1. Aleke nɔvi aɖewo sena le wo ɖokui me tso gbeƒãɖeɖe na amewo ŋu? (Kpɔ nɔnɔmetataa hã.)

 MÍ YEHOWA subɔlawo míeɖea gbeƒã na amewo, elabe míelɔ̃ mía Fofo si le dziƒo la vevie, eye míedina be míakpe ɖe amewo ŋu be woava nyae. Gbeƒãɖela geɖe kpɔa dzidzɔ ɖe gbeƒãɖeɖedɔa ŋu. Gake avu kpe kɔe wònyena na bubuwo ya. Nu ka tae? Ŋu kpea gbeƒãɖela aɖewo, eye wosusuna be yewomenya nufiafia o. Esesẽna na ɖewo hã be woado ɖe amewo dzi le woƒe aƒewo me le vo me. Ðewo hã vɔ̃na be womaxɔ yewo nyuie o. Hehe si nɔvi aɖewo hã xɔ le ɖevime wɔnɛ be womedina be yewoawɔ nu si ado dziku na amewo o. Togbɔ be nɔvi siawo lɔ̃ Yehowa vevie hã, esesẽna na wo be woate ɖe ame siwo womenya o ŋu agblɔ nya nyuia na wo. Togbɔ be ele alea hã, wonya be dɔ sia le vevie ŋutɔ, eya ta woɖea gbeƒã edziedzi. Esia dzɔa dzi na Yehowa ale gbegbe!

2. Ne dzi medzɔa wò le gbeƒãɖeɖedɔa me ɣeaɖewoɣi oa, nu ka tae mele be dzi naɖe le ƒowò o?

² Ðe gbeƒãɖeɖedɔa medzɔa dzi na wò ɣeaɖewoɣi oa? Ne nenemaea, ke dzi megaɖe le ƒowò o. Ne èse le ɖokuiwò me be yemebi ɖe nufiafia me oa, esia ate ŋu afia be èbɔbɔa ɖokuiwò, eye mèdi be yeahe amewo ƒe susu ava ye ɖokui dzi o. Ate ŋu afia hã be mèdi be yeahe nya kple amewo o. Ame sia ame dina be woawɔ nu ɖe ye ŋu nyuie,  vevietɔ ne ele nyui wɔm na amewo. Mía Fofo si le dziƒo la nya ale si nèle sesem le ɖokuiwò me la nyuie, eye edi be yeakpe ɖe ŋuwò. Eya ta wò dzi nedze eme! (Yes. 41:13) Le nyati sia mea, míadzro aɖaŋuɖoɖo atɔ̃ siwo akpe ɖe ŋuwò nàɖu seselelãme mawo dzi me, eye míakpɔ ale si nàwɔ akpɔ dzidzɔ le gbeƒãɖeɖedɔa me.

NA MAWU ƑE NYAA NADO ŊUSẼ WÒ

3. Nu kae kpe ɖe nyagblɔɖila Yeremiya ŋu wòɖe gbeƒã na amewo?

³ Tso blema kea, Mawu ƒe Nyaa do ŋusẽ esubɔlawo wote ŋu wɔ dɔ sesẽ siwo Mawu de wo si. Wo dometɔ ɖekae nye nyagblɔɖila Yeremiya. Esi Yehowa de dɔ asi nɛ be wòaɖe gbeƒãa, enɔ hehem ɖe megbe, eye wògblɔ be: “Nyemenya nuƒoƒo o, elabena ŋutsuvi dzaa ko menye.” (Yer. 1:6) Nu kae na dzi ɖo eƒo mlɔeba wòɖe gbeƒã? Nya siwo Mawu gblɔ nɛ ye do ŋusẽe. Yeremiya gblɔ tso Mawu ƒe nyaa ŋu be: “Enɔna abe dzobibi nue wotu nu ɖo le nye ƒuwo me ene, etsɔtsɔ tiam.” (Yer. 20:​8, 9) Togbɔ be ame siwo le eƒe anyigbamamaa me mewɔ nu ɖe eŋu nyuie o hã, nya siwo wode esi be wòagblɔ do ŋusẽe wòwɔ dɔa.

4. Nu kae dzɔna ne míexlẽ Mawu ƒe Nya la eye míede ŋugble le eŋu? (Kolosetɔwo 1:​9, 10)

⁴ Mawu ƒe Nya si le Biblia mea doa ŋusẽ Kristotɔwo. Esi apostolo Paulo nɔ nu xlɔ̃m nɔvi siwo le Kolose hamea me la, egblɔ be sidzedze vavãtɔ aʋã wo be woazɔ “ale si dze Yehowa” eye woayi edzi anɔ “ku tsem le dɔ nyui sia dɔ nyui wɔwɔ me.” (Xlẽ Kolosetɔwo 1:​9, 10.) Gbeƒãɖeɖedɔa hã le dɔ nyuiawo dome. Eya ta ne míexlẽa Mawu ƒe Nya la eye míedea ŋugble le eŋua, edoa ŋusẽ míaƒe xɔse eye míekpɔa ale si gbeƒãɖeɖe Fiaɖuƒea le vevie dzea sii.

5. Nu kae nàwɔ be Biblia sɔsrɔ̃ naɖe vi na wò geɖe wu?

⁵ Be Mawu ƒe Nyaa naɖe vi na mí la, ele be míagbɔ dzi ɖi axlẽe ade ŋugble le eŋu. Ne èxlẽ kpukpui aɖe eye eme mekɔ na wò oa, mègatsɔ dzitsitsi ati kpo ato edzi o. Ke boŋ zã Watch Tower Publications Index (Index des publications des Témoins de Jéhovah) alo Numekuku Ŋuti Mɔfiagbalẽ Na Yehowa Ðasefowo nàtsɔ aku kpukpui ma me, ale be nàse egɔme. Ne ègbɔ dzi ɖi srɔ̃ nua nyuiea, àva ka ɖe edzi geɖe wu be Mawu ƒe Nyaa nye nyateƒe. (1 Tes. 5:21)  Esia awɔe be nàtsɔ dzidzɔ agblɔ nu siwo nèsrɔ̃a na amewo.

DZRA ÐO ÐE GBEƑÃÐEÐEDƆA ŊU NYUIE

6. Nu ka tae wòle be míadzra ɖo ɖe gbeƒãɖeɖedɔa ŋu nyuie?

⁶ Ne èdzra ɖo ɖe gbeƒãɖeɖedɔa ŋu nyuiea, awɔe be nàɖe dzi ɖi ne èle nya nyuia gblɔm na amewo. Yesu kpe ɖe eƒe nusrɔ̃lawo ŋu wodzra ɖo ɖe gbeƒãɖeɖedɔa ŋu hafi wòdɔ wo ɖa. (Luka 10:​1-11) Esi nusrɔ̃lawo wɔ ɖe Yesu ƒe mɔfiamewo dzia, wote ŋu wɔ dɔ nyui geɖe eye esia na dzi dzɔ wo ale gbegbe.—Luka 10:17.

7. Nu kae míawɔ atsɔ adzra ɖo ɖe gbeƒãɖeɖedɔa ŋu? (Kpɔ fotoa hã.)

⁷ Aleke wòle be míadzra ɖo ɖe gbeƒãɖeɖedɔa ŋu? Ehiã be míabu nya siwo míagblɔ la ŋu nyuie, eye míagblɔ wo le mía ŋutɔwo ƒe nyagbewo me. Anyo hã be míabu ale si amewo awɔ nui, kple nya siwo woate ŋu abia ŋu do ŋgɔ, eye míabu nu siwo míawo hã míawɔ kple ale si míaɖo nya ŋu na woe ŋu. Ne ète ŋu wɔe alea, àɖe dzi ɖi aɖo nukomo ahado vivi amewo ŋu.

8. Mɔ ka nue Kristotɔwo le abe anyigoe siwo ŋu Paulo ƒo nu tsoe ene le?

⁸ Apostolo Paulo wɔ kpɔɖeŋu aɖe tsɔ ɖɔ akpa si wɔm míele le gbeƒãɖeɖedɔa me. Egblɔ be: “Nu xɔasi sia le mía si le anyigoewo me.” (2 Kor. 4:7) Nu kae nye nu xɔasi ma? Eyae nye Fiaɖuƒe nya nyuia, si xɔa amewo ɖe agbe. (2 Kor. 4:1) Ke nu kae anyigoeawo le tsitre ɖi na? Wole tsitre ɖi na mawusubɔla siwo tsɔa nya nyuia yina na amewo. Le Paulo ƒe ɣeyiɣiawo mea, asitsalawo tsɔa nuɖuɖu, wain, ga kple nu xɔasi bubuwo dea anyigoewo me. Nenema kee Yehowa tsɔ nu xɔasi si nye nya nyuia de mía si. Yehowa ado ŋusẽ mí míayi edzi agblɔe.

DO GBE ÐA NÀBIA DZINƆAMEƑO

9. Nu kae akpe ɖe mía ŋu ne míele vɔvɔ̃m be amewo atsi tsitre ɖe mía ŋu alo womawɔ nu ɖe mía ŋu nyuie o? (Kpɔ fotoa hã.)

⁹ Ɣeaɖewoɣia, ate ŋu adzɔ be míavɔ̃ be amewo mawɔ nu ɖe mía ŋu nyuie o alo be woatsi tsitre ɖe mía ŋu. Ne edzɔ alea, nu kae akpe ɖe mía ŋu? De ŋugble le gbe si apostoloawo do ɖa esi wode se na wo be woagaɖe gbeƒã oa ŋu. Womeɖe mɔ  vɔvɔ̃ ɖu wo dzi o. Ke boŋ wodo gbe ɖa na Yehowa be wòakpe ɖe yewo ŋu ‘yewoayi edzi agblɔ eƒe nyaa kple dzideƒo geɖe.’ Eye Yehowa ɖo woƒe gbedodoɖaa ŋu enumake. (Dɔw. 4:​18, 29, 31) Ne esesẽna na wò be nàɖe gbeƒã le vɔvɔ̃ taa, do gbe ɖa na Yehowa be wòakpe ɖe ŋuwò. Biae be wòana wò lɔlɔ̃ na amewo nasẽ ɖe edzi, ale be nàte ŋu aɖu amegbetɔvɔvɔ̃ dzi.

10. Aleke Yehowa kpena ɖe mía ŋu be míayi edzi anye yeƒe Ðasefowo? (Yesaya 43:​10-12)

¹⁰ Yehowae ɖo mí eƒe Ðasefowo, eye wòdo ŋugbe be yeakpe ɖe mía ŋu dzi nanɔ mía ƒo. (Xlẽ Yesaya 43:​10-12.) De ŋugble le mɔ ene siwo nu wòwɔa esia le ŋu. Gbãtɔ, Yesu li kpli mí ɣesiaɣi si míele gbeƒã ɖem nya nyuia. (Mat. 28:​18-20) Evelia, Yehowa de dɔ asi na mawudɔla aɖewo be woakpe ɖe mía ŋu. (Nyaɖ. 14:6) Etɔ̃lia, Yehowa naa eƒe gbɔgbɔ kɔkɔea mí be wòakpe ɖe mía ŋu míaɖo ŋku nu siwo míesrɔ̃ la dzi. (Yoh. 14:​25, 26) Enelia, Yehowa na mía nɔviwo mí be woawɔ dɔa kpli mí. Edze ƒãa be Yehowa kple eƒe habɔbɔa na nu sia nu si míehiã la mí be dzi nanɔ mía ƒo míate ŋu ayi edzi aɖe gbeƒã.

TRƆ ÐE NƆNƆMEAWO ŊU, EYE SUSU NYUI NENƆ ASIWÒ

11. Aleke nàwɔ ake ɖe ame geɖe ŋu ne èle gbeadzi? (Kpɔ fotoa hã.)

¹¹ Ðe dzi ɖena le ƒowò ne mètu amewo le aƒe me oa? Ne edzɔ alea, ke bia ɖokuiwò be: ‘Afi kae ameawo yi?’ (Dɔw. 16:13) ‘Ðe woyi dɔ me alo asi mea?’ Ke ɖe nàke ɖe ame geɖe ŋu ne èwɔ ablɔdziɖaseɖiɖidɔa? Nɔviŋutsu aɖe si ŋkɔe nye Joshua gblɔ be: “Mɔnukpɔkpɔ geɖe sua asinye meɖia ɖase na amewo ne mezɔ to fiasewo nu kple asiwo me.” Joshua kple srɔ̃a Bridget gblɔ hã be yewokena ɖe ame geɖe ŋu le aƒe me le ɣetrɔ me kple Kwasiɖagbe ŋdɔ me.—Ef. 5:​15, 16.

12. Aleke nàwɔ anya nu si dzi amewo xɔ se kple nu si le vevie na wo?

¹² Ne èɖi ɖase na ame aɖe gake metsi dzi ɖe nyaa ŋu oa, dze agbagba nànya nu si dzi wòxɔ se kple nu siwo le vevie nɛ. Joshua kple Bridget zãa nyabiase siwo le  míaƒe traktwo dzi tsɔna dzea dzeɖoɖo gɔme kple amewo. Le kpɔɖeŋu me, ne wole trakt si nye Agbalẽ Ka Ƒomevie Biblia Nye? zãm la, wogblɔna be: “Ame aɖewo bunɛ be Biblia nye agbalẽ si tso Mawu gbɔ, gake ame bubuwo mebunɛ nenema o. Nu kae wò ya nèsusu?” Zi geɖea, esia ʋua dzeɖoɖo ƒe mɔ na wo.

13. Ne amewo meɖo to mí o hã, nu ka tae míate ŋu agblɔ be míeɖo míaƒe taɖodzinua gbɔ? (Lododowo 27:11)

¹³ Ne míeɖe gbeƒã na amewo gake womeɖo to o hã, míeɖo míaƒe taɖodzinua gbɔ. Nu ka tae? Elabe míewɔ nu si Yehowa kple Via bia tso mía si, si nye be míaɖi ɖase na amewo. (Dɔw. 10:42) Ne edzɔ be míeke ɖe ame aɖeke ŋu le aƒewo me o alo wogbe be yewomaɖo to mí o hã, dzi ate ŋu adzɔ mí, elabena míewɔ nu si dze mía Fofo si le dziƒo ŋu.—Xlẽ Lododowo 27:11.

14. Nu ka tae wòle be wòanye dzidzɔ na mí ne gbeƒãɖela aɖe ke ɖe ɖetsɔlemetɔ aɖe ŋu?

¹⁴ Dzi ate ŋu adzɔ mí ne gbeƒãɖela aɖe ke ɖe ame aɖe si tsɔ ɖe le nya nyuia me ŋu. Gbetakpɔxɔ aɖe tsɔ míaƒe dɔa sɔ kple ale si amewo anɔ ɖevi aɖe si bú dim ene. Ame geɖewoe le edim le teƒe vovovowo. Mlɔeba ne ame aɖe va ke ɖe ɖevia ŋua, menye ame ma koe kpɔa dzidzɔ o, ke boŋ ame siwo katã nɔ edim hã kpɔa dzidzɔ. Nenema kee hamea me tɔwo katã le asi kpem ɖe nusrɔ̃lawɔwɔdɔa ŋu. Mí katãe awɔ dɔ aduadu be míakpe anyigbamamaa ɖo. Eya ta ne ɖetsɔlemetɔ yeye aɖe te kpekpeawo dedea, ele be wòanye dzidzɔ na mí katã.

WÒ SUSU NENƆ ALE SI NÈLƆ̃ YEHOWA KPLE HAWÒVIWOE ŊU

15. Aleke nya siwo le Mateo 22:​37-39 akpe ɖe mía ŋu dzo nanɔ mía me ɖe gbeƒãɖeɖedɔa ŋu? (Kpɔ foto si le akpaa dzi hã.)

¹⁵ Dzo ate ŋu aɖo mía me ɖe gbeƒãɖeɖedɔa ŋu ne míena míaƒe susu le ale si míelɔ̃ Yehowa kple mía haviwoe ŋu. (Xlẽ Mateo 22:​37-39.) Bu ale si dzi dzɔa Yehowa ne ekpɔ wò nèle dɔ sia wɔm ŋu kpɔ, eye bu ale si dzi dzɔa amewo ne wova te Biblia sɔsrɔ̃ ŋu kpɔ! Ðo ŋku edzi be mɔnukpɔkpɔ asu ame siwo ɖoa to míaƒe gbedeasia eye wotiae be yewoasubɔ Yehowa la si be woanɔ agbe tegbee.—Yoh. 6:40; 1 Tim. 4:16.

16. Nu kae míawɔ be míakpɔ dzidzɔ le gbeƒãɖeɖedɔa me ne míetsi teƒe ɖeka gɔ̃ hã? Gblɔ eƒe kpɔɖeŋu.

 ¹⁶ Ðe nɔnɔme aɖewo wɔe be nètsi teƒe ɖeka? Ne nenemae la, wɔ nu siwo nàte ŋui atsɔ aɖee afia be nèlɔ̃ Yehowa kple hawòviwo. Le corona dɔvɔ̃ ƒe ɣeyiɣia mea, eva hiã be Samuel kple Dania natsi aƒe me. Le ɣeyiɣi sesẽ mawo mea, woɖia ɖase to telefon kple lɛtaŋɔŋlɔ dzi, eye wosrɔ̃a Biblia kple amewo to Zoom dzi. Kansadɔ le Samuel ŋu, eya ta eyia kɔdzi zi geɖe, eye ɣesiaɣi si wòyia, eɖia ɖase na amewo. Egblɔ be: “Nɔnɔme sesẽwo ate ŋu ado míaƒe xɔse kpɔ, woate ŋu ana míatsi dzimaɖi eye ɖeɖi nate mía ŋu. Ne edzɔ alea, ele vevie be míawɔ nu siwo ana míakpɔ dzidzɔ le Yehowa subɔsubɔ me.” Le nɔnɔme sesẽ mawo katã mea, Dania hã va dze anyi eye wòtsi aba dzi ɣleti etɔ̃ sɔŋ. Emegbe eva hiã be wòanɔ bunɔkeke me ɣleti ade. Egblɔ be: “Medzea agbagba be mawɔ nu siwo mate ŋui le nɔnɔmea me. Mete ŋu ɖi ɖase na dɔnɔdzikpɔla si kpɔa gbɔnye kple ame siwo míedɔna woɖia asi na mí. Eye mete ŋu ɖi ɖase na nyɔnu aɖe si wɔa dɔ le atikedzraƒe aɖe le telefon dzi.” Togbɔ be Samuel kple Dania ƒe nɔnɔmewo meɖe mɔ na wo be woawɔ geɖe o hã, wowɔ nu si woate ŋui, si na wokpɔ dzidzɔ geɖe.

17. Nu kae nàwɔ be aɖaŋuɖoɖo siwo le nyati sia me naɖe vi na wò?

¹⁷ Aɖe vi na mí ne míewɔ ɖe aɖaŋu vovovo siwo woɖo le nyati sia me dzi. Míate ŋu atsɔ aɖaŋuɖoɖoawo dometɔ ɖe sia ɖe asɔ kple nu siwo míetsɔna ƒoa detsii. Be detsia navivi la, ele be nàzã detsiƒonu vovovoawo dometɔ ɖe sia ɖe nyuie. Nenema kee ne míewɔ ɖe aɖaŋu siwo katã woɖo na mí dzia, anɔ bɔbɔe be míado dzi le nɔnɔme ɖe sia ɖe me, eye míakpɔ dzidzɔ le gbeƒãɖeɖedɔa me.