NUSƆSRƆ̃NYATI 15
Nu Siwo Míate Ŋu Asrɔ̃ Tso Yesu Ƒe Nukunuwo Me
‘Eyi ɖato anyigba blibo la dzi nɔ nyui wɔm henɔ dɔ dam na amewo.’—DƆW. 10:38.
HADZIDZI 13 Kristo, Míaƒe Kpɔɖeŋuɖola
NYA VEVIAWO a
1. Nɔnɔme ka mee Yesu wɔ eƒe nukunu gbãtɔ le?
BU NU si dzɔ le ƒe 29 K.Ŋ. me, esi Yesu dze eƒe subɔsubɔdɔa gɔme ŋu kpɔ. Yesu kple eƒe nusrɔ̃la aɖewo kpakple nɔa Maria, yi srɔ̃kpeƒe aɖe le Kana si le Yesu de Nazaret ƒe dziehe, eye anɔ eme be Maria nɔ asi kpem ɖe wɔnawo ŋu. Gake nane va do mo ɖa si ate ŋu ana ŋu nakpe srɔ̃tɔ yeyeawo kple woƒe ƒomea vevie. Eyae nye be woƒe wain va vɔ. b Ðewohĩ esi vavalawo va sɔ gbɔ wu ale si wokpɔ mɔe tae. Maria yi ɖe Via Yesu gbɔ eye wògblɔ nɛ be: “Wain vɔ le wo si.” (Yoh. 2:1-3) Nu kae Yesu wɔ? Yesu wɔ nukunu; etrɔ tsi wòzu “wain nyui.”—Yoh. 2:9, 10.
2-3. (a) Nukunu kawoe Yesu wɔ? (b) Aleke Yesu ƒe nukunuawo me dzodzro ate ŋu aɖe vi na mí?
2 Yesu gawɔ nukunu geɖewo hã le eƒe subɔsubɔdɔa me. c Ezã ŋusẽ si Mawu nɛa tsɔ kpe ɖe ame akpe geɖe ŋu. Le kpɔɖeŋu me, Biblia na míenya be Yesu nyi ŋutsu 5,000 eye emegbe ŋutsu 4,000 sɔŋ le nukunu eve aɖe siwo wòwɔ me. Ne míetsɔ nyɔnu kple ɖevi siwo nɔ afi ma ƒe xexlẽme kpeea, ɖewohĩ ame siwo katã Yesu nyi le nukunu eve mawo ɖeɖe me ƒe xexlẽme awu 27,000. (Mat. 14:15-21; 15:32-38) Yesu da dɔ na ame gbogbo aɖewo hã le nudzɔdzɔ mawo me. (Mat. 14:14; 15:30, 31) Kpɔ ale si dzi anya dzɔ amehawo esime Yesu da dɔ na wo eye wòna nuɖuɖu woe ɖa!
3 Nufiame vevi geɖe le nukunu siwo Yesu wɔa me na mí, siwo ate ŋu ado ŋusẽ míaƒe xɔse egbea. Le nyati sia mea, míadzro nufiameawo dometɔ aɖewo me. Eyome míakpɔ nu siwo míate ŋu asrɔ̃ tso ale si Yesu bɔbɔ eɖokui eye eƒe dɔme trɔ ɖe amewo ŋu esime wònɔ nukunuawo wɔm la me.
NU SIWO MÍATE ŊU ASRƆ̃ TSO YEHOWA KPLE YESU ŊU
4. Nu ka tae nukunu siwo Yesu wɔa ɖe nu geɖe fia mí tso Yehowa ŋu?
4 Nukunu siwo Yesu wɔa ɖe nu geɖe fia mí tso eya ŋutɔ ŋu, gake wogaɖe nu geɖe fia mí tso Fofoa Yehowa hã ŋu. Esia mewɔ nuku o, elabe Yehowae na ŋusẽ Yesu wòte ŋu wɔ nukunu mawo. Dɔwɔwɔwo 10:38 gblɔ be: “Mawu tsɔ gbɔgbɔ kɔkɔe kple ŋusẽ si ami [na Yesu], eye wòyi ɖato anyigba blibo la dzi nɔ nyui wɔm henɔ dɔ dam na ame siwo katã Abosam te ɖe anyi, elabena Mawu nɔ kplii.” Ðo ŋku edzi hã be le nya sia nya si Yesu gblɔ kple nu sia nu si wòwɔ mea, eɖe Fofoa ƒe nɔnɔmewo kple seselelãmewo fia pɛpɛpɛ. Esia dze ƒãa le nukunu siwo wòwɔ hã me. (Yoh. 14:9) Bu nu vevi etɔ̃ siwo míate ŋu asrɔ̃ tso Yesu ƒe nukunuawo me ŋu kpɔ.
5. Nu kae ʋã Yesu wòwɔ nukunuwo? (Mateo 20:30-34)
5 Gbã, Yesu kple Fofoa lɔ̃ mí vevie. Esi Yesu nɔ anyigba dzia, ezã ŋusẽ si Mawu nɛ tsɔ kpe ɖe amewo ŋu, eye esia ɖe ale si gbegbe wòlɔ̃ amewoe fia. Gbe ɖekaa, ŋkunɔ eve do ɣli ɖe kuku nɛ be wòakpe ɖe yewo ŋu. (Xlẽ Mateo 20:30-34.) Biblia gblɔ be “woƒe nu wɔ nublanui na Yesu” eye wòda dɔ na wo. Helagbe me nya si gɔme woɖe be ‘ame ƒe nu nawɔ nublanui na ame’ fia ale asi ame ƒe dɔme natrɔ ɖe nɔvia ŋu vevie. Lɔlɔ̃e ʋãa ame wòɖea nɔnɔme ma fiana. Nɔnɔme ma kee ʋã Yesu wòna nu amewo woɖu eye wòda dɔ na anyidɔléla aɖe. (Mat. 15:32; Marko 1:41) Míate ŋu aka ɖe edzi be Yehowa, ‘Mawu si ƒe dɔme trɔna ɖe ame ŋu geɖe,’ kple Via wolɔ̃ mí vevie eye etena ɖe wo dzi ne míele fu kpem. (Luka 1:78; 1 Pet. 5:7) Míate ŋu aka ɖe edzi be mele tsɔtsɔm na wo be woaɖe kuxi siwo katã ɖe kpe na amegbetɔwoa ɖa o!
6. Ŋusẽ kae Mawu na Yesu?
6 Evelia, Mawu na ŋusẽ Yesu be wòakpɔ amegbetɔwo ƒe kuxiwo katã gbɔ. Nukunu siwo Yesu wɔ ɖo kpe edzi be ate ŋu akpɔ kuxi siwo katã ɖe kpe na amegbetɔwo siwo womele ta kpɔm na oa gbɔ. Le kpɔɖeŋu me, ŋusẽ le Yesu si be wòaɖe mí tso nu si gbɔ amegbetɔwo ƒe kuxiwo katã tso, si nye nu vɔ̃, si he dɔléle kple ku vɛ si me. (Mat. 9:1-6; Rom. 5:12, 18, 19) Nukunu siwo Yesu wɔa ɖo kpe edzi hã be ate ŋu ada dɔléle ‘ɖe sia ɖe ƒomevi’ eye wòafɔ ame siwo ku gɔ̃ hã ɖe tsitre. (Mat. 4:23; Yoh. 11:43, 44) Ŋusẽ le esi hã be wòana ahomya sesẽwo nu nafa, eye wòana amewo navo tso gbɔgbɔ vɔ̃wo si me. (Marko 4:37-39; Luka 8:2) Edea dzi ƒo na mí ŋutɔ be Yehowa na ŋusẽ sia gbegbe Via Yesu!
7-8. (a) Nu kawo dzie Yesu ƒe nukunuwo na míeka ɖo? (b) Nukunu siwo Yesu awɔ le xexe yeyea me dometɔ kae nèle mɔ kpɔm na?
7 Etɔ̃lia, míate ŋu aka ɖe edzi bliboe be nu nyui siwo ŋugbe Mawu do be Fiaɖuƒea awɔa, ava eme godoo. Nukunu siwo Yesu wɔ esime wònɔ anyigba dzi na míekpɔe be esi wòva nye Mawu Fiaɖuƒea ƒe Fia le dziƒoa, awɔ geɖe wu. Bu nu siwo wòava wɔ kpuie dometɔ aɖewo ŋu kpɔ. Aɖe dɔléle ɖe sia ɖe ƒomevi si le fu ɖem na amegbetɔwo ɖa eye míanɔ lãmesẽ blibo me. (Yes. 33:24; 35:5, 6; Nyaɖ. 21:3, 4) Dɔ magawu mí akpɔ o, eye afɔku aɖeke magadzɔ agblẽ nu le mía ŋu azɔ o. (Yes. 25:6; Marko 4:41) Woafɔ míaƒe ame vevi siwo le “ŋkuɖodziyɔdowo” me ɖe tsitre eye míatsɔ dzidzɔ awɔ atuu na wo. (Yoh. 5:28, 29) Nukunu siwo Yesu ava wɔ le xexe yeyea me dometɔ kae nèle mɔ kpɔm na vevie?
8 Esi Yesu nɔ nukunuwo wɔmaa, eɖe ɖokuibɔbɔ gã kple dɔmetɔtrɔ fia; esiawo nye nɔnɔme nyui siwo wòle be míawo hã míasrɔ̃. Na míakpɔ ale si Yesu ɖe nɔnɔme mawo fia le eƒe nukunu eve me. Gbãtɔe nye esi wòwɔ le srɔ̃ɖeƒe aɖe le Kana.
NU SI MÍATE ŊU ASRƆ̃ TSO ÐOKUIBƆBƆ ŊU
9. Nu kae Yesu wɔ le srɔ̃ɖeƒe aɖe? (Yohanes 2:6-10)
9 Xlẽ Yohanes 2:6-10. Esi wain vɔ le srɔ̃ɖeƒea, Yesu ƒe agbanɔamedzie wònye be wòawɔ nane tso eŋua? Ao. Nyagblɔɖi siwo ku ɖe Mesia ŋu dometɔ aɖeke megblɔ be atrɔ tsi wòazu wain o. Gake tsɔe be wò srɔ̃ɖeƒee nu ma dzɔ le. Aleke nàse le ɖokuiwò me? Anɔ eme be Yesu ƒe dɔme trɔ ɖe ƒomea ŋu, vevietɔ atsu kple asia, eye medi be woaɖu ŋukpe o. Esia tae wòwɔ nukunu si ŋu míeƒo nu tsoe le nyati sia ƒe gɔmedzedze ŋu ɖo. Etrɔ tsi lita 390 (alo galɔn 103) wòzu wain nyui. Ðewohĩ ewɔ wain gbogbo ma kple susu be ɖe natsi anyi ƒomea nazã emegbe, alo atsu kple asia natsɔe adzra akpɔ ga vi aɖe. Kpɔ ale si gbegbe dzi anya dzɔ atsu kple asi yeyeae ɖa!
Srɔ̃ Yesu; mègatsɔ nu siwo nèwɔa nɔ adegbe ƒomee o (Kpɔ memama 10-11 lia) e
10. Nu vevi kae míate ŋu ade dzesi le nuŋlɔɖi si le Yohanes ta 2 lia me? (Kpɔ nɔnɔmetataa.)
10 Bu nu vevi aɖewo siwo míate ŋu ade dzesi le nuŋlɔɖi si dze le Yohanes ta 2 lia me ŋu kpɔ. Ède dzesii be menye Yesu ŋutɔe ku tsi kɔ ɖe zɔawo me oa? Esi medi be yeahe susu ava ye ɖokui dzi o taa, ena subɔlawo wɔ dɔ ma. (Kpukpui 6, 7) Eye esi Yesu trɔ tsia wòzu wain vɔa, menye eya ŋutɔe kui yi na srɔ̃ɖeɖoɖoa dzi kpɔla o. Ke boŋ ena subɔlawo wɔ dɔ ma. (Kpukpui 8) Yesu mekɔ kplu, ku waina eye wòdoe ɖe dzi le vavalawo ŋkume heƒo adegbe be, ‘Mikpɔ wain si mewɔ fifi laa ɖa! Ame sia ame neɖoe kpɔ’ o.
11. Nu kae míate ŋu asrɔ̃ tso Yesu ƒe nukunua me?
11 Nu kae míate ŋu asrɔ̃ tso Yesu ƒe nukunu sia me? Eyae nye ɖokuibɔbɔ. Yesu metsɔ nukunu si wòwɔa ƒo adegbee o. Le nyateƒe mea, meƒo adegbe le nu siwo wòwɔa ŋu kpɔ o. Ke boŋ ebɔbɔa eɖokui eye wòtsɔa kafukafua katã naa Fofoa ɣesiaɣi. (Yoh. 5:19, 30; 8:28) Ne míesrɔ̃a Yesu eye míebɔbɔa mía ɖokuia, mímanɔ adegbe ƒom le nu siwo míewɔ ŋu o. Nu ka kee míete ŋu wɔ le Yehowa subɔsubɔ me o, mele be míatsɔe aƒo adegbe abe mía ŋutɔwo míaƒe ŋusẽ mee míewɔe le ene o. Ke boŋ míatsɔe aƒo adegbe le Yehowa me atsɔ aɖee afia be enye dada na mí be wòna mɔnukpɔkpɔa mí be míasubɔ ye. (Yer. 9:23, 24) Yehowa dze be míatsɔ kafukafua katã nɛ elabe mímate ŋu awɔ naneke eƒe kpekpeɖeŋu manɔmee o.—1 Kor. 1:26-31.
12. Mɔ bubu ka nue míate ŋu asrɔ̃ Yesu ƒe ɖokuibɔbɔ le? Gblɔ eƒe kpɔɖeŋu.
12 Mɔ bubu ka nue míate ŋu asrɔ̃ Yesu ƒe ɖokuibɔbɔ le? Bu kpɔɖeŋu sia ŋu kpɔ: Hamemetsitsi aɖe zã gaƒoƒo geɖe tsɔ kpe ɖe sɔhɛ subɔsubɔdɔwɔla aɖe ŋu wòdzra eƒe dutoƒonuƒo gbãtɔ ɖo. Esia wɔe be mía nɔviŋutsu sɔhɛa te ŋu ƒo nuƒoa nyuie wòde dzi gbɔ na nɔviawo. Esi wokpa vɔa, nɔvi aɖe te ɖe hamemetsitsia ŋu gblɔ nɛ be: ‘Nɔviŋutsu Asimasi ƒe nuƒoa ɖe kpe ŋutɔ loo, alo?’ Ðe wòle be hamemetsitsia nagblɔ be: ‘Ɛ̃ loo, menye ɣeyiɣi vie mezã tsɔ kpe ɖe eŋu o’? Alo abɔbɔ eɖokui agblɔ be: ‘Ɛ̃, edze agbagba ŋutɔ.’ Ne míebɔbɔ mía ɖokuia, mímadi kafukafu le nu nyui siwo míewɔ na ame bubuwo ta o. Ke boŋ nyanya be Yehowa dea dzesi nu siwo míewɔna eye wòdea asixɔxɔ wo ŋua, dzea mía ŋu. (Tsɔe sɔ kple Mateo 6:2-4; Heb. 13:16) Ɛ̃, ne míesrɔ̃ Yesu eye míebɔbɔ mía ɖokuia, míaƒe nu dzea Yehowa ŋu.—1 Pet. 5:6.
NU SI MÍATE ŊU ASRƆ̃ TSO DƆMETƆTRƆ ŊU
13. Nu kae Yesu kpɔ esi wògogo Nain dua, eye nu kae wòwɔ tso eŋu? (Luka 7:11-15)
13 Xlẽ Luka 7:11-15. Nu sia dzɔ le Yesu ƒe anyigbadzisubɔsubɔdɔa ƒe domedome lɔƒo. Yesu nɔ mɔ dzi yina Nain, si nye Galilea du aɖe si te ɖe Sunem ŋu me. Àɖo ŋku edzi be Sunem dua mee nyagblɔɖila Elisa fɔ nyɔnu aɖe viŋutsu ɖe tsitre ƒe 900 aɖewo do ŋgɔ le. (2 Fia. 4:32-37) Esi Yesu gogo Nain dua ƒe agbo nua, ekpɔ be wokɔ ame kuku aɖe nɔ dodom le dua me yina ɖiɖi ge. Sigbeɖe ahosi aɖe ƒe viŋutsu ɖekɛ ye ku. Nyɔnua nɔ nu xam eye ameha gã aɖe si tso dua me kplɔe ɖo. Ewɔ nublanui loo! Yesu na wotɔ te eye wòwɔ nu ɖedzesi aɖe tsɔ fa akɔ na nyɔnua. Efɔ via ɖe tsitre. Esiae nye ame etɔ̃ siwo Yesu fɔ ɖe tsitre siwo ŋu Nyanyuigbalẽawo ƒe nu tsoe ƒe gbãtɔ.
Srɔ̃ Yesu; na wò dɔme natrɔ ɖe ame siwo le nu xam ŋu (Kpɔ memama 14-16 lia)
14. Nu vevi kae míate ŋu ade dzesi le nuŋlɔɖi si dze le Luka ta 7 lia me? (Kpɔ nɔnɔmetataa.)
14 Bu nu vevi aɖe si míate ŋu ade dzesi le nuŋlɔɖi si dze le Luka ta 7 lia mea ŋu kpɔ. Ède dzesii be Yesu “kpɔ nyɔnua,” eye eyome ‘eƒe nu wɔ nublanui nɛa’? (Kpukpui 13) Ðewohĩ Yesu kpɔ nyɔnua wònɔ mɔ dzi le nu xam vevie esi wotsɔ via le eyome yina ɖiɖi ge eye esia na eƒe dɔme trɔ ɖe nyɔnua ŋu. Menye ɖeko Yesu se veve ɖe nyɔnua nu ko o, ke eɖee fia le eƒe nuwɔna me hã be yeƒe dɔme trɔ ɖe eŋu. Eƒo nu nɛ akɔfafatɔe be: “Dzudzɔ avifafa.” Yesu fɔ ahosia ƒe via ɖe tsitre eye ‘wòtsɔe na dadaa.’—Kpukpui 14, 15.
15. Nu kae míate ŋu asrɔ̃ tso Yesu ƒe nukunua me?
15 Nu kae míate ŋu asrɔ̃ tso Yesu ƒe nukunu sia me? Eyae nye be míaƒe dɔme natrɔ ɖe ame siwo le nu xam ŋu. Nyateƒee, ŋusẽ mele mía si be míafɔ amewo ɖe tsitre abe Yesu ene o. Gake míate ŋu asrɔ̃ Yesu eye míana míaƒe dɔme natrɔ ɖe ame siwo le nu xam ŋu. Míate ŋu awɔ esia ne míeléa ŋku ɖe nu ŋu nyuie eye míedzea agbagba be míagblɔ nya alo awɔ nu atsɔ akpe ɖe amewo ŋu afa akɔ na wo. d (Lod. 17:17; 2 Kor. 1:3, 4; 1 Pet. 3:8) Nya ʋɛ aɖewo siwo míagblɔ alo nu sue aɖe si míawɔ ate ŋu ade dzi ƒo na amewo ale gbegbe.
16. Abe ale si wòdze le wɔwɔfia ƒe fotoa me enea, nu kae míesrɔ̃ tso vidada si ƒe vi kua ƒe nuteƒekpɔkpɔa me?
16 Bu nuteƒekpɔkpɔ sia ŋu kpɔ: Ƒe aɖewo va yi esi nɔviwo nɔ kpekpe nɔ ha dzimaa, nɔvinyɔnu aɖe de dzesii be nɔvinyɔnu bubu aɖe si nye vidada nɔ avi fam. Ha si dzim wolea ƒo nu tso tsitretsitsimɔkpɔkpɔa ŋu, eye nɔvinyɔnu vidadaa ƒe vinyɔnu ku eteƒe medidi o koe nye ema. Nɔvinyɔnua nya esia, taa eyi vidadaa gbɔ kpla asi kɔ nɛ eye wòdzi haa kplii wu enu. Nɔvinyɔnu vidada gblɔ be: “Lɔlɔ̃ na nɔviŋutsua kple nɔvinyɔnua va yɔm fũu.” Ekpɔ dzidzɔ be yeyi kpekpea gbe ma gbe. Egblɔ be: “Fiaɖuƒe Akpataa mee míekpɔa kpekpeɖeŋu tsonɛ.” Míate ŋu aka ɖe edzi be Yehowa dea dzesi nu suesue siwo míewɔna tsɔ kpena ɖe ame siwo ƒe ame vevi ku eye woƒe “dzi gbã gudugudu” la ŋu, eye wòdea asixɔxɔ ale si míaƒe dɔme trɔna ɖe wo ŋua ŋu.—Ps. 34:18.
WƆ ÐOÐO NÀSRƆ̃ NU TSO YESU ƑE NUKUNUWO ŊU
17. Nu kawoe mee míedzro le nyati sia me?
17 Aɖe vi ŋutɔ ne èwɔ ɖoɖo srɔ̃ nu geɖe tso Yesu ƒe nukunu siwo ŋu Biblia ƒo nu tsoe ŋu. Yesu ƒe nukunuwo ɖee fia mí be Yehowa kple Yesu lɔ̃ mí vevie. Ŋusẽ le Yesu si be wòakpɔ amegbetɔƒomea ƒe kuxiwo katã gbɔ, eye míate ŋu ake ɖe edzi bliboe be nu siwo ŋugbe Biblia do be Mawu Fiaɖuƒea awɔa, ava eme kpuie. Ne míele Yesu ƒe nukunuwo ƒe nuŋlɔɖiwo me dzromaa, míate ŋu ade ŋugble le ale si míasrɔ̃ eƒe nɔnɔme nyuiwoe ŋu. Ðe manyo be nàwɔ ɖoɖo asrɔ̃ nu tso Yesu ƒe nukunu bubuwo ŋu le ɖokuiwò si alo le miaƒe Ƒometadedeagu me oa? Esia ana ǹasrɔ̃ nu geɖe. Eye kpɔ ale si gbegbe wòade dzi ƒo na amewoe ne èɖo dze tso nu siwo nèsrɔ̃ ŋu na wo ɖa!—Rom. 1:11, 12.
18. Nu kawo me míadzro le nyati si kplɔ esia ɖo me?
18 Le Yesu ƒe anyigbadzisubɔsubɔdɔa ƒe nuwuwu lɔƒoa, egafɔ ame aɖe ɖe tsitre; eyae nye etɔ̃lia si ŋu Biblia ƒo nu tsoe. Gake esia to vovo na susɔeawo elabe amea nye Yesu xɔlɔ̃ vevi, eye eku ŋkeke ene hafi Yesu fɔe ɖe tsitre. Nu vevi kawoe míate ŋu asrɔ̃ tso nukunu sia me? Eye nu kae míate ŋu awɔ be míagaxɔ tsitretsitsimɔkpɔkpɔa dzi se geɖe wu? Míakpɔ biabia siawo ƒe ŋuɖoɖowo le nyati si kplɔ esia ɖo me.
HADZIDZI 20 Ètsɔ Viwò Lɔlɔ̃a Na
a Edoa dzidzɔ na mí ne míexlẽ nu tso nukunu siwo Yesu wɔa ŋu. Le kpɔɖeŋu me, ena ahomya sesẽ nu fa, eda dɔ na dɔnɔwo, eye wòfɔ ame kukuwo ɖe tsitre! Menye ɖeko woŋlɔ nukunu siawo ɖe Biblia me be woado dzidzɔ na mí ko o, ke boŋ be míasrɔ̃ nu tso wo me. Míadzro nukunuawo dometɔ aɖewo me be míakpɔ nu si wofia mí tso Yehowa kple Yesu ŋu, eye míakpɔ ale si míate ŋu asrɔ̃ woƒe kpɔɖeŋu.
b Biblia ŋutinunyala aɖe gblɔ be: “Le Yuda nuto mawo mea, wobua amedzro wɔwɔ nu vevi ale gbegbe be ele be aƒea tɔ nakpɔ egbɔ be nuɖuɖu kple nunono li zã. Vevietɔ le srɔ̃kpeƒea, amewo kpɔa mɔ be nu mawo nasu amedzrowo katã eye ɖe natsi anyi.”
c Nyanyuigbalẽawo ƒo nu tso Yesu ƒe nukunu 30 kple edzivɔ aɖewo ŋu. To vovo na emawoa, Yesu gawɔ nukunu bubu geɖe siwo ŋu womeƒo nu tsoe ɖekaɖeka o. Le kpɔɖeŋu me, gbe ɖekaa, ‘du blibo’ va egbɔ eye ‘wòda dɔ na ame geɖe siwo ŋu dɔléle vovovowo le.’—Marko 1:32-34.
d Be nàkpɔ nya siwo nàte ŋu agblɔ kple nu siwo nàte ŋu awɔ atsɔ afa akɔ na ame siwo le nu xamaa, kpɔ nyati si nye “Fa Akɔ Na Ame Siwo Dzi Ku Dzɔ Ðo, Abe Ale Si Yesu Wɔe Ene,” le November 1, 2010 ƒe Gbetakpɔxɔ me.
e NU SI LE EDZI YIM LE FOTOA ME: Ŋugbetɔ kple ŋugbetɔsrɔ̃a, kpakple vavalawo le dzidzɔ kpɔm esi wonɔ wain nyui si Yesu wɔa nom. Yesu ŋutɔ nɔ wo kpɔm tso adzɔge.
