Ne èdi be yeanya ame aɖe nyuie la, ele be nànya nu siwo wòwɔ kple kuxi siwo dzi wòte ŋu ɖu. Nenema kee ne èdi be yeanya Mawu nyuie la, ele be nànya nu siwo wòwɔ. Ne èwɔ esia la, ale si nu siwo wòwɔ va yi le vi ɖem na mí fifia kple ale si woaɖe vi na mí le etsɔme la awɔ nuku na wò.

Yehowa Mawue nye Wɔla Gã la, eye “eƒe nɔnɔme makpɔmakpɔawo dzena gaglãa wokpɔna tso xexea wɔwɔ dzi, elabe wodze ƒãa le nu siwo wòwɔ la me.” (Romatɔwo 1:20) “Eyae nye Ame si tsɔ eƒe ŋusẽ wɔ anyigba, Ame si tsɔ eƒe nunya ɖo anyigba wɔnu la gɔme anyi kple Ame si tsɔ eƒe gɔmesese keke dziƒowo me.” (Yeremiya 10:12) Ale si Mawu ƒe nuwɔwɔwo wɔ nukui ɖee fia be etsɔ ɖe le eme na mí.

Bu ale si Mawu wɔ mí etɔxɛe ɖe ‘eƒe nɔnɔme nu’ ŋu kpɔ. (1 Mose 1:27) Esia fia be ena ŋutetea mí be míate ŋu aɖe yeƒe nɔnɔme deŋgɔawo afia le mɔ sue aɖe nu. Ena ŋutetea mí be míate ŋu ase yeƒe susuwo kple sewo kpakple mɔfiamewo gɔme. Ne míedzea agbagba be míanɔ agbe ɖe nu siawo nu la, enana dzi dzɔa mí wu eye agbea vivina mía nu. Gawu la, ena ŋutetea mí be míana mí kple ye dome nanɔ nyuie.

Nu siwo Mawu wɔ ɖe anyigba dzi ɖeɖe nana míekpɔnɛ be elɔ̃ mí. Le apostolo Paulo ƒe nya nu la, Mawu ‘medzudzɔ ɖaseɖiɖi le eɖokui ŋu hafi o, elabena ewɔa nyui na mí, enaa tsidzadza mí tso dziƒo eye wònaa nukuwo wɔna le wo wɔɣi, eye wòtsɔa nuɖuɖu kple dzidzɔ yɔa míaƒe dziwo me fũu.’ (Dɔwɔwɔwo 14:17) Menye nu siwo ana míanɔ agbe koe Mawu nana mí o. Ena nu gbogbo hamehame aɖewo mí ale be agbea navivi mía nu. Esiawo katã nye tame si Mawu ɖo ɖe mía ŋu la ƒe sue aɖe ko.

 Yehowa wɔ anyigba be amegbetɔwo nanɔ edzi tegbee. Biblia gblɔ be: “Etsɔ anyigba na amegbetɔviwo,” eye “menye ɖeko wòwɔe dzodzro o, ke boŋ ɖe wòmèe be woanɔ edzi.” (Psalmo 115:16; Yesaya 45:18) Ame kawoe anɔ edzi eye ɣeyiɣi didi kae woanɔ edzi? Biblia gblɔ be: “Ame dzɔdzɔewo anyi anyigba la dome, eye woanɔ edzi tegbee.”—Psalmo 37:29.

Le susu sia ta la, Yehowa wɔ ŋutsu kple nyɔnu gbãtɔ Adam kple Xawa, eye wòda wo ɖe paradiso me le anyigba dzi ‘be woaŋlɔ eme, eye woakpɔ edzi.’ (1 Mose 2:8, 15) Mawu de dɔ eve siwo ana woakpɔ dzidzɔ la asi na wo be: “Midzi ne miasɔ gbɔ, miayɔ anyigba la dzi, eye miaɖu edzi.” (1 Mose 1:28) Eya ta mɔkpɔkpɔa su Adam kple Xawa si be woanɔ agbe tegbee akpɔ dzidzɔ le anyigba dzi. Nublanuitɔe la, wotiae be yewomaɖo to Mawu o, eye esia wɔe be mɔnukpɔkpɔ si asu wo si be woanɔ ‘ame dzɔdzɔe siwo anyi anyigba dome’ la dome to wo ŋu. Ke hã, abe ale si míava kpɔe ene la, woƒe nuwɔnaa mena tame si Yehowa ɖo ɖe amegbetɔwo kple anyigba ŋu la trɔ o. Gake gbã la, na míade ŋugble le nu bubu aɖe si Mawu wɔ la ŋu.

Wogayɔa Biblia be Mawu ƒe Nya. Nu ka tae Yehowa tsɔ Biblia na mí? Susu vevitɔe nye be wòana míasrɔ̃ nu tso ye ŋu. (Lododowo 2:1-5) Gake Biblia meɖo nyabiase ɖe sia ɖe si le mía si ku ɖe Mawu ŋu la ŋu na mí o, agbalẽ aɖeke mate ŋu awɔ ema o. (Nyagblɔla 3:11) Ke hã, nu sia nu si le Biblia me la, akpe ɖe mía ŋu míanya Mawu. Ale si wòwɔa nu ɖe amewo ŋu na míekpɔ ame si ƒomevi wònye. Ena míenya ame siwo ƒe nu nyoa eŋu kple ame siwo ƒe nu menyoa eŋu o. (Psalmo 15:1-5) Ena míenya eƒe susu le tadedeagu, agbe nyui nɔnɔ kple nunɔamesiwo ŋu. Eye Biblia kpe ɖe mía ŋu míeva dze si ame si ƒomevi Yehowa nye to Via Yesu Kristo dzi.—Yohanes 14:9.

Susu bubu si ta Yehowa na eƒe Nya, Biblia mí ɖoe nye be wòakpe ɖe mía ŋu taɖodzinu nanɔ míaƒe agbe ŋu eye wòana míakpɔ dzidzɔ. Yehowa toa Biblia dzi gblɔa nu si wòle be míawɔ be míaƒe ƒomewo nakpɔ dzidzɔ, nu nadze mía ŋu kple ale si míanɔ te ɖe dzimaɖitsitsi nu la mí. Eye abe ale si míava kpɔe le magazine sia me le ŋgɔgbea ene la, Biblia ɖo agbemebiabia vevi aɖewo siwo nye: Nu ka tae fukpekpe bɔ alea gbegbe ɖo? Nu kae ava dzɔ le etsɔme? la ŋu. Egaɖe nu si Mawu wɔ be tame si yeɖo le gɔmedzedzea me la nava eme la me.

Mɔ bubuwo li siwo na míekpɔe be Biblia nye agbalẽ vevi aɖe eye Mawu gbɔ koe wòate ŋu atso. Togbɔ be ame 40 ye zã ƒe siwo wu 1,600 tsɔ ŋlɔe hã la, nya vevi ɖeka koe le eme, elabe Mawue nye Ame si na woŋlɔe. (2 Timoteo 3:16) To vovo na blemagbalẽ bubuwo la, wokpɔ Biblia ta wòle dedie ƒe gbogbo aɖewoe nye esi va yi, abe ale si Biblia-gbalẽ gbogbo siwo wotsɔ asi ŋlɔ la ɖo kpe edzii ene. Nu si gawu emae nye be, Biblia gakpɔtɔ li togbɔ be amewo dze agbagba be yewoatɔ te egɔmeɖeɖe, emama kple exexlẽ hã. Egbea, eyae nye agbalẽ si gɔme woɖe hema wu. Esi Biblia gakpɔtɔ li la, eɖo kpe edzi be, “Mawu ƒe nya ya nɔa anyi tegbee.”—Yesaya 40:8.

Nu bubu si Mawu wɔe nye ɖoɖo si wòwɔ be yeana yeƒe tameɖoɖowo nava eme. Abe ale si míegblɔe va yi ene la, Mawu ɖoe be amegbetɔwo nanɔ anyigba dzi tegbee. Ke hã, esi Adam tiae be yemaɖo to Mawu o la, eto ema dzi wɔ nu vɔ̃, eye mɔnukpɔkpɔ si su esi be wòanɔ agbe tegbee la to eya kple vi siwo wòava dzi la siaa ŋu. “To ame ɖeka dzi nu vɔ̃ va xexea me, eye to nu vɔ̃ me ku la va, ale ku la kaka ɖe amewo katã dome, esi wo katã wɔ nu vɔ̃ ŋuti.” (Romatɔwo 5:12) Esi Adam wɔ nu vɔ̃ la, edze abe esia mana Mawu ƒe tameɖoɖoa nava eme o ene. Aleke Yehowa wɔ nui?

Afɔ si Yehowa ɖe la, sɔ kple nɔnɔme siwo le esi. Ehe to na Adam kple Xawa ɖe woƒe nuwɔnaa ta wòsɔ, gake ewɔ ɖoɖo si me lɔlɔ̃ le la na woƒe dzidzimeviwo le etsɔme. Yehowa ƒe nunya kpe ɖe eŋu wòkpɔ ale si wòakpɔ kuxia gbɔ, eye wògblɔ egbɔkpɔnua enumake. (1 Mose 3:15) Yesu Kristo si nye Mawu ƒe Vi la dzie woato aɖe nu vɔ̃ kple ku ɖa. Nu kae esia bia?

 Be woaɖe amegbetɔwo tso Adam ƒe aglãdzedzea me tsonuwo me la, Yehowa dɔ Yesu ɖo ɖe anyigba dzi be wòafia nu amewo tso nu si ana woakpɔ agbe la ŋu, eye wòatsɔ ‘eƒe agbe ana wòanye tafe na ame geɖewo.’ a (Mateo 20:28; Yohanes 14:6) Yesu ate ŋu axe tafea elabe ame debliboe wònye abe Adam ene. Gake to vovo na Adam la, Yesu ya ɖo to bliboe va se ɖe ku me gɔ̃ hã. Esi Yesu mewɔ naneke si dze ku o ta la, Yehowa fɔe ɖe tsitre wòyi dziƒo. Fifia Yesu ate ŋu awɔ nu si Adam mete ŋu wɔ o, ena mɔnukpɔkpɔa gasu ame siwo nye toɖolawo si be woava nɔ agbe tegbee. “Ale si vodada ɖeka na wobu fɔ amewo katã la, nenema kee nu dzɔdzɔe wɔwɔ ɖeka na wobu amewo katã be wole dzɔdzɔe hena agbe.” (Romatɔwo 5:18) Mawu ato Yesu ƒe tafea dzi awɔ ɖe ŋugbe si wòdo na amegbetɔwo be woanɔ agbe tegbee le anyigba dzi la dzi.

Míesrɔ̃a nu geɖe tso Mawu ŋu ne míebu ale si wòkpɔ kuxi siwo Adam ƒe tomaɖomaɖoa he vɛ gbɔ la ŋu. Míekpɔe be naneke mate ŋu axe mɔ na Yehowa be wòagawu nu si gɔme wòdze la nu o; awɔ nya si wògblɔ la dzi “ade goe.” (Yesaya 55:11) Ale si gbegbe Yehowa lɔ̃ mí la hã dzɔa dzi na mí ŋutɔ. “Esia me woɖe Mawu ƒe lɔlɔ̃ ɖe go fia le le mía me, be Mawu dɔ eƒe Tenuvi la ɖo ɖe xexea me, be míakpɔ agbe to eya amea dzi. Esia me lɔlɔ̃ la le, menye be míawo míelɔ̃ Mawu o, ke boŋ be eya lɔ̃ mí, eye wòdɔ Via be wòanye avulévɔsa ɖe míaƒe nu vɔ̃wo ta.”—1 Yohanes 4:9, 10.

Esi Mawu “meve nu le eya ŋutɔ Via gɔ̃ hã ŋu o, ke boŋ wòtsɔe na ɖe mí katã ta” ta la, ena míeka ɖe edzi be “atsɔ nu bubuawo katã,” siwo ƒe ŋugbe wòdo la akpe ɖe eŋuti na mí. (Romatɔwo 8:32) Nu kae Mawu do ŋugbe be yeawɔ na mí. Xlẽ nyati si kplɔe ɖo.