1. Nu nyui kawoe sɔhɛ geɖe te ŋu wɔ?

 ƑE SIA ƒea, ɖevi kple sɔhɛ akpe geɖe xɔa nyɔnyrɔ. Ðe wò hã nèxɔ nyɔnyrɔa? Ne nenemaea, ke nyae be èdo dzidzɔ na Yehowa ƒe dzi, eye nɔvi siwo le hamea me hã kpɔa dzidzɔ ɖe ŋuwò. (Lod. 27:11) Bu nu nyui siwo nète ŋu wɔ va yi ŋu kpɔ. Èsrɔ̃ Biblia veviedodotɔe, ɖewohĩ hena ƒe geɖe. Nu siwo nèsrɔ̃ na nèva ka ɖe edzi be Biblia nye Mawu ƒe Nya. Azɔ hã, èva nya nu geɖe tso Mawu ŋu eye nèlɔ̃e ale gbegbe be nètsɔ ɖokuiwò ɖe adzɔgbe nɛ hexɔ nyɔnyrɔ. Èwɔe nyuie ŋutɔ!

2. Nu ka mee míadzro le nyati sia me?

² Ðikeke mele eme o be hafi nàxɔ nyɔnyrɔa, èdo go kuxi aɖewo siwo do wò xɔse kpɔ. Gake esi nèle tsitsimaa, àgado go kuxi bubuwo. Satana adze agbagba be yeana be wò lɔlɔ̃ na Yehowa natsi eye màgasubɔe azɔ o. (Ef. 4:14) Gake mele be nàɖe mɔ esia nadzɔ ɖe dziwò o. Nu kae akpe ɖe ŋuwò be nàyi edzi asubɔ Yehowa eye nàwɔ adzɔgbe si nèɖe nɛ la dzi? Eyae nye be nàyi ŋgɔ “aɖo tsitsinyenye gbɔ.” (Heb. 6:1) Aleke nàte ŋu awɔ esia?

3. Ne míexɔ nyɔnyrɔ vɔa, nu kae wòle be míanɔ wɔwɔm?

³ Ele be ame sia ame si xɔ nyɔnyrɔ nawɔ ɖe aɖaŋu si apostolo Paulo ɖo na haxɔsetɔ siwo nɔ Efeso la dzi. Paulo de dzi ƒo na Kristotɔ mawo be woazu ‘ame siwo tsi bliboe.’  (Ef. 4:13) Esia fia be woayi ŋgɔ. Paulo tsɔ ale si míatsi le xɔse me la sɔ kple ale si ɖevi tsinae. Ne dzilawo dzi via, wokpɔa dzidzɔ ɖe eŋu eye wolɔ̃nɛ. Gake womekpɔa mɔ be wòanye ɖevi ɖaa o, ke boŋ be wòatsi eye wòaɖe asi le “ɖevimenuwo” ŋu. (1 Kor. 13:11) Aleae wòle le mawusubɔsubɔ hã gome. Le nyɔnyrɔxɔxɔ megbea, ele be míayi ŋgɔ. Mina míadzro aɖaŋuɖoɖo siwo akpe ɖe mía ŋu míawɔ esia dometɔ aɖewo me.

4. Le Filipitɔwo 1:9 ƒe nya nua, nu kae nàwɔ be nàyi ŋgɔ? Ðe eme.

⁴ Na wò lɔlɔ̃ na Yehowa nagasẽ ɖe edzi. Èlɔ̃ Yehowa vevie. Gake àte ŋu ana wò lɔlɔ̃ nɛ nagasẽ ɖe edzi. Aleke nàwɔe? Nya si apostolo Paulo gblɔ le Filipitɔwo 1:9 akpe ɖe ŋuwò. (Xlẽe.) Paulo do gbe ɖa be nɔvi siwo nɔ Filipi la ƒe “lɔlɔ̃ nanɔ dzidzim ɖe edzi geɖe wu.” Esia fia be míate ŋu ana míaƒe lɔlɔ̃ na Yehowa me nasẽ ɖe edzi. Míate ŋu awɔ esia ne “sidzedze vavãtɔ kple nugɔmesese blibo” su mía si. Zi ale si míeva le Yehowa nyam nyuiea, zi nenemae míegava lɔ̃nɛ ɖe edzi eye eƒe nɔnɔme nyoameŋuwo kple ale si wòwɔa nui va léa dzi na mí. Míedzea agbagba be míanya nu si wòdi tso mía si ale be míawɔ nu si dzea eŋu, ke menye nu si ate ɖe edzi o.

5-6. Nu kae míate ŋu awɔ be míagalɔ̃ Yehowa ɖe edzi? Ðe eme.

⁵ Yesu ɖe Fofoa ƒe nɔnɔmewo fia pɛpɛpɛ, eya ta ne míenya Yesu nyuiea, míagalɔ̃ Yehowa ɖe edzi. (Heb. 1:3) Mɔ nyuitɔ si dzi míato anya Yesu ye nye be míasrɔ̃ Nyanyuigbalẽ eneawo. Ne mèkpɔ wɔ ɖoɖo xlẽa Biblia gbe sia gbe oa, ke àte ŋu adze egɔme fifia tso Nyanyuigbalẽawo dzi. Ne èle Yesu ƒe ŋutinyaa xlẽmaa, de dzesi eƒe nɔnɔme lédzinamewo. Le kpɔɖeŋu me, enye ame si ŋu wote ŋu tena ɖo bɔbɔe; ekɔ ɖeviwo ɖe eƒe akɔnu lɔlɔ̃tɔe. (Marko 10:13-16) Edoa vivi ɖe ame ŋu, eye eƒe nusrɔ̃lawo ɖea dzi ɖi le egbɔ ƒoa nu nɛ faa. (Mat. 16:22) Edze ƒãa be Yesu srɔ̃ Fofoa si le dziƒo la ƒe nɔnɔme, elabe Yehowa nye ame si ŋu wote ŋu tena ɖo bɔbɔe. Míate ŋu ate ɖe Yehowa ŋu ado gbe ɖa nɛ agblɔ míaƒe dzimenyawo katã nɛ, elabe míeka ɖe edzi be mado ŋukpe mí o. Elɔ̃ mí eye eléa be na mí.—1 Pet. 5:7.

⁶ Yesu sea veve ɖe ame nu. Apostolo Mateo gblɔ be: “Esi wòkpɔ amehawo la, woƒe nu wɔ nublanui nɛ, elabena wowɔ fu wo, eye wotsi yame abe alẽ siwo nu kplɔla mele o la ene.” (Mat. 9:36) Yesu srɔ̃ nɔnɔme sia hã tso Fofoa gbɔ, elabe Yesu ŋutɔ gblɔ be: “Menye dzidzɔ na Fofonye si le dziƒo la be ɖevi siawo dometɔ ɖeka pɛ hã natsrɔ̃ o.” (Mat. 18:14) Nya siawo faa akɔ na mí ŋutɔ! Ne míeva le Yesu nyam nyuiea, esia ana míagalɔ̃ Yehowa ɖe edzi.

7. Aleke hadede kple mía nɔvi Kristotɔ siwo tsi le xɔse me aɖe vi na wòe?

⁷ Nu bubu si akpe ɖe ŋuwò be nàɖe lɔlɔ̃ afia geɖe wu eye nàyi ŋgɔ ye nye be nàde ha kple nɔvi Kristotɔ siwo tsi le xɔse me. Àde dzesii be wole dzidzɔ kpɔm le Yehowa subɔsubɔ me eye meve wo kpɔ be yewotso nya me be yewoasubɔe o. Bia wo woagblɔ nuteƒekpɔkpɔ nyui siwo su wo si le Yehowa subɔsubɔ me na wò. Hafi nàtso nya me le nu vevi aɖe ŋua, bia aɖaŋuɖoɖo tso wo gbɔ. Ðo ŋku edzi be “aɖaŋuɖola geɖewo dzie wotona kpɔa dzidzedze.”—Lod. 11:14.

8. Ne eva dzɔ be nèke ɖi Biblia ƒe nufiafia aɖea, nu kae nàte ŋu awɔ?

 ⁸ Ka ɖe nu siwo nèsrɔ̃ le Biblia me dzi. Abe ale si míekpɔe le memama 2 lia me enea, Satana adze agbagba be yeana màgayi ŋgɔ le Yehowa subɔsubɔ me o. Mɔ aɖe si dzi wòate ŋu ato awɔ emae nye be yeana nàke ɖi Biblia ƒe nufiafia aɖewo. Le kpɔɖeŋu me, ame aɖewo adi be nàxɔe ase be menye Mawue wɔ nuwo o. Esi nènye ɖevia, ɖewohĩ mèbu nya ma ŋu yi ŋgɔ o. Gake fifiaa, wole nu ma fiam mi le suku eye wogblɔa nya aɖewo tsɔ ɖea eme. Adze abe susu le woƒe numeɖeɖewo me ene. Gake anɔ eme be esi womeku nu me be yewoakpɔe ɖa be Wɔla aɖe li o tae wosusui nenema ɖo. Ðo ŋku edzi be Lododowo 18:17 gblɔ be: “Ame gbãtɔ si va gblɔ eƒe nya la dzena ame dzɔdzɔe, va se ɖe esime ame evelia va bia gbee.” Eya ta nunya manɔ eme be nàxɔ nu sia nu si wofia mi le sukua dzi se o, ke boŋ anyo be nàde ŋugble le nu si Biblia fia ŋu nyuie. Ku nu me le míaƒe agbalẽwo me. Ðo dze kple nɔvi siwo xɔ nufiafia ma dzi se va yi. Bia ne woagblɔ nu si na wova ka ɖe edzi be Wɔla aɖe li si lɔ̃ mí na wò. Dzeɖoɖo siawo tɔgbi akpe ɖe ŋuwò nàka ɖe edzi be Wɔla aɖe li.

9. Nu kae nèsrɔ̃ tso nu si Melissa wɔa me?

⁹ Nɔvinyɔnu aɖe si ŋkɔe nye Melissa ku nu me le míaƒe agbalẽ siwo ƒo nu tso nuwɔwɔwo ŋu la me eye esia ɖe vi nɛ ŋutɔ. * Egblɔ be: “Wofiaa mí le suku be ɖeko nuwo dzɔ le wo ɖokui si, eye ale si nufialawo ɖea emea nana wòdzena abe nyateƒee ene. Gbãa, nyemedi be maku nyaa me o, elabe menɔ vɔvɔ̃m be nyemakpɔ kpeɖodzi sẽŋu aɖeke si ɖee fia be Mawue wɔ nuwo o. Gake meɖo ŋku edzi be Yehowa di be míakpɔ kpeɖodzi na nu siwo dzi míexɔ se. Eya ta meku nu me le nyaa ŋu. * Esia tututue mehiã. Ðeko wòvem be nyemewɔe kaba o.”

10-11. Nu kawoe akpe ɖe ŋuwò be nàɖu nuwɔna gbegblẽwo dzi? (1 Tesalonikatɔwo 4:3, 4)

 ¹⁰ Tsri nuwɔna gbegblẽwo. Le sɔhɛmenɔɣia, gbɔdɔdɔ ƒe dzodzro te ŋu sẽna ɖe ame me ŋutɔ. Azɔ hã amewo ate ŋu aƒoe ɖe nuwò be nànɔ agbe gbegblẽ, eye nenemae Satana hã di. Gake nu kae ate ŋu akpe ɖe ŋuwò be màgawɔ nu ma o? (Xlẽ 1 Tesalonikatɔwo 4:3, 4.) Do gbe ɖa na Yehowa nàgblɔ ale si tututu nèle sesem le ɖokuiwò me nɛ eye nàbiae be wòado ŋusẽ wò. (Mat. 6:13) Ðo ŋku edzi be Yehowa di be yeakpe ɖe ŋuwò, ke menye be yeabu fɔ wò o. (Ps. 103:13, 14) Azɔ hã Mawu ƒe Nyaa ate ŋu akpe ɖe ŋuwò. Melissa si ŋu míeƒo nu tsoe va yia wɔ avu kple gbɔdɔdɔ ƒe dzodzro vɔ̃wo. Gake egblɔ be: “Biblia xexlẽ gbe sia gbe kpe ɖe ŋunye meɖu dzodzro vɔ̃ mawo dzi. Enana meɖoa ŋku edzi be Yehowa tɔe menye eye mele be mawɔ naneke si ate ɖe edzi o.”—Ps. 119:9.

¹¹ Ne nane le fu ɖem na wòa, mègadze agbagba be yeakpɔ egbɔ le ye ɖokui si o. Gblɔe na dziwòlawo. Ðewohĩ egbɔgblɔ manɔ bɔbɔe na wò ya o, gake ehiã. Melissa gblɔ be: “Medo gbe ɖa na Yehowa be wòakpe ɖe ŋunye mate ŋu agblɔ nye kuxia na tɔnye. Esi megblɔe na tɔnye vɔa, nye dzi dze eme. Menya be esia na Yehowa kpɔ dzidzɔ ɖe ŋunye.”

12. Nu kae akpe ɖe ŋuwò be nàwɔ nyametsotso nyuiwo?

¹² Na Biblia me gɔmeɖosewo nafia mɔ wò. Ne èle tsitsimaa, dziwòlawo anɔ mɔ ɖem na wò vivivi be wò ŋutɔ nàtso nya me le nanewo ŋu. Gake ema mefia be èsu te atso nya me nyuie le nu sia nu ŋu o. Ke nu kae akpe ɖe ŋuwò be màwɔ nyametsotso si agblẽ wò kple Yehowa dome o? (Lod. 22:3) Nɔvinyɔnu aɖe si ŋkɔe nye Kari ƒo nu tso nu si kpena ɖe eŋu wòte ŋu tsoa nya me nyuie ŋu. Ede dzesii be Kristotɔ siwo tsi le xɔse me nyae be mehiã be woade se na yewo tso nu sia nu ŋu o. Egblɔ be: “Medzea agbagba be mase Biblia me gɔmeɖosewo gɔme, ke menye seawo ko o.” Ne èle Biblia xlẽmaa, bia ɖokuiwò be: ‘Nu kae nu si mexlẽa fiam tso ale si Yehowa bua nuwo ŋui ŋu? Ðe gɔmeɖose aɖewo le eme siwo akpe ɖe ŋunye mawɔ nu si sɔa? Aleke wòaɖe vi nam ne mewɔ wo ŋu dɔ?’ (Ps. 19:7; Yes. 48:17, 18) Ne èxlẽa Biblia eye nèdea ŋugble le eƒe gɔmeɖosewo ŋua, esia ana wòanɔ bɔbɔe na wò be nàtso nya me wòadze Yehowa ŋu. Àva nɔ nuwo ŋu bum abe ale si Yehowa bua woe ene eye àva kpɔe be mehiã be woade se na ye le nu sia nu ŋu o.

13. Aleke xɔlɔ̃ nyuiwo ate ŋu akpe ɖe ŋuwò? (Lododowo 13:20)

¹³ Dze xɔlɔ̃ ame siwo lɔ̃ Yehowa. Abe ale si míegblɔe va yi enea, ne míedea ha kple ame siwo tsi le xɔse mea, aɖe vi geɖe na mí. (Xlẽ Lododowo 13:20.) Nɔvinyɔnu aɖe si ŋkɔe nye Sara de dzesii be yemegava nɔ dzidzɔ kpɔm abe tsã ene o. Nu kae kpe ɖe eŋu? Egblɔ be: “Le ɣeyiɣi si tututu mehiã xɔlɔ̃wo mea, nɔvi aɖewo kpe ɖe ŋunye eye wova zu xɔlɔ̃ vavãwo nam. Nɔvinyɔnu sɔhɛ aɖe wɔ ɖoɖo kplim nye kplii míedzroa Gbetakpɔxɔ me kwasiɖa sia kwasiɖa. Xɔ̃nye bubu aɖe kpe ɖe ŋunye megate nyaŋuɖoɖo le kpekpeawo me. Xɔ̃nyewo kpe ɖe ŋunye megado vevie ɖokuisinusɔsrɔ̃ eye megadoa gbe ɖa geɖe wu. Esia na nye kple Yehowa dome va le kplikplikpli eye megava le dzidzɔ kpɔm ake.”

14. Aleke Julien wɔ dze xɔlɔ̃ nyuiwo?

 ¹⁴ Aleke nàte ŋu adze xɔlɔ̃ ame siwo akpɔ ŋuse nyui ɖe dziwò? Julien, si nye hamemetsitsi fifia, gblɔ be: “Esi menye sɔhɛa, medze xɔ̃ nɔvi siwo medea gbeadzi kplii. Dzo le wo me ɖe subɔsubɔdɔa ŋu eye wona mekpɔe be dzidzɔ geɖe le gbeƒãɖeɖedɔa me. Esia na meɖoe nye taɖodzinu be mawɔ ɣeyiɣiawo katã ƒe subɔsubɔdɔa. Gake meva de dzesii be xɔlɔ̃ ʋɛ aɖewo koe nɔ asinye elabe hanyetiwo koe medea ha kpli. Eya ta, meɖoe be madze xɔlɔ̃ ametsitsiwo hã. Medze xɔlɔ̃ nɔvi aɖewo le Betel. Woƒe kpɔɖeŋuwo kpe ɖe ŋunye metia modzakaɖeɖe siwo sɔ, eye esia na megate ɖe Yehowa ŋu wu.”

15. Nu ka ŋue Paulo xlɔ̃ nu Timoteo le? (2 Timoteo 2:20-22)

¹⁵ Ne ède dzesii be hadede kple ame aɖe le hamea me agblẽ wò kple Yehowa domea, nu kae wòle be nàwɔ? Paulo de dzesii be hamea me tɔ aɖewo megava nɔ asixɔxɔ dem Yehowa subɔsubɔ ŋu o, eya ta exlɔ̃ nu Timoteo be wòaƒo asa na wo. (Xlẽ 2 Timoteo 2:20-22.) Ƒomedodo si le mía kple Yehowa dome la xɔ asi ŋutɔ. Mele be míaɖe mɔ ame aɖeke nagblẽ eme o, elabe ɖe míeku kutri geɖe hafi mía kplii dome va le alea.—Ps. 26:4.

16. Taɖodzinu kawoe nàte ŋu aɖo na ɖokuiwò?

¹⁶ Ðo taɖodzinu nyuiwo. Ðo taɖodzinu siwo ado ŋusẽ wò eye woana nàtsi le xɔse me. (Ef. 3:16) Le kpɔɖeŋu me, àte ŋu aɖoe wò taɖodzinu be yeanɔ Biblia xlẽm eye yeanɔ nu srɔ̃m edziedzi. (Ps. 1:2, 3) Alo ɖewohĩ àdi be yeana yeƒe gbedodoɖa naganyo ɖe edzi eye yeaganɔ edom ɖa geɖe wu. Alo àte ŋu aɖoe be yeagaɖɔ ŋu ɖo geɖe wu le nu siwo yetsɔ ɖea modzakae kple ale si yezãa yeƒe ɣeyiɣi me. (Ef. 5:15, 16) Ne Yehowa kpɔe be èle agbagba dzem be yeayi ŋgɔa, akpɔ dzidzɔ ŋutɔ.

17. Ne èkpena ɖe amewo ŋua, aleke esia aɖe vi na wò?

¹⁷ Ne èkpena ɖe amewo ŋua, àyi ŋgɔ le Yehowa subɔsubɔ me. Yesu gblɔ be: “Dzidzɔ geɖe le nunana me wu nuxɔxɔ.”  (Dɔw. 20:35) Ne èzãa wò ɣeyiɣi kple wò ŋusẽ tsɔ kpena ɖe amewo ŋua, àkpɔ dzidzɔ geɖe. Le kpɔɖeŋu me, àte ŋu akpe ɖe ame tsitsiwo kple dɔnɔ siwo le miaƒe hamea me la ŋu. Àte ŋu atsɔ dɔ na wo alo akpe ɖe wo ŋu woazã woƒe elektrɔnikmɔ̃wo. Ne nɔviŋutsue nènyea, ɖoe wò taɖodzinu be yeayi ŋgɔ ava zu subɔsubɔdɔwɔla ale be nàte ŋu asubɔ nɔviawo. (Flp. 2:4) Azɔ hã àte ŋu aɖe lɔlɔ̃ afia ame siwo mele hamea me o la hã ne ègblɔa Fiaɖuƒe ŋuti nya nyuia na wo. (Mat. 9:36, 37) Ne anya wɔa, ɖoe wò taɖodzinu be yeawɔ ɣeyiɣiawo katã ƒe subɔsubɔdɔa.

18. Aleke ɣeyiɣiawo katã ƒe subɔsubɔdɔa akpe ɖe ŋuwò nàyi ŋgɔ?

¹⁸ Ɣeyiɣiawo katã ƒe subɔsubɔdɔa aʋu mɔnukpɔkpɔ na wò be nàwɔ geɖe le Yehowa subɔsubɔ me. Ne èwɔ mɔɖeɖedɔa la, mɔnukpɔkpɔ ate ŋu asu asiwò nàde Fiaɖuƒe Nyanyuigblɔlawo Ƒe Sukua. Àte ŋu asubɔ le Betel alo akpe asi ɖe teokrasixɔtudɔwo ŋu. Nɔvinyɔnu mɔɖela aɖe si ŋkɔe nye Kaitlyn gblɔ be: “Le nye nyɔnyrɔxɔxɔ megbea, mede gbeadzi kple nɔvi siwo bi ɖe gbeƒãɖeɖedɔa me eye esia kpe ɖe ŋunye nye kple Yehowa dome va le kplikplikpli. Woƒe kpɔɖeŋu ʋãm mesrɔ̃ Biblia nyuie eye meva se egɔme geɖe wu; ale si mefiaa nui hã ganyo ɖe edzi.”

19. Yayra kawoe nàkpɔ ne èdze agbagba yi ŋgɔ le Yehowa subɔsubɔ me?

¹⁹ Esi nèle agbagba dzem be yeayi ŋgɔ le Yehowa subɔsubɔ mea, ayra wò geɖe. Màzã wò ŋusẽ ɖe nu siwo maɖe vi aɖeke o ŋu o. (1 Yoh. 2:17) Azɔ hã màwɔ nyametsotso gbegblẽ siwo ana nàse veve emegbe o, ke boŋ àkpɔ dzidzɔ eye nu adze edzi na wò le agbe me. (Lod. 16:3) Wò kpɔɖeŋu nyuia ade dzi ƒo na nɔvi bubuwo. (1 Tim. 4:12) Vevietɔ wua, wò kple Yehowa dome anɔ kplikplikpli eye esia awɔe be wò dzi nadze eme.—Lod. 23:15, 16.