NE AFƆKU dzɔ ɖe dziwò kpɔ eye nètsi agbe la, àse ale si ame siwo hã tsi agbe le afɔku aɖe me la sena le wo ɖokuiwo me la gɔme: ana wò mo nada tu, màxɔe ase o, àtɔtɔ, àtsi dzi eye àku drɔ̃e baɖabaɖawo. Agbetsila siwo ƒo dzi ɖe le eye nu te wo ŋu la megadina be yewoanɔ agbe o.

Ne afɔku aɖe gblẽ nu le ŋuwò kpɔ la, ke wò hã àse le ɖokuiwò me be ewu tsɔtsɔ na ye. Àte ŋu ase le ɖokuiwò me be ne yeku la enyo wu. Ke hã, Biblia na eme kɔ be susu nyuiwo li siwo ta wòle be nàyi edzi anɔ agbe eye nànɔ mɔ kpɔm na etsɔme nyui aɖe.

Nyagblɔla 7:8 gblɔ be: “Nu ƒe nuwuwu nyo wu eƒe gɔmedzedze.” Mɔkpɔkpɔ buna ɖe ame ne afɔku dzɔ ɖe ame dzi teti eye wòle agbagba dzem be yeaŋlɔe be. Gake ne ègbɔ dzi ɖi be nuwo naɖɔ ɖo vivivi la, nɔnɔmea ava ka ɖe eme.

Biblia gblɔe ɖi be, ɣeyiɣi aɖe ava si me “womagase avifafa alo konyifafa . . . azɔ o.” (Yesaya 65:19) Esia ava eme ne Mawu Fiaɖuƒea va trɔ anyigbaa wòzu paradiso. (Psalmo 37:11, 29) Afɔkuwo magadzɔ azɔ o. Vevesese kple dzodzodzoetsitsiwo katã nu ayi tegbee elabe Mawu Ŋusẽkatãtɔ la do ŋugbe be: “Tsãnuwo magava susu me na ame, alo ava ame ƒe dzi me o.”—Yesaya 65:17.

Bu eŋu kpɔ ko: Wɔlaa wɔ ɖoɖo be ‘yeana mɔkpɔkpɔ wò eye etsɔme nanyo na wò’ si fia be ànɔ agbe le tomefafa me le Mawu Fiaɖuƒea me. (Yeremiya 29:11) Ðe nyateƒenya sia nyanya na nèdi be yeayi edzi anɔ agbea? Sally si ƒe nya míegblɔ le nyati gbãtɔ me gblɔ be: “Ne èɖoa ŋku nu nyui siwo katã Mawu Fiaɖuƒea ava wɔ na mí le etsɔme dzi na ɖokuiwò la, akpe ɖe ŋuwò nàŋlɔ nu siwo dzɔ va yi la be eye nàkpɔ ŋgɔ.”

Ðe manyo be nàsrɔ̃ nu geɖe tso nu si Mawu Fiaɖuƒea ava wɔ na amegbetɔwo kpuie la ŋu oa? Ne èwɔe alea la, ana nàka ɖe edzi be togbɔ be afɔku dzɔ ɖe ye dzi hã la, susu nyuiwo li siwo ta wòle be yeayi edzi anɔ agbe fifia eye yeanɔ mɔ kpɔm na ɣeyiɣi si afɔku aɖeke magadzɔ o. Hafi ɣeyiɣi ma naɖo gɔ̃ hã la, Biblia ɖo aɖaŋu nyui siwo ate ŋu akpe ɖe ŋuwò be nàdo dzi le afɔku si dzɔ ɖe dziwò la me. Kpɔ eƒe kpɔɖeŋu ʋɛ aɖewo ɖa.