ALE SI MÍAWƆ AÐU FULÉLE DZI
2 | Mègawɔ Wɔɖenui O
Biblia Ƒe Nufiafia:
“Migaɖo vɔ̃ vɔ̃ teƒe na ame aɖeke o. . . Ne anya wɔ, eye wòanye nu si atso mia gbɔ la, minɔ anyi kple amewo katã le ŋutifafa me. Migabia hlɔ̃ na mia ɖokuiwo o, . . . elabena woŋlɔ ɖi be: ‘“Tɔnyee nye hlɔ̃biabia; nye la, maɖo eteƒe,” Yehowa ye gblɔe.’”—ROMATƆWO 12:17-19.
Nu Si Wòfia:
Togbɔ be le dzɔdzɔme nua míado dziku ne ame aɖe dze agɔ le mía dzi hãa, Mawu medi be míawɔ wɔɖenui o. Ke boŋ, edi be míakpɔ ye sinu elabe madidi o yeaɖɔ nu gbegblẽwo katã ɖo.—Psalmo 37:7, 10.
Nu Si Nàte Ŋu Awɔ:
Ne amegbetɔ madeblibo wɔ wɔɖenuia, ɖeko wòganana fuléle dzina ɖe edzi. Eya ta ne ame aɖe dze agɔ le dziwò alo wɔ nu vevi wòa, mègaɖo vɔ̃ vɔ̃ teƒe o. Dze agbagba nàɖu ɖokuiwò dzi eye nàwɔ nu le ŋutifafa me. Le go aɖewo mea, anyo be nàɖe asi le nyaa ŋu. (Lododowo 19:11) Le go bubuwo hã mea, anyo be nàɖe afɔ aɖewo atsɔ akpɔ nyaa gbɔ. Le kpɔɖeŋu me, ne wowɔ nu vlo aɖe ɖe ŋuwòa, àte ŋu atiae be yeana dziɖuɖumegãwo alo poliswo nanya.
Ame si wɔa wɔɖenuia gblẽa nu le eɖokui ŋu
Ke ne edze abe mɔ aɖeke meli si dzi woato akpɔ nyaa gbɔ le ŋutifafa me o ɖe? Alo be èwɔ nu sia nu si nàte ŋui be yeakpɔ nyaa gbɔ le ŋutifafa me gake gbeɖea koe ɖe? Mègawɔ wɔɖenui o. Elabe ɖeko wòagblẽ nyaa ɖe edzi. Ne mèwɔ wɔɖenui oa, ke èɖu fulélea dzi. Àte ŋu aka ɖe edzi be Mawu akpɔ nyaa gbɔ le mɔ nyuitɔ nu. “Ðo ŋu ɖe eŋu, ekema eya ŋutɔ awɔe na wò.”—Psalmo 37:3-5.
Ɖewohĩ Esia Hã Adzɔ Dzi Na Wò
BIBLIA LE AMEWO ƑE AGBENƆNƆ TRƆM
Medi Be Maɖe Nu Madzɔmadzɔ Wɔwɔ Ða
Esi Rafika di be yeaho aʋa ɖe nu madzɔmadzɔ wɔwɔ ŋu ta la, eɖo habɔbɔ aɖe si tsi tre ɖe dziɖuɖua ŋu me. Gake eva srɔ̃e be Biblia do ŋugbe be ŋutifafa kple dzɔdzɔenyenye axɔ aƒe ɖe Mawu Fiaɖuƒea me.
