo elabena wokpɔe be womedze afia agbe nyui nɔnɔ amewo o.”

  NYA SI BIBLIA GBLƆ: Yesu Kristo gblɔ tso aʋatsonufialawo ŋu be: “Woƒe kutsetsewoe miatsɔ adze si woe. . . . Ati nyui sia ati nyui tsea ku nyui, gake ati manyomanyo tsea ku manyomanyo.” (Mateo 7:15-18) “Ku manyomanyo” siawo ƒe ɖewoe nye, nudede dunyahehe me kple asidada ɖe nuwɔna siwo Mawu lé fui abe ŋutsu kple ŋutsu alo nyɔnu kple nyɔnu ƒe dɔdɔ ene dzi. (Yohanes 15:19; Romatɔwo 1:25-27) Bubuwo hãe nye be wotsɔ woƒe sededewo kple kɔnyinyi gbɔlowo ɖɔli Ŋɔŋlɔawo me nufiafia siwo nye nyateƒe la. (Mateo 15:3, 9) Yesu gblɔ be: “Nyi nye alẽ sueawo.” (Yohanes 21:17) Gake  egbea la, nyateƒenya siwo le Biblia me ƒe dɔ le ame geɖe wum.

• Subɔsubɔhawo kple woƒe gadidi: Le numekuku aɖe si habɔbɔ aɖe (Pew Research Center) wɔ me la, amewo gblɔ be subɔsubɔhawo ƒoa nu tso ga ŋu fũu akpa. Nu si gagblẽ nyaa ɖe edzie nye be, ha aɖewo ƒe ŋgɔnɔlawo nɔa agbe si fia be wonye kesinɔtɔwo—gake mele alea le woƒe hameviwo ya gome o. Le kpɔɖeŋu me, le Germanytɔwo ƒe du gã aɖe me la, esesẽna na hamevi geɖe be woakpɔ woƒe gbe sia gbe nuhiahiãwo gake wotso woƒe bisiɔp nu be enɔa agbe abe kesinɔtɔ gãwo ene. Esia ve dɔme na Katolikotɔ geɖe siwo le du ma me. Gakpe ɖe eŋu la, magazine si nye GEO gblɔ be le Nigeria la, “gã si nu ame siwo ade miliɔn 100 dometɔ ɖe sia ɖe nɔa agbe ɖo mede euro ɖeka o, gake ale si pastɔ aɖewo nɔa agbee abe kesinɔtɔ gãwo ene la va le amewo nu ɖiam.”

  NYA SI BIBLIA GBLƆ: Paulo si nye Biblia ŋlɔlawo dometɔ ɖeka gblɔ be: “Míetsɔa Mawu ƒe nya la tsaa asi” o. (2 Korintotɔwo 2:17) Togbɔ be Paulo nye ame xɔŋkɔ le Kristo hame gbãtɔ me hã la, zi geɖe la, eya ŋutɔ wɔa dɔ sesẽ ale be wòaganye agba na ame bubuwo o. (Dɔwɔwɔwo 20:34) Eƒe nuwɔna ɖee fia be ewɔ ɖe Yesu ƒe se sia dzi be: “Faa miexɔe, faa minae.”—Mateo 10:7, 8.

Le wɔwɔ ɖe gɔmeɖose ma dzi me la, Yehowa Ðasefowo medoa asi ɖe woƒe agbalẽwo ŋu alo xɔa ga ne wosrɔ̃ Biblia kple amewo o. Womexɔa nu ewolia alo dzɔa ga le amewo si le woƒe kpekpewo me o. Le ema teƒe la, ga si amewo tso dzi me faa dzɔna ye wotsɔ kpɔa woƒe nuhiahiãwo gbɔ.—Mateo 6:2, 3.

Ƒe aɖewo va yi la, ne wogblɔ be amewo ava nɔ dodom le subɔsubɔhawo me la, màxɔe ase o. Gake Mawu kpɔe do ŋgɔ be nu sia ava dzɔ, eye wògblɔe ɖi le Biblia me. Mawu zã kpɔɖeŋunyagbɔgblɔ tsɔ ɖɔ subɔsubɔha siwo katã mewɔa nuteƒe nɛ o la be wole abe gbolo aɖe ene, eye woyɔe be “Babilon Gã la.”—Nyaɖeɖefia 17:1, 5.

Ŋkɔ si woyɔ nɛ la sɔ elabena togbɔ be alakpasubɔsubɔhawo gblɔna be yewowɔa nuteƒe na Mawu hã la, wodea ha kple xexemedziɖulawo kple susu be woana ɖoƒe kple kesinɔnuwo yewo. Nyaɖeɖefia 18:9 gblɔ be: ‘Anyigbadzifiawo wɔ ahasi kplii.’ Ŋkɔ “Babilon” hã sɔ nɛ ŋutɔ, elabena alakpasubɔsubɔha geɖe ƒe nuwɔnawo kple nufiafiawo abe luʋɔ makumaku, mawuɖekaetɔ̃ kple gbɔgbɔyɔyɔ ene dzɔ tso blema Babilon si nye du si me alakpasubɔsubɔ kple aʋatsodzixɔsewo xɔ aƒe ɖo. *—Yesaya 47:1, 8-11.

Babilon si nye du sesẽ la dze anyi esi Frat-tɔsisi si ƒo xlãe si nye takpɔnu nɛ la ‘mie,’ eye esia ʋu mɔ na Mediatɔwo kple Persiatɔwo wova xɔ dua. (Yeremiya 50:1, 2, 38) Le nyateƒe me la, woɖu Babilon dzi le zã ɖeka ko me.—Daniel 5:7, 28, 30.

Babilon Gã la hã “bɔbɔ nɔ tsi geɖewo dzi.” Biblia gblɔ be tsi siawo fia “amewo  kple amehawo”—ame miliɔn geɖe siwo le alakpasubɔsubɔhawo me. (Nyaɖeɖefia 17:1, 15) Biblia gblɔe ɖi be kpɔɖeŋu ƒe tsi sia amie—nudzɔdzɔ si fia be eteƒe madidi kura o woatsrɔ̃ egbegbe Babilon alɔtsɔtsɔe. (Nyaɖeɖefia 16:12; 18:8) Gake ame kae atsrɔ̃e? Dunyahela siwo wòdea ha kplii lae ava lé fui. Woaha eƒe nuwo, eye woaɖu eƒe ŋutilã le kpɔɖeŋumɔ nu.—Nyaɖeɖefia 17:16, 17. *

Le nu si ava dzɔ ɖe Babilon Gã dzi kpuie ta la, Mawu le nu xlɔ̃m mí lɔlɔ̃tɔe be: “Nye dukɔ, mido go le eme, ne miedi be yewoakpɔ gome kplii le eƒe nu vɔ̃wo me o, eye ne miedi be yewoaxɔ eƒe fuwɔamewo ƒe ɖeke o.” (Nyaɖeɖefia 18:4) De dzesii be wozã nya “ne miedi,” zi eve sɔŋ le kpukpui sia me. Ɛ̃, Mawu ƒe nuxlɔ̃amea le yiyim na ame siwo katã subɔsubɔhawo ƒe nufiafia totrowo ɖea fu na kple ame siwo di be Mawu nave yewo nu. Amewo abe Gaffar kple Hediye siwo ƒe nya míegblɔ va yi ene.

Hafi Gaffar nava srɔ̃ Biblia la, ebua Mawu be vɔvɔ̃ si le eŋu ye nana amewo ɖoa toe. Egblɔ be: “Nye dzi dze eme esi meva srɔ̃e be lɔlɔ̃ ƒe Mawue Yehowa nye, eye wòdi be amewo naɖo to ye le esi wolɔ̃ ye ta.” (1 Yohanes 4:8; 5:3) Hediye hã ƒe dzi dze eme esi wòva srɔ̃e be menye Mawue ɖoe be yeava nye tsyɔ̃evi loo alo be emae yexɔ vɛ o. Mawunyakpukpui siwo fa akɔ nɛ la dometɔ ɖekae nye Yakobo 1:13, si gblɔ be Mawu metsɔa nu vɔ̃ɖi tea ame aɖeke kpɔna o. Eya kple srɔ̃a Gaffar xɔ Biblia me nyateƒea dzi se eye wodo go le “Babilon Gã” la me.—Yohanes 17:17.

Ne wotsrɔ̃ Babilon Gã la, vɔ̃ aɖeke madzɔ ɖe ame siwo ɖo to hedo le eme, eye wova le ‘ta dem agu na Fofo la le gbɔgbɔ kple nyateƒe me’ la dzi o. (Yohanes 4:23) Wole mɔ kpɔm be “sidzedze Yehowa [ava xɔ] anyigba la dzi, abe ale si tsi yɔ atsiaƒu mee ene.”—Yesaya 11:9.

Ɛ̃, alakpasubɔsubɔ kple ku gbegblẽ siwo wòtsena la nu ayi, elabena Mawu “mate ŋu aka aʋatso o.” (Tito 1:2) Gake subɔsubɔ vavãtɔ ya akeke ta eye wòanɔ anyi ɖaa!