1. Nu ka dzie míeka ɖo?

 MÍ YEHOWA ƒe amewo míenyae be elɔ̃ mí, eye edi be agbea nadze edzi na mí. (Rom. 8:35-39) Eye míeka ɖe edzi hã be ne míewɔ Biblia me mɔfiamewo dzia, woaɖe vi na mí ɣesiaɣi. (Yes. 48:17, 18) Gake ne kuxi siwo míele mɔ kpɔm na o va mía dzia, aleke wòle be míawɔ nui?

2. Kuxi kawoe ate ŋu ava mía dzi, eye aleke esia ate ŋu ana míase le mía ɖokui me?

² Kuxiwo vaa mí katã dzi. Le kpɔɖeŋu me, míaƒe ƒometɔ aɖe ate ŋu awɔ nane wòate ɖe mía dzi. Ðewohĩ míaƒe lãme gblẽ vevie si wɔe be míetea ŋu wɔa geɖe le Yehowa subɔsubɔ me o. Ðewohĩ dzɔdzɔmefɔku aɖe gblẽ nu le mía ŋu vevie. Alo wole mía yome tim vevie le míaƒe xɔse ta. Ne nu siawo ƒe ɖe dzɔ ɖe mía dzia, míete ŋu sena le mía ɖokui me be: ‘Nu ka tae nu sia le dzɔdzɔm ɖe dzinye? Ðe medze agɔ aɖea? Ðe wòanye be nye nu megadzea Yehowa ŋu oa?’ Ðe nèse le ɖokuiwò me nenema kpɔa? Ne nenemaea, ke dzi megaɖe le ƒowò o. Yehowa subɔla wɔnuteƒe geɖe se le wo ɖokuiwo me nenema kpɔ.—Ps. 22:1, 2; Hab. 1:2, 3.

3. Nufiame kae le Psalmo 34:19 me na mí?

³ Xlẽ Psalmo 34:19. De dzesi nu vevi eve siwo dze le mawunyakpukpui sia me: (1) Ame dzɔdzɔewo kpea fu. (2) Yehowa ɖea mí tso nɔnɔme sesẽwo me. Aleke wòwɔa esiae? Mɔ ɖekae nye be ekpena ɖe mía ŋu be míada asɔ le  ale si míebua nuwo ŋui le agbe me. Togbɔ be Yehowa do ŋugbe na mí be míakpɔ dzidzɔ le ye subɔsubɔ me hãa, megblɔ na mí be míanɔ agbe kuxi aɖeke manɔmee o. (Yes. 66:14) Ke boŋ ede dzi ƒo na mí be míaƒe susu nanɔ ŋugbe si yedo na mí be míava se vivi le etsɔmea ŋu. (2 Kor. 4:16-18) Eya ta ele kpekpem ɖe mía ŋu be míayi edzi asubɔe gbe sia gbe.—Kony. 3:22-24.

4. Nu kawo mee míadzro le nyati sia me?

⁴ Azɔ míasrɔ̃ nu tso Yehowa subɔla wɔnuteƒe siwo nɔ anyi le blema kple esiwo li egbea ƒe kpɔɖeŋuwo me. Abe ale si míakpɔe enea, kuxi siwo míele mɔ kpɔm na o ate ŋu ava mía dzi, gake ne míeku ɖe Yehowa ŋua, magblẽ mí ɖi akpɔ o. (Ps. 55:22) Ne míele kpɔɖeŋuawo me dzromaa, bia ɖokuiwò be: ‘Ne nyee le nɔnɔme ma mea, aleke mawɔ nui? Aleke kpɔɖeŋu siawo ado ŋusẽm be mayi edzi aka ɖe Yehowa dzi? Nufiame kawoe le wo me siwo ŋu dɔ madi be mawɔ le nye agbe me?’

5. Kuxi kawo mee Yakob to? (Kpɔ nɔnɔmetata si le akpaa dzi.)

⁵ Yehowa subɔla siwo nɔ anyi le blema do go kuxi siwo womenɔ mɔ kpɔm na o. Wo dometɔ ɖekae nye Yakob. Fofoa gblɔ nɛ be wòaɖe woƒe ƒometɔ Laban, si hã nye Mawu subɔla, ƒe vinyɔnuwo dometɔ ɖeka, eye wòka ɖe edzi nɛ be Yehowa ayrae geɖe. (1 Mose 28:1-4) Eya ta Yakob wɔ ɖe aɖaŋuɖoɖoa dzi. Ezɔ mɔ yi Laban ƒe me le Kanaan. Vinyɔnu eve le Laban si, siwo nye Lea kple Rahel. Laban vinyɔnu ɖevitɔ Rahel ƒe nu lé dzi na Yakob vevie; eya ta elɔ̃ be yeawɔ dɔ na fofoa ƒe adre, ne yeaɖee. (1 Mose 29:18) Gake nuwo meva yi abe ale si Yakob kpɔ mɔe ene o. Laban trɔe to eme, ale be wòtsɔ via tsitsitɔ Lea boŋ nɛ wòɖe. Le kwasiɖa ɖeka megbea, Laban lɔ̃ be yeatsɔ Rahel ana Yakob wòaɖe, gake ele be wòawɔ dɔ ƒe adre bubu ɖe eya hã ta. (1 Mose 29:25-27) Azɔ hã, Laban tafa Yakob esime wònɔ dɔ wɔm nɛ. Le wo katã mea, Laban trɔe to eme ƒe 20 sɔŋ!—1 Mose 31:41, 42.

6. Nɔnɔme sesẽ bubu kawo mee Yakob to?

⁶ Yakob do dzi le kuxi bubuwo hã me. Ƒome gã aɖe nɔ esi, gake ŋutifafa menɔ viawo dome ɣesiaɣi o. Wodzra woawo ŋutɔwo nɔvi Yosef wòzu kluvi gɔ̃ hã. Yakob viŋutsu eve, siwo nye Simeon kple Lewi, he vlodoame va woƒe ƒomea kple Yehowa ƒe ŋkɔa dzi. Tsɔ kpe ɖe eŋua, Yakob srɔ̃ lɔlɔ̃a Rahel ku esime wònɔ vi evelia dzim. Eye le dɔ sesẽ aɖe si va to taa, eva hiã be Yakob naʋu ayi Egipte-nyigba dzi, togbɔ be eku amegã hã.—1 Mose 34:30; 35:16-19; 37:28; 45:9-11, 28.

7. Aleke Yehowa ɖee fia Yakob be eƒe nu dzea ye ŋu?

⁷ Le xaxa siawo katã me hãa, Yakob gaxɔ Yehowa kple eƒe ŋugbedodowo dzi se kokoko. Yehowa hã ɖee fia Yakob be eƒe nu dzea ye ŋu. Le kpɔɖeŋu me, togbɔ be Laban nɔ Yakob tafam hãa, Yehowa yrae wòkpɔ kesinɔnu geɖe. Eye ena woa kple via Yosef, si wòsusu be eku gbe aɖe gbe kea, gava wɔ ɖeka ake. Kpɔ ale si gbegbe Yakob ada akpe na Yehowa ɖe esia tae ɖa! Ale si Yakob kple Yehowa dome le kplikplikpli ye kpe ɖe eŋu wòte ŋu do dzi le eƒe kuxiwo me. (1 Mose 30:43; 32:9, 10; 46:28-30) Eya ta ne míawo hã míena mía kple Yehowa dome le kplikplikplia, akpe ɖe mía ŋu míado dzi le kuxi siwo míele mɔ kpɔm na o me.

8. Nu kae Fia David di be yeawɔ?

 ⁸ Fia David mete ŋu wɔ nu siwo katã wònɔ mɔ kpɔm be yeawɔ le Yehowa subɔsubɔ me o. Le kpɔɖeŋu me, David di vevie be yeatu gbedoxɔ na Mawu, eye egblɔe na nyagblɔɖila Natan. Natan ɖo eŋu nɛ be: “Nu sia nu si le dzi me na wò la, wɔe, elabena Mawu vavã la li kpli wò.” (1 Kron. 17:1, 2) Wò ya bu ale si gbegbe nya mawo anya de dzi ƒo na David ŋu kpɔ! Ðewohĩ anya te dzadzra ɖo enumake ɖe xɔtudɔ gã sia ŋu.

9. Aleke David wɔ nui esi wòse be menye yee atu gbedoxɔa o?

⁹ Eteƒe medidi o, nya siwo Yehowa ƒe nyagblɔɖilaa trɔ va gblɔ na David na dzi ɖe le eƒo. “Le zã ma ke me la,” Yehowa gblɔ na Natan be menye David ye atu gbedoxɔ na ye o, ke boŋ viawo dometɔ ɖekae. (1 Kron. 17:3, 4, 11, 12) Esi David se nya siawoa, aleke wòwɔ nui? Etrɔ eƒe taɖodzinua. Eya ta eva ɖoe be yeaƒo ga kple xɔtunu siwo ahiã nu ƒu be Salomo natsɔ awɔ dɔae.—1 Kron. 29:1-5.

10. Aleke Yehowa yra David?

¹⁰ Esi Yehowa na David nya be menye eyae atu gbedoxɔa na ye o vɔ tetia, ebla nu kplii. Yehowa do ŋugbe na David be eƒe dzidzimeviwo dometɔ ɖeka aɖu fia tegbee. (2 Sam. 7:16) Kpɔ ale si gbegbe dzi adzɔ David le xexe yeyea me ne eva nyae be Yesu si le dzi ɖum la tso yeƒe ƒomea me ɖa! Ŋutinya sia kpe ɖe mía ŋu míekpɔe be ne míete ŋu wɔ nu siwo katã míedi be míawɔ le Yehowa subɔsubɔ me o hãa, mía Mawua ate ŋu azã mí le mɔ siwo míesusu kpɔ o gɔ̃ hã nu.

11. Togbɔ be Fiaɖuƒea meva le ɣeyiɣi si me Kristotɔ gbãtɔwo nɔ mɔ kpɔm nɛ o hãa, aleke Yehowa yra woe? (Dɔwɔwɔwo 6:7)

¹¹ Kristotɔ gbãtɔwo hã do go kuxiwo. Le kpɔɖeŋu me, wonɔ mɔ kpɔm vevie be Mawu Fiaɖuƒea nava, gake womenya ɣeyiɣi si tututu wòava o. (Dɔw. 1:6, 7) Eya ta nu kae wowɔ? Wodo vevie gbeƒãɖeɖedɔa. Eye ale si nya nyuia nɔ kakamee na wokpɔe dze sii be Yehowa nɔ yayram ɖe yewoƒe agbagbadzedzewo dzi.—Xlẽ Dɔwɔwɔwo 6:7.

12. Nu kae Kristotɔ gbãtɔwo wɔ esime dɔ to?

¹² Ɣeaɖeɣia, ‘dɔ gã aɖe to le anyigba blibo la dzi.’ (Dɔw. 11:28) Kristotɔ gbãtɔwo meto le eme o. Bu nu si gbegbe wòanya gblẽ le wo ŋui ŋu kpɔ. Ƒome ƒe tawo anya tsi dzi ɖe ale si woakpɔ woƒe ƒomea ƒe nuhiahiãwo gbɔe ŋu. Ke sɔhɛ siwo ɖoe be yewoawɔ geɖe le subɔsubɔdɔa me ya ɖe? Ðe woanya se le wo ɖokuiwo me be yewoalala vie gbɔa? Aleke kee nuwo ɖanɔ na Kristotɔ mawo o, wotrɔ ɖe nɔnɔmea ŋu. Woyi edzi ɖe gbeƒã ale si woate ŋui, eye wotsɔ dzidzɔ ma nu siwo le wo si kple wo nɔvi siwo le Yudea.—Dɔw. 11:29, 30.

13. Yayra kawoe Kristotɔawo kpɔ esime dɔ to?

¹³ Yayra kawoe Kristotɔawo kpɔ esime dɔ to? Ame siwo xɔ nunanaa kpɔe be Yehowa nɔ kpekpem ɖe yewo ŋu. (Mat. 6:31-33) Wo kple ame siwo na nu wo dome va nɔ kplikplikpli. Eye ame siwo dzɔ nuawo kple ame siwo kpe asi ɖe nuawo mama ŋu la siaa kpɔ dzidzɔ si dona tso nunana me. (Dɔw. 20:35) Yehowa yra wo katã le esi wotrɔ ɖe nɔnɔmea ŋu ta.

14. Nɔnɔme sesẽ kawo mee Barnaba kple apostolo Paulo to, eye nu kawoe do tso eme? (Dɔwɔwɔwo 14:21, 22)

¹⁴ Woti Kristotɔ gbãtɔwo yome zi geɖe, eye ɣeaɖewoɣia, wotia wo yome esime womesusu kura be adzɔ o. Bu nu si dzɔ ɖe Barnaba kple apostolo Paulo dzi esime  wonɔ gbeƒã ɖem le Listra nutoa me ŋu kpɔ. Esi wova ɖoa, amewo xɔ wo nyuie kple dzidzɔ heɖo to wo. Gake emegbea, tsitretsiɖeŋulawo ‘ƒoe ɖe amehaawo nu,’ eye ame mawo siwo xɔ wo nyuie gbãa dometɔ aɖewo ƒu kpe Paulo wòku afã kple afã. (Dɔw. 14:19) Gake Barnaba kple Paulo yi gbeƒãɖeɖedɔa dzi le teƒe bubu. Nu kae do tso woƒe gbeƒãɖeɖedɔa me? Wowɔ “nusrɔ̃la geɖewo,” eye woƒe nyawo kple kpɔɖeŋu de dzi ƒo na wo nɔvi xɔsetɔwo. (Xlẽ Dɔwɔwɔwo 14:21, 22.) Togbɔ be Barnaba kple Paulo menɔ mɔ kpɔm na yometitia o hãa, womena ta o, eye esia ɖe vi na ame geɖe. Ne míawo hã míena ta o, ke boŋ míeyi dɔ si Yehowa de mía si dzia, ayra mí.

15. Nu kae míesrɔ̃ tso Nɔviŋutsu Macmillan ƒe kpɔɖeŋua me?

¹⁵ Yehowa ƒe amewo nɔ mɔ kpɔm be nanewo adzɔ le ƒe 1914 me. Wosusu be eteƒe madidi o, yewoaxɔ yewoƒe dziƒofetua. Bu Nɔviŋutsu A. H. Macmillan si hã susui nenema ŋu kpɔ. Le nuƒo aɖe si wòƒo le September 1914 mea, egblɔ be: “Ðewohĩ esiae nye dutoƒonuƒo mamlɛtɔ si maƒo.” Gake le nyateƒe mea, menye emae nye eƒe nuƒo mamlɛtɔ o. Nɔviŋutsu Macmillan gblɔ emegbe be: “Ðewohĩ mía dometɔ aɖewo tsi dzi hesusui be míele dziƒo yi ge enumake.” Egblɔ kpee be: “Nu si wòle be míawɔ boŋue nye be, míalé fɔ ɖe Aƒetɔ la ƒe dɔa ŋu.” Nɔviŋutsu Macmillan lé fɔ ɖe dɔa ŋu hã vavã. Edo vevie gbeƒãɖeɖedɔa. Mɔnukpɔkpɔ su esi wòde dzi ƒo na nɔvi siwo wolé de ga le esi wogbe be yewomade akpa aɖeke dzi o ta. Medaa hamea ƒe kpekpe aɖeke ƒuna o, esi wòtsi ku amegã gɔ̃ hã. Esi Nɔviŋutsu Macmillan do vevie Yehowa subɔsubɔ esime wòle eƒe fetua lalamaa, aleke wòɖe vi nɛ? Do ŋgɔ teti hafi wòaku le ƒe 1966 mea, egblɔ be: “Nye xɔse gasẽ egbea abe ale si wònɔ tsã ene.” Nɔnɔme nyui aɖee nye ema wòle be mí katã míasrɔ̃, vevietɔ ne míele dzi dom eteƒe didi wu ale si míesusui!—Heb. 13:7.

16. Nɔnɔme sesẽ kae va Herbert Jennings kple srɔ̃a dzi si womenɔ mɔ kpɔm na o? (Yakobo 4:14)

¹⁶ Yehowa subɔla geɖe dzea dɔ le ɣeyiɣi si womesusui kura o me. Le kpɔɖeŋu me, Nɔviŋutsu Herbert Jennings b gblɔ ale si eya kple srɔ̃a wokpɔ dzidzɔ esime wonɔ dutanyanyuigbɔgblɔdɔa wɔm le Ghana. Gake wova kpɔ tagbɔdɔ aɖe si nana woléa blanui vevie le eŋu. Esia na Nɔviŋutsu Jennings kpɔ nya siwo le Yakobo 4:14 ƒe nyateƒenyenye. (Xlẽe.) Egblɔ be: “Eva hiã be míawɔ ɖoɖo adzo le Ghana, le mía xɔlɔ̃ kplikplikpli geɖeawo gbɔ ahatrɔ ayi Canada [na dɔyɔyɔ].” Yehowa kpe ɖe Nɔviŋutsu Jennings kple srɔ̃a ŋu woyi edzi wɔ nuteƒe nɛ togbɔ be woto nɔnɔme sesẽ ma me hã.

17. Vi kae Nɔviŋutsu Jennings ƒe kpɔɖeŋua ɖe na mía nɔviwo?

¹⁷ Ale si Nɔviŋutsu Jennings kɔ dzi me faa ƒo nu tso eƒe kuxia ŋu le eƒe agbemeŋutinyaa me wɔ dɔ ɖe amewo dzi. Nɔvinyɔnu aɖe gblɔ be: “Nyemexlẽ nyati aɖeke si wɔ dɔ ɖe dzinye kpɔ abe esia ene o. . . . Ale si Nɔviŋutsu Jennings ɖe asi le eƒe dɔdeasia ŋu be wòate ŋu akpɔ eƒe lãmesẽnyawo gbɔ la kpe ɖe ŋunye meda sɔ le nye nɔnɔmea ŋu bubu me.” Nɔviŋutsu aɖe hã gblɔ be: “Esi mesubɔ abe hamemetsitsi ene ƒe ewo vɔ megbe la, eva hiã be maɖe asi le hamemetsitsi ƒe dɔa ŋu le  nye tagbɔdɔléle ta. Ale si mesena le ɖokuinye me be medo kpo nui, nu va sẽ ale gbegbe be zi geɖe la, Yehowa ƒe amewo ƒe agbemeŋutinya . . . xexlẽ sesẽna nam le magazineawo me. Ke hã, ale si Nɔviŋutsu Jennings nɔ te ɖe eƒe nɔnɔmea nui de dzi ƒo nam ŋutɔ.” Esia ɖo ŋku edzi na mí be, ne míedo dzi le nɔnɔme sesẽ siwo míekpɔ mɔ na o mea, ado ŋusẽ ame bubuwo. Ne nuwo meva yi na mí le agbe me abe ale si míedii ene o hãa, míaƒe xɔse kple dzidodo ate ŋu anye kpɔɖeŋu na amewo.—1 Pet. 5:9.

18. Abe ale si wòdze le fotoawo me enea, nu kae nèsrɔ̃ tso ahosi si le Nigeria ƒe kpɔɖeŋua me?

¹⁸ Corona dɔvɔ̃a gblẽ nu le Yehowa subɔla geɖe ŋu. Le kpɔɖeŋu me, nu boo aɖeke megasusɔ ɖe ahosi aɖe si le Nigeria si o. Gbe ɖeka ŋdia, vianyɔnuvi biae be nu kae yewoaɖu ne yewoɖa mɔlu mamlɛ si susɔ ɖe yewo si vɔ hã. Nɔvinyɔnua ɖo eŋu na via be ga alo nuɖuɖu aɖeke megasusɔ na yewo o, gake ele be yewoasrɔ̃ ahosi si nɔ Zarefat ƒe kpɔɖeŋua; yewoaɖa nu si susɔ ɖe yewo si, eye yewoaɖo ŋu ɖe Yehowa ŋu. (1 Fia. 17:8-16) Hafi woava bu tame le nu si woaɖu ŋdɔ ma ŋua, woxɔ nunana aɖewo tso wo nɔvi Kristotɔwo gbɔ. Nuawo sɔ gbɔ ale gbegbe be woate ŋu aɖui kwasiɖa eve kple edzivɔ. Nɔvinyɔnua gblɔ be yemenya be Yehowa nɔ to lém ɖe nya siwo gblɔm yenɔ na ye via ŋu o. Nyateƒee, agbemekuxi siwo míele mɔ kpɔm na o ate ŋu ava mía dzi, gake ne míeɖoa ŋu ɖe Yehowa ŋua, woate mí ɖe eyama ŋu geɖe wu.—1 Pet. 5:6, 7.

19. Yometiti ka mee Aleksey Yershov to?

¹⁹ Le ƒe ʋɛ siwo va yi mea, mía nɔviwo to yometiti siwo womekpɔ mɔ na o me. Bu Nɔviŋutsu Aleksey Yershov si le Russia ŋu kpɔ. Yehowa ƒe amewo nɔ ablɔɖe  me esime wòxɔ nyɔnyrɔ le ƒe 1994 me. Gake ƒe aɖewo megbea, nɔnɔmeawo va trɔ le Russia. Le 2020 mea, kpovitɔwo va do ɖe Nɔviŋutsu Yershov dzi le aƒe me, wotsa eƒe nuwo me heɖo asi eƒe nunɔamesi geɖe dzi. Le ɣleti geɖe megbea, dziɖuɖua tso enu be edze agɔ. Nu si gblẽ nyaa ɖe edzie nye be, ame aɖe wɔ eɖokui abe ɖe wòdi be yeasrɔ̃ Biblia ene ƒe ɖeka kple edzivɔ sɔŋ, evɔ le nyateƒe mea, eɖe videowo le adzame be yeatsɔ atso nɔvia nu. Nu vɔ̃ɖi ka gbegbee nye esi!

20. Nu kae Nɔviŋutsu Yershov wɔ, si na eya kple Yehowa dome gava le kplikplikpli wu?

²⁰ Ðe nu nyui aɖe do tso nu siwo me Nɔviŋutsu Yershov to mea? Ɛ̃. Eya kple Yehowa dome gava le kplikplikpli wu. Egblɔ be: “Nye kple srɔ̃nye míedoa gbe ɖa edziedzi wu tsã. Meva kpɔe be ne menye ɖe Yehowa kpe ɖe ŋunye oa, nyemate ŋu anɔ te ɖe nɔnɔmea nu o.” Egblɔ kpee be: “Ðokuisinusɔsrɔ̃ kpe ɖe ŋunye be dzi meɖe le ƒonye o. Medea ŋugble tso nuteƒewɔla siwo nɔ anyi le blema ƒe kpɔɖeŋuwo ŋu. Ŋutinya geɖe le Biblia me, siwo na mekpɔe be ele vevie be maɖe dzi ɖi ahaɖo ŋu ɖe Yehowa ŋu.”

21. Nu kawoe míesrɔ̃ le nyati sia me?

²¹ Nu kawoe míesrɔ̃ le nyati sia me? Nu siwo míele mɔ kpɔm na o ate ŋu adzɔ ɖe mía dzi le xexe sia me. Togbɔ be ele alea hãa, Yehowa kpena ɖe esubɔla siwo ɖoa ŋu ɖe eŋua ŋu ɣesiaɣi. Abe ale si mawunyakpukpui si dzi wotu nusɔsrɔ̃a ɖo gblɔe enea, “ame dzɔdzɔe ƒe fukpekpewo sɔ gbɔ, ke Yehowa ɖenɛ le wo katã me.” (Ps. 34:19) Mina míaƒe susu nanɔ ale si Yehowa kpena ɖe mía ŋui ŋu, ke menye nɔnɔme siwo vaa mía dzi ŋu o. Ekema míate ŋu agblɔ abe apostolo Paulo ene be: “Metea ŋu wɔa nuwo katã to ame si doa ŋusẽm la dzi.”—Flp. 4:13.