Nu Ka Tae Fuléle Bɔ Alea Gbegbe?
Nu ka tae fuléle bɔ ɖe xexea me alea gbegbe? Hafi míakpɔ ŋuɖoɖoa, ele be míanya nu si fuléle nye, nu si ta amewo léa fu ame, kple nu si tae fuléle kaka ɖe afi sia afi.
Nu Kae Nye Fuléle?
Fuléle fia be ame aɖe malɔ̃ ame alo ƒuƒoƒo aɖe me tɔwo ƒe nya gbɔ kura o, alo be wòatsri wo vevie. Menye ale si ame nado dziku ɖe ame aɖe ŋu hena ɣeyiɣi aɖe ƒe nya koe o.
NU SI TA AMEWO LÉA FU AME
Susu vovovowo tae amewo léa fu ame. Zi geɖea, menye nu si ame aɖe wɔ kokoko tae woléa fui ɖo o, ke boŋ woléa fui le esi wònye ame ƒomevi aɖe ta. Woléa fu ame aɖewo hã le esi wosusu be wonye ame baɖawo, wovɔ̃ ɖi, eye womate ŋu atrɔ o ta. Ðewohĩ wobua wo be womeɖo ta o, wonye nugblẽgawo alo nana amewo kpea fu. Anɔ eme hã be esi wosẽ ŋuta alo wɔ nu madzɔmadzɔ ɖe ame aɖewo ŋu kpɔ tae woawo hã woléa fu ame ɖo.
NU SI TA FULÉLE KAKA ÐE AFI SIA AFI
Ame aɖe ate ŋu alé fu ame si medo go kpɔ o gɔ̃ hã. Le kpɔɖeŋu me, ame aɖe ate ŋu anɔ nu wɔm ɖe ame aɖewo ŋu ɖe ƒomevii le esi exɔlɔ̃wo alo ƒometɔwo hã wɔa nu ɖe ameawo ŋu nenema ta. Eya ta ne edzɔ be eƒe ƒometɔwo alo nuto si me wòle me tɔwo lé fu ame ƒomevi aɖewoa, vivivia, eya hã ava lé fu wo.
Ne míese ale si gbegbe fuléle bɔ ɖe xexea me gɔmea, ana míase nu si tae ame geɖe léa fu wo nɔewo hã gɔme. Gake hafi míate ŋu aɖu fuléle si xɔ xexea me dzia, ele be míanya nu siwo koŋ gbɔ fuléle tso. Biblia gblɔ wo na mí.
BIBLIA NA MÍENYA NU SIWO KOŊ GBƆ FULÉLE TSO
WOMEWƆ AMEGBETƆWO BE WOALÉ FU WO NƆEWO O. Esi mawudɔla aɖe si wova yɔ be Satana Abosam dze aglã ɖe Mawu ŋu ye fuléle dze egɔme. “Amewulae [Abosam nye] tso eƒe aglãdzeɣi ke.” Esi wònye “aʋatsokala kple aʋatsokafofo” taa, eyi edzi na amewo le fu lém wo nɔewo eye wole ŋutasẽnuwo wɔm. (Yohanes 8:44; 1 Yohanes 3:11, 12) Biblia gblɔ be enye tagbɔsẽla vɔ̃ɖi kple ame si doa dziku vevie.—Hiob 2:7; Nyaɖeɖefia 12:9, 12, 17.
ELE BƆBƆE BE AMEGBETƆ MADEBLIBOWO NALÉ FU AME. Amegbetɔ gbãtɔ Adam hã dze Satana ƒe afɔ gbegblẽwo yome. Esia wɔe be mí katã míenyi nu vɔ̃ kple blibomademade dome. (Romatɔwo 5:12) Adam viŋutsu gbãtɔ Kain lé fu nɔvia Abel eye wòwui. (1 Yohanes 3:12) Enye nyateƒe be ame aɖewo lɔ̃a ame eye wonyoa dɔme. Gake esi míenyi nu vɔ̃ dome taa, ame geɖe nye ɖokuitɔdilawo, ŋuklẽlawo kple dadalawo, eye nɔnɔme siawo hea fuléle vɛ.—2 Timoteo 3:1-5.
ELE BƆBƆE NA AME SIWO MELƆ̃A AME ƑE NYA O BE WOALÉ FU AME. Fuléle kpɔtɔ le dzidzim ɖe edzi elabe amewo mekpɔa nublanui o, eye wowɔa nu siwo gblẽa nu le ame bubuwo ŋu. Nazãbubu, nya veamewo gbɔgblɔ, tamesesẽ le ame ŋu kple amewo ƒe nunɔamesiwo dome gbegblẽ le edzi yim, elabe “xexe blibo la katã le vɔ̃ɖitɔ la [si nye Satana Abosam] ƒe ŋusẽ te.”—1 Yohanes 5:19.
Gake menye nu siwo gbɔ fuléle tso koe Biblia gblɔ na mí o. Egblɔ ale si míawɔ aɖu edzi hã na mí.
Ɖewohĩ Esia Hã Adzɔ Dzi Na Wò
BIBLIA ME BIABIAWO ƑE ŊUÐOÐOWO
Mawue Wɔ Abosam La?
Afi kae Satana dzɔ tso? Xlẽ nu tso nu si tae Yesu gblɔ be Abosam “meli ke ɖe nyateƒe la me o” la ŋu.
BIBLIA ME BIABIAWO ƑE ŊUÐOÐOWO
Nu Kae Nye Nu Vɔ̃ Gbãtɔa?
Adam kple Xawa gbe toɖoɖo Mawu, si wɔe be wova zu nu vɔ̃ mewo eye woƒe dzidzimeviwo katã nyi woƒe nu vɔ̃a dome, abe ale si ɖeviwo xɔa dɔléle tso wo dzilawo gbɔ ene.
