NUSƆSRƆ̃NYATI 19
Aleke Míawɔ Be Míagaxɔ Xexe Yeye Si Ŋugbe Mawu Do Dzi Ase Geɖe Wu?
“Ne [Yehowa gblɔ] nya aɖe la, ɖe mawɔ edzi oa?”—4 MOSE 23:19.
HADZIDZI 142 Míalé Míaƒe Mɔkpɔkpɔa Me Ðe Asi Sesĩe
NYA VEVIAWO a
1-2. Nu kae wòle be míanɔ wɔwɔm esi míele xexe yeyea lalam?
YEHOWA do ŋugbe be yeaɖe xexe vɔ̃ɖi sia ɖa eye yeatsɔ xexe yeye si me dzɔdzɔenyenye anɔ la aɖo eteƒe. (2 Pet. 3:13) Míedea asixɔxɔ ŋugbedodo sia ŋu ŋutɔ! Togbɔ be míenya ɣeyiɣi si tututu xexe yeyea ava o hãa, nu siwo le dzɔdzɔm fifia ɖee fia be etu aƒe.—Mat. 24:32-34, 36; Dɔw. 1:7.
2 Gake ɣeyiɣi didi ka kee míele nyateƒea me o, ehiã be mí katã míanɔ míaƒe xɔse tum ɖo ale be míagaka ɖe Yehowa ƒe ŋugbedodowo dzi geɖe wu. Esia le vevie elabe aleke kee míaƒe xɔse ɖasẽ ŋui o, ate ŋu ava gbɔdzɔ. Le nyateƒe mea, apostolo Paulo gblɔ be xɔsemanɔamesi nye “nu vɔ̃ si ɖea to ɖe mí bɔbɔe.” (Heb. 12:1) Be míaƒe xɔse nagagbɔdzɔ oa, ehiã be míanɔ ŋugble dem le nu siwo ɖo kpe edzi be xexe yeyea nye nu ŋutɔŋutɔ eye be ava kpuiea ŋu edziedzi.—Heb. 11:1.
3. Nu kawo mee míadzro le nyati sia me?
3 Le nyati sia mea, míakpɔ nu etɔ̃ siwo míate ŋu awɔ be míagaxɔ xexe yeye si ŋugbe Yehowa do na mí dzi ase geɖe wu. Woawoe nye be: (1) míanɔ ŋugble dem le tafea ŋu vevie, (2) míanɔ ŋugble dem le ŋutete si le Yehowa si ŋu, eye (3) míanɔ nu siwo ate mí ɖe Yehowa ŋu wɔm. Esia megbea, míakpɔ ale si nya si Yehowa gblɔ na Habakuk ate ŋu ado ŋusẽ míaƒe xɔse egbea. Gake gbãa, míakpɔ nɔnɔme aɖewo siwo me wòahiã le be míaxɔ edzi ase geɖe wu be xexe yeyea ava.
NƆNƆME SIWO ME WÒABIA LE BE XƆSE SẼŊU NANƆ MÍA SI
4. Nyametsotso kawoe dzea ŋgɔ mí siwo bia xɔse geɖe?
4 Nyametsotso vovovowo dzea ŋgɔ mí gbe sia gbe, siwo bia xɔse geɖe. Le kpɔɖeŋu me, míetsoa nya me le modzakaɖeɖe, sukudede, srɔ̃ɖeɖe, vidzidzi, dɔwɔɖui, kple ame siwo míade ha kplii ŋu. Anyo be míabia mía ɖokui be: ‘Ðe nye nyametsotsowo ɖenɛ fiana be meka ɖe edzi be xexe sia maganɔ anyi wòadidi o, ke boŋ Mawu ƒe xexe yeyea ava xɔ ɖe eteƒe kpuiea? Alo ɖe nye nuwɔna sɔ kple ame siwo nɔa agbe abe ku koe nye nu sia nu ƒe nuwuwu ene tɔa?’ (Mat. 6:19, 20; Luka 12:16-21) Ne míexɔ edzi se bliboe be xexe yeyea tu aƒea, míatso nya me nyuie.
5-6. Ne míaƒe xɔse sẽ ŋua, aleke wòaɖe vi na mí le xaxawo me? Wɔ eƒe kpɔɖeŋu.
5 Míedoa go nɔnɔme sesẽ aɖewo hã siwo bia xɔse sẽŋu. Ate ŋu anye yometiti, dɔléle vɔ̃ɖi aɖe, alo nu bubu aɖe si aɖe dzi le mía ƒo. Ne nɔnɔme siawo va mía dzia, míedzea agbagba be míado dzi. Gake zi geɖea, wo nu meyina kaba o. Esia taa, míehiã xɔse sẽŋu be míate ŋu ado dzi ayi edzi asubɔ Yehowa kple dzidzɔ.—Rom. 12:12; 1 Pet. 1:6, 7.
6 Ne míele xaxawo me tomaa, ate ŋu awɔ na mí be xexe yeyea le megbe tsim akpa. Ðe esia fia be míaƒe xɔse gbɔdzɔa? Menye nenema kokoko o. Bu kpɔɖeŋu sia ŋu kpɔ: Le dzomeŋɔli ne ŋdɔ le ʋuʋum sesĩea, ate ŋu awɔ na mí be tsidzaɣia tsi megbe akpa. Gake aleke kee dzomeŋɔlia didi o, tsidzaɣi ava godoo. Nenema kee ne xaxawo na dzi ɖe le mía ƒoa, míate ŋu ase le mía ɖokui me be xexe yeyea le megbe tsim akpa. Gake ne míaƒe xɔse sẽ ŋua, míaka ɖe Mawu ƒe ŋugbedodowo dzi elabe míenya be woava eme ɖe ɣeyiɣi dzi godoo. (Ps. 94:3, 14, 15; Heb. 6:17-19) Eye awɔe hã be míalé fɔ ɖe Yehowa subɔsubɔ ŋu le míaƒe agbe me.
7. Nu ka ŋue wòle be míakpɔ nyuie le?
7 Nu bubu aɖe si me míehiã xɔse sẽŋu lee nye gbeƒãɖeɖedɔa. Ame siwo míeɖea gbeƒã na dometɔ geɖe bua Mawu ƒe xexe yeye si gbɔna ŋuti ‘nya nyuia’ be enye drɔ̃e dzro ko. (Mat. 24:14; Eze. 33:32) Ele be míakpɔ nyuie be míagawɔ nu abe woawo ene ake ɖi Yehowa ƒe ŋugbedodo o. Nu kae akpe ɖe mía ŋu? Eyae nye be míatu míaƒe xɔse ɖo. Míakpɔ mɔ etɔ̃ siwo dzi míato awɔ esia.
DE ŊUGBLE LE TAFEA ŊU VEVIE
8-9. Aleke ŋugbledede le tafea ŋu atu míaƒe xɔse ɖo?
8 Mɔ vevi aɖe si dzi míato atu míaƒe xɔse ɖoe nye be míanɔ ŋugble dem le tafea ŋu. Tafea nye kpeɖodzi be Mawu ƒe ŋugbedodowo ava eme godoo. Ne míedea ŋugble le nu si tae míehiã tafea kple nu si gbegbe Yehowa wɔ tsɔ xe tafea ɖe mía ta ŋua, esia awɔe be míagaxɔ edzi ase geɖe wu be ŋugbe si Mawu do be míava nɔ agbe tegbee le xexe si nyo wu mea ava eme. Nu ka tae míate ŋu agblɔe alea?
9 Bu nu si gbegbe Yehowa wɔ tsɔ xe tafea ɖe mía ta ŋu kpɔ. Edɔ eƒe Ŋgɔgbevi si gbɔ melɔ̃a nu le o, si nye eƒe kpeɖeŋutɔ vevitɔ, ɖa tso dziƒo wòva zu amegbetɔ deblibo le anyigba dzi. Yesu do dzi le nɔnɔme sesẽ vovovowo me le anyigba dzi. Mlɔebaa, ekpe fu eye wòse veve helĩhelĩ ʋuu heku. Tafe sia si Yehowa xe ɖe mía taa xɔ asi ŋutɔ! Èsusu be mía Mawu lɔ̃amea ɖe mɔ Via kpe fu nenema gbegbe heku ɖe mía ta kple susu be míava nɔ agbe si nyo wu hena ɣeyiɣi kpui aɖe koa? Kura o. (Yoh. 3:16; 1 Pet. 1:18, 19) Fe ma si gbegbe Yehowa xe ɖe mía ta ɖee fia be edi be míava nɔ agbe tegbee le xexe yeyea me, eye ana wòava eme hã.
DE ŊUGBLE LE ŊUTETE SI GBEGBE LE YEHOWA SI ŊU
10. Le Efesotɔwo 3:20 ƒe nya nua, nu kae Yehowa ate ŋu awɔ?
10 Mɔ evelia si dzi míato atu míaƒe xɔse ɖoe nye be míade ŋugble le Yehowa ƒe ŋutete ŋu. Ŋusẽ le Yehowa si be wòawɔ nu sia nu si ŋugbe wòdo. Awɔ na ame geɖe be ŋugbe si Mawu do be amewo nava nɔ agbe tegbee le xexe yeye me mate ŋu ava eme o. Gake nya lae nye be, Mawu ƒe ŋugbedodo akpa gãtɔ nye nu siwo gbɔ amegbetɔwo ƒe ŋutete ŋu kura. Esia mewɔ nuku o, elabe Yehowa nye Mawu Ŋusẽkatãtɔ.—Hiob 42:2; Marko 10:27; xlẽ Efesotɔwo 3:20.
11. Gblɔ Mawu ƒe ŋugbedodo ɖedzesi ɖeka. (Kpɔ aɖaka si nye “ Ŋugbedodo Ðedzesi Siwo Va Eme.”)
11 Bu nu siwo ŋugbe Yehowa do na eƒe amewo le blema, siwo dze abe womate ŋu ava eme o ene, la dometɔ aɖewo ŋu kpɔ. Edo ŋugbe na Abraham kple Sara be woadzi ŋutsuvi le woƒe tsitsime. (1 Mose 17:15-17) Eye egblɔ na Abraham be eƒe dzidzimeviwo ava nɔ Kanaan-nyigba dzi. Esime Abraham ƒe dzidzimeviwo siwo nye Israel-viwo nye kluviwo le Egipte ƒe geɖea, adze abe ŋugbedodo ma mate ŋu ava eme o ene. Gake eva eme. Ƒe geɖe megbea, Yehowa gblɔ na Elizabet be adzi vi, togbɔ be etsi ku nyagã ɣemaɣi hã. Yehowa gblɔ na Maria si nye ɖetugbui leaƒe hã be adzi ye ŋutɔ ye Vi. Esia ana ŋugbe si Yehowa do ƒe akpe geɖe va yi le Eden-bɔa mea nava eme; eye eva eme hã!—1 Mose 3:15.
12. Nu ka dzie Yosua 23:14 kple Yesaya 55:10, 11 na míeka ɖo tso Yehowa ƒe ŋutete ŋu?
12 Ne míedea ŋugble le Yehowa ƒe ŋugbedodowo katã kple ale si wòna wova emee ŋua, ana míagaxɔ edzi ase geɖe wu be ŋutete le esi be wòana xexe yeyea nava. (Xlẽ Yosua 23:14; Yesaya 55:10, 11.) Ne míeka ɖe Yehowa ƒe ŋusẽ dzia, míasu te akpe ɖe ame bubuwo hã ŋu woakpɔe be menye drɔ̃e ye xexe yeyea nye o, ke boŋ enye nu ŋutɔŋutɔ si ava. Yehowa ŋutɔ gblɔ be ŋugbe siwo yedo tso dziƒo yeye kple anyigba yeyea ŋua nye “nyateƒenyawo kple nya vavãwo.”—Nyaɖ. 21:1, 5.
WƆ NU SIWO ANA NÀNƆ YEHOWA ŊU KPLIKPLIKPLI
HAME ƑE KPEKPEWO
Aleke esia wɔwɔ akpe ɖe ŋuwò nàtu wò xɔse ɖo? (Kpɔ memama 13 lia)
13. Aleke hame ƒe kpekpewo ate ŋu ado ŋusẽ míaƒe xɔse? Ðe eme.
13 Mɔ etɔ̃lia si dzi míate ŋu ato atu míaƒe xɔse ɖoe nye be míawɔ nu siwo ana míanɔ Yehowa ŋu kplikplikpli. Le kpɔɖeŋu me, bu ale si hame ƒe kpekpeawo ɖea vi na mí ŋu kpɔ. Nɔvinyɔnu Anna si wɔ ɣeyiɣiawo katã ƒe subɔsubɔdɔ vovovowo ƒe geɖea gblɔ be: “Kpekpewo nana nye xɔse lia ke. Ne nɔvi siwo wɔ dɔdeasiwo mebi ɖe nufiafia me o alo womefia nu yeye aɖeke o hãa, mesea nya aɖe ya kokoko si nana megasea Biblia me nyateƒe aɖe gɔme nyuie wu, eye wòdoa ŋusẽ nye xɔse.” b Ðikeke mele eme o be mía nɔviwo ƒe nyaŋuɖoɖowo hãa doa ŋusẽ míaƒe xɔse.—Rom. 1:11, 12; 10:17.
GBEƑÃÐEÐEDƆA
Aleke esia wɔwɔ akpe ɖe ŋuwò nàtu wò xɔse ɖo? (Kpɔ memama 14 lia)
14. Aleke gbeƒãɖeɖedɔa doa ŋusẽ míaƒe xɔse?
14 Míegatua míaƒe xɔse ɖo ne míedoa vevie gbeƒãɖeɖedɔa. (Heb. 10:23) Barbara si le Yehowa subɔm ƒe 70 kple edzivɔe nye esia gblɔ be: “Mekpɔe be gbeƒãɖeɖe na amewo doa ŋusẽ nye xɔse ŋutɔ. Zi ale si mele nu ƒom na amewo tso Yehowa ƒe ŋugbedodo wɔnukuwo ŋua, zi nenemae mesẽa ŋu le xɔse me.”
ÐOKUISINUSƆSRƆ̃
Aleke esia wɔwɔ akpe ɖe ŋuwò nàtu wò xɔse ɖo? (Kpɔ memama 15 lia)
15. Aleke ɖokuisinusɔsrɔ̃ doa ŋusẽ míaƒe xɔse? (Kpɔ nɔnɔmetataawo.)
15 Nu bubu aɖe si tua míaƒe xɔse ɖoe nye ɖokuisinusɔsrɔ̃. Susan kpɔe be eɖea vi ŋutɔ ne yewɔ ɖoɖo aɖe koŋ ɖe nusɔsrɔ̃ ŋu. Egblɔ be: “Kwasiɖagbea, mesrɔ̃a Gbetakpɔxɔ nyati si míava srɔ̃ le kwasiɖanuwuwu si kplɔe ɖo. Dzoɖa kple Braɖaa, medzrana ɖo ɖe kwasiɖa domedome kpekpea ŋu. Mezãa ŋkeke susɔeawo tsɔ srɔ̃a nu hekua nu me le ɖokuinye si.” Esi Susan zɔna ɖe eƒe ɖoɖowɔɖia dzi taa, esrɔ̃a nu si doa ŋusẽ eƒe xɔse edziedzi. Irene si subɔ le míaƒe dɔwɔƒegã ƒe geɖea kpɔe be Biblia me nyagblɔɖiwo sɔsrɔ̃ doa ŋusẽ yeƒe xɔse ŋutɔ. Egblɔ be: “Ale si nyakui ɖe sia ɖe si Yehowa gblɔ ɖi va eme pɛpɛpɛa wɔa dɔ ɖe dzinye ŋutɔ.” c
“ELE EME VA GE KOKOKO”
16. Nu ka dzie Yehowa ka ɖo na Habakuk, eye nu ka tae nya mawo aɖe vi na míawo hã egbea? (Hebritɔwo 10:36, 37)
16 Ɣeyiɣi didi aɖee nye esia Yehowa subɔla aɖewo le lalam be nuɖoanyi sia nawu enu. Awɔ na mí ɣeaɖewoɣi be nuwuwua le megbe tsim akpa. Yehowa nya be ye subɔlawo ate ŋu ase le wo ɖokui me alea, eya ta eka ɖe edzi na nyagblɔɖila Habakuk be: “Azãgbe li na ŋutega la, eƒe nuwuwu le aƒe tum kabakaba, eye maflu ame o. Ne etsi megbe hã la, nɔ esinu kpɔm! Elabena ele eme va ge kokoko. Mahe ɖe megbe o!” (Hab. 2:3) Gake menye Habakuk koe nya mawo yi na o. Woyi na míawo hã egbea. Nu ka tae míegblɔe nenema? Mawu ƒe gbɔgbɔ ʋã apostolo Paulo wògblɔ be nya mawo ku ɖe Kristotɔ siwo le mɔ kpɔm vevie na xexe yeyea ŋu. (Xlẽ Hebritɔwo 10:36, 37.) Ɛ̃, míate ŋu aka ɖe edzi be ne edze abe ɖeɖekpɔkpɔ si ŋugbe Mawu do na mí le megbe tsim hãa, “ele eme va ge kokoko. Mahe ɖe megbe o!”
17. Aleke nɔvinyɔnu aɖe wɔ ɖe aɖaŋu si Yehowa ɖo na Habakuk dzi?
17 Yehowa subɔla geɖe wɔ ɖe aɖaŋu si wòɖo na Habakuk dzi, eye ‘wole mɔ kpɔm vevie’ na nuwuwua; ɖewo le esia wɔm hena ƒe geɖe gɔ̃ hã. Le kpɔɖeŋu me, Nɔvinyɔnu Louise dze Yehowa subɔsubɔ gɔme le ƒe 1939 me. Egblɔ be: “Ɣemaɣia, mesusu be Armagedon ava hafi mawu sekɛndrisuku (lycée) nu. Gake medzɔ nenema o. Le ƒe siwo katã metsɔ subɔ Yehowa mea, mesrɔ̃a nu tso ame siwo ŋu Biblia ƒo nu tsoe siwo lala kpɔ esinu ƒe geɖe be wòawɔ ŋugbe si wòdo na wo dzia ŋu. Wo dometɔ aɖewoe nye Noa, Abraham, kple Yosef. Woƒe ŋutinyawo de dzi ƒo nam be nye hã malala akpɔ Yehowa sinu. Eye esia kpe ɖe nye kple ame bubuwo ŋu míeka ɖe edzi bliboe be xexe yeyea tu aƒe.” Ɛ̃, nɔviŋutsu kple nɔvinyɔnu siwo le Yehowa subɔm ƒe geɖee nye esia dometɔ geɖe hã ka ɖe esia dzi!
18. Aleke Mawu ƒe nuwɔwɔwo nana míekana ɖe edzi be xexe yeyea ava?
18 Nyateƒee, xexe yeyea mekpɔ va haɖe o. Gake bu eŋu kpɔ: Ɣeaɖeɣi va yia, nuwɔwɔwo abe ɣletiviwo, nu miemiewo, lãwo kple amegbetɔwo ene menɔ anyi o. Gake fifia woli ŋutɔŋutɔ míekpɔna, eye ame aɖeke mekea ɖii o. Ke aleke wowɔ va li? Yehowae wɔ wo. (1 Mose 1:1, 26, 27) Nenema kee mía Mawua ɖo tame be yeawɔ xexe yeye aɖe, si me amewo anɔ agbe tegbee le le lãmesẽ blibo me; eye awɔe hã. Míeka ɖe edzi be le Mawu ƒe ɣeyiɣi ɖoɖi dzia, xexe yeyea ava eye míakpɔe wòanye nu ŋutɔŋutɔ, abe ale si ko míekpɔa Yehowa ƒe nuwɔwɔ bubuwo egbea ene.—Yes. 65:17; Nyaɖ. 21:3, 4.
19. Nu kawoe nàte ŋu awɔ atsɔ atu wò xɔse ɖo?
19 Hafi ɣemaɣi naɖoa, wɔ mɔnukpɔkpɔ ɖe sia ɖe ŋu dɔ nàtsɔ atu wò xɔse ɖo. De asixɔxɔ tafea ŋu. De ŋugble le ŋutete si le Yehowa si ŋu. Wɔ nu siwo ana nànɔ Yehowa ŋu kplikplikpli. Ne èwɔ nu siawoa, wò hã ‘àto xɔse kple dzigbɔɖi me anyi ŋugbedodowo dome.’—Heb. 6:11, 12; Rom. 5:5.
HADZIDZI 139 Kpɔ Ðokuiwò Le Xexe Yeyea Me
a Egbea, ame geɖe mexɔ ŋugbe si Biblia do be xexe yeye aɖe ava la dzi se o. Wosusu be enye drɔ̃e, gli alo nane si mate ŋu ava eme o. To vovo na woawoa, míawo ya míeka ɖe edzi bliboe be Yehowa ƒe ŋugbedodowo katã ava eme. Gake ehiã be míayi edzi anɔ míaƒe xɔse tum ɖo eye míana wòasẽ ɖe edzi. Aleke míawɔ esiae? Nyati sia aɖe eme.
b Míetrɔ ŋkɔ aɖewo.
c Àkpɔ nyati vovovowo ku ɖe Biblia me nyagblɔɖiwo ŋu le Numekuku Ŋuti Mɔfiagbalẽ Na Yehowa Ðasefowo ƒe tanya si nye “Nyagblɔɖiwo” te. Le kpɔɖeŋu me, kpɔ nyati si nye “Nu Si Yehowa Gblɔ Ði La Vana Eme” le January 1, 2008, ƒe Gbetakpɔxɔ me.
