Ne mía xɔlɔ̃ aɖe le susumedɔ léma, esia ate ŋu ate ɖe mía dzi vevie. Gake míate ŋu aɖee afia mía xɔlɔ̃a be míetsɔ ɖe le eme nɛ ne míekpena ɖe eŋu be wòanɔ te ɖe eƒe kuxia nu. Aleke míate ŋu awɔ esiae?

‘Miɖe abla le nusese me.’—YAKOBO 1:19.

Mɔ nyui aɖe si dzi nàte ŋu akpe ɖe xɔ̃wòa ŋu lee nye be nàɖo toe ne ele eƒe kuxiwo gblɔm na wò. Megawɔ na wò be ele be yeagblɔ nya aɖe kokoko tso nya sia nya si wòagblɔ ŋu o. Na wòakpɔe be ètsɔ ɖe le eme na ye eye nèle to ɖom yeƒe nyawo nyuie. Dze agbagba nàse nu gɔme nɛ, eye mègadrɔ ʋɔnui alo anɔ nya hem ɖe eŋu o. Nenɔ susu me na wò be ate ŋu agblɔ nya siwo meɖo be yeagblɔ hafi o, eye wòava vee emegbe be yegblɔ nya mawo.—Hiob 6:2, 3.

“Mifa akɔ na ame.”—1 TESALONIKATƆWO 5:14.

Nu ate ŋu ate ɖe xɔ̃wòa dzi vevie, alo wòanɔ sesem le eɖokui me be yemele ɖeke me o. Eya ta ne menya nya si tututu nàgblɔ nɛ o hãa, ka ɖe edzi nɛ be yetsɔ ɖe le eme nɛ; esia ade dzi ƒo nɛ eye wòana eƒe dzi nadze eme.

“Xɔlɔ̃ vavã lɔ̃a ame ɣeawokatãɣi.”—LODODOWO 17:17.

Wɔ nu ŋutɔŋutɔwo nàtsɔ akpe ɖe xɔ̃wòa ŋu. Mègasusui be yenya nu siwo yeawɔ atsɔ akpe ɖe ye xɔlɔ̃a ŋu xoxo o, ke boŋ biae wòagblɔe  na wò. Ne ele sesẽm na xɔ̃wòa be wòagblɔ kpekpeɖeŋu siwo wòhiã na wòa, àte ŋu agblɔ nu siwo miate ŋu awɔ ɖekaea nɛ. Le kpɔɖeŋu me, àte ŋu adoe ɖa be yewoavae ɖi tsa. Alo àte ŋu avae ɖi asi, adzra aƒe me ɖo alo awɔ dɔ bubu aɖe nɛ.—Galatiatɔwo 6:2.

“Migbɔ dzi ɖi.”—1 TESALONIKATƆWO 5:14.

Menye ɣesiaɣie xɔ̃wòa adi be yeaƒo nu o. Eya ta ka ɖe edzi nɛ be ɣesiaɣi si wòdi be yeaƒo nua, yele klalo aɖo toe. Xɔ̃wòa ƒe dɔlélea ate ŋu awɔe be wòagblɔ nya aɖe alo awɔ nane si ave wò. Ate ŋu agblẽ ɖoɖo aɖe si miewɔa me alo abi dzi. Gake gbɔ dzi ɖi eye nàse nu gɔme nɛ ne èle kpekpem ɖe eŋu.—Lododowo 18:24.

“Medzea agbagba be mana xɔ̃nyea nakpɔe be meli nɛ ɣesiaɣi. Togbɔ be nyemate ŋu akpɔ eƒe kuxiawo gbɔ nɛ o hãa, medzea agbagba be maɖo toe nyuie ne ele wo gblɔm nam. Ɣeaɖewoɣia, nu si wòdi koe nye be ame aɖe naɖo to ase yeƒe nyawo, esia nana eƒe dzi dzea eme.”—Farrah, a si xɔlɔ̃ le dzimaɖitsitsidɔ, blanuiléledɔ kple susumedɔ si nana wometea ŋu ɖua nu nyuie oa lém.

“Xɔ̃nye aɖe dea dzi ƒo nam eye wònyoa dɔme nam ŋutɔ. Ekpem va eƒe me eye wòɖa nu vivi aɖe nam. Ena meɖe dzi ɖi ŋutɔ, eya ta enɔ bɔbɔe nam be maɖe nye seselelãmewo agblɔ nɛ. Esia de dzi ƒo nam ŋutɔ!”—Ha-eun, si le blanuiléledɔ lém.

“Dzigbɔɖi le vevie ŋutɔ. Ne srɔ̃nye wɔ nane si vema, enɔa susu me nam be eƒe dɔléleae na wòwɔ nu nenema ɖo; menye ame ma ƒomevi wònye ŋutɔŋutɔ o. Esia kpena ɖe ŋunye be nyemedoa dziku o eye mewɔa nu ɖe eŋu nyuie wu.”—Jacob, si srɔ̃ le blanuiléledɔ lém.

“Srɔ̃nye kpena ɖe ŋunye geɖe eye wòfaa akɔ nam ŋutɔ. Ne metsi dzimaɖi veviea, mezia dzinye be mawɔ nu si nyemedi be mawɔ o. Esia wɔnɛ be ɣeaɖewoɣia, eya ŋutɔ hã metea ŋu wɔa nane siwo wòdi be yeawɔ o. Ale si wòtsɔa eɖokui saa vɔ henyoa dɔme nama wɔe be melɔ̃e vevie ŋutɔ.”—Enrico, si le dzimaɖitsitsidɔ lém.