Mawu wɔ míaƒe ŋutilã wòwɔ nuku ale gbegbe be ate ŋu aɖɔ eɖokui ɖo. Ne nane si míaƒe ŋutilãa, alo kokoe loo alo tɔe la, “ŋutilãa ŋutɔ dzea nu siwo ana abia naku la wɔwɔ gɔme.” (Johns Hopkins Medicine) Enumake ŋutilãa dzea dɔwɔwɔ gɔme be yeana ʋua natso, abia naku eye ŋusẽ naɖo ŋutilãa ƒe akpa ma ŋu.

BU NYA SIAWO ŊU KPƆ: Ne Wɔlaa wɔ míaƒe ŋutilã be eya ŋutɔ nawu abi la, ɖe esia mena míeka ɖe ŋugbe si wòdo dzi be yeakpe ɖe mía ŋu míahaya tso nu siwo doa vevesese na mí si me oa? Psalmowo ŋlɔla aɖe gblɔ be: “Edaa gbe le ame siwo ƒe dzi gbã la ŋu; eye wòblaa abi na wo.” (Psalmo 147:3) Gake ne nane siwo dzɔ ɖe dziwò va yi alo le dzɔdzɔm ɖe dziwò fifia na nèle veve sem le dzi me la, nu kae ana nàte ŋu aka ɖe edzi be Yehowa abla wò abiwo na wò fifia kple etsɔme?

Mawu do ŋugbe be: “Mègavɔ̃ o, elabena meli kpli wò. Mègatsi dzi o, elabena nyee nye wò Mawu. Mado ŋusẽ wò; makpe ɖe ŋuwò.” (Yesaya 41:10) Ame si nyae be Yehowa léa be na ye la ƒe susu dzea akɔ anyi, eye esia doa ŋusẽe be wòanɔ te ɖe nɔnɔme sesẽ vovovowo nu. Apostolo Paulo yɔ susu me ƒe akɔdzeanyi sia be “Mawu ƒe ŋutifafa, si ƒo gɔmesesewo katã ta.” Paulo gblɔ kpee be: “Metea ŋu wɔa nuwo katã to ame si doa ŋusẽm la dzi.”—Filipitɔwo 4:4-7, 9, 13.

Biblia kpe ɖe mía ŋu be míado ŋusẽ míaƒe xɔse eye míaxɔ ŋugbe siwo Yehowa do na amegbetɔwo ku ɖe etsɔme ŋu la dzi ase. Le kpɔɖeŋu me, Nyaɖeɖefia 21:4, 5 na míenya nu si Mawu awɔ kple susu si ta míate ŋu aka ɖe edzi be awɔe. Afi ma gblɔ be:

• “Atutu aɖatsi sia aɖatsi ɖa” le amewo ƒe ŋkume. Yehowa aɖe míaƒe fukpekpewo kple dzimaɖitsitsiwo katã ɖa, ne kuxi mawo dze nu sue aɖe na amewo gɔ̃ hã.

• Ŋusẽ le Fia Ŋusẽkatãtɔ si wɔ nuwo katã, ame si ‘bɔbɔ nɔ fiazikpui’ dzi le ŋutikɔkɔe me le dziƒo la si be wòatsi fukpekpewo nu eye wòana kpekpeɖeŋu si tututu míehiã la mí.

• Yehowa ka ɖe edzi na mí be yeƒe ŋugbedodowo nye “nyateƒenyawo kple nya vavãwo.” Esia fia be Mawu tsɔ eƒe ŋkɔ kple bubu si le eƒe ŋkɔa ŋu ka ɖe edzi na mí be yeawɔ yeƒe nyawo dzi.

“‘Atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o,konyifafa kple ɣlidodo kpakple vevesese hã maganɔ anyi o. Nu siwo nɔ anyi tsã la nu va yi.’ Eye Ame si bɔbɔ nɔ fiazikpuia dzi la gblɔ be: ‘Kpɔ ɖa! Mele nuwo katã wɔm yeyee.’ Eye wògagblɔ hã be: ‘Ŋlɔe, elabena nya siawo nye nyateƒenyawo kple nya vavãwo.’”—Nyaɖeɖefia 21:4, 5.

Xexea kple Biblia nana míekpɔa mía Fofo si le dziƒo la ƒe nɔnɔmewo. Togbɔ be nuwɔwɔwo megblɔna na mí tẽe be míadze si Mawu eye míazu exɔlɔ̃wo o hã, Biblia ya gblɔ na mí kã be: “Mite ɖe Mawu ŋu, eye ate ɖe mia ŋu.” (Yakobo 4:8) Dɔwɔwɔwo 17:27 gblɔ be: “Mele adzɔge tso mía dometɔ aɖeke gbɔ hafi o.”

Ne èva le Mawu nyam la, àva ka ɖe edzi geɖe wu be, “eléa be na [ye].” (1 Petro 5:7) Ne míeka ɖe Yehowa dzi alea la, vi kae wòaɖe na mí?

De ŋugble le Toru si le Japan ŋu kpɔ. Nɔa si nye Kristotɔ ye nyii gake eva ƒo eɖokui ɖe nu vlo wɔha aɖe si woyɔna be yakuza le Japan la me. Egblɔ be, “Mesusu be Mawu lé fum, eye mese le ɖokuinye me be Mawue nɔ to hem nam esi wòna nye ame veviwo, vevietɔ esiwo melɔ̃ vevie la ku.” Toru gblɔ be nɔnɔme siawo wɔe be yeƒe “tame va sẽ eye yemegasea veve ɖe ame nu o.” Egblɔ be “nu si meɖo be mawɔe nye be mawu ame aɖe si xɔ ŋkɔ wum esime mekpɔtɔ nye sɔhɛ ne maxɔ ŋkɔ hafi aku.”

Ke hã esi Toru kple srɔ̃a Hannah va nɔ Biblia srɔ̃m la, Toru wɔ tɔtrɔ veviwo le agbe me. Hannah gblɔ be: “Nye ŋutɔ mekpɔ eteƒe srɔ̃nye trɔ.” Fifia  nya si Toru gblɔna kple kakaɖedzie nye: “Mawu li eye wòtsɔa ɖe le eme na mía dometɔ ɖe sia ɖe. Medi be ame aɖeke naku o, eye ele klalo be yeatsɔ ame siwo trɔ dzi me la ƒe vodadawo ake wo. Eɖoa to sea nya siwo míate ŋu agblɔ na ame aɖeke o alo nya siwo gɔme ame aɖeke mate ŋu ase o la na mí. Eteƒe madidi o Yehowa aɖe kuxiwo, fukpekpewo kple vevesesewo katã ɖa. Fifia gɔ̃ hã, ekpena ɖe mía ŋu le mɔ siwo mevaa susu me na mí o nu. Eléa be na mí eye wòkpena ɖe mía ŋu ne nu te mía ŋu.”—Psalmo 136:23.

Nu si me Toru to la ɖee fia be ŋutete le Mawu si eye eteƒe madidi o aɖe afɔkuwo ɖa eye wòatutu míaƒe aɖatsiwo. Menye ɖeko esia na míeka ɖe edzi be nuwo anyo le etsɔme ko evɔ o, ke ekpe ɖe mía ŋu be míanɔ agbe si me dzidzeme le fifia gɔ̃ hã. Togbɔ be fukpekpewo bɔ ɖe xexea me hã la, lɔlɔ̃ si le Mawu si na mí kple ale si wòléa be na míi la ate ŋu aɖe vi na wò.